Қазақстан Республикасының әуежайларында халықаралық рейстердiң жолаушыларына қызмет көрсетудi жақсарту жөнiндегі шаралары туралы
Қазақстан Республикасы Үкіметінің 2000 жылғы 27 шілдедегі № 1132 қаулысы
(2005.27.07. берілген өзгерістер мен толықтырулармен)
Осы редакция 2013 жылғы 25 желтоқсанда енгізілген өзгерістеріне дейін қолданылды
Әуежайлар қызметтерiнiң тиiмдi және сапалы жұмысына қол жеткізу, халықаралық рейстердiң жолаушыларына қызмет көрсету мәдениетiн жақсарту, авиажолаушыларға қызмет көрсетуге қатысатын мемлекеттік органдардың келісілген iс-қимылын қамтамасыз ету, сондай-ақ ел экономикасына шетелдiк инвестицияларды тартуға ықпал ететiн Қазақстан Республикасының имиджiн көтеру мақсатында Қазақстан Республикасының Yкіметі қаулы етеді:
1. Қазақстан Республикасының Көлiк және коммуникациялар министрлігі Қазақстан Республикасының әуежайларында халықаралық рейстердiң жолаушыларына қызмет көрсетуге қатысатын мемлекеттік органдардың қызметiн үйлестірушi болып белгiленсiн.
2. Халықаралық авиарейстердiң жолаушыларына қызмет көрсетудi және оларды теңдеме жүктерi мен жүктердi ресiмдеудi:
Қазақстан Республикасы Мемлекеттік кiрiс министрлігінiң кеден органдарымен бiрлесiп халықаралық рейстерге қызмет көрсететiн әуежайлардың қызметтерi;
Қазақстан Республикасы Ұлттық қауiпсiздiк комитетiнiң Шекаралық қызметi қамтамасыз етедi деп белгiленсiн.
Әуежайдың әкiмшiлiгi халықаралық авиарейстерде авиациялық қауiпсiздiктi қамтамасыз ету үшiн жауаптылықта болады.
3. Қосымшаға сәйкес Қазақстан Республикасы Yкіметінiң кейбір шешiмдерiне өзгерістер мен толықтырулар енгiзiлсiн.
4. Осы қаулының орындалуын бақылау Қазақстан Республикасы Премьер-Министрінің орынбасары Д.К. Ахметовке жүктелсiн.
5. Осы қаулы қол қойылған күнінен бастап күшiне енедi.
Қазақстан Республикасының
| Премьер-Министрі | Қ.Тоқаев |
Қазақстан Республикасы Үкіметінiң
2000 жылғы 27 шілдедегі
№ 1132 қаулысына
қосымша
Қазақстан Республикасы Үкіметінiң кейбір шешімдеріне
өзгерістер мен толықтырулар
1 ҚР Үкіметінің 2005.27.07. № 781 қаулысымен күші жойылды (бұр.ред.қара)
7-тармақтың үшiншi абзацы мынадай редакцияда жазылсын:
«Дипломатиялық (консулдық) өкiлдiлiктерге белгiленген үлгiдегi тұрақты рұқсаттамаларды ресiмдеудi және берудi Қазақстан Республикасы Сыртқы iстер министрлігінiң ресми жазбаша өтiнiмiне орай шекара және кеден органдарымен келісiм бойынша әуежайдың әкiмшiлiгi жүргiзедi».
2. «Жүзу құралдарының, мұз үстімен жүретін құралдардың орналасқан жерiнен сапарға шығуына (шығарылуына) құжаттар ресiмдеудiң тәртібі және тоқтамаларды, айлақтар мен жүзу құралдарының мұз үстiмен жүретiн құралдардың орналасқан пункттерiн жабдықтау тәртібі туралы нұсқама мен Қазақстан Республикасының мемлекеттік шекарасы арқылы өткізу пункттеріндегі шекаралық режимнің ережелерiн бекіту туралы» Қазақстан Республикасы Министрлер Кабинетінің 1994 жылғы 4 қаңтардағы № 20 қаулысына (Қазақстан Республикасының ПYКЖ-ы, 1994 ж., № 1, 8-құжат):
көрсетiлген қаулымен бекітілген, Қазақстан Республикасының мемлекеттік шекарасы арқылы өткізу пункттеріндегі шекаралық режимнiң ережелерiнде:
мәтiн бойынша «Шекара әскерлерi» деген сөздер «Қазақстан Республикасы Ұлттық қауiпсiздiк комитетiнiң Шекаралық қызметi» деген сөздермен ауыстырылсын;
1-тармақта:
бiрiншi абзацтағы «шекара әскерлерiмен» деген сөздерден кейiн «кеден органдарымен» деген сөздермен толықтырылсын;
екiншi сөйлем мынадай редакцияда жазылсын:
«Қазақстан Республикасы Ұлттық қауіпсiздiк комитетiнiң Шекаралық қызметi, кедендiк қызмет және көлiктiк ұйымдардың әкiмшiлiгi шекаралық және кедендiк бақылауды жүзеге асыру үшiн үй-жайлар мен өзге де орындарды белгiлейдi. Бұл ретте, Қазақстан Республикасы Ұлттық қауiпсiздiк комитетiнiң Шекаралық қызметi көлiктік ұйымдардың әкiмшiлiгiмен, кеден органдарымен келісім бойынша осы жерлерде қосымша режимдiк iс-шаралар белгілейдi, олар:";
төртiншi абзацтағы «көлiк кәсiпорындарының қызметкерлерiне» деген сөздерден кейiн «Қазақстан Республикасының Ұлттық қауiпсiздiк комитетi Шекаралық қызметiнiң әскери қызметшілерiне және кеден органдарының қызметкерлерiне» деген сөздермен толықтырылсын.
3. «Қол жүгiн, теңдеме жүктi, жүктi, почтаны, борт тағамын, әуе кемесiнiң экипажын бақылау, тексеру мен жолаушылардың жеке басын тексерудiң ережелерiн бекіту туралы» Қазақстан Республикасы Yкіметінiң 1996 жылғы 10 маусымдағы № 723 қаулысына:
көрсетiлген қаулымен бекітілген, Қол жүгiн, теңдеме жүктi, жүктi, почтаны, борт тағамын, әуе кемесiнiң экипажын бақылау, тексеру мен жолаушылардың жеке басын тексерудiң ережелерiнде:
1-тармақ мынадай мазмұндағы абзацпен толықтырылсын:
«Халықаралық авиажелiлерде қол жүгiн, теңдеме жүктi бақылауды, тексерудi, жолаушылар мен әуе кемелерi экипаждарының мүшелерiн, сондай-ақ жүктердi, почтаны, борт тағамын жеке тексерудi Қазақстан Республикасы әуежайларының, кеден және шекара органдарының қызметкерлерi жүргiзедi»;
2-тармақтағы «Ұлттық қауiпсiздiк комитетiмен» деген сөздерден кейiн «Қазақстан Республикасы Мемлекеттік кірiс министрлігінiң Кеден комитетiмен» деген сөздермен толықтырылсын;
4-тармақтың бiрiншi абзацы мынадай редакцияда жазылсын:
«Қол жүгiн, теңдеме жүктi, бақылау мен тексеру және жолаушыларды жеке тексеру ұшуға арналған билеттi ұсыну бойынша жүргiзiледi».
4. «1998-2000 жылдарға арналған Қазақстан Рсспубликасының шекарасын аса қауiптi жұқпалы аурулардан санитарлық қорғау» мақсатты кешендiк бағдарламасын бекіту туралы» Қазақстан Республикасы Yкіметінiң 1998 жылғы 11 ақпандағы № 93 қаулысына (Қазақстан Республикасының ПYКЖ-ы, 1996 ж., № 4, 26-құжат):
4-тармақ «санитарлық-эпидемиологиялық, малдәрiгерлiк және фитосанитарлық бақылауды жүзеге асырушы мамандарды» деген сөздерден кейiн «тазартылған аймақтан тысқары жерлерде» деген сөздермен толықтырылсын.
ҚР Үкіметінің 28.04.03 ж. № 407 қаулысымен 5-тармақ алынып тасталды
5. «Малдәрiгерлiгі жөніндегі нормативтiк құқықтық актiлердi бекіту туралы» Қазақстан Республикасы Yкіметінiң 1996 жылғы 2 қазандағы № 1205 қаулысына (Қазақстан Республикасының ПҮКЖ-ы, 1996 ж., № 40, 379-құжат):
көрсетiлген қаулымен бекітілген, Шеттен әкелiнетiн және шетке шығарылатын малдарды, мал өнiмдерi мен шикiзаттарын мемлекеттік шекара арқылы өткiзген кезде мемлекеттік малдәрiгерлiк қадағалауды жүзеге асыру тәртібі туралы ережеде:
5-тармақтың үшiншi абзацы «тазартылған аймаққа кiру қажет болған жағдайда шақыру арқылы жүзеге асырылады» деген сөздермен толықтырылсын.
