Әскери мүлік айналымының кейбір мәселелері
Қазақстан Республикасы Үкіметінің 2008 жылғы 16 шілдедегі № 687 Қаулысы
Осы редакция 2009 жылғы 13 наурыздағы енгізілген өзгерістеріне дейін қолданылды
«Қазақстан Республикасының қорғанысы және Қарулы Күштері туралы» Қазақстан Республикасының 2005 жылғы 7 қаңтардағы Заңына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Пайдаланылмайтын әскери мүлікті тапсыру, сату және кәдеге жарату, сондай-ақ қорғаныс объектілерін мүліктік жалға беру (жалгерлікке беру) ережесі бекітілсін.
2. Қазақстан Республикасы Қорғаныс министрлігі бір ай мерзімде осы қаулыны іске асыру үшін тиісті ведомстволық актілерді әзірлесін.
3. «Қару-жарақ, әскери техника айналымы, қорғаныс объектілері мен басқа да әскери мүліктің жекелеген мәселелері» туралы Қазақстан Республикасы Үкіметінің 2001 жылғы 7 тамыздағы № 1039 қаулысына мынадай өзгерістер мен толықтырулар енгізілсін:
тақырыбындағы «Қару-жарақ, әскери техника айналымы, қорғаныс объектілері мен басқа да» деген сөздер алынып тасталсын;
кіріспедегі «Қазақстан Республикасының қорғанысы және Қарулы Күштері туралы» Қазақстан Республикасының 1993 жылғы 9 сәуірдегі Заңына сәйкес» деген сөздер алынып тасталсын;
1-тармақтағы «пайдаланылмайтын қаруға, әскери техника мен өзге де әскери мүлікке» деген сөздер «қару-жарақтан басқа, пайдаланылмайтын әскери мүлікке» деген сөздермен ауыстырылсын;
5-тармақтың 1) тармақшасында:
«өзге де» деген сөздерден кейін «пайдаланылмайтын» деген сөзбен толықтырылсын;
«Қазақстан Республикасының Қарулы Күштерінде пайдаланылмайтын» деген сөздер алынып тасталсын.
4. Мыналардың күші жойылды деп танылсын:
1) «Қазақстан Республикасы Қарулы Күштерінің, басқа да әскерлері мен әскери құралымдарының қару-жарағын, әскери техникасын, қорғаныс объектілері мен басқа да әскери мүлкін беру, мүліктік жалдауға беру (жалға беру), сату және пайдаға асыру ережесін бекіту туралы» Қазақстан Республикасы Үкіметінің 2003 жылғы 30 қыркүйектегі № 1006 қаулысы;
2) «Қазақстан Республикасы Үкіметінің 2005 жылғы 30 қаңтардағы № 1006 қаулысына өзгерістер мен толықтырулар енгізу туралы» Қазақстан Республикасы Үкіметінің 2005 жылғы 28 қаңтардағы № 70 қаулысы.
5. Осы қаулы қол қойылған күнінен бастап қолданысқа енгізіледі және жариялауға жатады.
| Қазақстан Республикасының Премьер-Министрі | К. Мәсімов |
Қазақстан Республикасы Үкіметінің
2008 жылғы 16 шілдедегі
№ 687 қаулысымен
бекітілген
Пайдаланылмайтын әскери мүлікті тапсыру, сату және кәдеге жарату, сондай-ақ қорғаныс
объектілерін мүліктік жалға беру (жалгерлікке беру) ережесі
1. Жалпы ережелер
1. Осы Пайдаланылмайтын әскери мүлікті тапсыру, сату және кәдеге жарату, сондай-ақ қорғаныс объектілерін мүліктік жалға беру (жалгерлікке беру) ережесі пайдаланылмайтын әскери мүлікті беру, сату және кәдеге жарату, сондай-ақ қорғаныс объектілерін мүліктік жалға беру (жалгерлікке беру) тәртібін реттейді.
2. Әскери мүлік уәкілетті орган белгілеген тәртіпке сәйкес Қарулы Күштерде, басқа да әскерлер мен әскери құралымдарда тікелей мақсаты бойынша пайдалануға жарамсыз немесе қорларда сақтаудың кепілді мерзімдерін өткерген болып танылады.
3. Үкіметтің шешіміне сәйкес Қарулы Күштерді, басқа да әскерлер мен әскери құралымдарды жабдықтау нормаларынан шығарылған қару-жарақ қару-жарақтан алынған әскери мүлік болып табылады.
4. Қазақстан Республикасының Үкіметі бекіткен Әскери мүлікті есепке алу және есептен шығару ережесіне сәйкес есептен шығарылған мүлік есептен шығарылған әскери мүлік болып табылады.
5. Пайдаланылмайтын әскери мүлікті беру, сату және кәдеге жарату, сондай-ақ қорғаныс объектілерін мүліктік жалға беру (жалгерлікке беру) үшін Қарулы Күштер, басқа да әскерлер мен әскери құралымдар ағымдағы жылғы 1 ақпаннан кешіктірмей пайдаланылмайтын әскери мүлік тізбелерін заңнамамен белгіленген негізде және шекте Қазақстан Республикасының Қарулы Күштеріндегі, басқа да әскерлері мен әскери құралымдарындағы пайдаланылмайтын әскери мүлікке иелік ету құқығын жүзеге асыратын уәкілетті органға (бұдан әрі - уәкілетті орган) жолдайды.
6. Уәкілетті орган тізбелерді алғаннан кейін бір ай мерзімде пайдаланылмайтын әскери мүліктің жалпы тізбесін жасайды және оны әскери мүлікке қажеттілікті айқындау үшін Қарулы Күштерге, басқа да әскерлермен әскери құралымдарға жолдайды.
7. Қарулы Күштер, басқа да әскерлер мен әскери құралымдар жалпы тізбені алғаннан кейін бір ай мерзімде уәкілетті органға әскери мүлікке қажеттілікке өтінім жолдайды немесе осындай қажеттіліктің жоқтығы туралы бірінші басшының не оны алмастыратын адамның қолымен жазбаша хабарлайды.
8. Уәкілетті орган Қарулы Күштерден, басқа да әскерлер мен әскери құралымдардан, сондай-ақ мемлекеттік білім беру ұйымдарынан түскен жалпы тізбелерден пайдаланылмайтын әскери мүлікке қажеттілікке өтінімдерді алғаннан кейін осы Ереженің 2-тарауына сәйкес пайдаланылмайтын әскери мүлікті беру туралы іс-шараларды жүзеге асырады.
9. Уәкілетті орган Қарулы Күштерден, басқа да әскерлер мен әскери құралымдардан әскери мүлікке қажеттіліктің жоқтығы туралы хабарлама алған жағдайда, сондай-ақ мемлекеттік білім беру ұйымдарынан өтінім жоқ болған кезде пайдаланылмайтын әскери мүлік осы Ереженің 3-тарауына сәйкес сатуға жатады.
2. Пайдаланылмайтын әскери мүлікті беру тәртібі
10. Пайдаланылмайтын қару-жарақты беру тек Қазақстан Республикасы Үкіметінің шешімі бойынша жүзеге асырылады.
11. Басқа пайдаланылмайтын әскери мүлік уәкілетті орган басшысының шешімі бойынша олар берген өтінімдерге сәйкес Қарулы Күштердің, басқа да әскерлер мен әскери құралымдардың жедел басқаруына беріледі.
12. Білім беру бағдарламаларын іске асыру үшін әскери мүлікке қажеттілік кезінде мемлекеттік білім беру ұйымдары уәкілетті органға ағымдағы жылдың бірінші сәуіріне әскери мүлікке қажеттілікке өтінім береді, оны уәкілетті орган бір ай мерзімде қарайды.
13. Жалпы тізбеден талап етілмеген пайдаланылмайтын әскери мүлікті Қарулы Күштер, басқа да әскерлер мен әскери құралымдар әскери-патриоттық тәрбиені арттыру және Қарулы Күштер, басқа да әскерлер мен әскери құралымдар үшін әскери кадрларды даярлау үшін мемлекеттік білім беру ұйымдарына уақытша өтеусіз пайдалануға беруі мүмкін.
14. Пайдаланылмайтын әскери мүлікті (соның ішінде қару-жарақты) беру кезінде тиісті шарт жасалады.
15. Барлық талап етілмеген әскери мүлік осы Ереженің 3-тарауына сәйкес сатуға жатады.
3. Пайдаланылмайтын әскери мүлікті сату тәртібі
16. Пайдаланылмайтын әскери мүлікті Қазақстан Республикасының Үкімет уәкілетті еткен ұйым (бұдан әрі - ұйым) жеке және заңды тұлғаларға жекешелендіру объектілері үшін заңнамада белгіленген жекешелендіру тәртібіне және шарттарына сәйкес сатады.
17. Қару-жарақ уәкілетті органның ұсынуы бойынша Қорғаныстық-өнеркәсіптік кешен мәселелері жөніндегі комиссия ұсыныстарының негізінде Қазақстан Республикасы Үкіметінің шешімі бойынша сатылады.
18. Сатылатын мүліктің бағасын анықтау үшін ұйым бағалау қызметі туралы заңнамада белгіленген тәртіппен мүлікті бағалауды жүргізеді.
19. Пайдаланылмайтын әскери мүлік, оны кәдеге жарату шартымен сатылуы мүмкін.
20. Пайдаланылмайтын әскери мүлікті сатудан түскен қаражат республикалық бюджет кірісіне жіберіледі.
21. Барлық сатылмаған әскери мүлік осы Ереженің 4-тарауына сәйкес кәдеге жаратуға жатады.
4. Пайдаланылмайтын әскери мүлікті кәдеге жарату тәртібі
22. Кәдеге жаратуға оларды пайдалану мүмкін болмайтын қару-жарақтың барлық түрі жатады.
23. Кәдеге жарату үшін тізбеде мыналар көрсетіледі:
1) мүлік типі;
2) шығарылған жылы;
3) саны;
4) жиынтықтаушы бұйымдардың болуы;
5) орналасқан жері немесе қоймаға салу орны;
6) техникалық құжаттамасының болуы.
24. Пайдаланылмайтын әскери мүлікті кәдеге жарату таңдап алынған технологияларға және экономикалық орындылығына байланысты оны сақтау орындарында немесе мамандандырылған кәсіпорындарда (цехтарда, учаскелерде, алаңдарда, аумақтарда) жүргізіледі.
25. Кәдеге жаратуға жататын мүлікті оны сақтау орындарынан тысқары Қазақстан Республикасының қолданыстағы заңнамасында көзделген талаптарға сәйкес өнеркәсіп алаңдарына немесе өндіріс цехтарына әкету кәдеге жаратуды жүргізетін ұйымдардың қаражаты есебінен жүзеге асырылады.
26. Кәдеге жаратуды мемлекеттік сатып алу туралы заңнамада белгіленген тәртіппен айқындалған заңды тұлғалар немесе уәкілетті органның, басқа да әскерлер мен әскери құралымдардың бөлімшелері жүргізеді.
27. Заңды тұлғаларды оны сақтау орындарында кәдеге жарату жөніндегі жұмыстарды жүргізуге жіберу уәкілетті органның шешімі бойынша жүзеге асырылады.
28. Кәдеге жарату үшін берілетін мүлік уәкілетті орган белгілеген тәртіппен қауіпсіз жай-күйге келтіріледі.
29. Кәдеге жарату өнімдерін сату осы Ереженің 3-тарауына сәйкес жүзеге асырылады.
5. Қорғаныс объектілерін мүліктік жалға беру (жалгерлікке беру) тәртібі
30. Мүліктік жалға беруге (жалгерлікке беруге) жататын пайдаланылмайтын объектілердің тізбесін қорғаныс объектілерін есепке алуды жүзеге асыратын Қазақстан Республикасының Қарулы Күштері, басқа да әскерлері мен әскери құралымдары бөлімшелерінің ұсынымдары негізінде уәкілетті орган жасайды және уәкілетті органның басшысы бекітеді.
31. Мүліктік жалға беруді (жалгерлікке беруді) уәкілетті орган (бұдан әрі - жалға беруші) жүзеге асырады.
32. Жалға беруші мүліктік жалға беру (жалгерлікке беру) процесін ұйымдастыру үшін делдалды тартуға құқылы.
33. Мүліктік жалға беруге (жалгерлікке беруге) жататын объектілердің тізбесі ресми басылымдарда жарияланады.
34. Өтінім жалға берушіге мынадай құжаттармен бірге беріледі:
1) қорғаныс объектісіне мұқтаждықтың техникалық-экономикалық негіздемесі;
2) нотариалды расталған құжаттар (заңды тұлғалар үшін);
3) паспорт немесе жеке басын куәландыратын өзге де құжат (жеке тұлғалар үшін).
35. Өтінім берілген күнінен бастап бір ай ішінде қаралады.
36. Өтінімді қарау нәтижелері және ұсынылған құжаттар бойынша жалға беруші мынадай шешімдердің бірін қабылдайды:
1) қорғаныс объектісін мақсатты бағыты бойынша мүліктік жалға беру (жалгерлікке беру) туралы;
2) осы объекті бойынша тендерлік іріктеу өткізу туралы;
3) себебін жазбаша түрде көрсете отырып бас тарту туралы.
37. Өтінім берушілерге қойылатын талаптарға сәйкес келетін екі және одан да көп өтінім бар болған кезде объектіні мүліктік жалға беру (жалгерлікке беру) тек тендер қорытындылары бойынша мүмкін болады.
38. Қорғаныс объектілерін мақсатты бағыты бойынша мүліктік жалға беру (жалгерлікке беру) кезінде орналасқан орнын, түрін, жай-күйін ескеретін, жалға беру ақысының есеп айырысу ставкалары мен арттыру (кеміту) коэффициенттерінің мөлшері, сондай-ақ объектілердің мақсатты арналуы өңірлік жағдайларды ескере отырып айқындалады және аумақтық мемлекеттік мүлік және жекешелендіру комитеттерімен келісім бойынша жалға беруші бекітеді.
39. Тендер өткізген кезде жалға беруші:
1) тендер өткізу күнін және орнын, оның шарттарын, сондай-ақ тендер жеңімпазын таңдау өлшемін айқындайды;
2) тендер құжаттамасын бекітеді;
3) тендер комиссиясын қалыптастырады;
4) кепілдік жарналар қабылдайды;
5) тендер комиссиясы мәжілісінің хаттамаларын бекітеді;
6) тендер жеңімпазымен мүліктік жалға беру (жалгерлікке беру) шартын жасасуды қамтамасыз етеді;
7) тендер аяқталғаннан кейін осы Ережеде көзделген жағдайларды қоспағанда, тендерге қатысушыларға кепілдік жарналарды қайтарады;
8) тендер өткізу үшін қажетті өзге де функцияларды жүзеге асырады.
40. Тендердің ұйымдастырушысы ретінде тендер комиссиясы болады.
41. Тендер комиссиясын жалға беруші құрады.
42. Тендер комиссиясының құрамына жалға берушінің, теңгерімде ұстаушының, өзге де мүдделі ұйымдардың өкілдері енгізіледі, сондай-ақ тәуелсіз мамандар мен сарапшылар тартылуы мүмкін. Комиссия төрағасы жалға берушінің өкілі болып табылады.
43. Тендер комиссиясы мүшелерінің жалпы саны тақ болуы және кемінде бес адам болуы тиіс.
44. Тендер комиссиясы мынадай функцияларды жүзеге асырады:
1) жалға беруші белгілеген мерзімде және олар ұсынған қорғаныс объектісі туралы деректер негізінде тендердің шарттарын әзірлейді, олардың негізгісі мақсатты бағыты бойынша мүліктік жалдау (жалгерлікке беру) кезінде ұқсас объектілер үшін белгіленген жалға беру ақысының ставкасынан төмен болмайтын жалға беру ақысының ең төмен ставкасы болып табылады;
2) тендерді жариялау үшін тендер құжаттамасын және басқа да қажетті құжаттарды әзірлейді;
3) тендер өткізеді;
4) қажет болған жағдайда мамандар мен сарапшыларды тартады;
5) тендер комиссиясы отырысының хаттамасын ресімдейді;
6) тендердің жеңімпазын айқындайды және тендердің қорытындылары бойынша өзге де шешім қабылдайды.
45. Тендер комиссиясының хатшысын жалға беруші тағайындайды және ол тендер комиссиясының мүшесі болып табылмайды. Тендер комиссиясы шешім қабылдаған кезде хатшының дауыс беруге құқығы жоқ.
46. Тендер комиссиясының хатшысы:
1) тендерге қатысатын адамдарға тендер құжаттамасын ұсынады;
2) тендер өтінімдері салынған конверттерде қабылдайды;
3) тендер комиссиясы отырысының күн тәртібі бойынша ұсыныстар, сондай-ақ қажетті құжаттар дайындайды;
4) тендер комиссиясы отырысының хаттамасын жүргізеді;
5) тендер өтінімдерін тіркейді.
47. Тендер құжаттамасын дайындау тәртібін, құрамын және шарттарын жалға беруші айқындайды.
48. Жалға беруші тендер өткізгенге дейін 30 күн бұрын мемлекеттік және орыс тілдерінде бұқаралық ақпарат құралдарында тендер өткізу туралы хабардың жариялануын қамтамасыз етеді.
49. Тендер өткізу туралы хабар мыналарды қамтуы тиіс:
1) тендер объектісінің қысқаша сипаттамасы;
2) мүліктік жалға берудің (жалгерлікке беру) мерзімін;
3) кепілдік жарнаның мөлшерін, мерзімі мен енгізу тәртібін;
4) тендердің шарттары мен жеңімпазды таңдау өлшемін;
5) тендер өткізу күнін, уақыты мен орнын;
6) тендерге қатысуға өтінімдерді қабылдау мекен-жайын, мерзімін;
7) тендерге қатысуды ресімдеу тәртібі туралы мәліметтерді;
8) тендерге қатысу үшін қажетті құжаттардың тізбесін;
9) тендер құжаттамасын алудың және тендер объектісімен таныстырудың мекен-жайын, мерзімі мен шарттарын.
50. Тендер құжаттамасы тендер комиссиясы айқындаған тәртіппен тендерге қатысушының жазбаша өтінімі бойынша жиынтықта ұсынылады.
51. Тендер құжаттамасы мынадай негізгі бөлімдерді қамтуы тиіс:
1) тендер объектісі туралы мәліметтерді;
2) өтінімнің және онымен бірге ұсынылатын құжаттардың мазмұны жөніндегі талаптарды;
3) тендер өткізу шарттары мен тәртібін;
4) тендер жеңімпазын таңдау өлшемін;
5) мүліктік жалға беру (жалгерлікке беру) шартының жобасын;
6) тендерге қатысуға өтінімнің үлгісін.
52. Тендерге қатысушыларды тіркеу тендер өткізу туралы хабар жарияланған күнінен бастап жүргізіледі және тендер өткізуге дейін үш күн қалғанда аяқталады.
53. Тендер өткізу туралы хабар жарияланғаннан кейін жалға беруші қорғаныс объектілері және тендер өткізу ережесі туралы ақпаратқа барлық тілек білдірушілердің еркін қол жеткізуін қамтамасыз етеді.
54. Тендерге қатысу үшін жалға беруші белгілеген мерзімде үміткер мыналарды ұсынуы қажет:
1) үміткердің тендерге қатысуға және шарттарын орындауы жөніндегі міндеттерді қабылдауға келісімінен тұратын тендерге қатысуға, шарт жасасуға өтінімді;
2) желімденген конвертте тендердің шарттары бойынша ұсынысты;
3) Қазақстан Республикасының заңды тұлғалары - жарғының, заңды тұлғаны тіркеу туралы куәліктің, статистикалық карточканың, сондай-ақ олардың өкілінің өкілеттігін куәландыратын құжаттың нотариалды расталған көшірмелерін;
4) шетелдік заңды тұлғалар - орыс тіліне аударылған, нотариалды расталған құрылтай құжаттарды;
5) жеке тұлғалар - паспортты немесе жеке басын куәландыратын өзге де құжатты;
6) кепілдік жарнаны аударғанын растайтын төлем тапсырмасының көшірмесін;
7) бюджеттің алдында берешегі жоқтығы туралы мәліметтерді;
8) хабарламада көрсетілген өзге де құжаттарды.
55. Тендерге қатысушылар кепілдік жарнаны жалға берушінің депозиттік шотына хабарламада көрсетілген мөлшерде, мерзімде және тәртіппен аударады.
56. Кепілдік жарнаның мөлшері хабарлама жарияланғаннан кейін өзгертілмейді.
57. Тендерге қатысу үшін кепілдік жарна объектінің теңгерім құнының 3 пайызы мөлшерінде белгіленеді.
58. Кепілдік жарна:
1) тендерге қатысушыға тендерге қатысудан оны өткізу мерзімі аяқталғанға дейін жазбаша бас тартқан жағдайда;
2) жеңімпазға бұрын келісілген шарттардан мүліктік жалға беру (жалгерлікке беруге) шарт жасасудан бас тартқан жағдайда қайтарылмайды.
59. Барлық қалған жағдайларда кепілдік жарналар тендер аяқталған күннен бастап 30 банктік күннен кешіктірмейтін мерзімде, ал егер ақша жалға берушінің шотына тендер өткеннен кейін түскен болса, онда олар түскен күнінен бастап 30 банктік күн ішінде қайтарылады.
60. Өтінімдерді қабылдау және тендерге қатысуға ниет білдірген адамдарды тіркеу талап етілетін құжаттардың толық жиынтығы бар болған кезде жүргізіледі.
61. Тендерге қатысушының мыналарға құқығы бар:
1) тендерге өзі немесе заңнамаға сәйкес жасалған сенімхат негізінде өз өкілдері арқылы қатысуға;
2) тендерге қойылған объектілер бойынша қосымша мәліметтерді, нақтылауларды тегін алуға;
3) алдын ала объектіні көруге;
4) тендер басталғанға дейін 3 күн бұрын ол туралы жалға берушіге жазбаша хабарлап, қатысуға берген өтінімін қайтарып алуға.
62. Егер өтінімді қабылдау аяқталған сәтінде бір өтінім ғана тіркелген болса тендер өткізілмеді деп танылады.
63. Тендер комиссиясы тендер өткізу күні отырыста қатысушылардың ұсыныстары салынған конверттерді ашады және олардың ұсыныстарын жариялайды.
64. Конверттерді ашу алдында комиссия олардың бүтіндігін тексереді, ол тендер комиссиясы отырысының хаттамасында белгіленеді.
65. Конверттерді ашқан және ұсыныстарды жариялаған кезде тендерге қатысушылардың немесе олардың өкілдерінің қатысуға құқығы бар.
66. Тендер комиссиясы ұсынылған ұсыныстардың тендер құжаттамасындағы талаптарға сәйкестігін тексереді.
67. Егер ұсынылған құжаттар талаптарға сәйкес келмесе, олар бұдан әрі қарауға жатпайды және осындай өтінімді берген тұлға тендерге қатысушы мәртебесінен айрылады, ол тендер комиссиясы отырысының хаттамасында белгіленеді.
68. Конверттер ашылғаннан және ұсыныстар жарияланғаннан кейін тендер комиссиясы талқылау және ұсыныстарды бағалау үшін отырысқа кетеді.
69. Тендер комиссиясының шешімі қатысып отырған комиссия мүшелерінің қарапайым көпшілік дауысымен қабылданады, дауыстар тең болған кезде тендер комиссиясы төрағасының дауысы шешуші болып табылады.
70. Тендер комиссиясының отырысы, егер тендер комиссиясының кемінде 2/3 мүшесі қатысса, заңды болып табылады.
71. Тендердің жеңімпазы деп тендер комиссиясының шешімі бойынша объект үшін жалға алу ақысының ең көп сомасын ұсынған және тендер құжаттамасындағы барлық талаптарға жауап беретін тендерге қатысушы танылады.
72. Тендер жеңімпазын айқындайтын немесе тендер қорытындылары бойынша өзге де шешімді айқындайтын тендер комиссиясының қорытындысы тендер комиссиясы мүшелерінің барлығы қол қоятын хаттамамен ресімделеді және оны жалға беруші бекітеді.
73. Хаттамада мынадай деректер болуы тиіс:
1) тендер комиссиясының құрамы;
2) объектінің атауы;
3) объектінің техникалық сипаттамасы;
4) тендердің шарттары;
5) тендерге қатысушылар және олардың ұсыныстары туралы мәліметтер;
6) тендерге қатысушылардың тізімі;
7) ұсынылатын жалға беру ақысының ставкасы;
8) тендер жеңімпазы;
9) тараптардың мүліктік жалға беру (жалгерлікке беру) шартына қол қою жөніндегі міндеттемелері.
74. Тендер нәтижелері туралы хаттаманың көшірмесі тендердің жеңімпазына беріледі және мүліктік жалға беру (жалгерлікке беру) шартын жасасуға оның құқығын растайтын құжат болып табылады.
75. Жалға алушымен мүліктік жалға беру (жалгерлікке беру) шарты тендер хаттамасына қол қойылған күнінен бастап 10 күнтізбелік күннен аспайтын мерзімде немесе жалға беруші мақсатты бағыты бойынша объектіні мүліктік жалға беру (жалгерлікке беру) туралы шешім қабылдағаннан кейін жасалады, одан кейін теңгерімді ұстаушы 30 күнтізбелік күннен аспайтын мерзімде объектіні қабылдау-беру актісі бойынша жалға алушыға береді.
76. Қабылдау-беру актісін жалға беруші бекітеді және мыналарды қамтуы тиіс:
1) актіні жасау орны мен күнін;
2) оларға сәйкес өкілдер тараптардың мүдделерін білдіруге уәкілетті құжаттардың атауы мен деректемелері;
3) оларға сәйкес объектіні беру жүргізілетін мүліктік жалға беру (жалгерлікке беру) шартының нөмірі мен қол қою күні;
4) анықталған ақауларының тізбесімен берілетін объектінің техникалық жай-күйі;
5) тараптардың мөрлерімен расталған өкілдердің қолдары.
77. Қабылдау-беру актісі мемлекеттік және орыс тілдерінде алты данада жасалады, екеуі жалға берушіде сақталады, екеуі теңгерімді ұстаушыда сақталады және екеуі жалға алушыға беріледі.
78. Тендердің жеңімпазы мүліктік жалға беру (жалгерлікке беру) шартын жасасудан бас тартқан жағдайда Жалға беруші қалған тендерге қатысушылар қатарынан жеңімпазды айқындауға (егер қалғандардың саны екеуден аз болмаса) не жаңа тендер өткізу туралы шешім қабылдауға құқылы.
79. Мүліктік жалға беру (жалгерлікке беру) шарты міндетті түрде мынадай жағдайларды қамтуы тиіс:
1) объектінің техникалық сипаттамасы;
2) жалға алушыға жалға берілген мүліктің мерзімі және шарттың қолданылу мерзімі;
3) жалға алынған мүлікті пайдалану ақысын енгізу тәртібі, мөлшері мен мерзімі;
4) жалға алушының міндеттері;
5) жалға берушінің міндеттері;
6) шартты мерзімінен бұрын бұзу негіздері мен шарттары.
80. Бір жылдан астам мерзімге жасалған мүліктік жалға беру (жалгерлікке беру) шарты мемлекеттік тіркеуге жатады.
81. Коммуналдық қызмет көрсетулерге төлемдер, ағымдағы және күрделі жөндеуге ақша аудару, объектіге қызмет көрсетуге төлемдер мүліктік жалға беру (жалгерлікке беру) ақысына кірмейді. Бұл төлемдерді жалға алушылар ведомстволық күзетке, пайдалану, коммуналдық, санитарлық және басқа да қызметтерге тікелей төлейді.
82. Егер мүліктік жалға беру (жалгерлікке беру) шартында өзгеше көзделмесе, мүлікті пайдалану үшін жалдау ақысының ставкалары жылына бір реттен көп емес өзгертілуі мүмкін.
83. Егер заңнамалық, актілерде немесе шартта өзгеше көзделмесе, жалға берушінің келісімінсіз жалға алушы жасаған бөлінбейтін жақсартулардың құны өтеуге жатпайды.
84. Қазақстан Республикасының аумағындағы қорғаныс объектілері мүдделі мемлекеттер үкіметтері арасындағы арнайы келісімдер негізінде басқа мемлекеттердің ұйымдарына мүліктік жалға берілуі (жалгерлікке берілуі) мүмкін.
85. Қорғаныс объектілерін мүліктік жалға беруден (жалгерлікке беруден) түскен қаражат республикалық бюджеттің кірісіне жіберіледі.
