Қазақстан Республикасының
Заңы
Әскери полиция органдары туралы
(2014.13.01. берілген өзгерістер мен толықтыруларымен)
Осы редакция 2014 жылғы 11 сәуірде енгізілген өзгерістеріне дейін қолданылды
Түпнұсқада мазмұны жоқ
Осы Заң Қазақстан Республикасы Қарулы Күштерi, ұлттық қауiпсіздiк және iшкi iстер органдары әскери полициясы органдарының (бұдан әрi - әскери полиция органдары) құқықтық негiздерiн, принциптерiн, мiндеттерiн және жүйесiн белгiлейдi.
1-тарау. Жалпы ережелер
1-бап. Әскери полиция органдарының мәртебесi
Әскери полиция органдары Қазақстан Республикасы Қарулы Күштерiнiң, ұлттық қауiпсіздiк органдарының, Iшкi iстер министрлігі iшкi әскерлерiнiң құрамына ұйымдық тұрғыдан кiретiн және Қазақстан Республикасының Қарулы Күштерiнде, басқа да әскерлерi мен әскери құралымдарында құқық тәртібін қамтамасыз ету жөніндегі функцияларды жүзеге асыратын арнайы әскери бөлiмшелер болып табылады.
2-бап. Әскери полиция органдары қызметiнiң құқықтық негiзi
Әскери полиция органдары қызметiнiң құқықтық негiзiн Қазақстан Республикасының Конституциясы, осы Заң, Қазақстан Республикасының өзге де нормативтiк құқықтық актілері, сондай-ақ Қазақстан Республикасы бекiткен халықаралық шарттар құрайды.
3-бап. Әскери полиция органдары қызметiнiң принциптерi
Әскери полиция органдарының қызметi заңдылық, дара басшылық, жариялылық, заң алдында жұрттың бәрiнiң теңдiгi, адам мен азаматтың құқықтарын және бостандықтарын құрметтеу мен сақтау принциптерiне құрылады.
4-бап. Әскери полиция органдарының жүйесi мен құрылымы
1. Әскери полиция органдары Қазақстан Республикасының Қарулы Күштерiнде, ұлттық қауiпсіздiк органдарында және Iшкi iстер министрлігінiң iшкi әскерлерiнде құрылады.
2. Әскери полиция органдарын құруды, қайта ұйымдастыруды және таратуды Қазақстан Республикасының заңнамасында белгiленген тәртiпте Қазақстан Республикасының Қорғаныс министрi, Iшкi iстер министрi, Ұлттық қауiпсіздiк комитетiнiң төрағасы жүзеге асырады.
3. Әскери полиция органдарының қызметiне басшылықты, олардың құрылымы мен штат санын айқындауды тиiстi лауазымды тұлғалар жүзеге асырады.
2009.10.07. № 177-IV ҚР Заңымен (бұр.ред.қара); 2012.13.02. № 553-IV ҚР Заңымен (бұр.ред.қара); 2014.13.01. № 159-V ҚР Заңымен (бұр.ред.қара) 5-бап өзгертілді
5-бап. Әскери полиция органдарының мiндеттерi
Әскери полиция органдарының мiндеттерi:
1) Қазақстан Республикасының Қарулы Күштерiнде, басқа да әскерлерi мен әскери құралымдарында құқық тәртібін қамтамасыз ету;
2) Қазақстан Республикасының заңдарында белгiленген құзыреттер шегінде қылмыстар мен құқық бұзушылықтардың профилактикасы, олардың алдын алу, анықтау, жолын кесу және ашу;
3) қылмыстар және құқық бұзушылықтар жасауға ықпал ететiн мән-жайларды анықтау;
4) Қазақстан Республикасының заңдарында белгiленген құзыреттер шегiнде анықтау iсiн жүргiзу;
5) анықтау, тергеу органдарынан және соттан жасырынып жүрген, сондай-ақ әскери бөлiмдер орналасқан жердi өз бетiмен тастап кеткен әскери қызметшiлердi iздестiру;
6) әскери көлiк құралдарының жол жүру қауiпсіздiгiн қамтамасыз ету;
7) заңнамада көзделген жағдайларда әскери қызметшiлердi гауптвахтаға жабу арқылы ұстауды орындау, сондай-ақ әкімшілік қамауға алу түріндегі әкімшілік жазаны орындау;
8) өздеріне осы Заңмен, Қазақстан Республикасының өзге де заңдарымен, Қазақстан Республикасы Президентінің және Қазақстан Республикасы Үкіметінің актілерімен жүктелген өзге де міндеттерді жүзеге асыру болып табылады.
Бұдан басқа, Ұлттық қауіпсіздік комитеті әскери полиция органдарының міндеттері:
1) Қазақстан Республикасының қылмыстық іс жүргізу заңнамасына сәйкес арнаулы мемлекеттік органдардың қызметкерлері жасаған қылмыстар бойынша анықтау ісін жүргізу;
2) әкімшілік құқық бұзушылық туралы істер бойынша (арнаулы мемлекеттік органдардың көлік құралдарын жүргізетін адамдар жасаған жол жүру қағидаларын бұзу бөлігінде) іс жүргізу болып табылады.
2014.13.01. № 159-V ҚР Заңымен 6-бап өзгертілді (бұр.ред.қара)
6-бап. Әскери полиция органдарының мемлекеттік органдармен және ұйымдармен, лауазымды тұлғалармен өзара iс-қимыл жасауы және ынтымақтастығы
1. Әскери полиция органдары өз қызметiн заңнамада белгiленген шекте Қазақстан Республикасының құқық қорғау және басқа да мемлекеттік органдарымен өзара iс-қимылда жүзеге асырады және өздерiнiң құзыретiне жататын мәселелер бойынша бір-бірiн хабардар етiп отырады.
Әскери полиция органдарының мемлекеттiк органдармен, олардың құрылымдық бөлімшелерімен және ведомстволық бағынысты ұйымдарымен өзара iс-қимылын ұйымдастыру және жүзеге асыру тәртібі тиісті мемлекеттік органдардың бірлескен нормативтік құқықтық актілерінде айқындалады.
2. Әскери құралымдар қолбасшылығы, әскери басқару органдары мен әскери қызметшiлер әскери полиция органдарына оларға жүктелген мiндеттердi шешуде жәрдемдесуге мiндеттi.
2-тарау. Әскери полиция органдарының өкiлеттiктерi
2008.26.05. № 34-IV ҚР Заңымен 7-бап өзгертілді (бұр.ред.қара)
7-бап. Әскери полиция органдарының өкiлеттiктерi
Қазақстан Республикасы Қарулы Күштерiнiң әскери полиция органдарының анықтау жүргiзу бөлiгіндегі өкiлеттiктерi Республикалық ұланның, төтенше жағдайлар саласындағы уәкілетті органның басқару органдары мен азаматтық қорғаныс бөлiмдерiнiң әскери қызметшiлерiне әскери бөлiмдердiң аумағынан тыс жерлерде қолданылады.
Аталған әскери құралымдардың
2012.13.02. № 553-IV ҚР Заңымен 7-1-баппен толықтырылды
7-1-бап. Ұлттық қауіпсіздік комитеті әскери полициясы органдарының өкілеттігі
Ұлттық қауіпсіздік комитеті әскери полициясы органдарының анықтау ісін жүргізу бөлігіндегі өкілеттігі арнаулы мемлекеттік органдардың әскери қызметшілері мен қызметкерлеріне қолданылады.
2009.10.07. № 177-IV ҚР Заңымен (бұр.ред.қара); 2014.13.01. № 159-V ҚР Заңымен (бұр.ред.қара) 8-бап өзгертілді
8-бап. Әскери полиция органдарының құқықтары
Әскери полиция органдары өздерiне жүктелген мiндеттердi орындау үшiн өз өкiлеттiктерi шегiнде және заңмен белгiленген тәртiпте:
1) әскери қызметшiлерден, әскери жиындардан өту уақытында запастағы азаматтардан, сондай-ақ әскери бөлiмдердiң, құрамалардың, мекемелердiң азаматтық қызметтегi адамдарынан өздерiнiң қызметтiк мiндеттерiн орындауға байланысты қоғамдық тәртiптi, әскери нысанды киім киiп жүру ережелерiн сақтауды, құқыққа қарсы iс-әрекеттердi және әскери полиция органдарының мiндеттерi мен функцияларын жүзеге асыруға кедергi келтiретiн iс-әрекеттердi тоқтатуын талап етуге;
2) әскери қызметшiлер және әскери жиындардан өту уақытында запастағы азаматтар, ал әскери бөлiмдер (әскери объектiлер) және гарнизондар аумақтарында өзге де адамдар құқық бұзушылықтар жасаған кезде олардың жеке басын куәландыратын құжаттарын тексеруге, құқық бұзушылықты тоқтатуды қамтамасыз ететiн шаралар қолдануға;
3) iс жүргiзудегi материалдар мен қылмыстық iстер бойынша әскери қызметшiлердi және өзге де азаматтарды әскери полиция органдарына шақыруға, олардан түсiнiктемелер, құжаттар немесе солардың көшiрмелерiн алуға, жауап алуға және өзге де тергеу iс-әрекеттерiн жүргiзуге, сондай-ақ дәлелсіз себеппен келуден жалтарған адамдарды заңда белгiленген тәртiппен күштеп әкелуге;
4) Қазақстан Республикасының заңнамасында белгiленген тәртiппен, қылмыстың жасалуына сезiктi, сондай-ақ анықтау, алдын ала тергеу органдарынан немесе соттан жасырынып жүрген айыпталушы немесе сотталушы әскери қызметшiлердi ұстауға;
5) осы баптың 4) тармақшасында аталған, ұсталған адамдарға жеке тексеру жүргiзуге, олардың заттарын, құжаттарын, көлiк құралдарын тексеруге, Қазақстан Республикасының заңнамасында белгiленген тәртiппен заңсыз айналымдағы заттарды алып қоюға;
6) әскери тәртiптi немесе қоғамдық тәртiптi өрескел бұзған әскери қызметшiлердi ұстауға және әскери полиция органдары мекемелерiне немесе қызмет атқарып жатқан жерiне жеткізуге;
7) Қазақстан Республикасының әкiмшiлiк құқық бұзушылық туралы заңнамасына сәйкес әскери қызметшiлерге, әскери жиындардан өту уақытында запастағы азаматтарға қатысты әкiмшiлiк құқық бұзушылық туралы iстер бойынша iс жүргiзудi жүзеге асыруға;
8) әскери қызметшiлер, сондай-ақ әскери жиындардан өту уақытында запастағы азаматтар жасаған тәртiптiк терiс қылықтар туралы материалдарды әскери бөлiмдердiң тиiстi командирлерiнiң (бастықтарының) қарауына беруге;
9) Қазақстан Республикасының заңнамасында белгiленген өкiлеттiктер шегiнде анықтау жүргiзуге;
2008.26.05. № 34-IV ҚР Заңымен 10-тармақша өзгертілді (бұр.ред.қара)
10) азаматтардың қауiпсіздiгiне қатер төндiретiн қылмыстардың жасалуына сезiктi адамдарды қудалау кезiнде азаматтардың тұрғын үйiне және өзге де үй-жайларына, оларға тиесiлi жер учаскелерiне, мемлекеттік органдардың және ұйымдардың аумағына және үй-жайларына (шет мемлекеттердiң және халықаралық ұйымдардың дипломатиялық иммунитетi бар өкiлдiктерiнен басқа) кедергiсіз кiруге және оларды қарап шығуға не онда қылмыс жасалған немесе жасалып жатыр деуге жеткiлiктi негiздер бар болған жағдайда, соңынан бұл туралы жиырма төрт сағат iшiнде прокурорды хабардар етуге;
2008.26.05. № 34-IV ҚР Заңымен 11-тармақша өзгертілді (бұр.ред.қара)
11) Қазақстан Республикасының заңнамасында белгiленген талаптарды сақтай отырып, мемлекеттік органдардан және ұйымдардан қозғалған қылмыстық iстер бойынша ақпарат пен материалдарды кедергiсіз және өтеусіз алуға;
12) өз құзыретi шегiнде әскери қолбасшылыққа және өзге де лауазымды адамдарға қылмыстар мен құқық бұзушылықтар жасауға ықпал ететiн мән-жайларды жою жөнiнде ұсыныстар енгiзуге;
13) қызмет мақсатында кезек күттiрмейтiн жағдайларда байланыс құралдарын орналасқан жерiне және кiмге тиесiлiгiне қарамастан пайдалануға;
14) әскери бөлiм орналасқан жердi өз бетiмен тастап қаруымен кеткен әскери қызметшiлердi iздестiру және ұстау жөніндегі ic-шараларды жүргiзу кезiнде құқық қорғау органдарымен келiсе отырып бақылау-өткізу пункттерiн дербес орнатуға;
15) Қазақстан Республикасының заңнамасында белгiленген тәртiппен және жағдайларда, Қазақстан Республикасы Қарулы Күштерiнiң, басқа да әскерлерiнiң және әскери құралымдарының көлiк құралдарын ұстауға, алкогольмен, есiрткiмен және уытқұмарлықпен масаң күйдегi адамдарды әскери көлiк құралдарын басқарудан шеттетуге және оларды медициналық тексеруге жiберуге;
16) қылмыстың жасалуына сезiктi адамдарды ұстау жөніндегі iс-шараларды жүргізу кезiнде, сондай-ақ адамдардың өмiрi мен денсаулығына қатер төндiретiн мән-жайлар кезiнде жол полициясы органдарымен келiсе отырып көшелердiң, автомобиль жолдарының жекелеген учаскелерiнде және басқа да аумақтарда көлiк және жаяу жүргiншiлер қозғалысын шектеуге немесе тыйым салуға;
17) әскери көлiк құралдары колоннасы өткен уақытта жол полициясы органдарымен үйлесiмдi түрде автомобиль жолдары мен көшелерде жол жүрiсiн реттеуге, осы колоннаға және арнайы мақсаттағы көлiк құралдарына iлесiп алып жүрудi ұйымдастыруға және қамтамасыз етуге;
18) әскери бөлiмдер мен әскери мекемелерде жол жүрiсi қауiпсіздiгiн қамтамасыз ету жөніндегі бақылау және профилактикалық iс-шараларының орындалуын тексеруге;
19) өзге мүмкiндiктер болмаған кезде оқиға болған жерге бару, шұғыл медициналық көмекке мұқтаж әскери қызметшiлер мен азаматтарды емдеу мекемелерiне жеткізу үшiн әскери көлiктi пайдалануға;
20) әскери полиция органдары ұстаған не тергеуде және сотта жатқан әскери қызметшiлердi ұстау үшiн, сондай-ақ гарнизондар қолбасшылығының қамау түрiндегі қылмыстық жазаны орындауы үшiн не әкімшілік қамауға алуды қолдану үшiн арнайы үй-жайы - гауптвахтасы болуға;
21) осы Заңда, Қазақстан Республикасының өзге де заңдарында, Қазақстан Республикасы Президентінің және Қазақстан Республикасы Үкіметінің актілерінде көзделген өзге де құқықтарды жүзеге асыруға құқылы.
2014.13.01. № 159-V ҚР Заңымен 9-бап өзгертілді (бұр.ред.қара)
9-бап. Әскери полиция органдарының мiндеттерi
Әскери полиция органдары өздерiнiң алдына қойылған мiндеттерге сәйкес және өкiлеттіктерi шегiнде:
1) әскери қызметшiлердiң және басқа да азаматтардың құқықтары мен бостандықтарын құқыққа қарсы қол сұғушылықтан қорғауға;
2) гарнизондарда құқық тәртібін қамтамасыз етуге, әскери қылмыстардың және өзге де құқық бұзушылықтардың алдын алуға, оларды анықтауға, ашуға және жолын кесуге, олардың жасалуына ықпал ететiн мән-жайларды белгiлеуге;
3) азаматтардың өтiнiштерiн қарауға, әскери қызметшiлер және әскери жиындардан өту уақытында запастағы азаматтар жасаған қылмыстар мен құқық бұзушылықтар туралы, сондай-ақ әскери бөлiмдер мен гарнизондардағы оқиғалар туралы жедел ақпараттың есебiн жүргiзуге және оны талдауға;
4) басқа құқық қорғау органдарымен өзара iс-қимыл жасай отырып, әскери бөлiм орналасқан жердi өз бетiмен тастап кеткен, қылмыс жасап, анықтау, алдын ала тергеу органдарынан және соттан жасырынып жүрген, қылмыстық жазаны орындаудан жалтарып жүрген әскери қызметшiлердi және Қазақстан Республикасының заңнамасында көзделген өзге де жағдайларда iздестiрудi жүзеге асыруға;
5) шақыру немесе келісім-шарт бойынша әскери қызмет өткерiп жүрген әскери қызметшiлер; әскери жиындардан өту уақытында запастағы азаматтар; өздерiнiң қызметтiк мiндеттерiн орындауға байланысты әскери бөлiмдердiң, құрамалардың, мекемелердiң азаматтық қызметтегi адамдары немесе осы бөлiмдер, құрамалар және мекемелер орналасқан жерде азаматтық қызметтегi адамдар жасаған барлық қылмыстар туралы iстер бойынша заңда белгiленген тәртiппен анықтау жүргiзуге;
6) өз құзыретi шегiнде әскери көлiк құралдарының жол жүрiсiн және оларды пайдалану ережелерiнiң сақталуын бақылауды жүзеге асыруға;
7) заңда белгіленген тәртiппен тергеушiнiң тапсырмасын, прокурордың нұсқауын, сот шешiмiн орындауға;
8) әскери полиция органдарының құзыретiне жатқызылған әкiмшiлiк құқық бұзушылық туралы iстер бойынша iс жүргізудi жүзеге асыруға;
9) төтенше жағдайлар зардаптарын жою кезiнде құқық тәртібін және қауiпсіздiктi қамтамасыз етуге;
10) әскери қызметшiлер арасында әскери тәртiптi қамтамасыз етуде әскери қолбасшылыққа жәрдемдесуге;
11) құқыққа қарсы қол сұғудан, оқиғалардан және жазатайым жағдайлардан зардап шеккен, сондай-ақ шарасыз не денсаулығы мен өмiрiне қауiп төнген өзге де жағдайды бастан кешiрiп жатқан азаматтарға көмек көрсетуге;
12) Қазақстан Республикасының заңнамасына сәйкес төтенше немесе соғыс жағдайы режимiн қамтамасыз етуге қатысуға, соғыс уақытында Қазақстан Республикасының аумақтық қорғаныс жүйесiнде жекелеген мiндеттердi орындауға;
13) заңнамада көзделген жағдайларда әскери қызметшiлердi гауптвахтаға жабу арқылы ұстауға;
14) қылмыстық процестi жүргiзетiн органдардың жазбаша талаптары бойынша тергеу iс-әрекеттерiн жүргiзу үшiн қамауға алынғандарды айдауылмен алып жүрудi қамтамасыз етуге;
15) осы Заңда, Қазақстан Республикасының өзге де заңдарында, Қазақстан Республикасы Президентінің және Қазақстан Республикасы Үкіметінің актілерінде көзделген өзге де міндеттерді жүзеге асыруға міндетті.
2007.22.05. № 255-III ҚР Заңымен 10-бап өзгертілді (бұр.ред. қара)
10-бап. Әскери полиция органдары қызметкерлерiнiң жауапкершiлігі
1. Әскери полиция органдарының әскери қызметшілері қылмыстар және өзге де құқық бұзушылықтар жасағаны үшін Қазақстан Республикасының заңдарына сәйкес жауаптылықта болады.
Әскери полиция органдарының әскери қызметшілерін әскери тәртіпті бұзғаны үшін жауаптылыққа тарту тәртібі әскери жарғылармен белгіленеді.
2. Әскери полиция органдары қызметкерлерiнiң iс-әрекетiне (әрекетсіздігіне) Қазақстан Республикасының заңнамасында белгiленген тәртiппен шағым жасалуы мүмкiн.
3-тарау. Әскери полиция органдары қызметкерлерінің атыс қаруын, арнайы құралдарды және дене кyшін қолдануы
11-бап. Атыс қаруын қолдану
1. Атыс қаруын қолдану лажсыз шара болып табылады және оған басқа шаралар тиiмсіз болғанда немесе егер жағдайдың мән-жайы бойынша басқа шараларды қолдану мүмкiн болмағанда жол берiледi.
2. Әскери полиция органдары қызметкерлерiнiң:
1) әскери қызметшiлердi, басқа да азаматтарды қылмыстық қол сұғудан қорғау, сол сияқты кепiлге алынған адамдарды босату;
2) әскери полиция органдарының қызметкерлерiне немесе олардың отбасы мүшелерiне, құқық тәртібін қорғау жөніндегі қызметтiк және қоғамдық борышын орындап жүрген адамдарға жасалған шабуылды тойтару;
3) күзетiлетiн объектiлерге, айдауылға, үй-жайларға, ғимараттарға, көлiк құралдарына, соның iшiнде әскери бөлiмдердiң әуе және теңiз кемелерiне жасалған шабуылды тойтару, сондай-ақ басып алынған жағдайда оларды босату;
4) қылмыс үстiнде ұсталған және қарсылық көрсеткен, қамаудан қашқан адамдарды ұстау (әкiмшiлiктiк қамаудағылардан басқа), сондай-ақ қарулы адамды ұстау;
5) егер жүргiзушi әскери полиция органдары қызметкерлерiнiң заңды талаптарына бағынбаса және әскери қызметшiлер мен азаматтардың өмiрiне не денсаулығына қауiп төндiрсе, әскери көлiк құралын зақымдау жолымен тоқтату;
6) хайуанаттардың шабуылынан қорғану;
7) дабыл қағу немесе көмек шақыру белгiлерiн беру;
8) қажеттi қорғану және лажсыз қажеттiлiк жағдайларында атыс қаруын қолдануға құқығы бар.
3. Қарулы шабуыл жасаған, қарулы қарсылық көрсеткен, адамдарды кепiлге алған, көлiк құралдарын басып алған не топтасып шабуыл жасаған жағдайлардан басқа кезде, әйелдер мен кәмелетке толмағандарға қатысты атыс қаруын қолдануға тыйым салынады.
4. Әскери полиция органдарының қызметкерлерi атыс қаруы қолданылған барлық жағдайларда айналадағылардың қауiпсіздiгiн қамтамасыз ету, зардап шеккендерге шұғыл медициналық көмeк көрсету үшiн қажеттi шаралар қолдануға, қару қолданылғаны туралы тiкелей бастығына баяндауға мiндеттi.
5. Әскери полиция органдары қызметкерлерiнiң кiсi өлiмiне немесе өзге де ауыр зардаптарға соқтырған атыс қаруын қолдануының әрбір жағдайы туралы әскери прокурор дереу хабардар етiледi.
6. Атыс қаруын қолданудың әрбір фактiсi бойынша қызметтiк тергеу жүргiзiледi. Атыс қаруын заңсыз қолдану фактiсi анықталған жағдайда, кiнәлi адам Қазақстан Республикасының заңдарына сәйкес жауаптылықта болады.
12-бап. Арнайы құралдарды және дене күшiн қолдану
1. Әскери полиция органдары қызметкерлерiнiң дене күшiн және арнайы құралдарды, соның iшiнде күрестiң жауынгерлiк әдiстерiн, кiсендердi, резеңке таяқтарды, үй-жайды ашатын, көлiктi мәжбүрлеп тоқтататын құралдарды, қызметтiк иттердi, сондай-ақ тiзбесiн Қазақстан Республикасының Үкіметі айқындайтын арнайы көлiк құралдарын қолдануға мына жағдайларда:
1) әскери қызметшiлердi, басқа да адамдарды олардың өмiрi мен денсаулығына қатер төндiретiн шабуылдан және өзге де әрекеттерден қорғауға, өзiн-өзi қорғауға;
2) әскери бөлiмдердегi жаппай тәртiпсіздiктiң, сондай-ақ әскери қызметшiлердiң қоғамдық тәртiптi және әскери тәртiптi топтасып бұзуының жолын кесуге;
3) әскери қалашықтарға, объектiлерге, құрылыстарға, үй-жайларға, ғимараттарға және әскери көлiк құралдарына жасалған шабуылды тойтаруға немесе оларды басып алған жағдайда босатуға;
4) егер құқық бұзушылардың қашып кетуi, айналадағыларға немесе өзiне зиян келтiруi мүмкiн деп пайымдауға жеткiлiктi негiздер болса, оларды әскери бөлiмдерге және гауптвахтаға жеткізу, ұсталған, күзетпен қамауға алынған адамдарды айдауылмен алып жүру және күзету үшiн, егер олар әскери полиция қызметкерлерiне, әскери тәртiптi сақтау және қоғамдық тәртiптi қорғау жөнiнде өздерiне жүктелген мiндеттердi орындайтын өзге де адамдарға бағынбаса немесе қарсылық көрсетсе, құқық бұзушыларды ұстауға құқығы бар.
2. Айналадағылардың өмiрi мен денсаулығына қатер төндiретiн шабуыл, топтасқан шабуыл жасаған не қарулы қарсылық көрсеткен жағдайлардан басқа кезде, әйелдерге, мүгедектiк белгiлерi анық білінiп тұрған адамдарға және жас балаларға қатысты арнайы құралдар мен дене күшiн қолдануға тыйым салынады.
3. Әскери полиция қызметкерлерiнiң кiсi өлiмiне немесе өзге де ауыр зардаптарға әкеп соқтырған арнайы құралдар және дене күшiн қолдануының әрбір жағдайы туралы әскери прокурор дереу хабардар етiледi.
4-тарау. Әскери полиция органдары қызметкерлерiнiң кадр құрамы, әлеуметтiк және құқықтық қорғалуы
13-бап. Әскери полиция органдарының кадр құрамы
2008.26.05. № 34-IV ҚР Заңымен 1-тармақ өзгертілді (бұр.ред.қара)
1. Әскери полиция органдары Қазақстан Республикасының заңнамасына сәйкес әскери қызметшiлермен және азаматтық персоналмен жасақталады.
2. Әскери полиция органдарында қызмет өткеру үшiн шақырылатын әскери қызметшiлер және өзге де адамдар қызметке тағайындалар алдында Қазақстан Республикасының заңнамасына сәйкес мiндеттi арнайы тексеруден өтедi.
Әскери полиция органдарына алғаш қызметке тұратын адамдар мiндеттi түрде арнайы бастапқы оқудан және тағылымдамадан өтедi, олар үшiн сынақ мерзiмi белгiленуi мүмкiн. Олардың сынақ мерзiмiнен және тағылымдамадан өту тәртібі мен шарттарын Қазақстан Республикасының Қорғаныс министрi, Iшкi iстер министрi, Ұлттық қауiпсіздiк комитетiнiң төрағасы айқындайды.
3. Бұрын сотталған және ақталмайтын негiздер бойынша қылмыстық жауапкершiлiктен босатылған адамдар, сондай-ақ келеңсіз себептер бойынша мемлекеттік органдардан жұмыстан босатылған адамдар әскери полиция органдарына қызметке қабылданбайды.
2007.15.05. № 253-III (бұр.ред.қара); 2008.26.05. № 34-IV (бұр.ред.қара) ҚР Заңдарымен 4-тармақ өзгертілді
4. Әскери полиция органдарының азаматтық персоналын жұмысқа қабылдау мәселелерi және еңбек жағдайлары Қазақстан Республикасының еңбек заңнамасымен және Қазақстан Республикасының мемлекеттік қызмет туралы заңнамасымен реттеледi.
14-бап. Әскери полиция органдарының әскери қызметшiлерiн әлеуметтік және құқықтық қорғау
1. Әскери полиция органдарының әскери қызметшiлерiне әскери қызмет өткерудi регламенттейтiн, құқықтық және әлеуметтiк кепiлдiктердi, жеңiлдiктердi, медициналық, зейнеттiк және басқа да қамсыздандыру түрлерiн белгілейтiн Қазақстан Республикасының заңнамасы, сондай-ақ осы шарттарға қайшы келмейтiн, құрылымына әскери полиция кiретiн тиiстi органдарда қызмет өткерудi регламенттейтiн Қазақстан Республикасының заңнамасы қолданылады.
2. Әскери полиция органдарының қызметкерлерi мемлекеттік билiк өкiлдерi болып табылады және мемлекеттің қорғауында болады, оларға белгiленген үлгiдегi қызмет куәлiктерi мен омырауға тағатын белгiлер берiледi.
3. Әскери полиция органдары қызметкерлерiнiң өз лауазымдық мiндеттерiн атқаруына байланысты олардың өздерiне жүктелген мiндеттердi орындауына кедергi келтiру, қорлау, қарсылық көрсету, күштеп қорқыту немесе олардың өмiрiне, денсаулығына, ар-ожданы мен қадiр-қасиетiне, мүлкiне қол сұғушылық Қазақстан Республикасының заңдарына сәйкес жауаптылыққа әкеп соғады.
15-бап. Әскери полиция органдары қызметiнде заңдылықтың сақталуын қадағалау
Әскери полиция органдары қызметiнде заңдылықтың сақталуын қадағалауды Қазақстан Республикасының Бас прокуроры және оған бағынышты әскери прокурорлар жүзеге асырады.
