Қазақстан Республикасы қаржы министрлігінiң Мемлекеттік мүлiк және
жекешелендiру департаментi туралы Қазақстан Республикасы Үкіметінiң
1997 жылғы 12 желтоқсандағы № 1751 қаулысы
(ҚР Үкіметінiң 06.11.98 ж. № 1135 қаулысымен енгізілген
өзгерістерімен)
ҚР Үкіметінің 1999.07.05. № 930 қаулысымен күші жойылды
"Қазақстан Республикасында мемлекеттік басқарудың пәрмендiлiгiн одан әрi арттыру жөніндегі шаралар туралы" Қазақстан Республикасы Президентінің 1997 жылғы 10 қазандағы № 3655 Жарлығы мен "Қазақстан Республикасы Президентінің 1997 жылғы 10 қазандағы № 3655 Жарлығын жүзеге асыру мәселелерi" туралы Қазақстан Республикасының Үкіметінiң 1997 жылғы 12 қарашадағы № 1551 қаулысына сәйкес Қазақстан Республикасының Үкіметі қаулы етедi:
1. Қоса берiлiп отырған Қазақстан Республикасы Қаржы министрлігінiң Мемлекеттік мүлiк және жекешелендiру департаментi туралы ереже бекітілсiн.
2. Мемлекеттік мүлiк және жекешелендiру департаментi қайта ұйымдастырылған Мемлекеттік мүлiк пен активтердi басқару департаментi мен Жекешелендiру жөніндегі департаменттiң, сондай-ақ олардың аумақтық органдарының мүлiктiк және өзге де құқықтары мен мiндеттерiнiң құқықтық мұрагерi болып айқындалсын.
3. Қазақстан Республикасының Стратегиялық жоспарлау және реформалар жөніндегі агенттiгi Мемлекеттік мүлiк және жекешелендiру департаментi мен оның аумақтық органдарын статистикалық және талдау ақпараттарымен қамтамасыз етiлетiн мемлекеттік органдардың тiзбесiне кiргiзсiн.
Қазақстан Республикасының
Премьер-Министрi
Қазақстан Республикасы
Үкіметінiң
1997 жылғы 12 желтоқсандағы
№ 1751 қаулысымен
бекітілген
Қазақстан Республикасы Қаржы министрлігінiң
Мемлекеттік мүлiк және жекешелендiру департаментi
туралы ереже
МИССИЯСЫ
Мемлекеттік меншiктi, оны жекешелендiрудi тиiмдi басқаруды қамтамасыз ету және тұрақты экономикалық өсуге ықпал жасау.
I. ЖАЛПЫ ЕРЕЖЕЛЕР
ҚР Үкіметінiң 06.11.98 ж. № 1135 қаулысымен 1-тармақ өзгерді
1. Қазақстан Республикасы Қаржы министрлігінiң Мемлекеттік мүлiк және жекешелендiру департаментi /бұдан әрi - Департамент/ Қазақстан Республикасының мемлекеттік меншікке иелiк ету, пайдалану, билiк жасау және оның мақсатқа сай әрі тиімді пайдаланылуына бақылау жасау жөніндегі өкiлеттiлiктi жүзеге асыратын және мемлекеттік мүлiктi бiрден бiр сатушы ретiнде оның мүддесiн бiлдiруге уәкiлеттi мемлекеттік басқару органы болып табылады.
2. Департамент өз қызметiн Қазақстан Республикасының Конституциясына, заңдарына, Қазақстан Республикасы Президентінің актілеріне, Премьер- Министрінің өкiмдерiне, өзге де нормативтiк құқықтық актiлерге, сондай-ақ осы Ережеге сәйкес жүзеге асырады.
3. Департамент пен оның аумақтық органдарын ұстауға арналған шығыстарды қаржыландыру республикалық бюджетте орталық атқарушы органдарды ұстауға көзделген қаржының есебiнен жүзеге асырылады.
ҚР Үкіметінiң 06.11.98 ж. № 1135 қаулысымен 4-тармақ жаңа редакцияда
4. Қазақстан Республикасы Қаржы министрлігінің Мемлекеттік мүлік және жекешелендіру департаментінің құрылымын Қазақстан Республикасының Үкіметі, штат санын - Қазақстан Республикасының Қаржы министрлігі, бекітілген құрылымы, адам саны мен еңбекке ақы төлеу қорының шеңберінде штат кестесін Департамент директоры бекітеді.
5. Департаменттiң облыстарды, Алматы және Байқоңыр қалаларында өзiнiң аумақтық органдары болады.
Аумақтық органдар департаментпен бiрге тiкелей бағыныстағы бiрыңғай жүйенi құрайды және өз қызметiн өздерiне Департамент жүктеген өкiлеттiктердiң шегiнде ұйымдастырады.
6. Департамент пен оның аумақтық органдары заңды тұлғалар болып табылады, Қазақстан Республикасының Мемлекеттік елтаңбасы бейнеленген, мемлекеттік тiлде өзiнiң атауы жазылған мөрi мен бланкiлерi, банктерде ағымдағы шоттары болады.
II. ДЕПАРТАМЕНТТIҢ НЕГIЗГI МIНДЕТТЕРI,
ФУНКЦИЯЛАРЫ ЖӘНЕ ҚҰҚЫҚТАРЫ
ҚР Үкіметінiң 06.11.98 ж. № 1135 қаулысымен 7-тармақ өзгерді
7. Департаменттiң өз қызметiнiң аясындағы негiзгi мiндеттерi:
Қазақстан Республикасының меншiгiне және жекешелендiруге қатысты мемлекеттік саясатты әзiрлеуге қатысу және оны жүзеге асыру;
Қазақстан Республикасының аумағында және одан тысқары жерлерде меншiк және оның мүлiктiк құқықтарын қорғау мәселелерi бойынша мемлекеттік мүдделерiн бiлдiру;
мемлекеттік меншiктiң мақсатқа сай және тиімді пайдаланылуын бақылауды жүзеге асыру;
мемлекеттік меншiктi жалдау, жалға алу, концессиялау, сенiмдi басқару, сатып алу-сату шарттары талаптарының сақталуына бақылау жасауды қамтамасыз ету;
шаруашылық серiктестiктерiнiң мемлекеттік үлестерiн, акционерлік қоғамдар акцияларының мемлекеттік пакеттерiн басқару, олардың басқару органдарында мемлекеттiң мүдделерiн бiлдiру;
Қазақстан Республикасының мемлекеттік меншiк объектiлерiн, оның iшiнде акциялардың мемлекеттік пакеттерi мен шаруашылық серiктестiктерiне қатысу үлесiн сатуды ұйымдастыру;
жүргізілген тексерістер мен тексерулердің материалдарын қорытудың негізінде мемлекеттік меншікті тиімді пайдалану жөнінде ұсыныстар әзірлеу;
мемлекеттік меншiк пен оны жекешелендiрудi басқару туралы заңдардың сақталуына бақылауды жүзеге асыру, оны қолданудың практикасын талдау және қорыту, оны жетiлдiру жөнiнде ұсыныстар әзiрлеу, заң және өзге де нормативтiк құқықтық актiлердi дайындауға қатысу;
министрлiктердiң, комитеттердiң және ведомстволардың мемлекеттік меншiктi басқару және жекешелендiру жөніндегі қызметiн салааралық үйлестiру;
жергiлiктi атқарушы органдардың мемлекеттік коммуналдық меншiктi басқару және жекешелендiру жөніндегі қызметiн ұйымдастыру;
халықаралық шарттар мен келісімдердiң жобаларын дайындауға қатысу және Қазақстан Республикасы Үкіметінiң тапсыруы бойынша оларға қол қою;
халықаралық ұйымдармен өз құзыретіндегі мәселелер бойынша өзара iс-қимыл мен ынтымақтастықты ұйымдастыру;
белгiленген тәртiппен өз қызметiн жақсарту жөнiнде ұсыныстар енгізу; өзiне заңдармен жүктелген өзге де мiндеттердi жүзеге асыру болып табылады.
ҚР Үкіметінiң 06.11.98 ж. № 1135 қаулысымен 8-тармақ өзгерді
8. Департамент негiзгi мiндеттерiне сүйене отырып:
Қазақстан Республикасының меншiгi және жекешелендiру қатынастарын реттеу саласында мемлекеттік саясатты жүзеге асыру жөнiнде ұсыныстар жасауға қатысады;
мемлекеттік меншiктiң мақсатқа сай және тиімді пайдаланылуына бақылау жасауды жүзеге асырады;
мемлекеттік мекемелер не мемлекеттiң қатысуымен заңды тұлғалар құру, оларды қайта ұйымдастыру, тарату, оңалту рәсiмдерiн жүргiзу үшiн мемлекеттік меншiк объектiлерiн сатуға немесе кепiлге, жалға, жалдап алуға, сенiмдi басқаруға беруге арналған келісім-шарттарға /шарттарға, келісімдерге/ қол қою туралы шешiмдер қабылдау жолымен мемлекеттік мүлiкке иелiк ету, пайдалану және билiк жасау жөніндегі өкiлеттiгiн жүзеге асырады;
белгiленген тәртiппен мүдделi министрлiктермен және ведомстволармен бiрлесiп мемлекеттік меншiктi жекешелендiрудiң бағдарламасын әзiрлейдi және жүзеге асырады;
ауыл шаруашылығы емес мақсаттағы мемлекеттік меншiк объектiлерiн, оның iшiнде құрылысы аяқталмаған объектiлердi де жекешелендiру кезiнде заңды және жеке тұлғаларға жер учаскелерiн жердi пайдалану не жалға алу құқығымен ұсынуға не беруге байланысты мәселелердi шешуге қатысады;
"алтын акцияны" енгізу туралы шешiм қабылдайды;
шаруашылық серiктестiктерiнiң мемлекеттік үлестерi мен акционерлік қоғамдар акцияларының мемлекеттік пакеттерiн басқаруды қамтамасыз етедi;
белгiленген тәртiппен мемлекеттiң қатысу үлесi бар акционерлік қоғамдар мен шаруашылық серiктестiктерiнiң борыштық мiндеттемелерi мен облигацияларының эмиссияларын сату туралы шешiм қабылдайды;
мемлекетке тиесiлi акциялар пакеттерiнiң ұстаушысы болып табылады;
шаруашылық серiктестiктерiндегі мемлекеттік үлеске және акциялардың мемлекеттік пакеттерiне кіріс пен дивидендтердің дұрыс есептелуiн, олардың бюджетке уақтылы және толық аударылуын бақылайды;
мемлекеттік меншiк объектiлерiн жекешелендiрудiң нақты түрлерi мен әдiстерiн айқындайды;
Қазақстан Республикасының мемлекеттік меншiк объектiлерiн сатуды ұйымдастырады және оған байланысты барлық шараларды жүргiзедi;
жекешелендiрiлген кәсiпорындарды сату алдында дайындауды жүргiзедi, осы мақсат үшiн тәуелсiз сарапшылар мен консультанттарды тартады, аталған шаралар бойынша ведомствоаралық комиссиялардың жұмысын ұйымдастырады;
мемлекеттік кәсіпорындар мен мемлекет қатысатын шаруашылық серіктестіктерінің тізіліміне енгізілген мемлекеттік кәсіпорындардың, мемлекет қатысатын шаруашылық серіктестіктері мен акционерлік қоғамдардың қаржы-шаруашылық қызметіне белгіленген тәртіппен және өз құзыретінің шегінде тексерістер мен тексерулерді жүргізеді, сондай-ақ Қазақстан Республикасы Ұлттық қауіпсіздік комитетінің, Ішкі істер министрлігінің, Бас Прокуратурасының, соттардың тиісті актілері бойынша, мемлекеттік органдардың өтініштері, азаматтардың хаттары мен арыздары бойынша ұйымдарға тексерістер мен тексерулер жүргізеді;
заңдарда белгіленген тәртіппен мемлекеттік кәсіпорындардың, мемлекет қатысатын шаруашылық серіктестіктері мен акционерлік қоғамдардың қаржы- шаруашылық қызметіне бекітілген жоспарға сәйкес тексерістер мен тексерулер жүргізеді;
инвестициялық жекешелендiру қорларын - бағалы қағаздар рыногына қатысушыларды трансформациялауға құнын бағалау жөніндегі жұмысты ұйымдастырады;
қажет болған жағдайда Департамент қызметiне байланысты жұмыстарды жүргiзуге қатысу үшiн тәуелсiз сарапшыларды, аудиторларды және консультанттарды тартады;
заңдардың қолданылуына талдау жүргiзедi және оның практикасын қорытады, оны жетiлдiру жөнiнде ұсыныс әзiрлейдi, өзiнiң құзыретiне жатқызылған мәселелердi реттейтiн заң және өзге де нормативтiк құқықтық актiлердi дайындауға қатысады;
өз құзыретiнiң шегiнде заңды және жеке тұлғалардың атқаруы үшiн мiндеттi нормативтiк құқықтық актiлер шығарады;
министрлiктердiң, комитеттердiң және ведомстволардың мемлекеттік мүлiктi басқару жөніндегі қызметтерiн салааралық үйлестiрудi жүзеге асырады;
жергiлiктi атқарушы органдардың мемлекеттік коммуналдық меншiктi басқару жөніндегі қызметтерiн үйлестiрудi жүзеге асырады;
халықаралық ұйымдармен өз құзыретіндегі мәселелер бойынша өзара iс-қимыл мен ынтымақтастықты ұйымдастырады;
халықаралық шарттар мен келісімдердiң жобаларын дайындауға қатысады және Қазақстан Республикасы Үкіметінiң тапсыруы бойынша оларға қол қояды; Қазақстан Республикасының аумақтары мен одан тысқары жерлерде меншiк мәселелерi жөнiнде мемлекеттiң мүдделерiн бiлдiрудi және оның мүлiктiк құқықтарын қорғауды қамтамасыз етедi;
белгiленген тәртiппен өз қызметiн жақсарту жөнiнде ұсыныс енгiзедi.
ҚР Үкіметінiң 06.11.98 ж. № 1135 қаулысымен 9-тармақ өзгерді
9. Департаменттiң өзiне жүктелген мiндеттер мен функцияларды орындау үшiн өз құзыретiнiң шегiнде:
атқару үшiн мiндеттi нұсқаулар беруге және нормативтiк құқықтық актiлер шығаруға;
мүдделi министрлiктермен және ведомстволармен бiрлесiп мемлекеттік меншiктi жекешелендiрудiң бағдарламасын әзiрлеуге және оны жүзеге асыруға;
заңдарда белгіленген тәртіппен ұйымдардың құрылтайшысы болуға және олардың жарғыларын бекітуге;
шаруашылық серiктестiктерiнiң құрылтайшысы болуға, олардың жарғыларын бекiтуге;
қолданылып жүрген заңдарға сәйкес мемлекеттік меншiктi, оның iшiнде шаруашылық серiктестiктердегi акциялардың мемлекеттік пакеттерiн және оның қатысу үлестерiн сату жөнiнде сауда саттықтар жүргiзуге;
белгiленген тәртiппен мемлекеттiң қатысу үлесi бар акционерлік қоғамдар мен шаруашылық серiктестiктерiнiң борыштық мiндеттемелерiн, сондай-ақ акцияларының, облигацияларының және өзге де бағалы қағаздарының эмиссияларын сатуға рұқсат беруге;
банкроттықты болдырмау жөніндегі, сондай-ақ мемлекеттiң қатысуымен шаруашылық серiктестiктер мен акционерлік қоғамдарды санациялау және қайта құрылымдау жөніндегі шараларды әзiрлеуге және оларды жүзеге асыруға қатысуға;
заңды және жеке тұлғалармен шарттар жасасуға және оңалту рәсiмдерiн жүргiзу үшiн мемлекеттік меншiк объектiлерiн, оның iшінде шаруашылық серiктестiктеріндегі акциялардың мемлекеттік пакеттерi мен қатысу үлестерiн сату немесе кепiлге беру, жалға тапсыру, концессиясы, лизингi, сырттан және сенiмдi басқаруға беру кезiнде өзара мiндеттемелердiң талаптары мен сипатын айқындауға және олардың орындалуына бақылау жасауды жүзеге асыруға;
заңдарда белгiленген жағдайларда және тәртiппен лицензиялауды жүзеге асыруға;
Үкiметке акционерлік қоғамдар шаруашылық серiктестiктерi мен өзге де ұйымдар құру, оларды қайта ұйымдастыру және тарату мәселелерi бойынша ұсыныс енгізуге;
Қазақстан Республикасы Үкіметінiң шешiмi бойынша мемлекеттік меншiктi сатудан алынған қаражаттың бiр бөлiгiн жекешелендiрiлетiн объектiлердi сату алдында дайындауға арналған шығыстарды қаржыландыру, аукциондар, тендерлер, конкурстар ұйымдастыру және өткізу, жекешелендiру кезiнде бақылау жасауды, қайта ұйымдастыруды, санацияны жүргiзу, шарттық негiзде сарапшылар мен консультанттар ретiнде заңды және жеке тұлғаларды тарту үшiн пайдалануға;
мемлекет қатысатын акционерлік қоғамдар мен шаруашылық серiктестiктерi органдарының қарауына олардың басшыларының кандидатурасын енгізуге;
министрлiктердiң, комитеттердiң және ведомстволардың мемлекеттік мүлiктi басқару жөніндегі қызметтерiне әдiстемелiк басшылық пен салааралық үйлестiрудi жүзеге асыруға;
орталық және жергiлiктi атқарушы органдардан, мемлекеттiң қатысуымен заңды тұлғалардан ақысыз негiзде қажеттi қаржы және өзге де құжаттарды, сондай-ақ мемлекеттік меншiктi пайдалануға байланысты мәселелер бойынша ақпаратты сұратуға және алуға;
мемлекеттік кәсіпорындардың, мемлекет қатысатын акционерлік қоғамдар мен шаруашылық серіктестіктердің тиісті бухгалтерлік және өзге де қаржы құжаттамаларын және материалдық құндылықтардың бар-жоғын тексеруге, сондай-ақ олардың басшылары мен басқа қызметкерлерінен тексерістер мен тексерулер жүргізу барысында туындайтын мәселелер бойынша жазбаша түсініктеме алуға;
анықталған тәртіп бұзушылықты жою, келтірілген зиянды өндіріп алу жөнінде шаралар қабылдауға;
анықталған тәртіп бұзушылық, мемлекеттік меншікті ұрлау және өзге де тәртіп бұзушылық фактілері бойынша материалдарды тергеу органдарына жіберуге;
мемлекеттік кәсіпорындарда, мемлекет қатысатын акционерлік қоғамдар мен шаруашылық серіктестіктерінде жүргізіліп отырған тексерістер мен тексерулерге мемлекеттік органдардың мамандарын келісім бойынша тартуға.
Департаменттiң құзыретiне кiретiн мәселелер бойынша заңдардың атқарылуына бақылау және тексеру жасауды жүзеге асыруға;
консалтингтiк қызмет көрсетулердi жүзеге асыру үшiн қазақстандық және шетелдiк заңды және жеке тұлғаларды жұмысқа тартуға;
Департамент қызметiнiң аясына жататын проблемалар бойынша ғылыми зерттеулердi жүзеге асыруға және үйлестiруге; аумақтық органдар туралы ереженi, сондай-ақ Қазақстан Республикасы Үкіметінiң тапсырмасы бойынша мемлекеттік кәсiпорындардың жарғыларын бекiтуге құқығы бар.
10. Департаменттiң мемлекеттік меншiкке иелiк ету, пайдалану және билiк жасау жөніндегі қатынасты реттейтiн, өзiнiң құзыретiнiң шегiнде қабылданған актілері белгiленген тәртiппен орталық және жергiлiктi атқару органдардың атқаруы үшiн мiндеттi болып табылады.
III. ДЕПАРТАМЕНТТIҢ ҚЫЗМЕТIН
ҰЙЫМДАСТЫРУ
11. Департаменттi Қазақстан Республикасы Қаржы министрiнiң ұсынуы бойынша Қазақстан Республикасының Үкіметі қызметке тағайындайтын және қызметiнен босататын Директор басқарады. Департаменттiң директорының оның ұсынуы бойынша Қазақстан Республикасының Қаржы министрi қызметке тағайындайтын және қызметiнен босататын орынбасарлары болады.
12. Департамент туралы ереженi Қазақстан Республикасының Үкіметі бекiтедi.
13. Департаменттiң директоры Департаменттiң жұмысын ұйымдастырады және оған басшылықты жүзеге асырады әрi Департаментке жүктелген мiндеттердiң орындалуы мен оның өз функцияларын жүзеге асыруы үшiн жеке жауаптылықта болады.
14. Департаменттiң өзiнiң құзыретiне жатқызылған мәселелер жөніндегі шешiмi барлық органдардың, ұйымдардың, лауазымды адамдар мен азаматтардың атқаруы үшiн мiндеттi.
15. Департамент қабылдаған шешiм Директор қол қоятын қаулылармен және бұйрықтармен ресiмделедi.
16. Директор болмаған уақытта оны Департаменттiң қызметiн үйлестiретiн, өзiне Директор жүктеген өзге де мiндеттердi жүзеге асыратын орынбасарлардың бiреуi алмастырады.
17. Департаменттiң аумақтық органдарының басшыларын Департамент директорының ұсынуы бойынша және тиiстi облыстар мен Алматы қаласы әкiмдерiнiң келісімiмен Қазақстан Республикасының Қаржы министрi бекiтедi.
18. Директор осы мақсатта:
өзiнiң орынбасарлары мен Департаменттiң құрылымдық бөлiмшелерi басшыларының мiндеттерi мен жауаптылығы дәрежесiн айқындайды;
Қазақстан Республикасының Қаржы министрi бекiтетiн лауазымдар номенклатурасына сәйкес Департаменттiң орталық аппараты мен аумақтық органдарының қызметкерлерiн қызметке тағайындайды және қызметiнен босатады;
тәртiптiк жаза қолданады;
өз құзыретiнiң шегiнде Департаменттiң орталық аппараты мен аумақтық органдары қызметкерлерiнiң атқаруы үшiн мiндеттi бұйрықтар шығарады;
Департаменттiң құрылымдық бөлiмшелерi мен оның аумақтық органдары туралы ереженi бекiтедi;
өз құзыретiнiң шегiнде қолданылып жүрген заңдарға сәйкес мемлекеттік органдар мен ұйымдарда Департаменттi бiлдiредi;
өзiнiң құзыретiне жатқызылған басқа да мәселелер бойынша шешiмдер қабылдайды.
19. Департаменттi қайта ұйымдастыру және тарату қолданылып жүрген заңдарға сәйкес жүзеге асырылады.
