Қазақстан Республикасы
Үкіметінің
2008 жылғы 19 наурыздағы
№ 270 қаулысымен
бекітілген
Осы редакция 2012 жылғы 14 мамырда енгізілген өзгерістеріне дейін қолданылды
Ядролық материалдарды, радиоактивті заттарды, иондаушы сәуле шығарудың радиоизотоптық
көздерін, радиоактивті қалдықтарды транзиттік тасымалдауды қоса алғанда,
Қазақстан Республикасы аумағының шегінде тасымалдау жөніндегі қызметті лицензиялау
ережесі
1. Жалпы ережелер
1. Осы Ядролық материалдарды, радиоактивті заттарды, иондаушы сәуле шығарудың радиоизотоптық көздерін, радиоактивті қалдықтарды транзиттік тасымалдауды қоса алғанда, Қазақстан Республикасы аумағының шегінде тасымалдау жөніндегі қызметті лицензиялау ережесі «Атом энергиясын пайдалану туралы» 1997 жылғы 14 сәуірдегі, «Лицензиялау туралы» 2007 жылғы 11 қаңтардағы Қазақстан Республикасының заңдарына сәйкес әзірленді және ядролық материалдарды, радиоактивті заттарды, иондаушы сәуле шығарудың радиоизотоптық көздерін, радиоактивті қалдықтарды транзиттік тасымалдауды қоса алғанда, Қазақстан Республикасы аумағының шегінде тасымалдау жөніндегі қызметті лицензиялау тәртібін айқындайды.
2. Жеке және заңды тұлғалар лицензиялау субъектілері болып табылады.
3. Қызметті лицензиялауды Қазақстан Республикасы Энергетика және минералдық ресурстар министрлігінің Атом энергетикасы комитеті (бұдан әрі - лицензиар) жүзеге асырады.
4. Ядролық материалдарды, радиоактивті заттарды, иондаушы сәуле шығарудың радиоизотоптық көздерін, радиоактивті қалдықтарды транзиттік тасымалдауды қоса алғанда, Қазақстан Республикасы аумағының шегінде тасымалдау жөніндегі қызметті жүзеге асыру құқығына арналған лицензия қолданылу мерзіміне шек қойылмай берілетін бас лицензия болып табылады.
2. Лицензия беру тәртібі
5. Өтініш беруші (заңды немесе жеке тұлға) лицензия алу үшін лицензиарға мына құжаттарды:
1) белгіленген үлгідегі өтінішті;
2) Жарғының және өтініш берушінің заңды тұлға ретінде мемлекеттік тіркеу туралы куәлігінің нотариалды куәландырылған көшірмелерін (заңды тұлға үшін);
3) жеке басын куәландыратын құжаттың көшірмесін (жеке тұлға үшін);
4) өтініш берушінің жеке кәсіпкер ретінде мемлекеттік тіркеу туралы куәлігінің нотариалды куәландырылған көшірмесін (жеке кәсіпкер үшін);
5) өтініш берушінің салық органында есепке қою туралы куәлігінің нотариалды куәландырылған көшірмесін;
6) жекелеген қызмет түрлерімен айналысу құқығы үшін бюджетке лицензиялық алым төлегенін растайтын құжатты;
7) біліктілік талаптарына сәйкес мәліметтер мен құжаттарды ұсынады.
6. Лицензия алу үшін өтінішпен бірге лицензиарға берілген барлық құжаттар тізімдеме бойынша қабылданады, оның көшірмесі өтініш берушіге лицензиардың құжаттарды қабылдап алған күні туралы белгі қойылып жіберіледі (тапсырылады).
7. Лицензияны лицензиар осы Ережеде белгіленген тиісті құжаттармен бірге өтініш берілген күннен бастап отыз жұмыс күнінен кешіктірмей, ал шағын кәсіпкерлік субъектілері үшін он жұмыс күнінен кешіктірмей береді.
8. Егер:
1) Қазақстан Республикасының заңдарында субъектілердің осы санаты үшін қызметтің жекелеген түрімен айналысуға тыйым салынған болса;
2) осы Ереженің 5-тармағына сәйкес талап етілетін барлық құжаттар табыс етілмеген;
3) осы қызметпен айналысу құқығы үшін лицензиялық алым енгізілмеген;
4) өтініш беруші біліктілік талаптарына сай келмеген;
5) өтініш берушіге қатысты оған осы қызметпен айналысуға тыйым салатын заңды күшіне енген сот үкімі болған жағдайларда лицензия беруден бас тартылуы мүмкін.
9. Лицензиар лицензия беруден бас тартқан жағдайда өтініш берушіге лицензия беру үшін белгіленген мерзімде бас тартудың себептерін көрсетіп, жазбаша түрде дәлелді жауап береді.
10. Егер лицензиар белгіленген мерзімде өтініш берушіге лицензияны бермеген немесе өтініш берушіні лицензияны және (немесе) лицензияға қосымшаны беруден бас тарту себептері туралы жазбаша хабардар етпеген жағдайда, онда лицензияны беру үшін белгіленген мерзім аяқталған күннен бастап бес жұмыс күні өткен соң, өтініш беруші лицензиарды қызметтің өзі мәлімдеген түрін жүзеге асыруды бастау туралы жазбаша түрде хабардар етеді.
Лицензиар өтініш берушінің жазбаша хабарламасын алған сәттен бастап бес жұмыс күнінен кешіктірмей, өтініш беруші жазбаша хабарламада көрсеткен күннен бастап лицензияны береді.
11. Лицензиар берілген, қайта ресімделген, тоқтатылған, жаңартылған және қолданылуы тоқтатылған лицензиялардың тізілімін жүргізуді жүзеге асырады.
12. Лицензияның қолданылуын тоқтату, одан айыру Қазақстан Республикасының әкімшілік құқық бұзушылық туралы заңнамасында көзделген тәртіппен жүзеге асырылады.
13. Лицензия жоғалған немесе бүлінген жағдайда лицензияның телнұсқасын беру лицензиялау туралы заңнамаға сәйкес жүзеге асырылады.
14. Лицензиялау туралы заңнамада көзделген жағдайда лицензияның қолданылуы тоқтатылған кезде лицензиат он жұмыс күні ішінде лицензияны лицензиарға қайтаруға міндетті.
15. Лицензиардың шешімдері мен іс-әрекетіне Қазақстан Республикасының заңнамасында белгіленген тәртіппен шағымдануға болады.
16. Лицензиар лицензиялау туралы Қазақстан Республикасының заңнамасын лицензиаттың сақтауын қамтамасыз етуге бағытталған лицензиялық бақылауды жүзеге асырады.
Қазақстан Республикасы
Үкіметінің
2008 жылғы 19 наурыздағы
№ 270 қаулысымен
бекітілген
Ядролық материалдарды, радиоактивті заттарды, радиоактивті иондаушы сәуле шығару көздерін, радиоактивті қалдықтарды транзиттік тасымалдауды қоса алғанда, Қазақстан Республикасының шегінде тасымалдау жөніндегі қызметке
қойылатын біліктілік талаптары
1. Осы Ядролық материалдарды, радиоактивті заттарды, радиоактивті иондаушы сәуле шығару көздерін, радиоактивті қалдықтарды транзиттік тасымалдауды қоса алғанда, Қазақстан Республикасының шегінде тасымалдау жөніндегі қызметке қойылатын біліктілік талаптары «Атом энергиясын пайдалану туралы» 1997 жылғы 14 сәуірдегі және «Лицензиялау туралы» 2007 жылғы 11 қаңтардағы Қазақстан Республикасының заңдарына сәйкес әзірленді.
2. Ядролық материалдарды, радиоактивті заттарды, радиоизотопты иондаушы сәуле шығару көздерін, радиоактивті қалдықтарды транзиттік тасымалдауды қоса алғанда, Қазақстан Республикасы аумағының шегінде тасымалдау жөніндегі қызметті жүзеге асыруға лицензия алуға арналған біліктілік талаптары өтініш берушіде:
1) қауіпті жүктерді тасымалдауға арналған лицензиясының;
2) уәкілетті органның буып-түйетін жинақталым конструкциясын, ерекше түрдегі радиоактивті материалды бекіткені туралы құжаттың;
3) белгіленген тәртіппен бекітілген тасымалдауды жүзеге асыру кезіндегі радиациялық қорғаныш бағдарламасының;
4) белгіленген тәртіппен бекітілген тасымалдау кезіндегі аварияның зардаптарын жою жоспарының;
5) белгіленген тәртіппен бекітілген тасымалдау кезеңінде ядролық материалдарды есепке алу мен бақылауды ұйымдастыру жөніндегі іс-шаралардың;
6) белгіленген тәртіппен бекітілген тасымалдау кезеңінде ядролық материалдарды және иондаушы сәуле көздерін физикалық қорғауды қамтамасыз ету жоспарының;
7) белгіленген тәртіппен бекітілген мәлімделетін қызмет түрін жүзеге асыру кезінде қауіпсіздік сапасын қамтамасыз ету бағдарламасының;
8) өтініш беруші мәлімделетін қызмет түрі бойынша бекіткен нормативтік құқықтық актілер, нормативтік, техникалық және әдістемелік құжаттамалар тізбесінің;
9) көлік құралына арналған санитарлық паспортының;
10) еңбек (қызметтік) міндеттерін атқарған кезде қызметкердің өмірі мен денсаулығына зиян келтіргені үшін жұмыс берушінің азаматтық-құқықтық жауапкершілігін міндетті сақтандыру туралы шартының;
11) қызметі үшінші тұлғаларға зиян келтіру қаупімен байланысты объектілер иелерінің азаматтық-құқықтық жауапкершілігін міндетті сақтандыру туралы шартының;
12) міндетті экологиялық сақтандыру шартының болуын қамтиды.
