ЄЄ"ҚазАвиаЛизинг" жабық акционерлік қоғамын құру туралы Қазақстан
Республикасы Үкіметінің 2002 ж. 31 мамырдағы № 601 қаулысы
(ҚР Үкіметінің 13.09.02 ж. № 1004 қаулысымен енгізілген өзгерістерімен)
Лизинг негізінде осы заманғы авиациялық техника мен технологиялық жабдыққа авиаоператорлардың қол жетімділігін қамтамасыз ету жолымен авиациялық қызметтер көрсету рыногын дамытуды қолдау, жаңа авиациялық техниканы пайдалану есебінен авиация көлігінің қауіпсіздігін арттыру мақсатында Қазақстан Республикасының Үкіметі қаулы етеді:
1. Жарғылық капиталына мемлекеттің 100 пайыз қатысуымен "ҚазАвиаЛизинг" жабық акционерлік қоғамы (бұдан әрі - Қоғам) құрылсын.
ҚР Үкіметінің 13.09.02 ж. № 1004 қаулысымен 2-тармақ алынып тасталды
2. Қазақстан Республикасының Қаржы министрлігі Қазақстан Республикасының Көлік және коммуникациялар министрлігімен бірлесіп, заңнамада белгіленген тәртіппен А 310-300 (сериялық нөмірлері 399 және 412 екі әуе кемесін Қоғамның жарғылық капиталына беруді қамтамасыз етсін.
3. Қазақстан Республикасы Қаржы министрлігінің Мемлекеттік мүлік және жекешелендіру комитеті заңнамада белгіленген тәртіппен:
1) қоғамның жарғылық капиталын қалыптастырсын;
2) қызметінің негізгі мәні авиациялық мүлікті сатып алу және лизингке беру деп белгілей отырып, Қоғамның мемлекеттік тіркелуін қамтамасыз етсін;
3) Қазақстан Республикасының Көлік және коммуникациялар министрлігіне Қоғам акцияларының мемлекеттік пакетіне иелік ету және оны пайдалану құқықтарын берсін;
4) Қазақстан Республикасының Көлік және коммуникациялар министрлігімен бірлесіп, осы қаулыдан туындайтын өзге де шараларды қабылдасын.
4. Қазақстан Республикасы Үкіметінің кейбір шешімдеріне мынадай толықтырулар енгізілсін:
1) "Акциялардың мемлекеттік пакеттеріне мемлекеттік меншіктің түрлері және ұйымдарға қатысудың мемлекеттік үлестері туралы" Қазақстан Республикасы Үкіметінің 1999 жылғы 12 сәуірдегі № 405 қаулысына (Қазақстан Республикасының ПҮКЖ-ы, 1999 ж., № 13, 124-құжат):
көрсетілген қаулымен бекітілген Акцияларының мемлекеттік пакеттері мен үлестері республикалық меншікке жатқызылған акционерлік қоғамдар мен шаруашылық серіктестіктердің тізбесінде:
"Астана қаласы" деген бөлім мынадай мазмұндағы реттік нөмірі 21-28-жолмен толықтырылсын:
"21-28. "ҚазАвиаЛизинг" ЖАҚ";
2) "Республикалық меншіктегі ұйымдар акцияларының мемлекеттік пакеттері мен мемлекеттік үлестеріне иелік ету және пайдалану жөніндегі құқықтарды беру туралы" Қазақстан Республикасы Үкіметінің 1999 жылғы 27 мамырдағы № 659 қаулысына:
көрсетілген қаулыға қосымшада:
"Қазақстан Республикасының Көлік және коммуникациялар министрлігіне" деген бөлім мынадай мазмұндағы реттік нөмірі 160-13-жолмен толықтырылсын: "160-13. "ҚазАвиаЛизинг" ЖАҚ".
5. Осы қаулының орындалуын бақылау Қазақстан Республикасы Премьер-Министрінің орынбасары К.Қ. Мәсімовке жүктелсін.
6. Осы қаулы қол қойылған күнінен бастап күшіне енеді.
Қазақстан Республикасының
| Премьер-Министрі | И.Тасмағанбетов
|
