ҚАЗАҚСТАН РЕСПУБЛИКАСЫНЫҢ КОНСТИТУЦИЯЛЫҚ
ЗАҢЫ
Алатау қаласының арнаулы құқықтық режимі туралы
Осы редакция 2026 жылғы 11 маусымда енгізілген өзгерістеріне дейін қолданылды
1-тарау. ЖАЛПЫ ЕРЕЖЕЛЕР
1-бап. Алатау қаласының арнаулы құқықтық режимі
2-бап. Алатау қаласының аумағы мен қала маңындағы аймағы
3-бап. Қазақстан Республикасының Алатау қаласының арнаулы құқықтық режимі туралы заңнамасы
4-бап. Осы Конституциялық заңмен реттелетін қатынастар
5-бап. Осы Конституциялық заңда пайдаланылатын негізгі ұғымдар
6-бап. Арнаулы құқықтық режимнің мақсаты
7-бап. Арнаулы құқықтық режимнің міндеттері
8-бап. Арнаулы құқықтық режимнің қағидаттары
9-бап. Ашықтық қағидаты
10-бап. Аумақтылық қағидаты
11-бап. «Бірыңғай терезе» қағидаты
12-бап. Цифрлық басымдылық қағидаты
13-бап. Субсидиарлық қағидаты
14-бап. Тұрақтылық қағидаты
15-бап. Қаржылық орнықтылық қағидаты
16-бап. Жеке инвестициялардың басымдығы қағидаты
2-тарау. АЛАТАУ ҚАЛАСЫН МЕМЛЕКЕТТІК БАСҚАРУ
17-бап. Алатау қаласы органдарының жүйесі
18-бап. Əкімшіліктің құқықтық жағдайы
19-бап. Əкімшіліктің өкілеттіктері
20-бап. Əкімшіліктің функцияларын беру
21-бап. Əкімшіліктің басқару органдары
22-бап. Кеңес
23-бап. Алатау қаласының мəслихаты
24-бап. Алатау қаласының əкімдігі
25-бап. Орталық мемлекеттік органдардың Алатау қаласындағы қызметі
26-бап. Əкімшіліктің Алматы облысы мен Алматы қаласының жергілікті атқарушы органдарымен өзара іс-қимыл жасауы
27-бап. Қазақстан Республикасының Үкіметі мен Қазақстан Республикасы мемлекеттік органдарының Алатау қаласының тыныс-тіршілігі мен оны дамытуға жəрдемдесуі
28-бап. Алатау қаласының стратегиялық құжаттары
29-бап. Алатау қаласының əкімшілігі мен өзге де мемлекеттік басқару ұйымдарының жұмыскерлері
3-тарау. АЛАТАУ ҚАЛАСЫНДАҒЫ БЮДЖЕТТІК ЖƏНЕ БЮДЖЕТАРАЛЫҚ ҚАТЫНАСТАР, САТЫП АЛУ ЖƏНЕ МЕМЛЕКЕТТІК-ЖЕКЕШЕЛІК ƏРІПТЕСТІК
30-бап. Алатау қаласының арнаулы бюджеттік режимі туралы жалпы ережелер
31-бап. Түсімдерді Алатау қаласының жергілікті бюджеті мен əкімшіліктің бюджеті арасында бөлу
32-бап. Мемлекеттік инвестициялық жобаларды жоспарлау жəне іске асыру
33-бап. Алатау қаласындағы мемлекеттік-жекешелік əріптестік
34-бап. Алатау қаласы органдарының сатып алу рəсімдері
4-тарау. АЛАТАУ ҚАЛАСЫНДАҒЫ ҚЫЗМЕТТІ ҚҰҚЫҚТЫҚ РЕТТЕУ
35-бап. Жалпы ережелер
36-бап. Алатау қаласының заңнамасы
37-бап. Алатау қаласында тілдерді қолдану
38-бап. Алатау қаласындағы резиденттік
39-бап. Алатау қаласындағы кəсіпкерлік қызмет жəне бизнес-лицензиялау
40-бап. Заңды тұлғалардың Алатау қаласының аумағындағы қызметінің құқықтық режимі
41-бап. Алатау қаласындағы реттеп лицензиялау жəне рұқсат беру рəсімдері
42-бап. Алатау қаласындағы мемлекеттік бақылау жəне қадағалау
43-бап. Алатау қаласының тауарларының, жұмыстарының жəне көрсетілетін қызметтерінің айналысы
44-бап. Алатау қаласының салық режимі
45-бап. Алатау қаласындағы кедендік режим
46-бап. Ақшалай міндеттемелерді орындау, валюталық реттеу мен валюталық бақылау
47-бап. Цифрлық активтерді реттеу
48-бап. Алатау қаласында қоршаған ортаны қорғау саласындағы құқықтық режим
49-бап. Алатау қаласының аумағында және қала маңындағы аймақта жер қойнауын пайдалану
50-бап. Алатау қаласының аумағында қаржы саласындағы қызметті жүзеге асыру
51-бап. Алатау қаласында цифрлық өзара іс-қимыл жасау және көрсетілетін қызметтерді ұсыну
52-бап. Алатау қаласының цифрлық объектілері мен цифрлық деректері
53-бап. Алатау қаласындағы цифрлық жазбалар
54-бап. Эксперименттік құқықтық режимдер
55-бап. Алатау қаласындағы мемлекеттік емес білім беру ұйымдары қызметінің құқықтық режимі
56-бап. Алатау қаласындағы мемлекеттік емес медициналық ұйымдар қызметінің құқықтық режимі
57-бап. Инновациялық қалалық мобильділік
58-бап. Алатау қаласындағы креативті индустрия
59-бап. Алатау қаласындағы ойын қызметі
60-бап. Алатау қаласында еңбек қатынастарын және шетелдік жұмыскерлерді тартуды реттеу
61-бап. Шетел азаматтары мен азаматтығы жоқ адамдардың көші-қон режимі
62-бап. Алатау қаласындағы стандарттау және техникалық реттеу рәсімдерін реттеу
63-бап. Алатау қаласындағы сәулет, қала құрылысы және құрылыс қызметі саласындағы құқықтық режим
64-бап. Алатау қаласының инфрақұрылым объектілерінің құрылысын реттеу
65-бап. Алатау қаласында тұрғын үй қатынастарын реттеу
66-бап. Алатау қаласында жылжымайтын мүлік объектілерін сатып алу тәртібін реттеу
67-бап. Алатау қаласында жер қатынастары
68-бап. Алатау қаласының жер қорын қалыптастыру
69-бап. Алатау қаласының жер қорын қалыптастыру мақсатында мемлекет мұқтажы үшін жер учаскелерін мәжбүрлеп иеліктен шығару
70-бап. Алатау қаласының жер қорын қалыптастыру мақсатында ауыл шаруашылығында пайдаланылатын (ауыл шаруашылығы мақсатындағы) жер учаскелерін мәжбүрлеп алып қою
71-бап. Алатау қаласындағы әкімшілік-деликт құқық бұзушылықтардың арнаулы құқықтық режимі
72-бап. Алатау қаласында реттеу режимін бұзғаны үшін жауаптылық
73-бап. Алатау қаласындағы инвестициялардың құқықтық режимінің негізгі қағидаттары
74-бап. Инвестициялық дауларды шешу
75-бап. Алатау қаласындағы шарттардың құқықтық режимі
5-тарау. ҚОРЫТЫНДЫ ЖӘНЕ ӨТПЕЛІ ЕРЕЖЕЛЕР
76-бап. Арнаулы ереже
77-бап. Жалпы өтпелі ереже
78-бап. Алатау қаласында негізгі бизнесті жүзеге асыратын заңды тұлғалар туралы өтпелі ережелер
79-бап. Алатау қаласында қызметін жүзеге асыратын заңды тұлғалардың филиалдары туралы өтпелі ережелер
80-бап. «Alatau» арнайы экономикалық аймағы жөніндегі өтпелі ережелер
81-бап. Инвестициялық шарттар жөніндегі өтпелі ережелер
82-бап. Инвестициялық жобалар және олар бойынша берілген жер учаскелері туралы өтпелі ережелер
83-бап. Алатау қаласындағы сәулет, қала құрылысы және құрылыс қызметі саласындағы өтпелі ережелер
84-бап. Жер қатынастары мәселелері жөніндегі өтпелі ережелер
85-бап. Алатау қаласында негізгі бизнесті жүзеге асыратын жеке тұлғалар туралы өтпелі ережелер
86-бап. Алатау қаласында және оның қала маңындағы аймағында кең таралған пайдалы қазбаларды барлау және өндіру туралы өтпелі ережелер
87-бап. Әкімшіліктің жекелеген функцияларын уақытша беру
88-бап. Қазақстан Республикасының өзге де мемлекеттік органдарымен келісілетін әкімшіліктің нормативтік құқықтық актілері туралы өтпелі ережелер
89-бап. Әкімшіліктің қызметін қамтамасыз ету мәселелері жөніндегі жекелеген өтпелі ережелер
90-бап. Осы Конституциялық заңды қолданысқа енгізу тәртібі
1-тарау. ЖАЛПЫ ЕРЕЖЕЛЕР
1-бап 2026 ж. 1 шілдеден бастап қолданысқа енгізіледі
1-бап. Алатау қаласының арнаулы құқықтық режимі
Алатау қаласы осы Конституциялық заңға сәйкес қоғамдық қатынастарды, оның ішінде мемлекеттік басқаруды құқықтық реттеу ерекшеліктерін белгілеуді көздейтін «қарқынды дамитын қала» арнаулы құқықтық режимінде (бұдан әрі - арнаулы құқықтық режим) Қазақстан Республикасының Конституциясы негізінде жұмыс істейді және дамиды.
2-бап 2026 ж. 1 шілдеден бастап қолданысқа енгізіледі
2-бап. Алатау қаласының аумағы мен қала маңындағы аймағы
1. Алатау қаласының аумағы кішірейтілмеуге тиіс.
2. Алатау қаласының аумағын Алматы облысы шекараларын ескере отырып ұлғайту Алатау қаласы Кеңесінің (бұдан əрі - Кеңес) шешімі бойынша əкімшіліктің нормативтік құқықтық актісінде жүзеге асырылады.
3. Алатау қаласын дамыту перспективасын қамтамасыз ету мақсатында арнаулы құқықтық режимнің жекелеген ережелері, оның ішінде қала құрылысын реттеу режимі, жерді пайдалану тəртібі мен режимі қолданылатын Алатау қаласының қала маңындағы аймағы Кеңестің шешімі бойынша əкімшіліктің нормативтік құқықтық актісінде белгіленеді.
3-бап 2026 ж. 1 шілдеден бастап қолданысқа енгізіледі
3-бап. Қазақстан Республикасының Алатау қаласының арнаулы құқықтық режимі туралы заңнамасы
1. Қазақстан Республикасының Алатау қаласының арнаулы құқықтық режимі туралы заңнамасы (бұдан əрі - арнаулы құқықтық режим туралы заңнама) Қазақстан Республикасының Конституциясына негізделеді жəне осы Конституциялық заң мен оны іске асыру үшін қабылданған Қазақстан Республикасы Президентінің актілерінен, Қазақстан Республикасы Үкіметінің, орталық мемлекеттік органдардың, Қазақстан Республикасы Ұлттық Банкінің, Қазақстан Республикасының Президентіне тікелей бағынатын жəне есеп беретін өзге де мемлекеттік органдардың, Алатау қаласы əкімшілігінің, мəслихаты мен əкімдігінің, Алматы облысы мен Алматы қаласының жергілікті атқарушы жəне өкілді органдарының нормативтік құқықтық актілерінен тұрады.
2. Егер осы Конституциялық заңда өзгеше көзделмесе, Қазақстан Республикасының өзге де заңнамалық актілері, сондай-ақ оларды іске асыру үшін қабылданған заңға тəуелді нормативтік құқықтық актілер арнаулы құқықтық режим туралы заңнамада айқындалған ерекшеліктер ескеріле отырып, осы Конституциялық заңмен реттелетін қоғамдық қатынастарға қолданылады.
3. Арнаулы құқықтық режим туралы заңнаманың ережелері мен Қазақстан Республикасының өзге де нормативтік құқықтық актілерінің ережелері арасында қайшылықтар болған кезде Қазақстан Республикасы Конституциясының жəне арнаулы құқықтық режим туралы заңнаманың ережелері қолданылады.
Арнаулы құқықтық режим туралы заңнама мəтінінің мазмұнын əртүрлі түсіну ықтималдығы кезінде арнаулы құқықтық режимді енгізудің тарихи алғышарттары ескеріле отырып, оның мақсаты мен міндеттеріне барынша сай келетін түсіндіруге артықшылық беріледі.
4. Қазақстан Республикасының өзге де заңнамасының арнаулы құқықтық режим туралы заңнаманың нормаларына қайшы келетін не Алатау қаласының тыныс-тіршілігі мен оны дамытуға, мемлекеттік басқаруға жəне Алатау қаласында қызмет пен қызмет əрекетін жүзеге асыруға қойылатын қосымша талаптарды белгілейтін нормалары осы Конституциялық заң мен арнаулы құқықтық режим туралы заңнаманың құрамына кіретін өзге де нормативтік құқықтық актілерге тиісті өзгерістер мен толықтырулар енгізілгеннен кейін ғана осындай қатынастарға қолданылуы мүмкін.
5. Қазақстан Республикасы ратификациялаған халықаралық шарттар осы Конституциялық заңнан басым болады. Қазақстан Республикасының аумағында халықаралық шарттардың қолданылу тəртібі Қазақстан Республикасының заңдарында айқындалады.
Инвестициялар, кəсіпкерлік қызметті жүргізу, Алатау қаласында қызмет əрекетін ұйымдастыру мен мемлекеттік басқару жəне (немесе) оның тыныс-тіршілігі мен оны дамыту мəселелерін қозғайтын, Қазақстан Республикасы қатысушы болуға ниеттенетін халықаралық шарттар мен Қазақстан Республикасы халықаралық шарттарының жобаларына қол қойылғанға дейін олар əкімшілікпен міндетті түрде келісілуге тиіс.
4-бап 2026 ж. 1 шілдеден бастап қолданысқа енгізіледі
4-бап. Осы Конституциялық заңмен реттелетін қатынастар
1. Осы Конституциялық заң мен оның негізінде қабылданатын, арнаулы құқықтық режим туралы заңнаманың құрамына кіретін өзге де нормативтік құқықтық актілер Алатау қаласының тыныс-тіршілігі мен оны дамытуға жəне онда қызмет пен қызмет əрекетін жүзеге асыруға байланысты қоғамдық қатынастарды реттейді.
2. Мемлекеттік органдар, əкімшілік органдар, лауазымды адамдар, сондай-ақ жеке жəне заңды тұлғалар осы Конституциялық заңмен реттелетін қоғамдық қатынастардың қатысушылары болады.
3. Егер осы Конституциялық заңда өзгеше көзделмесе, оның қолданылуы жəне арнаулы құқықтық режим туралы заңнаманың құрамына кіретін өзге де нормативтік құқықтық актілердің қолданылуы мыналармен:
1) елдің қорғаныс қабілетін жəне ұлттық қауіпсіздікті қамтамасыз ететін басқа да əскерлер мен əскери құралымдардың қызметін қоса алғанда, Қазақстан Республикасының қорғанысы жəне Қарулы Күштері туралы, Қазақстан Республикасының сыртқы барлау туралы, қарсы барлау қызметі туралы, жедел-іздестіру қызметі туралы, ұлттық қауіпсіздік туралы, прокуратура туралы, Қазақстан Республикасының арнаулы мемлекеттік органдары туралы, Қазақстан Республикасының Мемлекеттік күзет қызметі туралы, Қазақстан Республикасының ұлттық қауіпсіздік органдары туралы, аумақтық қорғаныс саласындағы, терроризмге қарсы іс-қимыл туралы, экстремизмге қарсы іс-қимыл туралы, адам саудасына қарсы іс-қимыл туралы, сыбайлас жемқорлыққа қарсы іс-қимыл туралы, қылмыстық жолмен алынған кірістерді заңдастыруға (жылыстатуға), терроризмді қаржыландыруға жəне жаппай қырып-жою қаруын таратуды қаржыландыруға қарсы іс-қимыл туралы заңнамасымен, сондай-ақ Қазақстан Республикасының есірткі, психотроптық заттар, сол тектестер мен прекурсорлар жəне олардың заңсыз айналымы мен терiс пайдаланылуына қарсы iс-қимыл шаралары туралы заңнамасымен;
2) Қазақстан Республикасының азаматтардың құқықтарына, бостандықтары мен міндеттеріне, дербес деректерге қатысты заңнамасымен, Қазақстан Республикасының неке-отбасы заңнамасымен;
3) Қазақстан Республикасының қылмыстық, қылмыстық-процестік, қылмыстық-атқару заңнамасымен;
4) Қазақстан Республикасының мемлекеттік құпиялар туралы заңнамасымен;
5) Қазақстан Республикасының адвокаттық қызмет жəне заң көмегі туралы заңнамасымен;
6) Қазақстан Республикасының сайлау жəне республикалық референдум туралы заңнамасымен;
7) Қазақстан Республикасының бухгалтерлік есеп пен қаржылық есептілік туралы, аудиторлық қызмет туралы, бағалау қызметі туралы, коллекторлық қызмет туралы, акционерлік қоғамдар, инвестициялық жəне венчурлік қорлар туралы заңнамасымен;
8) Қазақстан Республикасының табиғи жəне техногендік сипаттағы төтенше жағдайлардың жəне олардың зардаптарының алдын алу жəне оларды жою, төтенше жағдай аймағындағы халыққа шұғыл медициналық жəне психологиялық көмек көрсету, Қазақстан Республикасының азаматтық қорғанысын құру жəне оның жұмыс істеуі, мемлекеттік материалдық резервті қалыптастыру, сақтау жəне пайдалану, авариялық-құтқару қызметтері мен құралымдарын ұйымдастыру жəне олардың қызметі, сондай-ақ азаматтық қорғау органдары қызметкерлерінің мəртебесі мен əлеуметтік қорғалуы мəселелері жөніндегі заңнамасымен;
9) инвестициялар, кəсіпкерлік қызметті жүргізу, Алатау қаласында қызмет əрекеті мен мемлекеттік басқаруды ұйымдастыру, оның тыныс-тіршілігі жəне қала құрылысын дамыту мен инфрақұрылымдық даму мəселелерін қозғамайтын Қазақстан Республикасының өзге де заңнамасымен реттелетін қоғамдық қатынастарға қолданылмайды.
5-бап 2026 ж. 1 шілдеден бастап қолданысқа енгізіледі
5-бап. Осы Конституциялық заңда пайдаланылатын негізгі ұғымдар
1. Осы Конституциялық заңда мынадай негізгі ұғымдар пайдаланылады:
1) Алатау қаласының басым салалары - Алатау қаласының даму стратегиясын ескере отырып, əкімшіліктің нормативтік құқықтық актілерінде басым секторлар ретінде айқындалған Алатау қаласы экономикасының секторлары;
2) Алатау қаласының жер қоры - арнаулы құқықтық режимнің міндеттерін орындау жəне оны дамыту мақсатында осы Конституциялық заңға сəйкес қалыптастырылатын жеке жер қоры;
3) Алатау қаласының заңнамасы - осы Конституциялық заң мен оның негізінде қабылданған Алатау қаласы əкімшілігінің, мəслихаты мен əкімдігінің нормативтік құқықтық актілерінен тұратын Қазақстан Республикасының нормативтік құқықтық актілерінің жиынтығы;
4) Алатау қаласының органдары - Алатау қаласын мемлекеттік басқару органдары;
5) Алатау қаласының стандарттары - Алатау қаласының заңнамасына сəйкес қолданылатын Алатау қаласының міндетті стандарттары;
6) Алатау резиденті - осы Конституциялық заңға жəне əкімшіліктің нормативтік құқықтық актілеріне сəйкес тиісті құқықтық мəртебе берілген жеке немесе заңды тұлға. Əкімшіліктің нормативтік құқықтық актілерінде айқындалған жағдайларда əкімшілік, əкімшіліктің органдары Алатаудың резиденттері болып танылады;
7) əкімшілік - Қазақстан Республикасы Президентінің Жарлығы негізінде Қазақстан Республикасының Үкіметі құрған, функцияларын осы Конституциялық заңға сəйкес жүзеге асыратын заңды тұлға;
8) əкімшіліктің актілері - осы Конституциялық заң мен əкімшілік туралы ережеге сəйкес өз құзыреттері шегінде қабылданатын əкімшіліктің нормативтік құқықтық актілері жəне əкімшіліктің немесе əкімшілік органдарының нормативтік емес құқықтық актілері;
9) əкімшіліктің бюджеті - əкімшіліктің мемлекеттік қазынашылықта ашылған қолма-қол ақшаны бақылау шоты мен əкімшіліктің осы Конституциялық заңда жəне əкімшіліктің нормативтік құқықтық актілерінде айқындалған түсімдер есебінен қалыптастырылатын жəне арнаулы құқықтық режим туралы заңнамада белгіленген құзырет шегінде əкімшілік пен əкімшілік органдарының қызметін қаржылық қамтамасыз етуге арналған екінші деңгейдегі банктердегі шоттарын біріктіретін орталықтандырылған ақша қоры;
10) əкімшіліктің органдары - əкімшіліктің жекелеген өкілеттіктерін беру мақсатында əкімшілік Алатау қаласында оқшауланған ұйымдар түрінде құратын əкімшілік органдар;
11) бизнес-лицензия - Алатау резидентінің Алатау қаласы аумағында кəсіпкерлік қызметті жүзеге асыру құқығын растайтын жəне осындай қызметті жүргізудің рұқсат етілген түрлері мен шарттарын айқындайтын құжат;
12) бизнес-лицензиялау - бизнес-лицензияны беруге жəне соған қатысты Алатау қаласының заңнамасында көзделген өзге де əрекеттер жасауға байланысты іс-шаралар мен əрекеттер кешені;
13) бюджеттің өзіне жеткілікті болуы - Алатау қаласындағы көздерден қалыптастырылатын түсімдер сомасы қатарынан бес жыл бойы Алатау қаласының ағымдағы шығыстары мен оны дамытуға арналған шығыстардан асып түсетін Алатау қаласы жиынтық бюджетінің жай-күйі;
14) инвестициялар - пайда алу мақсатының болуына немесе болмауына қарамастан, Алатау қаласының заңнамасына сəйкес Алатау қаласының аумағында осы Конституциялық заң қолданысқа енгізілген күннен бастап инвестор салатын (салған) мүліктік игіліктер мен құқықтардың барлық түрлері, оның ішінде:
ақша, жылжымалы жəне жылжымайтын мүлік, сондай-ақ сервитуттан, кепілдіктен, кепілгерліктен, ипотекадан, кепілден, жалға алудан туындайтын басқа да мүліктік құқықтар жəне өзге де осыған ұқсас құқықтар;
облигациялар мен акциялар, бағалы қағаздар мен борыштық міндеттемелердің басқа да түрлері, пайлар, үлестік қатысу немесе заңды тұлғаға қатысудың кез келген ұқсас нысандары;
ақшалай талаптар, жұмыстарды орындау немесе экономикалық құндылығы бар кез келген өзге талап ету құқығы;
зияткерлік меншік құқықтары, зияткерлік шығармашылық қызмет нəтижелеріне құқықтар, оның ішінде Қазақстан Республикасының заңнамасына сəйкес қорғалатын авторлық жəне сабақтас құқықтар, патенттер, өнертабыстар, өнеркəсіптік үлгілер, пайдалы модельдер, тауар белгілері немесе қызмет көрсету белгілері, фирмалық атаулар, сондай-ақ іскерлік бедел (гуд-вилл), техникалық процестер мен ноу-хау;
заң, лицензия немесе шарт негізінде, оның ішінде мемлекеттік-жекешелік əріптестік шеңберінде берілген, кəсіпкерлік қызметті жүзеге асыруға арналған кез келген құқықтар;
15) инвестициялық дау - мыналардың:
инвестицияларды қорғау туралы ережелерді (экспроприациядан қорғауды жəне сот төрелігінен бас тартуды қоса алғанда) Қазақстан Республикасының бұзуына байланысты инвестор мен Қазақстан Республикасының;
Алатаудың резидент заңды тұлғасындағы қатысу үлестерін (акцияларын) иеленуге, пайдалануға жəне оларға билік етуге қатысты Алатаудың осындай резидент заңды тұлғасының қатысушысы (акционері) болатын инвестор мен əкімшілік органның;
инвестициялық жобаны іске асыруға байланысты туындайтын, инвестор мен əкімшіліктің жəне (немесе) өзге де əкімшілік органдардың атынан Қазақстан Республикасының арасындағы кез келген дау, оның ішінде мыналарға:
əкімшіліктің немесе өзге де əкімшілік органдардың инвесторлардың құқықтары мен заңды мүдделерін бұзатын əкімшілік əрекеттеріне (əрекетсіздігіне) немесе əкімшілік актілеріне;
инвесторлардың инвестициялық жобаны іске асыру барысында Алатау қаласы заңнамасының ережелерін қоса алғанда, Қазақстан Республикасының заңнамасын бұзатын əрекеттеріне (əрекетсіздігіне) байланысты дау;
16) инвестициялық жоба - Алатаудың резидент заңды тұлғасының Алатау қаласының басым саласында жəне тиісті бизнес-лицензияда, сондай-ақ мемлекеттік-жекешелік əріптестік жобасын іске асыру үшін - тиісті мемлекеттік-жекешелік əріптестік шартында айқындалған құнға, мерзімдерге жəне өзге де талапарға сəйкес инвестицияларды жүзеге асыруын көздейтін жоба;
17) инвестор - осы Конституциялық заңға сəйкес инвестицияларды жүзеге асыратын, меншік нысанына қарамастан, қолданылып жүрген заңнамаға сəйкес тиісті түрде құрылған немесе ұйымдастырылған заңды тұлға жəне жеке тұлға;
18) инфрақұрылым сапасы жоғары елдер - əкімшіліктің нормативтік құқықтық актісінде айқындалатын, өнімнің, жұмыстардың, процестер мен көрсетілетін қызметтердің сапасы жөніндегі реттеуші талаптар жүйесінің тиімді жұмыс істеуі мен сақталуын қамтамасыз ететін тиісті салалардағы инфрақұрылым сапасы жоғары шет мемлекеттер немесе олардың жекелеген өңірлері;
19) Кеңес - əкімшіліктің жоғары басқару органы болатын Алатау қаласының Кеңесі, оның мүшелерінің құрамы мен санын Қазақстан Республикасының Президенті айқындайды;
20) реттеп лицензиялау - реттеуші лицензияны беруге жəне соған қатысты Алатау қаласының заңнамасында көзделген өзге де əрекеттерді жасауға байланысты іс-шаралар мен əрекеттер кешені;
21) реттеуші лицензия - белгіленген біліктілік талаптарына жəне өзге де талаптарға сəйкес келген жағдайда, Алатау резидентінің мемлекет тарапынан реттелуге тиіс белгілі бір қызмет түрін жүзеге асыру құқығын растайтын құжат;
22) реттеуші рұқсат - əкімшілік органның тұлғаға эксперименттік құқықтық режимге қатысуға, сондай-ақ жекелеген операцияны жасауға, жеке жобаны іске асыруға не Алатау қаласының аумағында өзге де нақты əрекеттер жасауға құқық беретін құжаты немесе шешімі;
23) рұқсат беру рəсімі - реттеуші рұқсатты беруге жəне соған қатысты Алатау қаласының заңнамасында көзделген өзге де əрекеттерді жасауға байланысты іс-шаралар мен əрекеттер кешені;
24) рұқсат етілетін электрондық цифрлық қолтаңбалар - Қазақстан Республикасының цифрлық заңнамасына сəйкес танылатын электрондық цифрлық қолтаңбалар, сондай-ақ əкімшіліктің нормативтік құқықтық актісінде белгіленген тəртіппен жəне өлшемшарттар сақталған кезде Алатау қаласының заңнамасы бойынша пайдалануға рұқсат етілетін шетелдік электрондық цифрлық қолтаңбалар;
25) салықтық преференция - инвестициялық жобаны іске асыру үшін Алатау резидентіне берілген, мөлшерлемені төмендету, бір немесе бірнеше салықты жəне (немесе) бюджетке төленетін басқа да міндетті төлемдерді төлеуден ішінара немесе толық босату, салық салу объектісін жəне (немесе) салықтық базаны, салық салу объектісінің немесе салықтық базаның қосымша шегерімдерін, түзетулерін өзгерту түріндегі Алатау қаласында белгіленген жалпы салық режимінен ауытқу;
26) сəулет, қала құрылысы жəне құрылыс саласындағы рұқсат етілетін практикалар (бұдан əрі - рұқсат етілетін практикалар) - қызметті лицензиялаған кезде Алатау қаласында қолданылуына рұқсат етіледі деп танылған халықаралық құрылыс нормалары мен қағидалары, халықаралық стандарттар, өңірлік стандарттар, шет мемлекеттердің стандарттары, стандарттау жөніндегі халықаралық ұйымдардың, стандарттау жөніндегі өңірлік ұйымдардың жəне (немесе) шет мемлекеттердің техникалық-экономикалық ақпарат сыныптауыштары не шет мемлекеттер сəулетшілерінің, жобалаушыларының, құрылысшыларының жəне (немесе) инженерлерінің кəсіптік қауымдастықтары мен өзге де ұйымдарының стандарттары;
27) халықаралық жобалау құжаттамасы - осы Конституциялық заңға жəне əкімшіліктің нормативтік құқықтық актілеріне сəйкес танылатын, тиісті лицензиясы немесе өзге де ұқсас рұқсат құжаты бар шетелдік жобалаушының рұқсат етілетін практикаларға сəйкес əзірлеген жобалау құжаттамасы;
28) шетелдік жұмыскер - Алатау қаласында, оның ішінде корпоративішілік ауысу шеңберінде еңбек қызметін жүзеге асыру үшін Алатаудың резидент заңды тұлғасы тартатын шетелдік азамат немесе азаматтығы жоқ адам.
