Қазақстан Республикасында мүгедектiгi бойынша, асыраушысынан
айырылу жағдайы бойынша және жасына байланысты берiлетiн мемлекеттік
әлеуметтiк жәрдемақылар туралы Қазақстан Республикасының
1997 жылғы 16 маусымдағы № 126-I Заңы
(2004.31.12. берілген өзгерістер мен толықтырулармен)
Осы редакция 2005 ж. 15 желтоқсандағы енгізілген өзгерістеріне дейін қолданылды
1 тарау. Жалпы ережелер
ҚР 16.11.99 ж. № 482-1 Заңымен 1-бап өзгертілді
1-бап. Азаматтардың мемлекеттік әлеуметтiк
жәрдемақылар алуға құқығы
1. Қазақстан Республикасы азаматтарының осы Заңда және Қазақстан Республикасының оған сәйкес қабылданған өзге де нормативтiк құқықтық актілерінде көзделген негiздерде және тәртiппен мүгедектiгi бойынша, асыраушысынан айырылу жағдайы бойынша және жасына байланысты мемлекеттік әлеуметтiк жәрдемақылар алуға құқығы бар.
2. Қазақстан Республикасында тұрақты тұратын шетелдiк азаматтар мен азаматтығы жоқ адамдар Қазақстан Республикасының азаматтарымен бірдей мемлекеттік әлеуметтiк жәрдемақы алу құқығын пайдаланады.
3. Бір мезгiлде әртүрлi мемлекеттік әлеуметтiк жәрдемақылар алуға құқығы бар адамдарға олардың тыңдауы бойынша бір жәрдемақы тағайындалады.
4. Мемлекеттік әлеуметтiк жәрдемақылар (бұдан әрi - жәрдемақылар) мемлекеттік әлеуметтiк қамсыздандыру жүйесiне кiредi және мүгедектiгiне, асыраушысынан айрылуына және жасына байланысты оларды алуға мұқтаж азаматтарға ақша қаражатын мемлекеттің мезгiл-мезгiл төлеп тұруы болып табылады.
2004.20.12 № 13-III ҚР Заңымен 1-1-баппен толықтырлыды (2005.01.01. бастап қолданысқа енгізілді)
1-1-бап. Халықты әлеуметтiк қорғау саласындағы органдар
1. Уәкiлеттi мемлекеттік орган - халықты әлеуметтiк қорғау мәселелерi жөніндегі орталық атқарушы орган.
2. Уәкiлеттi ұйым (бұдан әрi - Орталық) - осы Заңның шарттары бойынша функцияларды жүзеге асыруға Қазақстан Республикасының Yкіметі уәкiлеттiк берген заңды тұлға.
3. Жәрдемақы төлеу жөніндегі уәкiлеттi орган - Орталықтың аумақтық бөлiмшелерi.
4. Жәрдемақы тағайындау жөніндегі уәкiлеттi мемлекеттік орган - уәкiлеттi мемлекеттік органның аумақтық бөлiмшелерi.
2004.20.12 № 13-III ҚР Заңымен 2-бап өзгертілді (2005.01.01. бастап қолданысқа енгізілді) (бұр. ред. қара)
2-бап. Жәрдемақылар төлеуге арналған қаражат
Осы Заңға сәйкес жәрдемақылар төлеу бюджет қаражаты есебiнен жүзеге асырылады.
2004.20.12 № 13-III ҚР Заңымен 3-бап өзгертілді (2005.01.01. бастап қолданысқа енгізілді) (бұр. ред. қара)
3-бап. Жәрдемақылар тағайындау тәртібі
1. Жәрдемақылар тағайындау үшiн өтiнiш жасау жәрдемақыға құқығы пайда болғаннан кейiн, қандай да бір мерзiммен шектелмей кез келген уақытта жүзеге асырылуы мүмкiн.
2. Жәрдемақы тағайындау туралы өтiнiш жәрдемақыға құқығы бар адамның тұрғылықты жерi бойынша жәрдемақы төлеу жөніндегі уәкiлеттi органға берiледi, оған тiзбесiн уәкiлеттi мемлекеттік орган бекiтетiн құжаттар қоса тiркеледi.
3. Азаматтарға жәрдемақы тағайындауды Қазақстан Республикасының Үкіметі белгiлеген тәртiппен жәрдемақы тағайындау жөніндегі уәкiлеттi мемлекеттік орган жүргiзедi.
4. Жәрдемақы тағайындау үшiн құжаттарды қарау өтiнiш берiлген күннен бастап он күн мерзiмнен аспауға тиiс.
Жәрдемақы төлеу жөніндегі уәкiлеттi орган тиiстi шешiм шығарылғаннан кейiн бес күннен кешiктiрмей ол туралы өтiнiш берушiге хабарлайды.
Жәрдемақы тағайындаудан бас тартылған жағдайда жәрдемақы тағайындау жөніндегі уәкiлеттi мемлекеттік орган бас тарту себебiн жазбаша дәлелдеп, өтiнiш берушiге құжаттарын қайтаруға мiндеттi.
5. Жәрдемақы тағайындау жөніндегі уәкiлеттi мемлекеттік органның шешіміне сот тәртібімен шағым жасалуы мүмкiн.
2004.20.12 № 13-III ҚР Заңымен 4-бап өзгертілді (2005.01.01. бастап қолданысқа енгізілді) (бұр. ред. қара)
4-бап. Жәрдемақының бір түрiн екiншiсiне ауыстыру
Жәрдемақының бір түрiн екiншiсiне ауыстыру жәрдемақы алушы адамның жәрдемақы тағайындау жөніндегі уәкiлеттi мемлекеттік органға барлық қажеттi құжаттарымен қоса өтiнiш берген күннен бастап жүргiзiледi.
Жәрдемақының бір түрiнен екiншiсiне ауыстыру туралы өтiнiш беру, құжаттарды қарау, шешiм қабылдау тәртібі, сондай-ақ осындай жәрдемақыны төлеу осы Заңның 3-бабының 2 - 5-тармақтарына сәйкес жүргiзiледi.
2004.20.12 № 13-III ҚР Заңымен 5-бап өзгертілді (2005.01.01. бастап қолданысқа енгізілді) (бұр. ред. қара)
5-бап. Жәрдемақылар тағайындау мерзiмi
1. Жасына байланысты жәрдемақы сондай жәрдемақы тағайындауға өтiнiш берiлген күннен бастап тағайындалады.
2. Мүгедектiгi бойынша жәрдемақы мүгедектiгi белгiленген күннен бастап, бірақ оны тағайындауға өтiнiш берген күнге дейiн әрi кеткенде 3 айдан аспайтын мерзiм үшiн тағайындалады.
3. Асыраушысынан айырылу жағдайы бойынша жәрдемақылар жәрдемақыға құқығы пайда болған күннен бастап тағайындалады, бірақ барлық қажеттi құжаттармен жәрдемақыға тағайындауға өтiнiш берiлген күнге дейiн әрi кеткенде 12 айдан аспайтын мерзiм үшiн.
4. Жәрдемақы төлеу жөніндегі уәкiлеттi органның өтiнiштi барлық қажеттi құжаттармен бірге қабылдаған күнi жәрдемақы тағайындау үшiн өтiнiш берiлген күн болып есептеледi.
ҚР 05.04.99 ж. № 366-1 ; 2004.20.12 № 13-III (2005.01.01. бастап қолданысқа енгізілді) (бұр. ред. қара) Заңдарымен 6-бап өзгертілді
6-бап. Жәрдемақыларды төлеу тәртібі
1. Жәрдемақылар аяқталған ай үшiн төленедi.
2. Алушы уақытында талап етпеген жәрдемақылардың есептелген сомасы өткен уақыт үшiн, бірақ оларды алу үшiн өтiнiш беру алдындағы 3 жылдан аспайтын уақытқа төленедi.
3. Жәрдемақы тағайындау және төлеу жөніндегі уәкiлеттi органдардың кiнәсi бойынша уақытында алынбаған жәрдемақылар сомасы қандай да бір мерзiммен шектелмей, өткен уақыт үшiн бір мезгiлде төленедi.
3-1. Мемлекеттік әлеуметтiк жәрдемақыларды алушы қайтыс болған жағдайда отбасы мүшелерiне не жерлеудi жүзеге асырған адамға он бес еселенген айлық есептiк көрсеткiш мөлшерiнде жерлеуге арналған біржолғы төлем төленедi.
4. Жәрдемақыларды алу Қазақстан Республикасының заңдарында көзделген тәртiппен жүзеге асырылады.
7-бап. Жәрдемақылардан ұстап қалу
1. Жәрдемақылардан ұстап қалу атқару iсi тәртібімен жүргiзiлуi мүмкiн.
2. Жәрдемақыдан ұстап қалу төленуге тиiстi сомадан жүргiзiледi.
3. Жәрдемақыдан төленуге тиiстi соманың 25 процентiнен артық ұстап қалуға болмайды.
4. Жәрдемақыны тағайындайтын және төлейтiн органның кiнәсi бойынша жәрдемақы түрiнде артық төленген сомалар ұстап қалуға жатпайды.
2 тарау. Мүгедектігі бойынша жәрдемақы
2004.20.12 № 13-III ҚР Заңымен 8-бап өзгертілді (2005.01.01. бастап қолданысқа енгізілді) (бұр. ред. қара)
8-бап. Жәрдемақы тағайындау шарттары
1. Мүгедектiгi бойынша жәрдемақылар мүгедектiкке душар болған жағдайда жәрдемақыға өтiнiш жасалған уақытта жұмыстың тоқтатылғанына немесе жалғасуына қарамастан тағайындалады.
2. Мүгедектiгi бойынша жәрдемақылар қашан болғанына - жұмыс немесе қызмет кезiнде, жұмысқа кiрiскенге дейiн немесе жұмысты тоқтатқаннан кейiн болғанына қарамастан тағайындалады.
3. Мүгедек адамға зейнетақы төлеу тағайындалған кезде мүгедектiгi бойынша жәрдемақы төлеу тоқтатылады немесе осы Заңның 12-бабының 5-тармағына сәйкес Орталық пен жинақтаушы зейнетақы қорларынан алатын зейнетақы төлемдерiнiң мөлшерi ескерiле отырып қайта қаралады.
4. Зейнетақы төлемдерiн алуға құқық беретiн жасқа жеткен мүгедек адамдарды қайта куәландыру олардың өтiнiшi бойынша ғана жүргiзiледi.
ҚР 21.03.2002 № 308 Заңымен 9-бап жана редакцияда; 2004.20.12 № 13-III ҚР Заңымен 9-бап өзгертілді (2005.01.01. бастап қолданысқа енгізілді) (бұр. ред. қара)
9-бап. Мүгедектік топтары
Тіршілік ету әрекетінің шектелу, оның ішінде еңбекке қабілетін жоғалту дәрежесіне қарай мүгедектік үш топқа бөлінеді.
Мүгедектіктің себептерін, топтарын, еңбекке қабілетін жоғалту дәрежесін, сондай-ақ мүгедек болған уақытты жәрдемақы тағайындау жөніндегі уәкiлеттi мемлекеттік орган анықтайды.
Мүгедектікті куәландыру тәртібін, оның себептерін, топтарын және еңбекке қабілетін жоғалту дәрежесін анықтауды Қазақстан Республикасының заңдарына сәйкес халықты әлеуметтік қорғау саласындағы орталық атқарушы орган азаматтардың денсаулығын сақтау саласындағы басшылықты жүзеге асыратын уәкілетті орталық атқарушы органмен келісе отырып белгілейді.
ҚР 21.03.02 ж. № 308 ; 2004.20.12 № 13-III (2005.01.01. бастап қолданысқа енгізілді) (бұр. ред. қара) Заңдарымен 10-бап өзгертілді
10-бап. Мүгедектiгi бойынша жәрдемақы тағайындау мерзiмi
1. Мүгедектiгi бойынша жәрдемақы мүгедектiктiң жәрдемақы тағайындау жөніндегі уәкiлеттi мемлекеттік орган белгілеген бүкiл кезеңiне тағайындалады.
2. Мүгедектiк тобы өзгерген жағдайда жаңа мөлшерде жәрдемақы төлеу мүгедектiк тобы өзгерген күннен бастап жүзеге асырылады.
Қайта куәландырылушы еңбекке қабiлеттi деп танылған жағдайда жәрдемақы еңбекке қабiлеттi деп танылған күнге дейiн төленедi.
3. Егер мүгедек адам қайта куәландыруға ол үшiн тағайындалған мерзiмде жәрдемақы тағайындау жөніндегі уәкiлеттi мемлекеттік органға келмесе, оған жәрдемақы төлеу тоқтатыла тұрады, ал ол мүгедек деп қайта танылған жағдайда тоқтатылған күннен бастап, бірақ бір айдан аспайтын мерзiм үшiн қайта басталады.
Дәлелдi себептер бойынша қайта куәландыру мерзiмiн өткiзiп алған жағдайда жәрдемақы төлеу, төлем тоқтатылған күннен бастап, егер жәрдемақы тағайындау жөніндегі уәкiлеттi мемлекеттік орган оны осы кезең үшiн мүгедек деп таныса, қайта куәландырылған күнге дейiн, бірақ әрi кеткенде 3 жылдан аспайтын мерзiм үшiн жүргiзiледi. Бұл ретте, егер қайта куәландыру кезiнде мүгедек адам мүгедектiктiң басқа (неғұрлым жоғары немесе неғұрлым төмен) тобына ауыстырылса, аталған уақыт үшiн жәрдемақы бұрынғы топ бойынша төленедi.
Егер жалпы аурудың салдарынан еңбек қабiлетiн жоғалтқан мүгедекке жәрдемақы төлеу еңбек қабiлетiнiң қалпына келуi себептi тоқтатылса немесе ол қайта куәландыруға дәлелдi себепсiз келмеуiнiң салдарынан жәрдемақы алмаса, оны кейiннен мүгедек деп таныған жағдайда бұрын тағайындалған жәрдемақыны төлеу, жәрдемақы төлеу тоқтатылғаннан кейiн 5 жылдан аспайтын уақыт өткен жағдайда, мүгедектiк анықталған күннен бастап жаңартылады. Егер 5 жылдан астам уақыт өтсе, жәрдемақы жалпы негiздерде қайта тағайындалады.
ҚР 16.11.99 ж. № 482-1 ; 2004.31.12 № 28-III (бұр. ред. қара) (2005 ж. 1 қаңтардан бастап күшіне енеді) Заңдарымен 11-бап өзгертілді
11-бап. Мүгедектiгi бойынша жәрдемақыға құқығы бар мүгедектердiң санаттары
Мүгедектiгi бойынша жәрдемақыға құқығы бар мүгедектерге:
1) жалпы аурулардан, еңбекте мертiгуден, кәсiби аурулардан мүгедек болғандар, он алты жасқа дейiнгi мүгедек балалар, он алтыдан он сегіз жасқа дейiнгi бірiншi, екiнші, үшiншi топтағы мүгедек балалар
1-1) бала кезiнен мүгедектер;
2) мүгедектiкке әскери қызметтен өту кезiнде алған жарақаттың, контузияның, мертiгудiң, аурудың салдарынан душар болған мерзiмдi қызметтегi әскери қызметшiлер қатарынан шыққан мүгедектер, азаматтық немесе әскери мақсаттағы ядролық объектiлердегi авариялардың зардаптарын жою кезiнде не ядролық объектiлердегi авариялық жағдайлар салдарынан мүгедек болған адамдар;
3) әскери қызмет мiндеттерiн (қызмет мiндеттерiн) атқаруға байланысты емес жазатайым жағдайдың салдарынан болған мертiгу не әскери және қызмет борышын орындауға байланысты емес ауру салдарынан мүгедектiкке душар болған жағдайда әскери қызметшiлер (мерзiмдi қызметтегi әскери қызметшiлердi қоспағанда), Қазақстан Республикасының iшкi iстер органдары мен бұрынғы Мемлекеттік тергеу комитетiнiң басшы және қатардағы құрамының адамдары қатарынан шыққан мүгедектер;
4) әскери қызметтен өту кезiнде жаралану, контузия, мертiгу, ауыруы салдарынан мүгедектiкке душар болған әскери қызметшiлер (мерзiмдi әскери қызметтегi әскери қызметшiлердi қоспағанда), қызмет мiндеттерiн атқару кезiнде жаралану, контузия, мертiгу, ауыруы салдарынан мүгедектiкке душар болған Қазақстан Республикасының iшкi iстер органдары мен бұрынғы Мемлекеттік тергеу комитетiнiң қызметкерлерi қатарынан шыққан мүгедектер;
5) себеп-салдарлық байланысы анықталған жағдайда төтенше экологиялық жағдайлар, соның iшiнде ядролық жарылыстар мен сынақтар кезіндегі радиациялық әсер етудiң салдарынан және/немесе олардың зардаптарынан болған мүгедектер жатады.
ҚР 21.03.2002 № 308-II Заңымен 12-бап жаңа редакцияда
ҚР 09.01.03 ж. № 382-II ; 2004.20.12 № 13-III (2005.01.01. бастап қолданысқа енгізілді) (бұр. ред. қара); 2004.31.12 № 28-III (бұр. ред. қара) (2005 ж. 1 қаңтардан бастап күшіне енеді) Заңдарымен 12-бап өзгертілді
12-бап. Мүгедектiгi бойынша жәрдемақының мөлшерi
1. Осы Заңның 11-бабының 1), 1-1) және 3) тармақшаларында аталған мүгедектерге мүгедектiгi бойынша айлық жәрдемақы:
бірiншi топтағы мүгедектерге - тиiстi қаржы жылына арналған республикалық бюджет туралы заңда белгiленетiн 10 айлық есептiк көрсеткiш (бұдан әрi - айлық есептiк көрсеткiш);
екiншi топтағы мүгедектерге - 7,5 айлық есептiк көрсеткiш;
үшiншi топтағы мүгедектерге - 5 айлық есептiк көрсеткiш;
он алты жасқа дейiнгi мүгедек балаларға - 7 айлық есептiк көрсеткiш;
бала кезiнен бірiншi топтағы мүгедектерге - 10 айлық есептiк көрсеткiш;
бала кезiнен екiншi топтағы мүгедектерге - 8 айлық есептiк көрсеткiш;
бала кезiнен үшiншi топтағы мүгедектерге - 6 айлық есептiк көрсеткiш;
он алтыдан он сегіз жасқа дейiнгі біріншi топтағы мүгедек балаларға - 10 айлық есептiк көрсеткіш;
он алтыдан он сегіз жасқа дейiнгi екiншi топтағы мүгедек балаларға - 8 айлық есептiк көрсеткiш;
он алтыдан он сегiз жасқа дейiнгі үшiншi топтағы мүгедек балаларға - 6 айлық есептiк көрсеткіш мөлшерiнде тағайындалады.
2. Осы Заңның 11-бабының 2) және 5) тармақшаларында аталған мүгедектерге мүгедектiгi бойынша айлық жәрдемақы:
бірiншi топтағы мүгедектерге - 12 айлық есептiк көрсеткiш;
екiншi топтағы мүгедектерге - 9,5 айлық есептiк көрсеткiш;
үшiншi топтағы мүгедектерге - 7 айлық есептiк көрсеткiш мөлшерiнде тағайындалады.
3. Осы Заңның 11-бабының 4) тармақшасында аталған мүгедектерге мүгедектiгi бойынша айлық жәрдемақы:
бірiншi топтағы мүгедектерге - 16 айлық есептiк көрсеткiш;
екiншi топтағы мүгедектерге - 11 айлық есептiк көрсеткiш;
үшiншi топтағы мүгедектерге - 7 айлық есептiк көрсеткiш мөлшерiнде тағайындалады.
4. Жұмыс iстейтiн жәрдемақы алушыларға мүгедектiгi бойынша жәрдемақы толық мөлшерiнде төленедi.
5. Егер Орталықтан және жинақтаушы зейнетақы қорларынан берiлетiн жиынтық зейнетақы төлемдерiнiң мөлшерi мүгедектердiң тиiстi санаттары үшiн белгiленген мүгедектiгi бойынша айлық жәрдемақы мөлшерiнен кем болса, жәрдемақы төлеу зейнетақы төлемдерiне мүгедектердiң сол санаты үшiн белгiленген жәрдемақы мөлшерiне дейiн жеткiзiлген тиiстi қосымша төлемдер түрiнде жүргiзiледi.
3 тарау. Асыраушысынан айырылу жағдайы
бойынша жәрдемақы
ҚР 16.11.99 ж. № 482-1 Заңымен 13-бап өзгертілді
13-бап. Жәрдемақыны тағайындау шарттары
1. Асыраушысынан айрылу жағдайы бойынша жәрдемақы алуға, асыраушысы қайтыс болған отбасының еңбекке жарамсыз, оның асырауында болған мүшелерiнiң құқығы бар. Бұл орайда осы баптың 2-тармағының 3) тармақшасында аталған балалар мен адамдарға жәрдемақылар олар асыраушының асырауында болғандығына қарамастан тағайындалады.
2. Отбасының еңбекке жарамсыз мүшелерi болып:
1) Егер он сегіз жасқа толғанға дейiн мүгедек болып қалса, он сегіз жасқа толмаған және осы жастан асқан балалары (оның iшiнде асырап алған балалары, өгей ұлдары мен өгей қыздары), аға-iнiлерi, апа-сiңлілерi және немерелерi есептеледi, бұл орайда аға-iнiлерi, апа-сiңлiлерi және немерелерi - егер олардың еңбекке жарамды ата-аналары болмаса, өгей ұлдары мен қыздары - егер олар ата-аналарынан алимент алмайтын болса есептеледi.
Асыраушысынан айрылу жағдайы бойынша жәрдемақы алуға құқығы бар кәмелетке толмағандар бұл құқықты өздерiн асырап алған кезде де сақтайды;
2) егер зейнетақымен қамсыздандыру туралы заңдарға сәйкес зейнеткерлiк жасына жетсе, әкесi, шешесi (оның iшiнде асырап алушылар), зайыбы, жұбайы;
3) егер қайтыс болған асыраушысының 8 жасқа толмаған балаларын, iнiлерiн, қарындастарын немесе немерелерiн күтумен айналысса және жұмыс iстемейтiн болса, жасы мен еңбекке жарамдылығына қарамастан ата-аналардың немесе жұбайлардың біреуi не атасы, әжесi, аға-iнiсi немесе апа-сiңлiсi;
4) егер зейнетақымен қамсыздандыру туралы заңдарға сәйкес зейнеткерлiк жасына жетсе және заң бойынша асырауға мiндеттi адамдары болмаса және өмiр сүру үшiн басқа қаражат көздерi жоқ болса, атасы мен әжесi есептеледi.
3. он сегіз жастан асқан оқитын азаматтар асыраушысынан айрылу жағдайы бойынша жәрдемақы орта білім беру жүйесiнде, жоғары және арнаулы орта білім беру жүйесiнiң күндiзгi оқу нысанында оқу орнын бiтiргенге дейiн, бірақ жиырма үш жастан аспайтын шекте жәрдемақы алуға құқығы бар.
4. Қайтыс болған адамның асырауындағы отбасы мүшелерi, егер олар оның толық асырауында болса немесе одан өздерi үшiн өмiр сүрудiң тұрақты және негiзгi қаражат көзi болған көмек алып тұрса, оның асырауында болған деп есептеледi.
5. Ата-анасының екеуiнен де айырылған балаларға (тұлдыр жетiмдерге) тағайындалған жәрдемақылар олардың заңды өкiлiне (асырап алушыға, қамқоршысына) төленедi.
6. Осы Заңның қайтыс болғандардың отбасына қатысты барлық ережелерi, егер бұл фактiлер сот тәртібімен белгiленген болса, тиiсiнше хабар-ошарсыз кеткендердiң немесе қайтыс болды деп жарияланғандардың отбасына да қолданылады.
14-бап. Жәрдемақы тағайындалатын кезең
Асыраушысынан айрылу жағдайы бойынша жәрдемақы қайтыс болған адамның отбасы мүшесi осы Заңның 13-бабына сәйкес еңбекке жарамсыз деп саналатын бүкiл кезеңге, ал "Қазақстан Республикасында зейнетақымен қамсыздандыру туралы" Қазақстан Республикасының Заңына сәйкес зейнетақы төлемдерiн алуға құқық беретiн жасқа жеткен отбасы мүшелерiне өмiр бойына белгiленедi.
15-бап. Отбасының барлық мүшелерiне бір жәрдемақы тағайындау
1. Асыраушысынан айрылу жағдайы бойынша жәрдемақыға құқығы бар отбасының барлық мүшелерiне ортақ бір жәрдемақы тағайындалады.
2. Отбасы мүшесiнiң талап етуi бойынша оның жәрдемақы үлесi бөлiнедi және оған жеке төленедi.
3. Жәрдемақының үлесiн бөлу оны бөлуге өтiнiш жасаған күннен бастап жүзеге асырылады.
4. Асыраушысынан айрылу жағдайы бойынша жәрдемақымен қамсыздандырылған отбасы мүшелерiнiң саны өзгерген кезде жәрдемақының мөлшерi жәрдемақыға құқығы бар отбасы мүшелерiнiң санына қарай тиiсiнше көбейтiледi немесе азайтылады.
5. Отбасының мүшелерiнiң біреуiне жәрдемақы төлеу тоқтатыла тұрған немесе жәрдемақы төлеудi тоқтата тұруға себеп болған жағдаяттар өткеннен кейiн оны төлеу қайта басталған жағдайларда да жәрдемақы мөлшерiн нақ солайша қайта қарау белгiленедi.
ҚР 16.11.99 ж. № 482-1 ; 2004.20.12 № 13-III (2005.01.01. бастап қолданысқа енгізілді) (бұр. ред. қара) 2004.31.12 № 28-III (бұр. ред. қара) (2005 ж. 1 қаңтардан бастап күшіне енеді) Заңдарымен 16-бап өзгертілді
16-бап. Асыраушысынан айрылу жағдайы бойынша жәрдемақының мөлшерi
1. Асыраушысынан айырылу жағдайы бойынша айлық жәрдемақының ең жоғары мөлшері отбасының барлық еңбекке жарамсыз мүшелеріне 12 айлық есептiк көрсеткіш мөлшерiнде тағайындалады.
2. Отбасының асыраушысынан айрылу жағдайы бойынша айлық жәрдемақы алуға құқығы бар еңбекке жарамсыз бір мүшесi болған кезде жәрдемақы 5 айлық есептiк көрсеткiш;
екеу болған кезде - отбасының еңбекке жарамсыз әрбір мүшесiне 4,3 айлық есептiк көрсеткiш;
үшеу болған кезде - отбасының еңбекке жарамсыз әрбір мүшесiне 3,5 айлық есептiк көрсеткiш;
төртеу болған кезде - отбасының еңбекке жарамсыз әрбір мүшесiне 2,8 айлық есептiк көрсеткiш;
бесеу болған кезде - 2,3 айлық есептiк көрсеткiш мөлшерiнде тағайындалады.
Отбасының еңбекке жарамсыз алты және одан да көп мүшелерi болған кезде әркiмге арналған жәрдемақының мөлшерi он екі еселенген айлық есептiк көрсеткiштен бірдей үлес ретiнде есептеледi.
3. Ата-аналарының екеуiнен де айрылған жағдайда балаларға (тұлдыр жетiмдерге) айлық жәрдемақы әрбір балаға - бес айлық есептiк көрсеткiш мөлшерiнде, отбасының еңбекке жарамсыз өзге мүшелерiне - 3 айлық есептiк көрсеткiш мөлшерiнде, бірақ отбасының еңбекке жарамсыз барлық мүшелерiне 15 айлық есептiк көрсеткiштен аспайтын мөлшерде тағайындалады.
4. Қызмет мiндеттерiн атқару немесе әскери қызметтен өту кезiнде қаза тапқан немесе жаралану, контузия, мертiгу, ауыруы салдарынан қайтыс болған әскер қызметшiлердiң, Қазақстан Республикасының iшкi iстер органдары мен бұрынғы Мемлекеттік тергеу комитетi қызметкерлерiнiң отбасы мүшелерiне асыраушысынан айрылу жағдайы бойынша айлық жәрдемақының мөлшерi отбасының еңбекке жарамсыз әрбір мүшесiне бір айлық есептiк көрсеткiшке, бірақ отбасының барлық мүшелерiне 15 айлық есептiк көрсеткiштен аспайтын мөлшерде көбейтiледi.
5. Егер отбасының еңбекке жарамсыз мүшелерiнiң Орталық пен жинақтаушы зейнетақы қорларынан алатын жиынтық зейнетақы төлемдерiнiң мөлшерi асыраушысынан айрылу жағдайы бойынша алатын айлық жәрдемақының мөлшерiнен кем болса, жәрдемақы төлеу зейнетақы төлемдерiне отбасының осы еңбекке жарамсыз мүшелерi үшiн белгiленген жәрдемақының мөлшерiне дейiнгi тиiстi қосымша төлем түрiнде жүргiзiледi.
4 тарау. Жасына байланысты жәрдемақылар
2004.20.12 № 13-III ҚР Заңымен 17-бап өзгертілді (2005.01.01. бастап қолданысқа енгізілді) (бұр. ред. қара)
17-бап. Жәрдемақыларды тағайындау шарттары
Жасына байланысты жәрдемақы азаматтарға зейнетақы төлемдерiне құқығы болмаған жағдайда "Қазақстан Республикасында зейнетақымен қамсыздандыру туралы" Қазақстан Республикасының Заңында белгiленген жасқа жеткен кезде, не зейнетақы төлемiн зейнетақының ең төмен мөлшерiнен аз мөлшерде алған жағдайда Орталықтан, жинақтаушы Зейнетақы қорларынан тағайындалады.
18-бап. Жасына байланысты әлеуметтiк жәрдемақының мөлшерi
1. Жасына байланысты айлық жәрдемақы 3 айлық есептiк көрсеткiш мөлшерiнде тағайындалады.
2. Зейнеткерлiк жасқа жеткен және "Қазақстан Республикасында зейнетақымен қамсыздандыру туралы" Қазақстан Республикасының Заңына сәйкес мiндеттi зейнетақы жарналарын төлеудi жүзеге асырған азаматтарға жасына байланысты айлық жәрдемақы заң актілерінде белгiленген зейнетақының ең төменгi мөлшерiне дейiнгi тиiстi қосымша төлем түрiнде берiледi.
5 тарау. Қорытынды және өтпелі ережелер
19-бап. Халықаралық шарттар
Егер Қазақстан Республикасы бекiткен халықаралық шартта осы Заңдағыдан өзгеше ережелер белгiленсе, халықаралық шарттың ережелерi қолданылады.
2004.20.12 № 13-III ҚР Заңымен 20-бап өзгертілді (2005.01.01. бастап қолданысқа енгізілді) (бұр. ред. қара)
20-бап. Мемлекеттік кепiлдiктер
1. 1998 жылғы 1 қаңтарға дейiн қолданылып келген заңдар бойынша әлеуметтiк зейнетақылар, мүгедектiгi бойынша және асыраушысынан айрылу жағдайы бойынша зейнетақылар тағайындалған адамдарға 1998 жылғы 1 қаңтардан бастап бюджет қаражаты есебiнен 1998 жылғы 1 қаңтарға дейiн iс жүзiнде алып келген зейнетақыларының мөлшерiнен кем емес мөлшерде мүгедектiгi бойынша, асыраушысынан айрылу жағдайы бойынша және жасына байланысты мемлекеттік әлеуметтiк жәрдемақылар төленедi.
2. Аталған жәрдемақыларды төлеу осы Заңда белгiленген тәртiппен жүзеге асырылады.
21-бап. Қазақстан Республикасында мүгедектiгi бойынша,
асыраушысынан айрылу жағдайы бойынша және
жасына байланысты берiлетiн мемлекеттік әлеуметтiк
жәрдемақылар туралы заңдарды бұзғаны үшiн жауаптылық
Қазақстан Республикасында мүгедектiгi бойынша, асыраушысынан айрылу жағдайы бойынша және жасына байланысты берiлетiн мемлекеттік әлеуметтiк жәрдемақылар туралы заңдарды бұзғаны үшiн жауаптылық Қазақстан Республикасының заңдарына сәйкес белгiленедi.
22-бап. Осы Заңның күшiне енгiзiлу тәртібі
Осы Заң 1998 жылғы 1 қаңтардан бастап күшiне енедi.
Қазақстан Республикасының
Президентi
