5) жеке тексеріп қарау жүргізетін кеден органы лауазымды адамдарының іс-әрекеттеріне осы Кодекске сәйкес шағым жасауға;
6) адвокаттың қызметтерін пайдалануға құқығы бар.
5. Өзіне қатысты жеке тексеріп қарау жүргізілген жеке адамға жеке тексеріп қараудың жүргізілгені туралы хаттаманың көшірмесі, тауарлардың алынып қойғаны туралы акті беріледі.
6. Жеке тексеріп қарауды тексеріліп қаралатын адаммен бір жыныстағы кеден органының лауазымды адамдары сол жыныстағы екі куәгердің қатысуымен санитарлық-гигиеналық талаптарға сай келетін оқшауланған үй-жайда жүргізеді. Бұл үй-жайға басқа жеке тұлғалардың енуіне және олардың тарапынан жеке тексеріп қараудың жүргізілуін қадағалау мүмкіндігіне жол берілмеуге тиіс. Тексеріп қаралатын адамның дене органдарын тексеріп зерттеуді маман-дәрігер, қажет болған жағдайда арнайы медициналық техниканы пайдалана отырып жүргізуге тиіс.
Қазақстан Республикасының заң актілерінде көзделген жағдайларды қоспағанда, маман-дәрігердің кеден органы басшысының немесе оны алмастырушы адамның жеке тексеріп қарауды жүргізу туралы шешімін орындаудан жалтаруға құқығы жоқ.
7. Жеке тексеріп қараудың жүргізілгендігі туралы кеден ісі мәселелері жөніндегі уәкілетті орган бекітетін нысан бойынша хаттама жасалады.
Хаттамаға - жеке тексеріп қарауды жүргізген кеден органының лауазымды адамы, өзіне қатысты тексеріп қарау жүргізілген жеке тұлға, куәгерлер, ал тексеріп зерттеу жүргізілген кезде - дәрігер қолдарын қояды.
449-бап. Тауарларды арнаулы таңбалармен таңбалау, оларға бірдейлендіру белгілерін қою
1. Қазақстан Республикасының заңдарында көзделген жағдайларда кеден органдары кедендік бақылауды тауарларда (олардың орамаларында) арнаулы таңбалардың, бірдейлендіру белгілерінің немесе оларды Қазақстан Республикасының кедендік аумағына әкелудің заңдылығын растау үшін пайдаланылатын тауарларды белгілеудің өзге де тәсілдерінің болуын тексеру жолымен жүзеге асырады.
2. Тауарларда арнаулы таңбалардың, бірдейлендіру белгілерінің немесе тауарларды белгілеудің өзге де тәсілдерінің болмауы, егер өзінен мұндай тауарлар табылған адам, декларант не өзге де мүдделі адам басқаша дәлелдей алмаса, Қазақстан Республикасының кедендік аумағына тауарларды кедендік ресімдеу мен шығару жүргізілмей жүзеге асырылған тауарлар әкелу ретінде қаралады.
450-бап. Тауарлардың және көлік құралдарының есебі мен олар бойынша есептілік жүйесін тексеру
1. Кедендік бақылаудың нысаны ретіндегі тауарлардың және көлік құралдарының есебі мен олар бойынша есептілік жүйесін тексеру мынадай жағдайларда:
1) тұлға осы Кодекстің ережелеріне сәйкес кедендік ресімдеудің оңайлатылған рәсімдерін қолдану туралы мәлімдеген кезде;
2) Қазақстан Республикасының заңдарында айқындалған тәртіппен есепке алынуға тиіс тауарларды шартты түрде шығарған кезде;
3) кеден брокерлері, кедендік тасымалдаушылар ретіндегі қызметті жүзеге асыратын, сондай-ақ жекелеген кедендік режимдер шеңберінде және уақытша сақтау бойынша кеден қызметтерін көрсету жөніндегі қызметті жүзеге асыратын тұлғаларға қатысты;
4) кедендік бақылаудағы тауарлар мен көлік құралдарына қатысты сыртқы экономикалық қызметке қатысушыларды тексеру кезінде қолданылады.
2. Осы бапта көрсетілмеген жағдайларда, есеп пен есептілік жүйесін тексеру кеден ісі саласындағы сыртқы экономикалық және өзге де қызметті тексеруді пайдалана отырып кедендік бақылау жүргізу кезінде іске асырылуы мүмкін.
451-бап. Тауарлар мен көлік құралдарының есебін жүргізу
1. Шартты түрде шығарылған тауарлар мен көлік құралдарын, тарифтік және тарифтік емес реттеу шаралары белгіленген тауарларды бақылауды қамтамасыз ету мақсатында кеден органдары осы Кодекске сәйкес кедендік ресімдеу мен кедендік бақылау кезінде тұлғалар беретін мәліметтер негізінде, кеден ісі мәселелері жөніндегі уәкілетті орган белгілеген тәртіппен және нысандарда Қазақстан Республикасының кедендік шекарасы арқылы өткізілетін тауарлар мен көлік құралдарының есебін жүргізеді.
2. Қазақстан Республикасының аумағында шартты түрде шығарылған тауарлар мен көлік құралдарын пайдаланатын тұлғалар және осы Кодексте белгіленген өзге де тұлғалар олардың есебін жүргізуге және кеден органдарына кеден ісі мәселелері жөніндегі уәкілетті орган белгілеген тәртіппен есептілік тапсыруға міндетті.
452-бап. Үй-жайлар мен аумақтарды тексеру
1. Қазақстан Республикасының заң актілерінде көзделген жағдайларды қоспағанда, кеден бақылауын жүргізу мақсатында кеден органының лауазымды адамдары қызметтік куәлігін және кеден органының басшысы қол қойған нұсқаманы көрсеткен кезде, кедендік бақылауға жататын тауарлар мен көлік құралдары, кедендік бақылау үшін қажетті құжаттар болатын, не болуы мүмкін, не кедендік бақылаудағы тауарларға қатысты қызмет жүзеге асырылатын аумақ пен үй-жайларға (тексеріп қарау мен тінту жүргізу құқығынсыз) кіруге құқығы бар.
2. Кіруге прокурор рұқсат ететін тұрғын үй-жайларды қоспағанда, аумаққа және үй-жайға кіргізуден бас тартқан жағдайда кеден органдарының лауазымды адамдары, аумаққа және үй-жайға екі куәгердің қатысуымен қарсылықтың жолын кесу және жабық үй-жайларды ашу арқылы кіруге құқылы. Үй-жайларға қарсылықтың жолын кесу және жабық үй-жайларды ашу арқылы кірудің барлық жағдайлары туралы кеден органдары жиырма төрт сағаттың ішінде прокурорды хабардар етеді. Кеден органдары лауазымды адамдарының аумақ пен үй-жайларға кіруіне қарсылық көрсеткен адамдар Қазақстан Республикасының заңдарына сәйкес жауапты болады.
Кейінге қалдыруды күттірмейтін жағдайларда прокурордың рұқсаты талап етілетін әрекеттер рұқсатсыз да, бірақ кейіннен прокурорды жиырма төрт сағаттың ішінде жазбаша хабардар ете отырып жүргізілуі мүмкін. Прокурор аталған хабарламаны алғаннан кейін жүргізілген әрекеттердің заңдылығын тексереді және олар заңсыз болған жағдайда күшін жояды немесе тыйым салу-шектеу сипатындағы шараларды өз қаулысымен тоқтатады.
3. Егер Қазақстан Республикасының заң актілерінде мемлекеттік органдар лауазымды адамдарының жекелеген объектілерге кіруінің арнаулы тәртібі белгіленсе, онда мұндай объектілерге кіру осы заң актілерінде айқындалған тәртіппен жүргізіледі.
4. Кедендік бақылаудағы, оның ішінде шартты түрде шығарылған тауарлардың бар екендігін растау мақсатында жүргізілетін үй-жайлар мен аумақтарды тексеру уақытша сақтау қоймаларында, кеден қоймаларында, бос қоймаларда, арнаулы экономикалық аймақтарда, бажсыз сауда дүкенінің үй-жайларында, сондай-ақ осы Кодексте көзделген кедендік рәсімдердің немесе кедендік режимдердің шарттарына сәйкес тауарлар болуы тиіс тұлғаларға жүргізіледі. Үй-жайлар мен аумақтарды тексеру тауарлардың жоғалғаны, оларды иеліктен айырғандығы не оларға осы Кодексте белгіленген талаптар мен шарттарды бұза отырып өзге де тәсілмен билік етілуі туралы ақпарат болған жағдайда, осындай ақпаратты тексеру үшін, сондай-ақ іріктеп тексеру негізінде жүргізіледі.
5. Осы баптың 4-тармағында көрсетілмеген тұлғалардың үй-жайлары мен аумақтарын тексеруді кеден органдары осындай үй-жайларда немесе аумақтарда Қазақстан Республикасының кедендік аумағына осы Кодексте көзделген тәртіпті бұза отырып әкелінген тауарлардың бар екендігі туралы ақпарат болған жағдайда, осындай ақпаратты тексеріп шығу үшін жүргізеді. Тексеру нәтижелері жөнінде кеден ісі мәселелері жөніндегі уәкілетті орган бекітетін нысан бойынша акт жасалады, оның екінші данасы тексеру жүргізілген тұлғаға беріледі.
6. Үй-жайлар мен аумақтардың осы Кодекстің 89 104, 130, 145, 246-баптарында белгіленген бағалау талаптары мен шарттарына сәйкестігін анықтау үшін тексеруді де кеден органдары жүзеге асырады. Тексеру нәтижелері бойынша кеден ісі мәселелері жөніндегі уәкілетті орган белгілейтін нысан бойынша қорытынды жасалады.
58-тарау. Кедендік сараптама
453-бап. Кедендік сараптама тағайындау
1. Кедендік сараптаманың мақсаты Қазақстан Республикасының кедендік шекарасы арқылы өткізілетін тауарлардың сапалық құрамын анықтау үшін, олардың Сыртқы экономикалық қызметтің тауар номенклатурасына сәйкес дұрыс жіктелуі үшін зерттеу жүргізу болып табылады.
2. Кеден органдары:
1) кедендік ресімдеу мен кедендік бақылауды жүзеге асырған;
2) алдын ала шешім қабылдаған;
3) кеден ісі саласында құқық бұзушылықтар анықталған жағдайларда кеден органдары лауазымды адамдарының тауардың сапалық құрамын айқындауы мүмкін болмаған кезде кедендік сараптама тағайындауы мүмкін.
3. Тауарлар, кедендік және өзге де құжаттардағы тауарлар туралы мәліметтер, бірдейлендіру белгілері кедендік сараптамалардың объектілері болып табылады.
4. Кедендік сараптаманы кедендік зертханалардың сарапшылары жүргізеді.
Кедендік сараптаманы жүргізу үшін:
1) кедендік ресімдеу мен кедендік бақылау сатысында немесе алдын ала шешім қабылдау кезінде, сондай-ақ сыртқы экономикалық қызметке қатысушылардың өтініштері бойынша - кедендік сараптамаға жолдама;
2) кеден ісі саласындағы құқық бұзушылықтар бойынша - кедендік сараптама тағайындау туралы қаулы негіз болып табылады.
Жолдамада не қаулыда:
1) кедендік сараптама жүргізу үшін негіздеме;
2) кедендік сараптама жүргізілуге тиіс кеден зертханасының атауы;
3) сарапшының алдына қойылған мәселелер;
4) сарапшының қарауына берілетін материалдар көрсетіледі.
5. Кедендік сараптаманы тағайындаған кеден органының лауазымды адамы декларантты кедендік сараптама тағайындау туралы жолдамамен не қаулымен таныстыруға, осы Кодекстің 375, 376-баптарында көзделген құқықтар мен міндеттерді түсіндіруге міндетті. Жолдамаға не қаулыға танысқандығы туралы белгі соғылады және декларант қол қояды.
454-бап. Кедендік сараптама жүргізу тәртібі
1. Кедендік сараптама кеден зертханасының үй-жайында да, егер бұл зерттеу сипаты бойынша қажет болса не зерттеу объектісін сараптауға жеткізу мүмкін болмауына байланысты, одан тысқары жерлерде де өткізіледі. Сарапшы кеден зертханасы басшысының жазбаша өкімі бойынша ғана кедендік сараптаманы жүргізуге кіріседі.
2. Кедендік сараптаманың нәтижесі бойынша сарапшының қорытындысы беріледі.
3. Кедендік сараптаманы кеден зертханаларында жүргізу тәртібін және қорытынды нысанын кеден ісі мәселелері жөніндегі уәкілетті орган бекітеді.
455-бап. Сарапшының құқықтары мен міндеттері
1. Сарапшы:
1) егер қойылған мәселелер өзінің құзыретіне жатпаса, сараптама жүргізуден бас тартуға;
2) өзінің құзыретіне кірмейтін сұрақтарға жауап беруден бас тартуға;
3) кедендік сараптама жүргізу үшін қажетті қосымша материалдар табыс ету туралы өтініш беруге құқылы.
2. Сарапшы:
1) кедендік сараптамаға қатысты материалдармен танысуға;
2) сыртқы экономикалық қызметке қатысушыларға кедендік сараптама мәселелері бойынша консультациялар беруге;
3) бұл тұрғыда мәселе қойылмаған, іс үшін маңызы бар мән-жайлар туралы ой-пікірін қорытындыға енгізуге;
4) кедендік сараптамаға ұсынылған тауарлардың сынамалары мен үлгілеріне зерттеу жүргізуге және зерттеулердің нәтижелерін толық, жан-жақты және объективті бағалау негізінде қорытынды беруге;
5) іс жүргізуінде немесе қарауында кеден ісі саласындағы құқық бұзушылықтар туралы іс бар тұлғаның шақыруы бойынша өзі берген қорытындыны түсіндіру немесе толықтыру үшін келуге;
6) кедендік сараптама нәтижесінде алынған мәліметтерді жария етпеуге міндетті.
3. Өзінің міндеттерін орындамаған немесе тиісінше орындамаған жағдайда сарапшы Қазақстан Республикасының заңдарына сәйкес жауапты болады.
456-бап. Сарапшының қорытындысы
1. Сарапшы қорытындыны жазбаша нысанда өзінің атынан береді.
2. Сарапшының қорытындысында өзі жүргізген зерттеулер және қойылған сұрақтарға негізді жауаптары жазылады.
3. Күрделі сараптамалық зерттеулер жүргізу қажет болған жағдайларда кеден зертханасы басшысының шешімі бойынша комиссиялық сараптама жүргізіледі, ол бір мамандықтағы бірнеше сарапшыға тапсырылады. Сарапшылар арасында келіспеушілік болған кезде олардың әрқайсысы немесе бір бөлігі жеке қорытынды беруге құқылы.
4. Кедендік сараптамаларды өз құзыреттерінің шегінде әр түрлі мамандықтағы сарапшылар жүргізу қажет болған жағдайда, кешенді сараптама тағайындалады. Әр сарапшы қорытындының өзі кедендік сараптама жүргізген бөлігіне қол қояды.
5. Табыс етілген материалдар бойынша қорытынды беру мүмкін болмаған кезде сарапшы кеден сараптамасын тағайындаған кеден органына бұл туралы, бас тарту дәлелін көрсете отырып, жазбаша хабарлайды.
457-бап. Қосымша және қайталап жүргізілетін кедендік сараптама
1. Қосымша кедендік сараптама жаңадан ашылған жағдайлар бойынша тағайындалады. Қосымша кедендік сараптама жүргізу бастапқы сараптаманы орындаған сарапшыға немесе басқа сарапшыға тапсырылуы мүмкін.
2. Қайталап жүргізілетін кедендік сараптама алдыңғы қорытындыға декларант шағымданған жағдайларда сол объектілерді зерттеу және сол мәселелерді шешу үшін тағайындалады. Қайталап жүргізілетін кедендік сараптаманы тағайындау кезінде жолдамада немесе қаулыда алдыңғы сараптама нәтижелерімен келіспеу себебі көрсетілуге тиіс.
3. Қайталап жүргізілетін кедендік сараптама бойынша іс жүргізу кеден ісі мәселелері жөніндегі уәкілетті орган айқындайтын тәртіппен жүзеге асырылады.
458-бап. Тауарлардың сынамалары мен үлгілерін іріктеп алу
1. Кеден органдары кеден зертханаларында сараптама жүргізу мақсатында тауарлардың сынамалары мен үлгілерін іріктеп алуға құқылы.
2. Сынамалар мен үлгілер оларды іріктеп алу нормаларын көздейтін нормативтік-техникалық құжаттамаға сәйкес зерттеу мүмкіндігін қамтамасыз ететін ең аз мөлшерде алынады. Кедендік бақылаудағы тауарлардың сынамалары мен үлгілерін іріктеп алу туралы кеден ісі мәселелері жөніндегі уәкілетті орган белгілеген нысан бойынша акт жасалады.
3. Декларант кеден органдарының лауазымды адамдары тауарлардың сынамалары мен үлгілерін іріктеп алуы кезінде қатысады. Декларант кеден органдарының лауазымды адамдарына тауарлардың сынамалары мен үлгілерін іріктеп алу кезінде жәрдем көрсетуге, оның ішінде сынамалар мен үлгілер іріктеп алу үшін қажетті жүк және өзге де операцияларды өз есебінен жүзеге асыруға міндетті.
Тауарлар берілгеннен кейін күнтізбелік он күннен соң декларант келмеген жағдайда, сондай-ақ кейінге қалдыруға болмайтын жағдайлар кезінде кеден органдары декларант жоқ кезде тауарлардың сынамалары мен үлгілерін іріктеп алуы мүмкін. Мұндай жағдайда тауарлардың сынамалары мен үлгілерін іріктеп алу туралы акт жасай отырып, тауарлардың сынамалары мен үлгілерін іріктеп алу екі куәгердің қатысуымен жүзеге асырылады.
4. Сынамалар мен үлгілер Қазақстан Республикасының заңдарына сәйкес жойылуға немесе кәдеге жаратылуға жататын жағдайларды қоспағанда, кедендік сараптама аяқталған соң сынамалар мен үлгілер декларантқа қайтарылады.
59-тарау. Кеден ісі саласындағы сыртқы
экономикалық және өзге де қызметке
қатысушыларды тексеру
459-бап. Кеден ісі саласындағы сыртқы экономикалық және өзге де қызметке қатысушыларды тексеру
1. Кеден ісі саласындағы сыртқы экономикалық және өзге де қызметке қатысушыларды тексеруді Қазақстан Республикасының кеден және өзге де заңдарының сақталмағаны туралы негіздемелер болған жағдайда кеден органдары жүзеге асырады, оның сақталуын бақылау кеден ісі мәселелері жөніндегі уәкілетті орган белгілеген тәртіппен кеден органдарына жүктелген.
2. Қажет болған жағдайда кеден ісі саласындағы сыртқы экономикалық және өзге де қызметке қатысушыларды тексеруді кеден органдары басқа да мемлекеттік органдарды тарта отырып жүргізуі мүмкін.
460-бап. Кеден ісі саласындағы сыртқы экономикалық және өзге де қызметке қатысушыларға тексеру жүргізу үшін нұсқама
1. Кеден ісі саласындағы сыртқы экономикалық және өзге де қызметке қатысушыларды тексеру кеден ісі мәселелері жөніндегі уәкілетті орган немесе кеден ісі мәселелері жөніндегі уәкілетті органның аумақтық бөлімшелері не кеден берген нұсқама ұсыныла отырып жүргізіледі.
2. Нұсқамаға кеден органының басшысы немесе оның орнындағы адам қол қоюға тиіс, ол елтаңбалық мөрмен расталған, кеден ісі мәселелері жөніндегі уәкілетті орган белгілеген тәртіпке сәйкес арнаулы журналда тіркелген болуға тиіс.
3. Нұсқама Қазақстан Республикасының заңдарына сәйкес прокуратура органдарында тіркелуге тиіс.
4. Кеден органының нұсқамасында мынадай деректемелер:
1) нұсқаманың кеден органында тіркелген күні мен нөмірі;
2) нұсқаманы енгізген кеден органының атауы;
3) сыртқы экономикалық және өзге де қызметтерге қатысушының толық атауы;
4) салық төлеушінің тіркеу нөмірі;
5) тексерудің мақсаты;
6) кеден органы тексеруші адамдарының лауазымы, тегі, аты, әкесінің аты;
7) тексеру жүргізудің мерзімі;
8) тексерілетін кезең болуға тиіс.
5. Бір нұсқаманың негізінде кеден ісі саласындағы сыртқы экономикалық және өзге қызметке қатысушыға бір ғана тексеру жүргізілуі мүмкін.
6. Осы Кодекстің 462-бабының 2-тармағында көзделген тексеру мерзімдері ұзартылған жағдайда, алдыңғы нұсқаманың нөмірі мен тіркелген күні көрсетілген қосымша нұсқама ресімделеді.
461-бап. Кеден ісі саласындағы сыртқы экономикалық және өзге де қызметке қатысушыларға тексеру жүргізудің басталуы
1. Кеден ісі саласындағы сыртқы экономикалық және өзге де қызметке қатысушыға міндетті түрде қызмет куәлігін көрсете отырып, нұсқаманы тапсырған кез тексерудің басталғаны болып есептеледі.
2. Кеден ісі саласындағы сыртқы экономикалық және өзге де қызметке қатысушының Қазақстан Республикасының заңдарына сәйкес ресімделген нұсқаманы алудан бас тартуы тексеруді тоқтату үшін негіз болып табылмайды.
3. Тексеруді жүзеге асыру кезеңінде кеден ісі саласындағы сыртқы экономикалық және өзге де қызметке қатысушының тексерілетін құжаттарға өзгерістер мен толықтырулар енгізуіне жол берілмейді.
462-бап. Кеден ісі саласындағы сыртқы экономикалық және өзге де қызметке қатысушыларға тексеру жүргізу мерзімдері
1. Осы баптың 2 және 3-тармақтарында көзделген жағдайларды қоспағанда, кеден ісі саласындағы сыртқы экономикалық және өзге де қызметке қатысушыларға тексеру жүргізудің нұсқамада көрсетілетін мерзімі нұсқаманы тапсырған кезден бастап отыз жұмыс күнінен аспауға тиіс.
2. Тексеруді жүзеге асыратын кеден органы қызметінің аймағы шегінен тысқары жерде құрылымдық бөлімшелері бар кеден ісі саласындағы сыртқы экономикалық және өзге де қызметке қатысушыларды тексеру кезінде тексеру жүргізу мерзімі алпыс жұмыс күніне дейін ұзартылуы мүмкін.
3. Кеден ісі саласындағы сыртқы экономикалық және өзге де қызметке қатысушыларға тексеру жүргізу мерзімі кеден ісі саласындағы сыртқы экономикалық және өзге де қызметке қатысушыларға кеден органының құжаттар беру туралы талаптарын тапсырған және оларға сұратылған құжаттарды берген кездің арасындағы уақыт кезеңдерінде, сондай-ақ кеден органының сұратуы бойынша мәліметтер мен құжаттар алу кезінде тоқтатыла тұрады.
463-бап. Кеден органы лауазымды адамдарын кеден ісі саласындағы сыртқы экономикалық және өзге де қызметке қатысушыларға тексеру жүргізу үшін аумаққа немесе үй-жайға жіберу
1. Кеден ісі саласындағы сыртқы экономикалық және өзге де қызметке қатысушы осы Кодекстің 452-бабына сәйкес кеден органының лауазымды адамдарын аумаққа немесе үй-жайға (тұрғын үй-жайлардан басқа) жіберуді қамтамасыз етуге міндетті.
2. Тексеру жүргізуші кеден органының лауазымды адамдарын көрсетілген аумаққа немесе үй-жайға (тұрғын үй-жайлардан басқа) жіберуді қамтамасыз етуден бас тартылған жағдайда хаттама жасалады.
3. Хаттамаға екі куәгердің қатысуымен тексеру жүргізетін кеден органының лауазымды адамы және кеден ісі саласындағы сыртқы экономикалық және өзге де қызметке қатысушы қол қояды. Кеден ісі саласындағы сыртқы экономикалық және өзге де қызметке қатысушы көрсетілген хаттамаға қол қоюдан бас тартқан жағдайда бас тартудың себептері туралы жазбаша түсінік беруге міндетті.
4. Кеден ісі саласындағы сыртқы экономикалық және өзге де қызметке қатысушының, егер:
1) нұсқама табыс етілмеген не белгіленген тәртіппен ресімделмеген;
2) нұсқамада көрсетілген тексеру мерзімдері басталмаған немесе өтіп кеткен;
3) кеден органдарының осы лауазымды адамдары нұсқамада көрсетілмеген;
4) егер Қазақстан Республикасының заңдарына сәйкес тексеруге жататын аумаққа немесе үй-жайға жіберу үшін арнаулы рұқсат қажет болса, ал лауазымды адамдардың аумаққа немесе үй-жайға кіруге мұндай рұқсаттары болмаған;
5) сұратылған құжаттаманың тексерілетін кезеңге қатысы болмаған жағдайларда кеден органының лауазымды адамдарына тексеру жүргізу үшін аумаққа немесе үй-жайға жіберуден бас тартуға не оларға құжаттарды бермеуге құқығы бар.
464-бап. Кеден органы лауазымды адамдарының кеден ісі саласындағы сыртқы экономикалық және өзге де қызметке қатысушыларға тексеру жүргізу кезіндегі өкілеттігі
1. Кеден ісі саласындағы сыртқы экономикалық және өзге де қызметке қатысушыларға тексеру жүргізу кезінде кеден органдарының лауазымды адамдары:
1) тауарлар мен көлік құралдарының болуын тексеруге және оларға кедендік қарауды жүзеге асыруға;
2) кеден ісі саласындағы сыртқы экономикалық және өзге де қызметке қатысты құжаттарды тексеруге;
3) тұлғалардан кеден ісі саласындағы сыртқы экономикалық және өзге де қызметті жүзеге асыруға қатысты құжаттар, анықтамалар, жазбаша және ауызша түсініктер алуға;
4) тауарлар мен көлік құралдары бар үй-жайларды мөрлеуге;
5) Қазақстан Республикасының заңдарында айқындалған тәртіппен кеден ісі саласындағы сыртқы экономикалық және өзге де қызметке қатысты және кеден ісі саласындағы құқық бұзушылықтардың жасалғаны туралы куәландыратын құжаттарды алып қоюға құқылы. Бұл орайда кеден ісі саласындағы сыртқы экономикалық және өзге де қызметке қатысушы алып қойылған құжаттардың көшірмелерін жасауға құқылы.
2. Алынған құжаттар Қазақстан Республикасының заңдарында белгіленген тәртіппен және мерзімдерде қайтарылады.
3. Аталған шараларды қолданбау кеден ісі саласындағы құқық бұзушылықтарды жасыруға әкеп соғуы мүмкін ерекше жағдайларда мөрлеу және алып қою жүзеге асырылады.
465-бап. Кеден ісі саласындағы сыртқы экономикалық және өзге де қызметке қатысушыларды тексерудің аяқталуы
1. Тексеру аяқталғаннан кейін кеден органының лауазымды адамдары:
1) тексерудің жүргізілген орнын, акт жасау күнін;
2) тексеру жүргізген кеден органы лауазымды адамдарының лауазымын, тегін, атын, әкесінің атын;
3) кеден ісі саласындағы сыртқы экономикалық және өзге де қызметке қатысушының тегін, атын, әкесінің атын не толық атауын;
4) кеден ісі саласындағы сыртқы экономикалық және өзге де қызметке қатысушының орналасқан жерін, банк деректемелерін;
5) кеден ісі саласындағы сыртқы экономикалық және өзге де қызметке қатысушының кедендік және қаржылық есептілік жүргізуге, кеден органдары өндіріп алатын кедендік төлемдердің және салықтардың төленуіне жауапты басшысы мен лауазымды адамдарының тегін, атын, әкесінің атын;
6) алдыңғы тексеру мен бұрын анықталған Қазақстан Республикасының кеден заңдарын бұзушылықтарды жою жөнінде қабылданған шаралар туралы мәліметтерді;
7) кеден ісі саласындағы сыртқы экономикалық және өзге де қызметке қатысушы тексеру үшін тапсырған құжаттар туралы мәліметтерді;
8) кеден ісі саласында анықталған құқық бұзушылықтарды Қазақстан Республикасы заң актілерінің тиісті нормаларына сілтеме жасай отырып, егжей-тегжейлі сипатталуын;
9) кеден ісі саласындағы сыртқы экономикалық және өзге де қызметке қатысушыны тексерудің нәтижелерін көрсетіп тексеру актісін жасайды.
2. Кеден ісі саласындағы сыртқы экономикалық және өзге де қызметке қатысушыға тексеру актісін тапсырған күн тексеру мерзімінің аяқталған күні болып есептеледі.
3. Егер тексеру аяқталғаннан кейін Қазақстан Республикасының кеден заңдарын бұзу анықталмаған жағдайда, тексеру актісінде тиісті жазба жүргізіледі.
4. Тексеру актісіне тексеру барысында алынған құжаттардың көшірмелері, есептер және басқа да материалдар қоса тіркеледі.
5. Тексеру актісі тексеру жүргізген кеден органы лауазымды адамының қолы қойылып үш дана етіп жасалады.
6. Тексеру актісі тексеру актілерін тіркеудің арнаулы журналында тіркеледі, ол нөмірленген, байлап-қайымдалған және кеден органының мөрімен бекітілген болуға тиіс.
7. Тексеру актісінің бір данасы кеден ісі саласындағы сыртқы экономикалық және өзге де қызметке қатысушыға беріледі. Тексеру актісін алған кезде кеден ісі саласындағы сыртқы экономикалық және өзге де қызметке қатысушы оны алғаны туралы белгі соғуға міндетті.
8. Кеден ісі саласындағы сыртқы экономикалық және өзге де қызметке қатысушы тексерудің нәтижелерімен келіспеген жағдайда, кеден ісі саласындағы сыртқы экономикалық және өзге де қызметке қатысушының басшысы немесе уәкілетті лауазымды адамы тексеру актісіне тиісті жазба жасайды.
466-бап. Кеден ісі саласындағы сыртқы экономикалық және өзге де қызметке қатысушыларды тексеру нәтижелері бойынша шешім
1. Кеден ісі саласындағы сыртқы экономикалық және өзге де қызметке қатысушыларды тексеру аяқталғаннан кейін тексеру актісінде көрсетілген нәтижелердің негізінде кеден органы осы Кодекстің 350-бабында көзделген нысанда кедендік төлемдердің, салықтардың және өсімпұлдардың есептелген сомалары туралы хабарлама шығарады.
