Қазақстан Республикасының Ауыл шаруашылығы министрлігіне ведомстволық
бағыныстағы жекелеген ұйымдардың мәселелерi Қазақстан Республикасы
Үкіметінің 2002 жылғы 29 желтоқсандағы № 1431 қаулысы
(ҚР Үкіметінің 24.06.04 ж. № 604 қаулысымен
енгізілген өзгерістерімен)
Осы редакция Қазақстан Республикасы Үкіметінің 2005 жылғы 6 сәуірдегі № 310 Қаулысымен енгізілген өзгерістеріне дейін қолданылды
"Ветеринария туралы" Қазақстан Республикасының 2002 жылғы 10 шiлдедегi Заңына сәйкес Қазақстан Республикасының Үкіметі қаулы етеді:
1. Қазақстан Республикасы Ауыл шаруашылығы министрлігінiң "Орталық ветеринариялық зертхана" шаруашылық жүргiзу құқығындағы республикалық мемлекеттік кәсiпорны Қазақстан Республикасы Ауыл шаруашылығы министрлігінiң "Республикалық ветеринариялық зертхана" республикалық мемлекеттік қазыналық кәсiпорны болып қайта құру жолымен қайта ұйымдастырылсын.
2. Қазақстан Республикасы Ауыл шаруашылығы министрлігінiң "Республикалық ветеринариялық зертхана" республикалық мемлекеттік қазыналық кәсiпорны қызметiнiң негiзгi мәнi:
1) Қазақстан Республикасының Үкіметі бекiтетiн тiзбеге енгiзiлген жануарлардың аса қауiптi ауруларының диагностикасы;
2) ветеринариялық препараттарды, жемшөп пен жемшөп қоспалары тiркеу сынағынан, байқап тексеруден өткізу, сондай-ақ шағым болған кезде ветеринариялық препараттардың серияларын (партияларын) бақылау болып белгiленсiн.
3. Қазақстан Республикасы Ауыл шаруашылығы министрлігінiң "Ветдез" республикалық мемлекеттік кәсiпорны Қазақстан Республикасы Ауыл шаруашылығы министрлігінiң "Республикалық эпизоотияға қарсы отряд" республикалық мемлекеттік қазыналық кәсiпорны болып қайта құру жолымен қайта ұйымдастырылсын.
4. Қазақстан Республикасы Ауыл шаруашылығы министрлігінiң "Республикалық эпизоотияға қарсы отряд" республикалық мемлекеттік қазыналық кәсiпорны қызметiнiң негiзгi мәнi:
1) Қазақстан Республикасының Yкіметі бекiтетiн тiзбеге енгiзiлген жануарлардың аса қауіпті жұқпалы ауруларының ошақтарын жою;
2) мемлекеттік шекарадағы ветеринариялық бақылау бекеттерiнде көлiк құралдарын дезинфекциялау;
3) ветеринариялық препараттардың республикалық қорын сақтау болып белгiленсiн.
5. Қазақстан Республикасы Ауыл шаруашылығы министрлігінiң "Республикалық ветеринариялық зертхана" мемлекеттік мекемесi Қазақстан Республикасы Ауыл шаруашылығы министрлігінiң "Ветеринариядағы мониторинг, референция, зертханалық диагностика және әдiснама ұлттық орталығы" мемлекеттік мекемесi болып қайта аталсын.
6. Қазақстан Республикасы Ауыл шаруашылығы министрлігінiң "Ветеринариядағы мониторинг, референция, зертханалық диагностика және әдiснама ұлттық орталығы" мемлекеттік мекемесi қызметiнiң негiзгi мәнi:
1) ветеринарияда пайдаланылатын депониттi Микроорганизмдер штамдарының ұлттық коллекциясын енгiзумен бірге, жануарлар ауруларының диагностикасы жөніндегі референттiк және әдiснамалық функциялар;
2) Қазақстан Республикасындағы жабайы жануарлар ауруларының эпизоотиялық мониторингi болып белгiленсiн.
7. Қазақстан Республикасы Ауыл шаруашылығы министрлігінiң аумақтық органдарын штат санының бекітілген лимитi мен оларды ұстауға көзделген қаражат шегiнде шекарадағы және көлiктегi мемлекеттік ветеринариялық қадағалау аймақтық бөлiмшелерi болып табылатын ветеринариялық бақылау бекеттерi бар Астана қаласына көшiре отырып, Солтүстiк-Батыс аймақтық шекарадағы және көлiктегi мемлекеттік ветеринариялық қадағалау басқармасы және Алматы қаласында Оңтүстiк-Шығыс аймақтық шекарадағы және көлiктегi мемлекеттік ветеринариялық қадағалау басқармасы - мемлекеттік мекемелерi құрылсын.
ҚР Үкіметінің 24.06.04 ж. № 604 қаулысымен 8-тармақ өзгертілді
8. Қазақстан Республикасы Үкіметінiң кейбір шешiмдерiне мынадай өзгерістер мен толықтырулар енгiзiлсiн:
1) "Республикалық мемлекеттік кәсiпорындардың тiзбесi туралы" Қазақстан Республикасы Үкіметінiң 1996 жылғы 25 маусымдағы № 790 қаулысына (Қазақстан Республикасының ПҮКЖ-ы, 1996 ж., № 29, 256-құжат):
көрсетiлген қаулымен бекітілген республикалық мемлекеттік кәсiпорындардың тiзбесiнде:
реттiк нөмiрi 503-жол алынып тасталсын;
реттiк нөмiрi 504-1-жол алынып тасталсын;
"Қазақстан Республикасының Ауыл шаруашылығы министрлігі" деген бөлiм мынадай мазмұндағы реттiк нөмiрi 44-102-жолмен толықтырылсын:
"44-102 "Республикалық эпизоотияға қарсы отряд" республикалық мемлекеттік қазыналық кәсiпорны";
мынадай мазмұндағы реттiк нөмiрi 44-103-жолмен толықтырылсын:
"44-103 "Республикалық ветеринариялық зертхана" республикалық мемлекеттік қазыналық кәсiпорны;
2) "Қазақстан Республикасының орталық атқарушы органдарына ведомстволық бағыныстағы мемлекеттік мекемелер штат санының лимиттерiн бекіту туралы" Қазақстан Республикасы Yкіметінiң 2000 жылғы 12 ақпандағы № 229 қаулысына:
көрсетiлген қаулымен бекітілген Республикалық бюджеттiң қаражаты есебiнен қаржыландырылатын Қазақстан Республикасының орталық атқарушы органдарына ведомстволық бағыныстағы мемлекеттік мекемелер штат санының лимиттерiнде:
"Қазақстан Республикасының Ауыл шаруашылығы министрлігі" деген 2-бөлiмде:
"Республикалық ветеринариялық зертхана 84" деген жол мынадай редакцияда жазылсын:
"Ветеринариядағы мониторинг, референция, зертханалық диагностика және әдiснама ұлттық орталығы 84";
3) "Қазақстан Республикасы Ауыл шаруашылығы министрлігінiң кейбір мәселелерi" туралы Қазақстан Республикасы Yкіметінiң 2002 жылғы 7 қазандағы № 1096 қаулысына (Қазақстан Республикасының ПҮКЖ-ы, 2002 ж., № 33, 357-құжат):
көрсетiлген қаулымен бекітілген Қазақстан Республикасының Ауыл шаруашылығы министрлігі туралы ережеде:
"Жалпы ережелер" деген 1-бөлiм 6-тармағының екiншi абзацында "ұйымдастыру-құқықтық нысанындағы" деген сөздерден кейiн "ветеринариялық бақылау бекеттерi бар шекарадағы және көлiктегi аймақтық мемлекеттік ветеринариялық қадағалау бөлiмшелерi" деген сөздермен толықтырылсын.
9. Қазақстан Республикасының Ауыл шаруашылығы министрлігі заңнамада белгiленген тәртiппен:
1) бір ай мерзiмде Қазақстан Республикасы Қаржы министрлігінiң Мемлекеттік мүлiк және жекешелендiру комитетiне қайта ұйымдастырылатын кәсiпорындардың жарғыларын бекітуге енгiзсiн;
2) мемлекеттік ветеринариялық ұйымдардың әдiлет органдарында мемлекеттік тiркелуiн қамтамасыз етсiн;
3) осы қаулыны iске асыру жөнiнде өзге де шаралар қабылдасын.
10. Осы қаулы 2003 жылғы 1 қаңтардан бастап күшiне енетiн 5, 6-тармақтар мен 8-тармақтың 2) тармақшасын қоспағанда, қол қойылған күнiнен бастап күшiне енедi.
Қазақстан Республикасының
| Премьер-Министрі | И. Тасмағамбетов |
