4. Эмитенттiң уәкiлеттi органның тиiстi шешiмiн алған кезден бастап бағалы қағаздар эмиссиясын тоқтата тұруға және анықталған заң бұзушылықты уәкiлеттi орган белгiлеген мерзiмде жоюға мiндеттi. Эмиссияны тоқтата тұру кезеңiнде бағалы қағаздарды орналастыру тоқтатыла тұрады.
5. Аталған ескертпелер жойылғаннан кейiн уәкiлеттi органның шешiмi бойынша эмиссия жалғастырылуы мүмкiн.
6. Эмитент бұқаралық ақпарат құралдарында бағалы қағаздар эмиссиясының тоқтатыла тұратыны туралы, ал тоқтата тұру себептерi жойылған жағдайда оның қайта басталатыны туралы хабар жариялауға мiндеттi.
7. Уәкiлеттi органның эмиссияны тоқтата тұру туралы шешiмi жөнiнде сотқа шағым берiлуi мүмкiн.
21-бап. Бағалы қағаздар эмиссиясын жарамсыз деп тану
1. Уәкiлеттi орган мынадай негiздер бойынша бағалы қағаздар эмиссиясы болмады деп тануға құқылы:
инвесторлар үшiн елеулi мәнi бар бағалы қағаздар эмиссиясы нақты шарттарының тiркелген эмиссия проспектiсiне (тiркелген шығару шарттарына) сәйкес келмеуi;
тiркелген эмиссия проспектiсiне (тiркелген шығару шарттарына) сәйкес келмейтiн мәлiметтер бар бағалы қағаздардың шығарылуы мен орналастырылуы туралы жарнама науқанын жүргiзу;
бағалы қағаздарды шығару және орналастыру қорытындысы туралы есепте көрсетiлген мәлiметтердiң тiркелген эмиссия проспектiне (тiркелген шығару шарттарына) немесе осындай эмиссияның нақты орналастырылу деректерiне сәйкес келмеуi;
эмиссияны тоқтата тұрудың себебi болған жолсыздықтарды жою туралы уәкiлеттi органның ұйғарымын эмитенттiң орындамауы.
2. Бағалы қағаздар эмиссиясы жарамыз деп танылған жағдайда осы шығарылымның бағалы қағаздары эмитентке қайтарылуға тиiс, ал эмитенттiң осы бағалы қағаздарды орналастырудан алған қаражаты инвесторларға қайтарылады. Бағалы қағаздардың құнын өтеу инфляция коэффициентiн ескере отырып жүзеге асырылады.
3. Дау туған жағдайда уәкiлеттi орган эмитенттiң алған қаражатын мәжбүр етiн қайтару туралы сотқа қойып өтiнiш етуге құқылы.
4. Бағалы қағаздар эмиссиясын жарамсыз деп тануға және қаражатты иелерiне қайтаруға байланысты барлық шығындар эмитенттiң есебiне жатқызылады.
5. Уәкiлеттi органның бағалы қағаздар эмиссиясын жарамсыз деп тану туралы шешiмiне сотқа шағым берiлуi мүмкiн.
Ескерту. 21-бап өзгертiлдi және толықтырылды - Қазақстан
Республикасының 1998.07.10. N 282 Заңымен.
22-бап. Бағалы қағаздар шығарылымы және эмитенттiң
қызметi туралы ақпарат
1. Бағалы қағаздарды ашық орналастырған жағдайда эмитент мемлекеттiк тiркеуден өткеннен кейiн эмитент 30 күн iшiнде бұқаралық ақпарат құралдарына бағалы қағаз шығару туралы мәлiмет жариялайды.
2. Эмитент, сондай-ақ оның андеррайтерлерi ықтимал инвесторларға бағалы қағаздарды сатып алғанға дейiн бағалы қағаздар эмиссиясы проспектiмен (шығару шарттарымен), сондай-ақ эмитенттiң қызметiмен және олар шығарған ескiру мерзiмi алты айдан аспауға тиiс бағалы қағаздар туралы ақпаратпен танысу мүмкiндiгiн қамтамасыз етуге мiндеттi.
3. Бағалы қағаздарды орналастыру кезеңiнде ықтимал инвесторлардың мүдделерiн қозғайтын бағалы қағаздар эмиссиясының тiркелген проспектiндегi (тiркелген шығару шарттарындағы) деректермен салыстырғанда, iстiң нақты жай-күйiндегi өзгерiстердi уәкiлеттi органда тiркеуге және ықтимал инвесторларға осы өзгерiстер туралы және эмитенттiң қызметi мен олар шығарған бағалы қағаздары жөнiнде хабарлауға мiндеттi.
4. Ықтимал инвесторлардың мүдделерiн қозғайтын эмитент iсiнiң нақты жай-күйiндегi өзгерiстер деп мыналар танылады:
1) эмитенттiң органына кiретiн адамдар тiзiмiндегi өзгерiстер;
2) эмитенттiң және оның еншiлес ұйымдары мен тәуелдi акционерлiк қоғамдарының органдарына кiретiн (өкiлдерi кiретiн) эмитент акционерлерiнiң (қатысушыларының) жарғылық капиталдағы (шығарылған (төленген) жарғылық капиталдағы) үлес мөлшерiнiң өзгерiстерi, сондай-ақ егер, олар әрбiр осындай ұйымның (ашық халықтық акционерлiк қоғамның жарғылық капиталында бес және одан да көп процент) дауыс беретiн акциялардың (үлестердiң, үлестiк жарналардың) он және одан да көп проценттерiн иеленген жағдайда, басқа ұйымдардың жарғылық капиталдарындағы (шығарылған (төленген) жарғылық капиталдағы) акционер үлесi мөлшерiнiң өзгерiстерi;
3) эмитенттiң дауыс берiлетiн акцияларының он және одан да көп процентiн (ашық халықтық акционерлiк қоғам үшiн - бес және одан да көп процентiн) иеленетiн эмитент акционерлерiнiң (қатысушыларының) тiзiмiндегi өзгерiстер;
4) әрбiр осындай ұйымның дауыс берiлетiн акцияларының (үлестерiнiң, үлес жарналарының) он және одан да көп процентiн (ашық халықтық акционерлiк қоғам үшiн - бес және одан да көп процентiн) эмитент иеленетiн заңды тұлғалардың тiзiмiндегi өзгерiстер;
5) акционерлердiң жалпы жиналысының (шаруашылық серiктестiктiң жоғары органының) шешiмдерi;
6) эмитентi, оның еншiлес ұйымдарын және тәуелдi акционерлiк қоғамдарын қайта ұйымдастыру;
7) эмитенттiң шоттары мен мүлкiне тыйым салу;
8) эмитент лицензиясының күшiн тоқтата тұру немесе тоқтату не оны қайтарып алу;
9) эмитенттiң қызметiн тоқтата тұру немесе тоқтату;
10) ықтимал инвесторлардың мүлiктiк мүдделерiн қозғайтын және уәкiлеттi органдар осындай деп таныған өзге де өзгерiстер.
5. Осы баптың 4-тармағында көрсетiлген эмитенттiң iсiнiң нақты жай-күйiндегi өзгерiстерi туралы мәлiметтердi эмитент оларды тiркеу (бағалы қағаздар эмиссиясы проспектiсiне (шығару шарттарына) тиiстi өзгерiстер енгiзу үшiн) осындай өзгерiстер туындаған кезден бастап жетi жұмыс күнiнен аспайтын мерзiмде уәкiлеттi органға жiберуге тиiс.
6. Егер бағалы қағаздар эмиссиясы проспектiсiнде (шығару шарттарында), сондай-ақ эмитенттiң қызметi мен ол шығарған бағалы қағаздар туралы ақпаратта ықтимал инвесторлардың мүдделерiн қозғайтын жалған, дәл емес немесе толық емес мәлiметтер болса, эмитент келтiрiлген нұқсан үшiн заңдарға сәйкес мүлiктiк жағынан толық жауапты болады, ол оның лауазымды адамдары Қазақстан Республикасының заңдарында көзделген әкiмшiлiк және қылмыстық жауапқа тартылуы мүмкiн.
7. Инвесторларға (ықтимал инвесторларға) бағалы қағаздар эмиссиясының проспектiсiнде (шығару шарттарында) және эмитенттiң қызметi туралы және ол шығарған бағалы қағаздар туралы ақпаратта жалған, дәл емес немесе толық емес мәлiметтердi табыс ету немесе жариялау арқылы келтiрiлген нұқсан үшiн эмитенттiң жауапкершiлiгiн шектейтiн инвесторлар (ықтимал инвесторлар) мен эмитент арасындағы жасалған келiсiм жарамсыз деп есептеледi.
Ескерту. 22-бап өзгертiлдi - Қазақстан Республикасының 1997.07.11.
N 154 Заңымен.
Ескерту. 22-бап өзгертiлдi - Қазақстан Республикасының 1998.07.10.
N 282 Заңымен.
23-бап. Эмиссиялық бағалы қағаздарды орналастыру
шарттары
1. Бағалы қағаздар эмиссиясының құрылымы уәкiлеттi органда тiркелген құрылымға сәйкес келуге тиiс.
2. Бағалы қағаздарды қайталама рынокта ашық орналастыру мен олардың айналысы кезiнде бiр инвестордың басқа инвесторлар алдындағы эмиссиялық бағалы қағаздарды сатып алу жөнiнде артықшылықты құқық белгiлеуге тыйым салынады. Акционерге жаңа эмиссияның бағалы қағаздарын сатып алғанда артықшылықты құқық берген кезде бұл шарт қолданылмайды.
3. Ашық қоғам бағалы қағаздарды орналастыру кезiнде андеррайтердiң қызметiн пайдалана алады. Бағалы қағаздар рыногындағы андеррейтердiң қызметiн бағалы қағаздар рыногында атаулы ұстау құқығымен брокерлiк және дилерлiк қызметтi жүзеге асыруға уәкiлеттi органның лицензиясы бар бағалы қағаздар рыногының кәсiпқой қатысушылары жүзеге асыруға құқылы.
Андеррайтер қызметiн жүзеге асыратын бағалы қағаздар рыногының
кәсiпқой қатысушылары эмиссиялық синдикаттар құруға құқылы.
Эмиссиялық синдикат бiрлескен қызмет туралы шарттың негiзiнде құрылады.
Бағалы қағаздар рыногының кәсiби қатысушыларының андеррайтер қызметiн жүзеге асыруының шарттары мен тәртiбi бағалы қағаздар рыногы туралы заңдармен реттеледi.
Ескерту. 23-бап өзгертiлдi - Қазақстан Республикасының 1998.07.10.
N 282 Заңымен.
24-бап. Эмиссиялық бағалық қағаздарды шығару және
орналастыру қорытындылары туралы есеп
1. Эмитент бағалы қағаздарды шығарудың және орналастырудың қорытындылары туралы есептi оларды орналастырудың әрбiр алты айдағы (әрбір алты ай аяқталғаннан кейiн бiр ай iшiнде) қорытындылары бойынша, сондай-ақ түпкiлiктi орналастыру аяқталғаннан кейiн бiр айдың iшiнде уәкiлеттi органға табыс етуге мiндеттi.
Ашық халықтық акционерлiк қоғам тоқсан аяқталғаннан кейiн жиырма күн iшiнде өз акцияларын нақты орналастырылуы туралы мәлiметтердi көрсете отырып, тоқсандық баланстар және кiрiстер мен шығыстар туралы есебiн баспасөз басылымында жариялауға және уәкiлеттi органға беруге мiндеттi.
2. Банктер және банк операцияларының жекелеген түрлерiн жүзеге асыратын ұйымдар бағалы қағаздарды шығару және орналастыру қорытындылары туралы есептi Қазақстан Республикасының Ұлттық Банкiнiң қорытындысымен бiрге табыс етедi.
3. Есептi қарау үшiн табыс етiлетiн құжаттар тiзбесiн және оларды ресiмдеу тәртiбiн уәкiлеттi орган белгiлейдi. Эмитент аталған талаптарды орындамаған жағдайда уәкiлеттi орган оның есебiн қараудан бас тартуға құқылы. Эмитент құжаттарды қайтадан табыс еткен кезде қарау мерзiмi жаңартылады.
4. Уәкiлеттi орган акцияларды шығару және орналастыру қорытындысы туралы есептi 14 күнтiзбелiк күн iшiнде қарайды.
5. Эмитент бағалы қағаздарды шығару және орналастыру қорытындылары туралы есептi тапсырмаған жағдайда уәкiлеттi орган осы эмиссияны жарамсыз деп тануға құқылы.
6. Бағалы қағаздар эмиссиясын тiркеу немесе оларды шығару және орналастыру қорытындысы туралы есептi қарау үшiн эмитент ұсынған мәлiметтердiң бұрыстығы анықталған жағдайда, уәкiлеттi орган эмиссияны тоқтата тұру немесе оны болмаған деп тану туралы шешiм қабылдауға құқылы.
7. Эмиссиялардың тiркеу үшiн немесе есептi бекiту үшiн эмитент табыс еткен мәлiметтердiң дұрыс еместiгi анықталған жағдайда уәкiлеттi орган есептi бекiту туралы шешiмнiң күшiн жоюға және эмиссияны жарамсыз деп тануға құқылы.
Ескерту. 24-бап өзгертiлдi - Қазақстан Республикасының 1997.07.11.
N 154 Заңымен.
Ескерту. 24-бап өзгертiлдi - Қазақстан Республикасының 1998.07.10.
N 282 Заңымен.
Ескерту. 24-бап өзгертiлдi - Қазақстан Республикасының 1999.07.16.
N 436 Заңымен.
24-1-бап. Бағалы қағаздар ұстаушыларды уәкiлеттi органның
хабардар етуi
1. Бағалы қағаздар рыногында жасалған немесе жасалуы мүмкiн құқық бұзушылықтар туралы бағалы қағаздар ұстаушыларды хабардар ету және оларды ескерту мақсатында уәкiлеттi орган баспа басылымында:
баспа бағалы қағаздар шығару мен орналастыруды тоқтата тұру және эмиссияны болмаған деп тану туралы;
бағалы қағаздар рыногында кәсiби қызметтi жүзеге асыру құқығына лицензияны қайтарып алу немесе оның күшiн тоқтата тұру туралы;
эмитенттердiң және бағалы қағаздар рыногына кәсiпқой қатысушылардың қызметiн тексеру туралы мәлiметтердi жариялайды.
2. Уәкiлеттi орган бағалы қағаздар рыногы субъектiлерiнiң қызметi туралы мәлiметтер базасын жүргiзедi.
24-2-бап. Инвесторлардың бағалы қағаздар рыногындағы
құқықтарын қорғау
1. Инвесторлардың бағалы қағаздар рыногындағы құқықтарын қорғау мақсатында уәкiлеттi орган эмитенттер мен бағалы қағаздар рыногына кәсiпқой қатысушылардың қызметiне тексерiс жүргiзедi.
Тексерiстiң нәтижелерi бойынша, бағалы қағаздар рыногын реттейтiн заңдардың бұзылуы анықталған жағдайда, уәкiлеттi орган:
эмитенттерге және бағалы қағаздар рыногының кәсiби қатысушыларына орындалуы мiндеттi нұсқамалар жiберуге;
бағалы қағаздар ұстаушылары тiзiлiмiнiң жекелеген дербес шоттары және тұтас алғанда, тiзiлiм бойынша бағалы қағаздардың қозғалысын тоқтата тұруға;
кiнәлi тұлғалардың жауапкершiлiктерi туралы мәселелердi заңдарға сәйкес шешуге құқылы.
2. Эмитенттердiң және бағалы қағаздар рыногына кәсiпқой қатысушылардың қызметiн тексерудi уәкiлеттi орган:
ұсынылған құжатттарды қарау;
мүдделi тараптардың өкiлдерiн жолсыздық фактiсi бойынша олардың түсiнiктемелерiн тыңдау мақсатында шақыру;
эмитенттiң немесе бағалы қағаздар рыногына кәсiпқой қатысушының орналасқан жерi бойынша тексерiс жүргiзу арқылы жүзеге асырады.
Тексерiстер жүргiзудiң және олардың нәтижелерiн ресiмдеудiң тәртiбiн уәкiлеттi орган белгiлейдi.
3. Уәкiлеттi орган, заңдарда көзделген жағдайларда, бағалы қағаздар рыногындағы кәсiпқой қатысушылардың көрсеткен қызметi үшiн сыйақы мөлшерiнiң негiздiлiгiн айқындауға құқылы.
Ескерту. 24-1, 24-2-баптармен толықтырылды - Қазақстан
Республикасының 1998.07.10. N 282 Заңымен.
IV тарау. Бағалы қағаздар рыногындағы кәсiби
қызмет
25-бап. Бағалы қағаздар рыногындағы кәсiби қызметке
қойылатын талаптар
1. Бағалы қағаздар рыногындағы кәсiби қызмет:
бiлiктiлiк талаптарына;
қаржы тұрақтылығы өлшемдерiне;
қолданылып жүрген заңдарға сәйкес өз қызметi туралы ақпаратты ашып көрсету талаптарына;
iскерлiк әдеп нормаларына сәйкес болуға тиiс.
2. Бағалы қағаздар рыногының кәсiпқой қатысушысы клиентке мүлiктiк зиян келтiрген жағдайда Қазақстан Республикасының заңдарында белгiленген тәртiп бойынша залалды өз есебiнен өтеуге мiндеттi.
3. Бағалы қағаздардың ұйымдасқан рыноктарындағы қызметтi жүзеге асыратын бағалы қағаздар рыногының кәсiпқой қатысушысы өзiнiң қызметiне байланысты қаржы тәуекелдерiн сақтандыруға құқылы.
26-бап. Бағалы қағаздар рыногындағы кәсiби
қызметтi лицензиялау
1. Бағалы қағаздар рыногындағы кәсiби қызметтiң бiр немесе бiрнеше бiрлескен түрлерiн жүзеге асыруға тиiстi лицензиясы бар тұлғалар бағалы қағаздар рыногындағы кәсiби қызметтi жүзеге асыруға құқылы. Бағалы қағаздар рыногындағы қызметтi жүзеге асыруға лицензия берудi шарттары мен тәртiбiн уәкiлеттi орган белгiлейдi.
2. Бағалы қағаздар рыногында кәсiби қызметтi жүзеге асыруға лицензия алу үшiн кәсiпқой қатысушы өз капиталының уәкiлеттi орган белгiленген ең төмен деңгейiнiң талабын орындауы қажет.
3. Уәкiлеттi орган заңдармен айқындалатын реттерде лицензия беруден бас тартуға, лицензияның қолданылуына тоқтата тұруға немесе лицензияны қайтарып алуға құқылы.
4. Лицензия берiлгенi үшiн алым алынады, оның мөлшерi мен төлену тәртiбi Қазақстан Республикасының заңдарымен белгiленедi.
Ескерту. 26-бап өзгертiлдi - Қазақстан Республикасының 1998.07.10.
N 282 Заңымен.
27-бап. Бағалы қағаздар рыногында мәмiлелердi
жүзеге асыруды шектеу
1. Бағалы қағаздар рыногына брокерлiк және дилерлiк қызметтi жүзеге асыруға лицензия алған тұлғалардың бағалы қағаздармен мәмiлелер жасауға, егер аталған мәмiлелердi жасау және жүзеге асыру өз клиенттерiнiң мүдделерiне қайшы келетiн болса, құқықтары жоқ.
2. Қызметтiк ақпаратты бар тұлғалардың бас пайдасын көздеу мақсатында немесе оны үшiншi бiреуге беру үшiн осы ақпаратты пайдалана отырып мәмiлелер жасауға құқығы жоқ. Бағалы қағаздар рыногының жай-күйi мен дамуы туралы мiндеттi түрде жариялануға тиiстi ақпаратты мемлекеттiк органдардың, қоғамдық ұйымдардың лауазымды адамдарының немесе бағалы қағаздар рыногының кәсiпқой қатысушыларының қасақана жасырып қалуына жол берiлмейдi.
Осы талапты бұзған тұлғалар заңдарға сәйкес жауап бередi.
3. Өзiнiң қызмет бабындағы жағдайына, эмитентпен жасасқан еңбек мiндеттемелерiне немесе шарттарына орай эмитент және ол шығарған бағалы қағаздар туралы ақпараты бар адамдарды бағалы қағаздар рыногының басқа субъектiлерiмен салыстырғанда артықшылықты жағдайға қоятын, көпшiлiктiң қолы жетпейтiн кез келген ақпарат қызметтiк ақпарат деп танылады.
4. Қызметтiк ақпараты бар адамдарға:
эмитенттiң басқару органдарының лауазымды адамдары немесе осы эмитентпен шарт арқылы байланысты бағалы қағаздар рыногының кәсiпқой қатысушысы;
эмитенттiң немесе эмитентпен шарт арқылы байланысты бағалы қағаздар рыногының кәсiпқой қатысушысының аудиторлары:
мемлекеттiк органдардың бақылау, қадағалау және өзге де өкiлеттiгi себептi аталған ақпаратқа қолы жететiн қызметшiлерi.
28-бап. Бағалы қағаздар рыногындағы кәсiби
қызмет түрлерi
1. Бағалы қағаздар рыногында кәсiби қызметтiң мынадай түрлерi жүзеге асырылуы мүмкiн:
брокерлiк;
дилерлiк;
депозитарлық;
кастодиалдық;
бағалы қағаздар портфелiн басқару жөнiндегi;
бағалы қағаздармен операциялар бойынша өзара талаптар мен мiндеттемелердi (клирингтiк) айқындау жөнiндегi;
бағалы қағаздар ұстаушыларының тiзiлiмiн жүргiзу жөнiндегi қызмет;
уәкiлеттi органның белгiлеуi бойынша кәсiби қызметтiң басқа да түрлерi;
мемлекеттiк емес зейнетақы қорларының зейнетақы активтерiн инвестициялық басқару.
2. Бағалы қағаздар рыногындағы кәсiби қызмет түрлерiн қоса атқаруды уәкiлеттi орган белгiлейдi.
3. Бағалы қағаздар рыногындағы кәсiби қызмет, қаржы рыногындағы қызметтi қоспағанда, кәсiпкерлiк қызметтiң басқа түрлерiмен қоса атқарылмайды.
4. Бағалы қағаздар рыногындағы банктердiң және банк операцияларының жекелеген түрлерiн жүзеге асыратын ұйымдардың қызметi Қазақстан Республикасындағы банк қызметiн реттейтiн заңдарға және уәкiлеттi органның нормативтiк құқықтық актiлерiне сәйкес жүзеге асырылады.
Ескерту. 28-бап толықтырылды - Қазақстан Республикасының 1997.06.19.
N 134-I Заңымен.
Ескерту. 28-бап өзгертiлдi - Қазақстан Республикасының 1997.07.11.
N 154 Заңымен.
29-бап. Брокерлiк қызмет
1. Брокерлiк қызмет - өз клиентiнiң мүдделерiн көздеп және соның есебiнен тапсырма шарты немесе комиссия шарты негiзiнде iс-қимыл жасайтын брокердiң бағалы қағаздар рыногында бағалы қағаздармен азаматтық-құқықтық мәмiлелер жасау жөнiндегi қызметi.
2. Брокердiң өз клиенттерiнiң мүдделерiн көздеп мәмiлелер жасауы жазбаша нысанда жасалған шарт негiзiнде жүзеге асырылады.
3. Брокер өз клиенттерiнiң бағалы қағаздармен жүргiзiлетiн операциялар есебiн арнаулы шоттарда жүргiзедi.
4. Брокер клиенттердiң бағалы қағаздарының нақты ұстаушысы ретiнде болуы мүмкiн.
30-бап. Дилерлiк қызмет
Дилерлiк қызмет - бағалы қағаздармен өз атынан және өз есебiнен азаматтық-құқықтық мәмiлелер жасау жөнiндегi қызмет.
31-бап. Бағалы қағаздар портфелiн басқару жөнiндегi қызмет
1. Бағалы қағаздар портфелiн басқару жөнiндегi қызмет - бағалы
қағаздар портфелi иесiнiң шартпен белгiленетiн жекелеген заңды
құқықтарын жүзеге асыру жөнiндегi басқарушының қызметi.
2. Бағалы қағаздар портфелiн басқару жөнiндегi қызметтi жүзеге асыру тәртiбi, басқарушының құқықтары мен мiндеттерi Қазақстан Республикасының арнаулы заңдарымен белгiленедi.
32-бап. Бағалы қағаздармен жүргiзiлетiн операциялар
бойынша өзара талаптар мен мiндеттемелердi
(клиринг) айқындау жөнiндегi қызмет
1. Клирингiлiк қызмет - бағалы қағаздармен мәмiлелер жасау нәтижесiнде жүзеге асырылатын есеп айырысуға қатысушы тараптардың өзара талаптары мен мiндеттемелерiн есепке алу жөнiндегi қызмет.
2. Бағалы қағаздар рыногындағы клирингтiк қызметтi лицензиялауды Қазақстан Республикасының Ұлттық Банкi уәкiлеттi органмен келiсе отырып жүзеге асырады.
33-бап. Депозитарлық қызмет
1. Бағалы қағаздардың депозитарийi - бағалы қағаздар иелерiн есепке алу мен олардың құқықтарын растау, сондай-ақ бағалы қағаздарды материалсыздандыру жөнiндегi қызметтi және заң актiлерiне сәйкес өзге де қызмет түрлерi жүзеге асыратын мамандандырылған ұйым.
2. Депозитарий мен депоненттiң қатынастары олардың арасында жасалған шарт негiзiнде туындайды. Шарттың нысаны мен мазмұны Қазақстан Республикасының заңдарымен белгiленедi.
Шарттың жасалуы депоненттiң бағалы қағаздарына меншiк құқықтарының депозитарийге өтуiне әкеп соқпайды. Депоненттiң бағалы қағаздарына депозитарийдiң дербес билiк етуге, оларды басқаруға немесе, депоненттiң тапсырмаларын орындауды қоспағанда, депоненттiң атынан бағалы қағаздармен кез келген iс-әрекеттi жүзеге асыруға құқығы жоқ.
3. Депозитарийдiң бағалы қағаздар ұстаушылардың тiзiлiмiнде нақтылы ұстаушы ретiнде тiркелуге құқығы бар.
4. Депозитарий бағалы қағаздарға құқықтарды есепке алу жөнiндегi өз мiндеттерiн орындамағаны немесе лайықты орындамағаны үшiн, оның iшiнде депо шоттары бойынша жазбалардың толық және дұрыс болуы үшiн жауап бередi.
Ескерту. 33-бап өзгертiлдi - Қазақстан Республикасының 1998.07.10.
N 282 Заңымен.
34-бап. Бағалы қағаздар ұстаушылардың тiзiлiмiн
жүргiзу жөнiндегi қызмет
1. Бағалы қағаздар ұстаушылардың тiзiлiмiн жүргiзу жөнiндегi қызмет - белгiлi бiр күнге бағалы қағаздың меншiк иесiн белгiлеуге мүмкiндiк беретiн деректердi жинау, тiркеу, өңдеу, сақтау және беру жөнiндегi қызмет.
2. Бағалы қағаздар иелерiнiң тiзiлiмi жүйесi бағалы қағаздар ұстаушылардың тiзiлiмiн жүргiзу жүйесiне өзгерiстер енгiзудi қажет етуге әкеп соғатын барлық фактiлер мен құжаттар туралы ақпаратты жинау мен сақтауды қамтамасыз етуге тиiс.
3. Бағалы қағаздар ұстаушылардың тiзiлiмiн жүргiзу құжаттандырылған немесе құжаттандырылмаған нысандарда шығарылған атаулы бағалы қағаздар жөнiнде жүзеге асырылады.
4. Бағалы қағаздар ұстаушылардың тiзiлiмiн эмитент немесе эмитентпен жасасқан шартқа сәйкес тiркеушi жүргiзедi.
5. Бағалы қағаздар ұстаушылардың саны 500-ден аспаған кезде эмитент өзi шығарған бағалы қағаздарды ұстаушылардың тiзiлiмiн дербес жүргiзуге құқылы.
6. Тiркеушi бағалы қағаздар ұстаушылардың тiзiлiмдерiн эмитенттердiң санына шек қоймай жүргiзедi.
7. Бағалы қағаздар ұстаушы туралы деректер бағалы қағаздар иесiнiң немесе оларды нақтылы ұстаушының тапсыруы бойынша тiзiлiмге енгiзiлуге тиiс.
8. Бағалы қағаздар иесiнiң немесе нақтылы ұстаушының талап етуi бойынша тiркеушi тiзiлiмнен көшiрме беруге мiндеттi.
Тiзiлiмнен берiлетiн көшiрмеде көшiрме берiлiп отырған бағалы қағаздарға қойылған барлық шектеулер немесе оларды мiндеттеу фактiлерi туралы белгi болуға тиiс.
9. Тiзiлiмдi жүргiзу тәртiбiн, тiзiлiмдерден берiлетiн көшiрмелердiң нысандарын, бағалы қағаздар беру туралы өкiмдердiң нысандарын және оларда көрсетiлетiн мәлiметтердiң тiзбесiн уәкiлеттi орган белгiлейдi.
10. Эмитент пен тiркеушiнiң арасында тiзiлiм жүргiзу туралы шарттың күшi тоқтатылған жағдайда соңғысы эмитент көрсеткен басқа тiркеушiге тiзiлiм жүйесiн қарайтын барлық деректер мен құжаттарды, сондай-ақ шарттың күшi тоқтатылған күнге жасалған тiзiлiмдi бередi. Оның берiлуi уәкiлеттi орган белгiлейтiн мерзiмде жүзеге асырылады.
Эмитенттен жасасқан шарттың қолданылуы тоқтатылған күннен кейiн тiркеушi берген барлық көшiрмелер жарамсыз болады.
11. Тiркеушi эмитенттiң, оның лауазымды адамдарының және дербес немесе аффилиирленген тұлғалармен бiрлесiп осы эмитенттiң дауыс берiлетiн акцияларының (үлестерiнiң, үлестiк жарналарының) бес және одан да көп процентiн иеленетiн әрбiр жеке акционерiнiң (қатысушының) аффилиирленген тұлғасы болуға тиiс емес.
Ескерту. 34-бап өзгертiлдi және толықтырылды - Қазақстан
Республикасының 1998.07.10. N 282 Заңымен.
35-бап. Кастодиандық қызмет
1. Кастодиандық қызмет - банктер өздерiне клиенттер сенiп тапсырған бағалы қағаздар мен ақшаны сақтауды және есепке алуды қамтамасыз ету жөнiнде бағалы қағаздар рыногында атқаратын қызметi.
2. Кастодиандық, қызметтi лицензиялауды уәкiлеттi орган жүзеге асырады.
3. Кастодиан өз клиенттерiне тиесiлi бағалы қағаздардың нақтылы ұстаушысы болуға құқылы.
4. Кастодиандық қызметтi жүзеге асырудың шарттары мен тәртiбi заңдармен және Қазақстан Республикасының Ұлттық Банкi мен уәкiлеттi органның нормативтiк құқықтық актiлерiмен белгiленедi.
Ескерту. 35-бап өзгертiлдi - Қазақстан Республикасының 1997.07.11.
N 154 Заңымен.
36-бап. Бағалы қағаздар бланкiлерiн шығару және
Қазақстан Республикасының аумағына әкелу
1. Бағалы қағаздар бланкiлерiн шығару жөнiндегi қызмет - полиграфия өндiрiсi бар және бағалы қағаздар бланкiлерiн шығарудың толық циклы жасалатын полиграфия кәсiпорындарының қызметi.
