Агроөнеркәсiп кешенiнiң салалары үшiн шетелдiк технологияларды, техника
мен басқа да өнiмдердi сатып алуды ретке келтiру туралы Қазақстан
Республикасы Министрлер Кабинетінің 1993 ж. 29 желтоқсандағы № 1312
қаулысы
Қазақстан Республикасы Үкіметінің 2005 жылғы 9 ақпандағы № 124 Қаулысымен күші жойылды
Агроөнеркәсiп кешенi үшiн шетелдiк технологияларды, техника мен басқа өнiмдердi сатып алуды ретке келтiру, республикаға техниканың, пестицидтердiң, гербицидтердiң, өсiмдiк тұқымдарының мемлекеттік сорттық сынаудан өтпеген, ескiрген үлгiлерiн әкелудi, сондай-ақ мақсатта жұмсалатын валюталық қаражаттың орынсыз шығындарын болдырмау мақсатында Қазақстан Республикасының Министрлер Кабинетi қаулы етедi:
1. Шетелдiк фирмалардан техникалық-экономикалық жағынан негiздеусiз, сараптау мен тиiстi сынаудан өтпеген техника мен технологияларды, асыл тұқымды малды, өсiмдiк қорғау құралдарын, вакцинаны және ауыл шаруашылығы бағытындағы басқа да өнiмдердi шетел кредитi мен Республикалық валюта қаражаты есебiнен сатып алуға жол берiлмейдi деп есептелсiн.
Қазақстан Республикасы агроөнеркәсiп кешенiнiң салалары үшiн шетелдiк технологияларды, техниканы, тұқымды, малды, өсiмдiк қорғау құралдарын, вакцинаны және басқа да өнiмдердi сатып алудың тәртібі туралы Ереже бекітілсiн (қоса берiлiп отыр).
2. Осы қаулының 1-тармағында көрсетiлген өнiмдердi жасап шығарумен, оларды өндiру және сынаудан өткiзумен айналысатын Қазақстан Республикасының министрлiктерi мен ведомстволарына, ғылыми ұйымдары және басқа да мекемелерi мен кәсiпорындары сынақ лабораторияларын (орталықтарын) тiркеуге әзiрлеудi жүзеге асырсын.
Қазақстан Республикасының Министрлер Кабинетi жанындағы Стандарттау және метрология жөніндегі Бас басқармасы берiлген өтiнiштерге сәйкес осы өнiмдерге сертификаттық сынақ жасау құқығын беретiн сынақ лабораторияларының (орталықтарының) тiркелуiн жүргiзсiн.
3. Қазақстан Республикасының министрлiктерi, мемлекеттік комитеттерi мен ведомстволары агроөнеркәсiп кешенi үшiн шетелдiк технологияларды, техниканы, малды, өсiмдiк қорғау құралдарын, вакцина мен басқа да өнiмдердi сатып алғанда олардың белгiлi бiр бөлiгiн Қазақ ауыл шаруашылығы ғылым академиясы мен ауыл шаруашылығы жоғары оқу орындарының тәжiрибелiк және эксперименталдық шаруашылықтарына, ғылыми-зерттеу ұйымдарының сынақ лабораторияларына, Қазақстан Ауыл шаруашылығы министрлігінiң машина сынау станцияларына бiрiншi кезекте бөлiп отырсын.
Қазақстан Республикасының Қаржы министрлігі аталған үлгiлердi орталықтандыра сатып алуға және оларды сынақтан өткiзудi ұйымдастыруға қажеттi қаражатты жыл сайын бюджет жобаларында көздейтiн болсын.
4. Қазақстан Республикасының Экономика министрлігі Қазақ ауыл шаруашылығы ғылым академиясымен, мүдделi министрлiктермен және ведомстволармен бiрлесе отырып импортты ауыстыратын материалдар мен техниканы, өсiмдiк қорғау құралдары мен биопрепараттарды отандық технологиялар негiзiнде 1994 жылдан бастап шығаруды ұйымдастыру туралы мәселенi пысықтасын.
5. Шетелдiк технологиялар, техника, өсiмдiк тұқымдары, асыл тұқымды мал, өсiмдiк қорғау құралдары, вакцина және агроөнеркәсiп кешенi салалары үшiн басқа да өнiмдердi сатып алу саласындағы қызметтi үйлестiру, сондай-ақ оларды сатып алатын валюта қаражатын шоғырландыру мақсатында осы мәселеге мүдделi министрлiктер, ведомстволар, мемлекеттік комитеттер мен акционерлік компаниялар акционерлік қоғам құра алады.
Қазақстан Республикасының
Премьер-министрi
Қазақстан Республикасы
Министрлер Кабинетінің
1993 жылғы 29 желтоқсандағы
№ 1312 қаулысымен
Бекiтiлген
Агроөнеркәсiп кешенi салалары үшiн шетелдiк технологияларды,
техниканы, тұқымды, малды, өсiмдiк қорғау құралдарын, вакцинаны
және басқа өнiмдердi сатып алудың тәртібі туралы
Ереже
1. Осы Ереже агроөнеркәсiп кешенi салалары үшiн шетелдiк технологияларды, техниканы, өсiмдiк тұқымдарын, асыл тұқымды малды, өсiмдiк қорғау құралдарын, вакцинаны және басқа өнiмдердi шетел кредитi мен Республикалық валюта қорының қаражаты есебiнен сатып алудың тәртібін белгiлейдi.
2. Шетелден сатып алуға жоспарланған ауыл шаруашылығы бағытындағы импорттық машиналардың, жабдықтардың, технологиялардың, тұқымдардың, асыл тұқымды малдың, вакцинаның, өсiмдiк қорғау құралдарының өнеркәсiптiк үлгiлерiн таңдап алу жөніндегі ұсыныстарды әзiрлеудi министрлiктерде, мемлекеттік комитеттерде, ведомстволарда немесе кәсiпорындарда арнайы құрылған тәжiрибелi мамандар тобы жүргiзедi. Мұндай үлгiлердiң әлемдiк стандартқа сай келуi тиiс және техникалық-экономикалық көрсеткiштерi жағынан ТМД елдерiнiң өндiрiсiнде бар сол тектестерден асып түсуi шарт.
3. Аталған өнiмдердi сатып алу жөнiнде әзiрленген ұсыныстар ғылыми-техникалық сараптау жүргiзу мақсатымен Қазақстан Республикасының агроөнеркәсiбi Ведомствоаралық ғылыми-техникалық кеңесiнiң қарауына жiберiледi.
Өсiмдiктердi қорғаудың химиялық, биологиялық құралдары мен өсу реттегiштерiн сатып алу мәселесiн Қазақстан Республикасының Ауыл шаруашылығы өсiмдiктерi мен орман алқаптарын қорғаудың химиялық, биологиялық құралдарын, феромондар мен өсу реттегiштерiн сынау және тiркеу жөніндегі мемлекеттік ведомствоаралық комиссиясы шешедi.
4. Сатып алынатын технологиялардың, техниканың, тұқымның, асыл тұқымды малдың, өсiмдiк қорғау құралдары мен ауыл шаруашылығы бағытындағы басқа да өнiмдердiң жоғары тұтынушылық қасиеттерi туралы тиiстi сынақтармен негiзделген дәлме-дәл деректер болған 3-тармақта аталған ұйымдар тиiстi сараптамадан кейiн қосымша сынақтан өткiзбей-ақ осы өнiмдердi сатып алу жөнiнде ұсыныс жасау туралы шешiм қабылдай алады.
5. Тұтынушылық қасиеттерi туралы дәлме-дәл деректер мен республика жағдайында қолдану тәжiрибесi болмағанда технологиялар мен техниканың, тұқымның, асыл тұқымды малдың, өсiмдiктер қорғау құралдарының, вакцинаның таңдалған үлгiлерi ғылыми сараптама жүргiзу үшiн жеткiлiктi мөлшерде ғана сатып алынады, сараптама Қазақ ауыл шаруашылығы ғылым академиясы мен Қазақстан Республикасы Ұлттық ғылым академиясы ғылыми-зерттеу ұйымдарының бейiмделген лабораторияларында, тәжiрибелiк және эксперименталдық шаруашылықтарында, Қазақстан Республикасы Ауыл шаруашылығы министрлігінiң жоғары ауыл шаруашылық оқу орындарының сорт учаскелерi мен машина сынау станцияларында, оқу-тәрбие шаруашылықтарында жүргiзiледi, сертификаттық сынаулар Қазақстан Республикасы Министрлер Кабинетінің жанындағы Стандарттау және метрология жөніндегі Бас басқармасында тiркелген лабораторияларда (орталықтарында) жүргiзiледi. Бұл үлгiлерге сондай-ақ Қазақстан Республикасының Экология және биоресурстар министрлігі тарапынан мемлекеттік экологиялық сараптама да жүргiзiледi.
Техникалық-экономикалық негiздемелер әзiрлеуге жұмсалған шығынды импорттық техниканы, технологияларды және ауыл шаруашылығы бағытындағы басқа да өнiмдердi сатып алушы министрлiктер, мемлекеттік комитеттер, ведомстволар, меншiктiң барлық түріндегі кәсiпорындар мойындарына алады. Оларды сынау мемлекеттік бюджеттен осы мақсатқа бөлiнген қаржы есебiнен жүргiзiледi.
6. Сынау қорытындылары тиiсiнше Қазақстан Республикасының агроөнеркәсiп кешенi Ведомствоаралық ғылыми-техникалық кеңесi мен Қазақстан Республикасының Ауыл шаруашылығы өсiмдiктерi мен орман алқаптарын қорғаудың химиялық, биологиялық құралдарын, феромондар мен өсу реттегiштерiн сынау және тiркеу жөніндегі мемлекеттік ведомствоаралық комиссиясында қаралады. Олардың ұсыныстары әлеуеттi тұтынушылар мен Қазақстан Республикасының Экономика министрлігі жанындағы Шетел инвестициялары жөніндегі ұлттық агенттiгiнiң қаперiне жеткiзiледi.
7. Шетелдiк техниканы, технологияларды, тұқымдарды, асыл тұқымды малды, вакцинаны, өсiмдiк қорғау құралдары мен ауыл шаруашылығы бағытындағы басқа да өнiмдердi сатып алу жөніндегі, сондай-ақ шетел кредитi мен Республикалық валюта қорының қаражаты есебiнен валюталық қаржыландыруды талап ететiн импортты ауыстыратын өнiмдер шығаруды ұйымдастыру жөніндегі ұсыныстар Қазақстан Республикасы Экономика министрлігі жанындағы Шетелдiк инвестициялар жөніндегі ұлттық агенттiгiнiң мiндеттi түрде сараптауынан өткiзiлуге жатады.
8. Шетелдiк технологияларды, техниканы, тұқымдарды, асыл тұқымды малды, вакцинаны және ауыл шаруашылығы бағытындағы басқа да өнiмдердi сатып алудың аса маңызды және даулы мәселелерiн, сондай-ақ импортты ауыстыратын өнiмдердi шығаруды ұйымдастыру жөніндегі ұсыныстар Қазақстан Республикасы Министрлер Кабинетінің жанындағы Агроөнеркәсiп кешенiнiң кеңесi мен Қазақстан Республикасы Министрлер Кабинетінің жанындағы Агроөнеркәсiп кешенiне арналған машина жасау жөніндегі кеңесте қаралуы мүмкiн.
9. Мемлекет кепiлдiгiмен кредит есебiнен белгiленген тәртiптi бұзып сатып алынған импорттық техниканы, технологияларды және ауыл шаруашылығы бағытындағы басқа да өнiмдердi өндiрiске енгiзуден келген зиянның орны қазiргi қолданылып жүрген заңдарға сәйкес тауарлардың сол түрлерiн сатып алуға тапсырыс берген заңды ұйымдар тарапынан толтырылады.
