«Қазақстан Республикасының 2025 жылға дейінгі Стратегиялық даму жоспарын бекіту және Қазақстан Республикасы Президентінің кейбір жарлықтарының күші жойылды деп тану туралы» Қазақстан Республикасы Президентінің 2018 жылғы 15 ақпандағы № 636 Жарлығына өзгерістер енгізу туралы» Қазақстан Республикасы Президентінің 2021 жылғы 26 ақпандағы № 521 Жарлығы (күші жойылды)

 2025 жылға қарай Қазақстандағы түбегейлі өзгерістер:

 қазақстандық экспорттың шикізаттық сипатынан - қазақстандық өнімді ілгерілету және шикізаттық емес экспортты дамыту үшін қолайлы жағдайлар жасауға көшу.

 1-міндет. Сауда-экономикалық ынтымақтастықты кеңейту, сондай-ақ халықаралық интеграциялық бірлестіктерге белсенді қатысу арқылы ұлттық мүдделерді ілгерілету және қорғау.

 Саясат сауда-экономикалық ынтымақтастықты кеңейтуге, халықаралық интеграцияда ұлттық мүдделерді ілгерілетуге және қорғауға, сыртқы экономикалық қызметте экономикалық қауіпсіздік өлшемшарттарын сақтауға, сыртқы қарыз алу саясатын оңтайландыруға, сондай-ақ интеграциялық процестерге қатысу мен ұлттық құзыретте қалуы тиіс мәселелер арасындағы теңгерімді қолдауға бағытталған.

 Еуразиялық экономикалық одақ (бұдан әрі - ЕАЭО), Тәуелсіз Мемлекеттер Достастығы және басқалар сияқты халықаралық және өңірлік экономикалық бірлестіктерде Қазақстанның экономикалық мүдделерін ілгерілету жөніндегі жұмыс жалғасады.

 Қазақстандық тауарлардың ЕАЭО бойынша әріптес елдердің нарықтарына кемсітусіз қолжетімділігін қамтамасыз ету мақсатында кедергілерді жою және ЕАЭО-ның ішкі нарығындағы алып қоюлар мен шектеулерді барынша қысқарту бойынша жұмыс жалғасады.

 Ұлттық мүдделердің сақталуы және ескерілуі мақсатында 2025 жылы Қазақстан тарапынан белгілі бір даярлықты талап ететін газ, мұнай және мұнай өнімдерінің ортақ нарықтарын, энергетика және қаржы нарықтарын іске қосу маңызды болмақ.

 Өнеркәсіп және ауыл шаруашылығы салаларында қосылған құнның жаһандық тізбектеріне кезең-кезеңмен кіріктіре отырып, қосылған құнның өңірлік тізбектерін жолға қою жалғасады. Шикізаттық емес экспорт (41 млрд АҚШ долл. дейін) және АӨК өнімдері экспортының көлемі 2 есе артады.

 Вьетнаммен және Иранмен қолданыстағы келісімдердің үлгісі бойынша еркін сауда туралы келісімдер жасасу арқылы қазақстандық тауарлардың үшінші елдер нарықтарына преференциялық қолжетімділігін қамтамасыз ету бойынша ЕАЭО-ға мүше мемлекеттермен бірлескен жұмыс жүргізілетін болады.

 Көрсетілетін қызметтерді сату және шетелдік инвестициялар тарту үшін қолайлы жағдайлар жасау мақсатында Сингапурмен келіссөздер жалғасады. Жақын перспективада басым әріптестермен отандық өнімді өткізудің жаңа нарықтары зерделенетін болады.

 ЕАЭО шеңберінде өзара іс-қимыл салаларын одан әрі дамыту және тереңдету бұрынғыдай ұлттық мүдделер мен ішкі экономикалық саясаттың басымдықтарын ескере отырып, прагматикалық мүдде, теңдік және экономикалық басымдық негізінде қаралатын болады.

 Елдің халықаралық сауда рәсімдерін оңайлату жөніндегі міндеттемелерін орындау үшін мемлекеттік шекараның периметрі бойынша автомобиль, теміржол бекеттері мен өткізу пункттерінің инфрақұрылымын жаңғырту және реконструкциялау жалғасады, бұл отандық тауарларды сыртқы нарықтарға барынша ыңғайлы ілгерілету үшін қажетті жағдайлар жасауға мүмкіндік береді.

 Жұмысты жүзеге асырудың тәсілдері мен форматы қайта қаралады, оның негізінде ЭЫДҰ-мен, ғылыми тәсілге негізделген өзара іс-қимылдың жаңа стратегиясы да құрылады.

 Қазақстан 2025 жылға дейін ЭЫДҰ-ның озық практикалары мен стандарттарын имплементациялау бойынша осы ұйымға кіру ниеті туралы ресми өтініш жіберу үшін жұмыс жүргізеді.

 Қазақстандық бизнес қызметінің қолайлы жағдайларын қамтамасыз ету мақсатында өңірлік экономикалық бірлестіктермен (Шанхай ынтымақтастық ұйымы, Тәуелсіз Мемлекеттер Достастығы, Еуропалық одақ, Оңтүстік-Шығыс Азия мемлекеттері қауымдастығы және т.б.) ынтымақтастық күшейтілетін болады.

 2-міндет. Қазақстандық өнімді ілгерілету үшін қолайлы жағдайлар жасау

 Тиімді экономикалық дипломатия жүргізу әлемдік нарықтарға кепілді қол жеткізу жолындағы басты аспект болып табылады. Мемлекетаралық деңгейде қол жеткізілген уағдаластықтар, егер импорттаушы елдердің ұлттық талаптары сақталатын жағдайда, отандық тауарлардың экспорты үшін қолайлы жағдайларды қамтамасыз етуге мүмкіндік береді.

 Әлеуетті әріптестерді тартуға бағытталған халықаралық көрмелер, жәрмеңкелер, бизнес-форумдар және басқа да имидждік іс-шаралар ұйымдастыру арқылы қазақстандық өнімді ілгерілету үшін нақты нарықтарда шетелдегі сауда өкілдіктерінің (дипломатиялық өкілдіктердің) жұмысы жандандырылатын болады. Бұл жұмыс іс-шараларды ұйымдастыруға емес, өнімді ілгерілетудегі тиімділікке (экспорттың нақты көрсеткіштері) бағдарланған нақты көрсеткіштерімен құрылатын болады.

 Шет мемлекеттермен екіжақты сауда-экономикалық қатынастар шеңберінде үкіметаралық комиссиялар жандандырылуда.

 Басым ұлттық мүдделерді ілгерілетуге және қазақстандық өндірушілердің шет мемлекеттер нарықтарына қол жеткізуі жөніндегі мәселелерді шешуге бағдар ұстанады.

 Шикізаттық емес экспортты дамыту шеңберінде өтеу, сақтандыру және кепілдік беру, субсидиялау және т.б., қаржылай емес құралдар, қолдау бағдарламалары арқылы қазақстандық экспорттаушыларды қолдау, Қазақстан Республикасы Сыртқы істер министрлігінің шетелдегі мекемелерін тарту, экспорттық әлеуеті жоғары қызметтерді дамыту, қауіпсіздік пен сапаның халықаралық талаптарына жауап беретін жаңа ұлттық стандарттарды қабылдау арқылы қаржылай қолдау көрсету бойынша шаралар қабылданатын болады.

10-жалпыұлттық басымдық. Теңгерімді аумақтық даму

 Басымдықтың мәні: өңірлердің әлеуетін ашу және олардың әлеуметтік-экономикалық жүйелерінің бәсекеге қабілеттілігін нығайту.

 2025 жылға қарай Қазақстандағы түбегейлі өзгерістер:

 орталықтандырылған басқарудан - өңірлердің дербестігін арттыру;

 өңірлік алшақтықтардан - сыртқы және ішкі байланысты қамтамасыз етуге, іскерлік белсенділікті ынталандыруға көшу.

 1-міндет. Елдің аумақтық тұтастығы және кеңістіктегі дамуы

 Мемлекет өңірлердің дербестігін арттыру мен аумақтық тұтастыққа қауіп-қатерді азайту арасындағы ақылға қонымды теңгерімді ұстанатын болады.

 Шекара маңы ынтымақтастығы мен экономикалық интеграцияның түрлі нысандары ел үшін саяси тәуекелдер туғызбайды.

 Кеңістікте даму саясаты:

 басқарылатын урбандалу мен «адамдар инфрақұрылымға» қағидатын ескере отырып, «өсу нүктелерін» дамытуға;

 «өсу нүктелерімен» бірге елдің тірек негізін (қоныстандыру жүйесін) және бірыңғай ішкі экономикалық кеңістікті құрайтын «экономикалық дәліздерді» қалыптастыруға және дамытуға;

 елдің солтүстік, оңтүстік және оңтүстік-шығыс өңірлерінің өнеркәсіптік әлеуетін ашуға;

 елдің батыс, орталық және орталық-шығыс өңірлерінде өнеркәсіптің «жаңа бөліністерін» дамытуға бағытталатын болады.

 Қазақстанның «өсу нүктелері» қалалық агломерациялар, ірі қалалар (негізінен облыс орталықтары), халқының саны 50 мыңнан астам адам моноқалалар, ірі қалаларға жақын және шекара маңындағы аумақтарда орналасқан шағын қалалар, сондай-ақ тірек ауылдық елді мекендер болып табылады.

 «Өсу нүктелерін» дамыту жөніндегі шаралар экономикалық интеграция есебінен экономикалық белсенділік пен әл-ауқаттың қалған аумақтарға «оң әсерін қалыптастыруын» қамтамасыз етуге мүмкіндік береді.

 Қазақстанның кеңістіктегі дамуы экономикалық және демографиялық тығыздықты арттыруға, «экономикалық дәліздер» арқылы ішкі байланысты арттыруға бағытталатын болады.

 «Басқарылатын урбандалу» саясаты ауыл халқының қалаларға жаппай ағылуына жауап ретінде алдын алу шараларын («адамдар инфрақұрылымға» қағидаты) қабылдауды білдіреді. Осыған байланысты жер ресурстарын кешенді басқару және көліктік жоспарлау, халық пен бизнестің қажеттіліктерін қанағаттандыру үшін әлеуметтік және инженерлік инфрақұрылымға инвестициялау, «жасыл» технологияларды қолдана отырып, «жасыл аймақтарды» кеңейту сияқты құралдар пайдаланылатын болады. Ұзақ мерзімді перспективада урбандалу деңгейінің ұлғаюы көрсетілетін қызметтер секторының экономикаға үлесін кеңейтуге, сол сияқты жұмыс орындары санының тұрақты өсуін қамтамасыз ететін көрсетілетін қызметтердің жаңа түрлерін құруға мүмкіндік береді. Қызмет көрсету секторын дамыту экономиканың басқа секторларынан босатылған жұмыскерлерді, сондай-ақ еңбек нарығына алғаш рет кіретін жас мамандарды жұмысқа орналастыруға мүмкіндік береді.

 Ірі металлургия кәсіпорындары жұмыс істейтін өңірлер (бірінші кезекте, Шығыс Қазақстан, Қарағанды және Павлодар облыстары) жоғары технологиялық, ғылымды қажетсінетін өндірістер мен техникалық қызмет көрсету орталықтарына айналады. Ғылымды қажетсінетін өндірістер құра отырып, осы облыстарды қайта индустрияландыру жүргізілетін болады.

 Еліміздің батыс өңірінде (Маңғыстау, Батыс Қазақстан, Ақтөбе, Атырау облыстары) «жаңа бөліністерді» дамыту үшін мұнай-химия, газ өңдеуді дамытуға, шикізатты қайта өңдеуге арналған отандық жабдықтар өндірісін жолға қоюға, сондай-ақ отандық компаниялардың мұнай сервистік көрсетілетін қызметтер нарығын игеруіне баса назар аударылады.

 Оңтүстік өңірлерді индустрияландыру үлкен қалаларды (облыс орталықтарын) энергиямен қамтамасыз етуде жаңартылатын энергия көздерін дамыту, ірі көлік-логистикалық жобаларды іске асыру, облыс орталықтарында индустриялық-инновациялық мамандықтар бойынша техникалық және кәсіптік білім беру ұйымдарының желісін қалыптастыру есебінен қамтамасыз етіледі.

 Солтүстік өңірлерді (Солтүстік Қазақстан, Ақмола, Қостанай облыстары) дамыту үшін озық технологияларды пайдалана отырып, агроөнеркәсіп кешенін (өсімдік шаруашылығы, мал шаруашылығы, сүт фермалары, тамақ өнеркәсібі) одан әрі дамыту, ауыл шаруашылығы машинасын жасауды және басқа да ілеспе өндірістерді дамыту (Қостанай, Петропавл қалаларында) басымдықтарға айналады.

 Ресей тарапымен шекара маңы ынтымақтастығын дамытуға солтүстік өңірлердің ерекше назар аударылады, бүл интеграциялық процестерді жеделдетуге, тауарлардың, жұмыстардың, көрсетілетін қызметтердің, капиталдың және еңбек ресурстарының «ортақ нарығын» қалыптастыруға мүмкіндік береді.

 Ірі қалаларға (облыс орталықтарына) жақын орналасқан моно- және шағын қалаларды дамыту үйлесімді және үйлестірілген түрде (өнеркәсіп орындарының орналасуы, жалпы көлік-логистикалық жүйе, жұмыспен қамтудың ортақ нарығы және т.б.) жүзеге асырылатын болады.

 Шалғайдағы (ірі «өсу орталықтарынан алыстағы») моноқалалар арасында экономиканы әртараптандыру және баламалы өндірістерді дамыту үшін әлеуеті бар ірі моноқалаларға (халқы 50 мыңнан астам адам) мемлекет баса назар аударатын болады.

 2-міндет. Мемлекеттік басқаруды орталықтан алу

 Орталықтың өкілеттіктері

 Орталық деңгейде тек стратегиялық мәселелер: қорғаныс қабілеті мен ұлттық қауіпсіздікті, заңдылық пен құқық тәртібін, бірыңғай сыртқы экономикалық және монетарлық саясаттарды қамтамасыз ету, республикалық маңызы бар инфрақұрылымды дамыту және азаматтардың өзін-өзі дамытуы үшін мүмкіндіктерді теңестіру сақталатын болады.

 Республикалық маңызы бар инфрақұрылым өңіраралық байланыс (авто- және теміржолдар, көпірлер, порттар мен әуежайлар), энергиямен жабдықтау (электрмен және газбен жабдықтау), экология, байланыс (деректерді берудің магистральдық желілері) салаларын және өнеркәсіптік аймақтарды қамтиды. Мектепке дейінгі және мектептегі білім беру салалары, сондай-ақ тұрғылықты жеріне қарамастан әрекетке қабілетсіз адамдарды әлеуметтік қорғау арқылы мүмкіндіктерді теңестіруге қол жеткізілетін болады.

 Өңірлердің өкілеттіктері

 Жергілікті жерлерде өмір сүру сапасы қалыптасады, сондықтан азаматтар мен мемлекеттік шешім қабылдайтын адамдар арасындағы қашықтықты қысқарту өте маңызды болады. Бұл жергілікті атқарушы органдардың қызметін айтарлықтай жақсартып қана қоймай, сонымен қатар әлеуметтік капитал деңгейін арттыруға мүмкіндік береді.

 Өңірлік деңгейде облыстық, аудандық (қалалық) және ауылдық билік деңгейлері арасында өкілеттіктердің, жауапкершілік пен ресурстардың қажетті теңгерімі қамтамасыз етіледі.

 Аудан (облыстық маңызы бар қалалар), аудандық маңызы бар қалалардың, кенттердің, ауылдардың, ауылдық округтердің әкімдерін тікелей сайлау енгізілетін болады.

 Өмір сүру сапасына тікелей байланысты барлық мәселелер барынша жергілікті деңгейде шешіледі.

 Жергілікті атқарушы органдардың барлық тиісті өкілеттіктері мен құралдары (фискалдық орталықтан алу) болады. Бұл аумақты дамыту, қоғамдық кеңістікті абаттандыру, жергілікті көлік, әлеуметтік және өзге де инфрақұрылым, базалық қызметтер көрсету мәселелеріне қатысты.

 Дербестікті ұлғайту қоғамдық бақылау мен азаматтық институттар арқылы жергілікті биліктің халыққа есеп беруін күшейтуді көздейді. Аудандар мен елді мекендер бюджеттерінің инфрақұрылымдық және әлеуметтік бастамаларына арналған қоғамдық маңызы бар шығыстары қоғамдық сараптамадан, оның ішінде онлайн-сауалнамалар қолданылып сараптамадан өтетін болады.

 Жергілікті жерлерде барлық бағдарламаларды іске асыру жергілікті өзін-өзі басқару органдарының бақылауымен жүзеге асырылуға тиіс.

 Тиісті әкімшілік-аумақтық бірліктердің жергілікті атқарушы органдары мен мәслихаттарының өзгеше реттеуді және фискалдық саясатты пайдалану мүмкіндігімен кеңейтілген өкілеттіктері болады. Мәслихаттар отырыстарының міндетті түрде онлайн-трансляңиясы енгізіледі. Халық қалаулыларының пікірталастары, олардың қоғамдық-саяси келбеті қоғам үшін «сандыққа салынған құпия» болмауы керек.

 Жергілікті өзін-өзі басқаруды одан әрі дамыту мақсатында оңайлатылған бюджеттік рәсімдер, дербестікті кеңейту, өкілді және атқарушы органдардың жауапкершілігін күшейту көзделетін болады.

 Жергілікті өзін-өзі басқаруды дамытудың жаңа тұжырымдамасы әзірленеді.

 3-міндет. Халықтың шоғырлануы мен ұтқырлығын ынталандыру

 Елді аумақтық-кеңістікте дамыту экономикалық және демографиялық тығыздықты арттыруға бағытталатын болады. Орталық азаматтардың ұтқырлығы аймағының шегінде басқарылатын урбандалуды ескере отырып, «өсу нүктелерін» дамытуға ден қояды. Өңірлік таланттарды тарту және олардың тұрақтап қалуы үшін жағдай жасалатын болады.

 «Адамдар өңірлерден маңыздырақ» тәсіліне сәйкес мемлекет халықтың ішкі көші-қонына кедергі жасамайды және келешегі белгісіз моно- және шағын қалаларда, шалғайдағы ауылдық елді мекендерде, шекара маңындағы аудандарда да бұрмалаушы сигналдар туғызбайды. Бюджеттік ресурстардың тиімділігі «адамдар - инфрақұрылымға» моделіне көшуіне қарай ұлғаятын болады.

 Ірі қалалар функционалдық қалалық аудандарды құрайтын іргелес елді мекендермен қатар қаралатын болады. Әкімшілік-аумақтық құрылым елді мекендерді ірілендіру, біріктіру және қайта бағындыру жолымен ішкі және сыртқы байланыстарды жақсартуды ынталандыратын болады.

 Шикізаттық облыстардағы жүйе құраушы кәсіпорындар жұмыскерлерінің отбасылары қоныс аудару, қайта оқыту және балаларды біліммен қамтамасыз ету мүмкіндігіне ие болады. Бұған қаржы-өнеркәсіптік топтар мен жергілікті атқарушы органдардың бірлескен көмек топтамасын әзірлеуі арқылы қол жеткізіледі.

 4-міндет. Сыртқы және ішкі байланыстылықты қамтамасыз ету

 Экономикалық белсенділік, капитал мен ресурстар шогырланған орталықтар - қалалар «шұғыла» қағидаты бойынша бірыңғай көлік желісіне интеграцияланатын болады. Олардың аумақтары шегінде қала маңындағы көліктің интеграцияланған инфрақұрылымы болады.

 Республикалық жолдардың 24 мың км реконструкцияланатын және жол сервисімен қамтамасыз етілетін болады.

 Сонымен қатар ауылдық жерлерде инженерлік желілермен қамтамасыз етілген жеке тұрғын үй құрылысы үшін жыл сайын 22 мың жер учаскесі бөлінетін болады.

 Шекара маңындағы аумақтарды дамытудың сыртқы векторы көрші елдердің «миллиондық» қалаларымен инфрақұрылымдық байланыспен нығайтылатын болады.

 Тірек ауылдық елді мекендердің негізгі көлік артерияларына, ірі қалаларға немесе жақын маңдағы облыс орталықтарына инфрақұрылымдық қолжетімділігі болады. Әрбір тірек ауылға дейінгі жергілікті жолдар салынады және 100 % жөнделеді. Даму әлеуеті бар 3 500-ден астам ауыл жаңа өңірлік стандарттарға сәйкес жаңғыртылатын болады.

 Өңірлік даму саласындағы бағдарламалық құжаттар аумақтық- кеңістіктегі даму проблемаларын кешенді түрде шешетін болады.

 5-міндет. Іскерлік белсенділікті ынталандыру үшін республикалық инфрақұрылымдық инвестицияларды жүзеге асыру

 Орталық өңірлердің экономикалық дамуын жеделдету үшін мамандандырылған факторларға аса маңызды инвестиңияларды салады.

 Бірінші кезекте бұл өнеркәсіптік аймақтар мен көлік-логистикалық тораптарға, әсіресе, солтүстік-батыс және оңтүстік шекара бойындағы аграрлық өңірлерге, сондай-ақ орталық пен шығыстың металлургиялық өңірлеріне қатысты болады.

 Орталық аумақтық кластерлердің қалыптасуы мен дамуын ынталандырады.

 Жергілікті жерлерде инфрақұрылымдық жобаларды республикалық бюджеттен қаржыландыру кезінде қоса қаржыландырылатын жеке секторға басымдық беріледі.

 6-міндет. «Smart City» («Ақылды қала») тұжырымдамасын іске асыру

 Қалаларда ресурстарды үтымды пайдалану және басқару үшін жоғары

 технологиялық шешімдерді қолдана отырып, Нұр-Сұлтан мен басқа да қалалардың тәжірибесін ескеретін «эталонды» стандарт негізінде «Smart City» тұжырымдамасын іске асыру жалғасады.

 Цифрлық технологиялар білім беру, көлік, тұрғын-үй-коммуналдық шаруашылық, денсаулық сақтау, қауіпсіздік, әлеуметтік сала, қаланы басқару, құрылыс, бизнесті дамыту, туризм және экологияны қоса алғанда, қалалардың тыныс-тіршілігі салаларына енгізілетін болады.

 Бұл қалалық қызметтер жұмысының тиімділігін арттырады және қолданылуы халыққа әлеуметтік пайда беруге көмектесетін «ақылды» технологияларға көшу үшін жағдай жасайды.

 Білім беру инфрақүрылымын дамыту үшін Alpharabius.kz цифрлық платформасы білім беру контентінің бірыңғай тұжырымдамасымен біріктірілген жеке іс жүзінде қашықта орналасқан білім беру ұйымдарының, білім беру жобаларының желісі бар «Al-Farabi Knowledge» («әл-Фараби білім қаласы») тұжырымдамасы іске асырылатын болады.

 7-міндет. «Жасыл» экономика және қоршаған ортаны қорғау

 Жұмыс істеп тұрған өндірістерде ЭЫДҮ стандарттары бойынша ең озық қолжетімді технологияларды енгізуді ынталандыру және «жасыл» технологияларды дамыту, қалдықтарды энергетикалық кәдеге жаратуды дамыту бойынша жұмыс жалғастырылады.

 Париж келісімінің мақсаттарына қол жеткізу үшін Қазақстанның 2050 жылға дейінгі төмен көміртекті дамуы жөніндегі түжырымдама әзірленетін болады.

 Қалдықтарды басқару жүйесін одан әрі дамыту және қоқыстарды қайта өңдеу саласына инвестициялар тарту үшін «Waste to energy» («Қалдықтар энергияға») технологиясын пайдалана отырып, қалдықтарды энергетикалық кәдеге жарату енгізілетін болады.

 Су шаруашылығын дамытуды жақсарту, ирригациялық және дренаждық жүйелерді қалпына келтіру, жаңа су шаруашылығы объектілерін (арналар, су қоймалары) салу, топтық су құбырларын реконструкциялау және су үнемдеу бойынша шараларды енгізу жөнінде шаралар қабылданатын болады.

 Жеке тұлғалардың, аграрийлер мен кәсіпорындардың тиімді су тұтынуын ынталандыратын жүйелі нормаларды енгізу, кәсіпорындар мен тұрғын үй-коммуналдық салада су пайдалану мен тазартудың тұйық циклын ынталандыру мақсатында су заңнамасы жаңартылатын болады.

 Нормативтік есептеулер шегінде және тартылған қаржы қаражатының өтелуін ескере отырып, су беруге арналған тарифті ұлғайтқанда суды пайдалану бөлігінде экономикалық тиімді тарифтік саясатты әзірлеу бойынша; сондай-ақ орман шаруашылығын дамытуды жақсарту, ормандарды сақтау және молықтыру көлемдерін ұлғайту бойынша шаралар қабылданатын болады.

 Минералдық-шикізат базасын дамытуға және геологиялық зерттеулер жүргізуге назар аударылатын болады.

 Жаңа технологияларды таңдау мен енгізу кезінде шетелде энергиялық тиімді және «ақылды» деп танылған технологиялар, Қазақстанның климатына жарамды және пайдаланылатын жағдайына экономикалық тиімділігі басымдыққа ие болады.

 Электр энергетикасында жаңа генерациялау көздері, оның ішінде жаңартылатын энергия көздері пайдаланатын объектілер енгізілетін болады. Экологиялық таза энергия көлемі 13 су электр станциясын, 34 жел және 12 күн станциясын салу есебінен 2 есеге ұлғаяды.

 АХҚО алаңы белсенді түрде іске қосылады, «жасыл» жобаларды қаржыландыру бойынша құралдар (атап айтқанда, «жасыл» облигациялар) пайдаланылады, жаңа құралдар, оның ішінде туынды, «жасыл» қаржы құралдары жасалатын болады.

Қазақстан Республикасының

2025 жылға дейінгі ұлттық

даму жоспарына

ҚОСЫМША

2025 жылға дейінгі Стратегиялық көрсеткіштер картасы