20) авиация персоналының кәсіптік даярлығы және денсаулық жағдайы мәселелері бойынша белгіленген талаптар мен нормаларды азаматтық авиация ұйымдарының қамтамасыз етуін бақылау мен қадағалауды жүзеге асырады;
21) әуеайлақтар (тікұшақ айлақтары) объектілерінің, қону алаңдарының күтіп-ұсталуын және әуежай қызметінің құрамына кіретін әуеайлаққа және жерде қызмет көрсету қызметтерінің (жұмыстарының) сапасын бақылау мен қадағалауды жүзеге асырады;
22) азаматтық авиация саласында ұшу қауіпсіздігі мен авиациялық қауіпсіздік талаптарын бұзушылықтарды есепке алуды жүргізеді;
23) азаматтық және эксперименттік авиация саласындағы ұшудың іздестіру-құтқарумен және авариялық-құтқарумен қамтамасыз етілуін бақылауды жүзеге асырады;
24) азаматтық авиация саласындағы уәкілетті органмен бірлесіп Қазақстан Республикасының әуе кеңістігін пайдалану және авиация қызметі туралы Қазақстан Республикасы заңнамасының Халықаралық азаматтық авиация ұйымының (ИКАО) стандарттары мен ұсынылатын практикасына сәйкес келу мониторингін жүзеге асырады;
25) азаматтық авиация саласындағы уәкілетті органға Халықаралық азаматтық авиация ұйымының (ИКАО) стандарттары мен ұсынылатын практикасынан орын алған айырмашылықтар туралы Халықаралық азаматтық авиация ұйымын (ИКАО) уақтылы хабардар етуді қамтамасыз етуге және оларды аэронавигациялық ақпарат құжаттарында жариялауға жәрдем көрсетеді;
26) азаматтық авиация саласындағы уәкілетті органмен бірлесіп авиациялық оқиғалар мен оқыс оқиғаларды болғызбау немесе олардың салдарын азайту мақсатында ұсынымдар береді, сондай-ақ осындай ұсынымдардың орындалуына талдау жүргізеді;
2022.29.12. № 174-VІІ ҚР Заңымен 27) тармақша өзгертілді (2023 ж. 1 наурыздан бастап қолданысқа енгізілді) (бұр.ред.қара)
27) азаматтық авиация саласындағы уәкілетті органмен бірлесіп, авиациялық оқиғаларды жинау, бағалау, өңдеу, сақтау және тіркеу тетігін қоса алғанда, авиациялық оқиғалар туралы деректерді міндетті және ерікті түрде ұсыну жүйесін әзірлейді, енгізеді, зерделейді және ұстап-тұрады;
28) азаматтық авиация саласындағы уәкілетті органмен бірлесіп мемлекеттік және халықаралық деңгейлерде ұшу қауіпсіздігі туралы ақпарат алмасуға және авиациялық оқиғалар туралы ақпарат таратуға қатысады;
29) азаматтық авиация саласындағы уәкілетті органмен бірлесіп азаматтық авиацияның ұшу қауіпсіздігіне байланысты ақпаратты жинауды және талдауды, сондай-ақ осындай ақпаратты жасауды және азаматтық авиация саласындағы қызметті жүзеге асыратын жеке және заңды тұлғалардың назарына жеткізуді жүзеге асырады. Талдау ақпарат көздерін ашып көрсетуді талап етпейді;
30) авиациялық медициналық сарапшыларды тағайындайды;
2022.29.12. № 174-VІІ ҚР Заңымен 30-1), 30-2), 30-3), 30-4), 30-5), 30-6) және 30-7) тармақшалармен толықтырылды (2023 ж. 1 наурыздан бастап қолданысқа енгізілді)
30-1) елді мекендердің халық тығыз орналасқан аудандарының үстінен пилотсыз авиациялық жүйелерді қолданып ұшуды орындауға арналған рұқсат береді;
30-2) пилотсыз авиациялық жүйелерді қолданып, авиациялық жұмыстарды орындауға арналған рұқсатты береді;
30-3) авиациялық қауіпсіздік бойынша даярлау және қайта даярлау бағдарламасына сәйкес авиациялық қауіпсіздік жөніндегі персоналды жұмысқа жіберуді жүзеге асырады;
30-4) авиация персоналының куәліктерін беруге байланысты даярлау мен бағалаудың құзыреттілік жүйесін іске асыруды жүзеге асырады;
30-5) ұшу қауіпсіздігі және авиациялық қауіпсіздік мәселелері бойынша шет мемлекеттердің авиациялық билігімен және мамандандырылған халықаралық ұйымдармен халықаралық ынтымақтастықты, оның ішінде ынтымақтастық туралы екіжақты келісімдер жасасу, тәжірибе және ақпарат алмасу, сондай-ақ халықаралық азаматтық авиация ұйымдарында Қазақстан Республикасының атынан өкілдік ету арқылы жүзеге асырады;
30-6) Халықаралық азаматтық авиация ұйымының (ИКАО) стандарттары мен ұсынылатын практикасынан орын алған айырмашылықтар туралы Халықаралық азаматтық авиация ұйымын (ИКАО) уақтылы хабардар етуді және оларды аэронавигациялық ақпарат құжаттарында жариялауды қамтамасыз етеді;
30-7) жеке және заңды тұлғалардан Қазақстан Республикасының әуе кеңістігін пайдалану және авиация қызметі туралы Қазақстан Республикасының заңнамасында көзделген ақпаратты, құжаттар мен материалдарды сұратады;
31) Қазақстан Республикасының заңнамасында тыйым салынбаған өзге де қызмет түрлерін жүзеге асырады.
16-10-бап. Азаматтық авиация саласындағы уәкілетті ұйымның қызметін қаржыландыру
2022.29.12. № 174-VІІ ҚР Заңымен 1-тармақ жаңа редакцияда (2023 ж. 1 шілдеден бастап қолданысқа енгізілді) (бұр.ред.қара)
1. Азаматтық авиация саласындағы уәкілетті ұйымның қызметін қаржыландыру азаматтық авиация саласындағы төлемдердің түсімдері есебінен жүзеге асырылады, олар қызметтер көрсетуге арналған шығыстарды өтеу, оның қызметінің шығынсыз болуын қамтамасыз ету және өз кірістері есебінен қаржыландыру үшін жеткілікті болуға тиіс.
2022.29.12. № 174-VІІ ҚР Заңымен 1-1-тармақпен толықтырылды (2023 ж. 1 шілдеден бастап қолданысқа енгізілді)
1-1. Азаматтық авиация саласындағы уәкілетті ұйым азаматтық авиация саласындағы төлемдерді алу қағидаларында айқындалатын тәртіппен азаматтық авиация саласындағы төлемдерді алуға құқылы.
2. Азаматтық авиация саласындағы уәкілетті ұйым жұртшылық пен бұқаралық ақпарат құралдарына бюджеттің ашықтығын, оның ішінде азаматтық авиация саласындағы уәкілетті органның интернет-ресурсында қаржылық есептілікті, сондай-ақ сомасы Қазақстан Республикасының республикалық бюджет туралы заңында тиісті қаржы жылына белгіленген айлық есептік көрсеткіштің 100 еселенген мөлшерінен асып түсетін шығыстардың баптары туралы өзекті және егжей-тегжейлі ақпаратты ашық қолжетімділікте орналастыру арқылы қамтамасыз етуге міндетті.
16-11-бап. 2022.29.12. № 174-VІІ ҚР Заңымен алып тасталды (2023 ж. 1 шілдеден бастап қолданысқа енгізілді) (бұр.ред.қара)
16-12-бап. Аэронавигациялық қызмет көрсетуді мемлекеттік беруші
1. Азаматтық авиация саласындағы уәкілетті органға ведомстволық бағынысты мемлекеттік кәсіпорын болып табылатын аэронавигациялық қызмет көрсетуді беруші аэронавигациялық қызмет көрсетуді мемлекеттік беруші болып табылады.
2. Аэронавигациялық қызмет көрсетуді мемлекеттік беруші қызметінің негізгі мақсаты Қазақстан Республикасының әуе кеңістігінде ұшу қауіпсіздігін қамтамасыз ету болып табылады.
3. Аэронавигациялық қызмет көрсетуді мемлекеттік беруші өз қызметінің негізгі мақсатын аэронавигациялық қызметтер көрсету және ұшу қауіпсіздігін қамтамасыз етуге аударымдарды жүзеге асыру арқылы іске асырады.
2022.29.12. № 174-VІІ ҚР Заңымен 16-13-баппен толықтырылды (2023 ж. 1 наурыздан бастап қолданысқа енгізілді); 2026.12.06. № 311-VIII ҚР Заңымен 16-13-баптың тақырыбы өзгертілді (2026 ж. 13 тамыздан бастап қолданысқа енгізілді) (бұр.ред.қара)
16-13-бап. Азаматтық авиация саласындағы уәкілетті ұйымның қызметшілері
1. Азаматтық авиация саласындағы уәкілетті ұйымның бірінші басшысы Қазақстан Республикасының заңнамасына сәйкес қызметке тағайындалады және қызметінен босатылады.
2. Азаматтық авиация саласындағы уәкілетті ұйымның бірінші басшысы азаматтық авиация саласындағы уәкілетті ұйымға басшылықты жүзеге асырады және Қазақстан Республикасының әуе кеңістігін пайдалану және авиация қызметі туралы Қазақстан Республикасының заңнамасына сәйкес ұйымға жүктелген міндеттердің орындалуына және оның функцияларды жүзеге асыруына дербес жауаптылықта болады.
2026.12.06. № 311-VIII ҚР Заңымен 3-тармақпен толықтырылды (2026 ж. 13 тамыздан бастап қолданысқа енгізілді)
3. Азаматтық авиация саласындағы уәкілетті ұйымның қызметшісі лауазымына:
1) сот әрекетке қабілетсіз немесе әрекет қабілеті шектеулі деп таныған;
2) тармақшаның қолданысы 2029 ж. 14 маусымға дейін тоқтатылды, тоқтата тұру кезеңінде осы тармақша 2026.12.06. № 311-VIII ҚР Заңының 2-бабының 2-тармағы 6) тармақшасының редакциясында қолданылады
2) активтері мен міндеттемелері туралы декларацияны ұсынбаған адамды жұмысқа қабылдағаны үшін алғаш рет әкімшілік жауаптылыққа тартылған жағдайды қоспағанда, лауазымға тағайындалар алдындағы үш жыл ішінде әкімшілік сыбайлас жемқорлық құқық бұзушылық жасағаны үшін әкімшілік жаза қолданылған;
3) сыбайлас жемқорлық қылмыс жасаған;
4) лауазымға орналасу уақытында заңда белгіленген тәртіппен жойылмаған немесе алынбаған сотталғандығы бар;
5) осы Заңның 16-6-бабы 1-тармағының төртінші бөлігіне сәйкес міндетті арнаулы тексерудің оң нәтижелерін алмаған;
6) Қазақстан Республикасының заңдарында белгіленген шектеулер мен тыйымдарды сақтамағаны үшін азаматтық авиация саласындағы уәкілетті ұйымға жұмысқа орналасар алдындағы бір жыл ішінде жұмыстан шығарылған адам тағайындала алмайды.
2026.12.06. № 311-VIII ҚР Заңымен 4-тармақпен толықтырылды (2026 ж. 13 тамыздан бастап қолданысқа енгізілді)
4. Азаматтық авиация саласындағы уәкілетті ұйымның қызметшісімен еңбек шартын тоқтату мынадай негіздерде жүргізіледі:
1) Қазақстан Республикасының Еңбек кодексінде көзделген негіздер;
2) осы Заңның 16-6-бабы 1-тармағының төртінші бөлігіне сәйкес міндетті арнаулы тексерудің теріс нәтижелері;
3) кірістері мен мүлкі туралы көрінеу жалған мәліметтер беру;
4) «Сыбайлас жемқорлыққа қарсы іс-қимыл туралы» Қазақстан Республикасының Заңында белгіленген сыбайлас жемқорлыққа қарсы шектеулерді қабылдамау;
5) Қазақстан Республикасының заңдарында көзделген жағдайларды қоспағанда, пайдаланылуы кіріс алуға алып келетін мүлікті сенімгерлік басқаруға бермеу;
6) азаматтық авиация саласындағы уәкілетті ұйымға жұмысқа кіру кезінде жұмысқа қабылдаудан бас тартуға негіз болуы мүмкін көрінеу жалған құжаттарды немесе мәліметтерді ұсыну;
7) Қазақстан Республикасының заңдарында көзделген өзге де негіздер.
2026.09.01. № 256-VIII ҚР Заңымен 2-2-тараумен толықтырылды (2026 ж. 12 шілдеден бастап қолданысқа енгізілді)
2-2-тарау. АВИАЦИЯЛЫҚ ОҚИҒАЛАРДЫ ТЕРГЕП-ТЕКСЕРУ ЖӨНІНДЕГІ УƏКІЛЕТТІ ҰЙЫМ
16-14-бап. Авиациялық оқиғаларды тергеп-тексеру жөніндегі уəкілетті ұйымның мəртебесі мен құзыреті
1. Авиациялық оқиғаларды тергеп-тексеру жөніндегі уəкілетті ұйымның функцияларын жүзеге асыратын заңды тұлғаны Қазақстан Республикасының Үкіметі айқындайды.
2. Авиациялық оқиғаларды тергеп-тексеру жөніндегі уəкілетті ұйым өз құзыреті шегінде:
1) азаматтық авиация саласындағы уəкілетті органға азаматтық жəне эксперименттік авиация саласындағы авиациялық оқиғаларды жəне оқыс оқиғаларды тергеп-тексеруге байланысты мəселелер жөніндегі нормативтік құқықтық актілердің жобаларын əзірлеуге жəрдемдеседі;
2) азаматтық жəне эксперименттік авиациядағы авиациялық оқиғалар мен оқыс оқиғалардың деректерін ұсыну жəне оларды тергеп-тексеру қағидаларына сəйкес авиациялық оқиғаларды тергеп-тексеру жөніндегі уəкілетті ұйымның ұсынуы бойынша азаматтық авиация саласындағы уəкілетті орган құратын Авиациялық оқиғаны немесе оқыс оқиғаны тергеп-тексеру жөніндегі комиссияның Қазақстан Республикасының аумағында азаматтық жəне эксперименттік авиацияның авиациялық оқиғалары мен оқыс оқиғаларын тергеп-тексеруді жүргізуін ұйымдастырады;
3) азаматтық авиация саласындағы уəкілетті органның шешімі бойынша Қазақстан Республикасының Азаматтық əуе кемелерінің мемлекеттік тізілімінде тіркелген не пайдаланушылары Қазақстан Республикасының жеке немесе заңды тұлғалары болып табылатын əуе кемелерімен басқа мемлекеттердің аумағында болған азаматтық авиацияның авиациялық оқиғалары мен оқыс оқиғаларын тергеп-тексеруге қатысады;
4) жүргізілген тергеп-тексерулердің нəтижелері бойынша авиациялық оқиғалар мен оқыс оқиғаларды болғызбау немесе олардың салдарын азайту мақсатында ұсынымдар береді жəне оларды азаматтық авиация саласындағы уəкілетті органға жəне азаматтық авиация саласындағы уəкілетті ұйымға жібереді, сондай-ақ осындай ұсынымдардың орындалуына талдау жүргізеді;
5) Қазақстан Республикасының Азаматтық əуе кемелерінің мемлекеттік тізілімінде тіркелген не пайдаланушылары Қазақстан Республикасының жеке немесе заңды тұлғалары болып табылатын əуе кемелерімен болған авиациялық оқиғалар мен оқыс оқиғалар жөніндегі статистикалық деректерді жинайды, сақтайды жəне азаматтық авиация саласындағы уəкілетті органға береді;
6) Қазақстан Республикасының аумағында шет мемлекеттер пайдаланушыларының əуе кемелерімен болған авиациялық оқиғалар мен оқыс оқиғалар жөніндегі статистикалық деректерді жинайды, сақтайды жəне азаматтық авиация саласындағы уəкілетті органға береді;
7) азаматтық авиация саласындағы уəкілетті органмен бірлесіп, халықаралық азаматтық авиация ұйымдарымен статистикалық деректер алмасуға қатысады;
8) құзыреті шегінде авиациялық оқиғалар мен оқыс оқиғаларды тергеп-тексеруге жауапты шет мемлекеттердің органдарымен жəне халықаралық азаматтық авиация ұйымдарымен өзара іс-қимыл жасайды;
9) авиациялық оқиғалар мен оқыс оқиғаларды тергеп-тексеру мəселелері бойынша Қазақстан Республикасының мүдделі мемлекеттік органдарымен өзара іс-қимыл жасайды;
10) авиациялық оқиғалар мен оқыс оқиғаларды тергеп-тексеру кезінде дəлелдемелердің сақталуын қамтамасыз етеді;
11) авиациялық оқиғалар мен оқыс оқиғаларды тергеп-тексеруге байланысты ұшу қауіпсіздігі туралы құпия ақпараттың қорғалуын қамтамасыз етеді;
12) Қазақстан Республикасының əуе кеңiстiгiн пайдалану жəне авиация қызметі туралы Қазақстан Республикасы заңнамасының Халықаралық азаматтық авиация ұйымының (ИКАО) авиациялық оқиғалар мен оқыс оқиғаларды тергеп-тексеру мəселелері бойынша стандарттары мен ұсынылатын практикасына сəйкес келуін мониторингтеуді жүзеге асырады;
13) Халықаралық азаматтық авиация ұйымының (ИКАО) авиациялық оқиғалар мен оқыс оқиғаларды тергеп-тексеру мəселелері бойынша стандарттары мен ұсынылатын практикасынан орын алған айырмашылықтар туралы Халықаралық азаматтық авиация ұйымын (ИКАО) уақтылы хабардар етуді жəне оларды аэронавигациялық ақпарат құжаттарында жариялауды қамтамасыз етеді;
14) жүргізілген авиациялық оқиғалар мен оқыс оқиғаларды тергеп-тексеру қорытындылары бойынша ұсынымдардың іске асырылуын мониторингтеуді жүзеге асырады.
16-15-бап. Авиациялық оқиғаларды тергеп-тексеру жөніндегі уəкілетті ұйымның қызметін қаржыландыру
1. Авиациялық оқиғаларды тергеп-тексеру жөніндегі уəкілетті ұйымның бюджеті ұшу қауіпсіздігін қамтамасыз етуге арналған аударымдардың есебінен қалыптастырылады.
2. Азаматтық авиация саласындағы уəкілетті органға ведомстволық бағынысты мемлекеттік кəсіпорын болып табылатын аэронавигациялық қызмет көрсетуді беруші авиациялық оқиғалар мен оқыс оқиғаларды тергеп-тексеруді ұйымдастыру мен жүргізу жəне болашақта оларды болғызбау мақсатында ұшу қауіпсіздігін қамтамасыз етуге арналған аударымдарды авиациялық оқиғаларды тергеп-тексеру жөніндегі уəкілетті ұйымға аударады.
3. Аэронавигациялық қызмет көрсетуді берушінің билігінде қалған таза табыстың бір бөлігі аэронавигациялық қызмет көрсетуді беруші аударымдарының көзі болып табылады, оны бөлу нормативін азаматтық авиация саласындағы уəкілетті орган белгілейді.
4. Ұшу қауіпсіздігін қамтамасыз етуге арналған аударымдарды аудару тəртібін жəне оның нормативін азаматтық авиация саласындағы уəкілетті орган бекітеді.
2026.12.06. № 311-VIII ҚР Заңымен 16-16-баппен толықтырылды (2026 ж. 13 тамыздан бастап қолданысқа енгізілді)
16-16-бап. Авиациялық оқиғаларды тергеп-тексеру жөніндегі уәкілетті ұйымның қызметшілері
1. Авиациялық оқиғаларды тергеп-тексеру жөніндегі уәкілетті ұйымның қызметшісі лауазымына:
1) сот әрекетке қабілетсіз немесе әрекет қабілеті шектеулі деп таныған;
2) тармақшаның қолданысы 2029 ж. 14 маусымға дейін тоқтатылды, тоқтата тұру кезеңінде осы тармақша 2026.12.06. № 311-VIII ҚР Заңының 2-бабының 2-тармағы 7) тармақшасының редакциясында қолданылады
2) активтері мен міндеттемелері туралы декларацияны ұсынбаған адамды жұмысқа қабылдағаны үшін алғаш рет әкімшілік жауаптылыққа тартылған жағдайды қоспағанда, лауазымға тағайындалар алдындағы үш жыл ішінде әкімшілік сыбайлас жемқорлық құқық бұзушылық жасағаны үшін әкімшілік жаза қолданылған;
3) сыбайлас жемқорлық қылмыс жасаған;
4) лауазымға орналасу уақытында заңда белгіленген тәртіппен жойылмаған немесе алынбаған сотталғандығы бар;
5) авиациялық оқиғаларды тергеп-тексеру жөніндегі уәкілетті ұйымға жұмысқа орналасар алдындағы бір жыл ішінде Қазақстан Республикасының заңдарында белгіленген шектеулер мен тыйымдарды сақтамағаны үшін жұмыстан шығарылған адам тағайындала алмайды.
2. Авиациялық оқиғаларды тергеп-тексеру жөніндегі уәкілетті ұйымның қызметшісімен еңбек шартын тоқтату мынадай негіздер бойынша жүргізіледі:
1) Қазақстан Республикасының Еңбек кодексінде көзделген негіздер;
2) кірістері мен мүлкі туралы көрінеу жалған мәліметтер беру;
3) «Сыбайлас жемқорлыққа қарсы іс-қимыл туралы» Қазақстан Республикасының Заңында белгіленген сыбайлас жемқорлыққа қарсы шектеулерді қабылдамау;
4) Қазақстан Республикасының заңдарында көзделген жағдайларды қоспағанда, пайдаланылуы кіріс алуға алып келетін мүлікті сенімгерлік басқаруға бермеу;
5) авиациялық оқиғаларды тергеп-тексеру жөніндегі уәкілетті ұйымға жұмысқа кіру кезінде жұмысқа қабылдаудан бас тартуға негіз болуы мүмкін көрінеу жалған құжаттарды немесе мәліметтерді ұсыну;
6) Қазақстан Республикасының заңдарында көзделген өзге де негіздер.
3-тарау. ӘУЕ КЕҢІСТІГІН ПАЙДАЛАНУДЫ ҰЙЫМДАСТЫРУ
2013.04.07. № 132-V ҚР Заңымен 17-бап өзгертілді (бұр.ред.қара)
17-бап. Әуе кеңiстiгiн пайдалануды ұйымдастыру негiздерi
2017.10.05. № 64-VI ҚР Заңымен 1-тармақ өзгертілді (бұр.ред.қара)
1. Әуе кеңiстiгiн пайдалануды ұйымдастыру әуе кемелерінің ұшуын (әуе қозғалысын) қауiпсiз, үнемдi және тұрақты орындауды, сондай-ақ әуе кеңiстiгiн пайдалануға байланысты қызметтi қамтамасыз етудi көздейдi.
Әуе кеңiстiгiн пайдалануды ұйымдастыру:
1) әуе кеңiстiгiнiң құрылымы мен сыныптамасын айқындауды және белгілеуді;
2) осы Заңның 25-бабында белгіленген басымдықтарға сәйкес әуе кеңiстiгiн пайдалануды жоспарлауды және үйлестіруді;
3) әуе кеңiстiгiн пайдаланудың рұқсат беру не хабардар ету тәртiбiн айқындауды және қамтамасыз етуді;
4) мыналарды:
әуе қозғалысына қызмет көрсетуді, әуе қозғалысын басқаруды;
әуе қозғалысының ағындарын ұйымдастыруды білдіретін әуе қозғалысын ұйымдастыруды;
5) Қазақстан Республикасының әуе кеңістігін пайдалану қағидаларының сақталуын бақылауды және қадағалауды қамтиды.
2. Қазақстан Республикасының әуе кеңістігін пайдалану қағидаларын оның пайдаланушыларының барлығы өздерінің жауапкершілігі аймақтары шегінде сақтауын қамтамасыз етуді:
2022.29.12. № 174-VІІ ҚР Заңымен 1) тармақша өзгертілді (2023 ж. 1 наурыздан бастап қолданысқа енгізілді) (бұр.ред.қара)
1) әуе трассаларында және әуеайлақтар (тікұшақ айлақтары) аудандарында - азаматтық авиация саласындағы уәкілетті органға анықталған бұзушылықтар туралы хабарлай отырып, аэронавигациялық қызмет көрсетуді берушінің әуе қозғалысына қызмет көрсету органдары;
2) мемлекеттік авиация ұшуының арнайы аймақтары мен басқа да аудандарында - әуе қозғалысын басқару органдары;
2022.29.12. № 174-VІІ ҚР Заңымен 3) тармақша өзгертілді (2023 ж. 1 наурыздан бастап қолданысқа енгізілді) (бұр.ред.қара)
3) әуе трассаларынан тыс, әуе кеңістігінде Қазақстан Республикасының Мемлекеттік шекарасынан ұшып өту кезінде аэронавигациялық қызмет көрсетуді берушінің әуе қозғалысын басқару органдары немесе әуе қозғалысына қызмет көрсету органдары мемлекеттік авиация саласындағы уәкілетті органмен келісу бойынша жүзеге асырады.
2017.10.05. № 64-VI ҚР Заңымен 3-тармақ өзгертілді (бұр.ред.қара)
3. Әуе кеңiстiгiн пайдалануды ұйымдастыруды азаматтық авиация және мемлекеттік авиация салаларындағы уәкiлеттi органдар, сондай-ақ осы Заңда және Қазақстан Республикасының әуе кеңiстiгiн пайдалану қағидаларында айқындалған тәртiппен олар үшiн белгiленген аймақтар мен аудандарда әуе қозғалысына қызмет көрсету және әуе қозғалысын басқару органдары жүзеге асырады. Әуе кеңістігін икемді пайдалануды қамтамасыз ету үшін азаматтық-әскери үйлестіру қағидаттары мен тәртібі Қазақстан Республикасының әуе кеңістігін пайдалану қағидаларында белгіленеді.
4. Әуе кеңiстiгiнiң құрылымын ұйымдастыру Қазақстан Республикасының экологиялық заңнамасы сақталған жағдайда жүзеге асырылуға тиiс.
2017.10.05. № 64-VI ҚР Заңымен 4-1-тармақпен толықтырылды
4-1. Әуе қозғалысының ағындарын ұйымдастыруды әуе қозғалысына қызмет көрсету органдарының мәлімделген өткізу қабілеттілігін ескере отырып, азаматтық авиация саласындағы уәкілетті органның ведомстволық бағынысындағы мемлекеттік кәсіпорын болып табылатын аэронавигациялық қызмет көрсетуді беруші жүзеге асырады.
2017.10.05. № 64-VI ҚР Заңымен 4-2-тармақпен толықтырылды
4-2. Әуе қозғалысына қызмет көрсету қажеттілігі азаматтық авиация саласындағы уәкілетті орган бекітетін әуе қозғалысына қызмет көрсетуге қажеттілікті бағалау әдістемесіне сәйкес және мыналар:
1) тиісті әуе қозғалысының типтері;
2) әуе қозғалысының қарқындылығы;
3) метеорологиялық жағдайлар;
4) осы ауданға немесе осы жерге қатысы болуы мүмкін басқа да факторлар ескеріле отырып айқындалады.
2017.10.05. № 64-VI ҚР Заңымен 5-тармақ жаңа редакцияда (бұр.ред.қара); 2022.29.12. № 174-VІІ ҚР Заңымен 5-тармақ өзгертілді (2023 ж. 1 наурыздан бастап қолданысқа енгізілді) (бұр.ред.қара)
5. Мемлекеттік және (немесе) эксперименттік авиация ұшуының арнайы аймақтары мен аудандарын қоспағанда, Қазақстан Республикасының бақыланатын әуе кеңiстiгiнде әуе қозғалысына қызмет көрсетуді азаматтық авиация саласындағы уәкілетті органның ведомстволық бағынысындағы мемлекеттік кәсіпорын болып табылатын аэронавигациялық қызмет көрсетуді беруші жүзеге асырады.
Жекелеген әуеайлақтардың (тікұшақ айлақтарының) аудандарында әуе қозғалысына қызмет көрсетуді жеке кәсіпкерлік субъектісі болып табылатын аэронавигациялық қызмет көрсетуді беруші жүзеге асыруы мүмкін.
2022.29.12. № 174-VІІ ҚР Заңымен 5-1-тармақпен толықтырылды (2023 ж. 1 наурыздан бастап қолданысқа енгізілді)
5-1. Егемендігі айқындалмаған әуе кеңістігінде, сондай-ақ Қазақстан Республикасы әуе қозғалысына қызмет көрсетуді қамтамасыз етуге жауапты болатын шектес мемлекеттердің берілген әуе кеңістігінде әуе қозғалысын ұйымдастыруды және оған қызмет көрсетуді азаматтық авиация саласындағы уәкілетті органға ведомстволық бағынысты мемлекеттік кәсіпорын болып табылатын аэронавигациялық қызмет көрсетуді беруші жүзеге асырады.
Жекелеген әуеайлақтардың (тікұшақ айлақтарының) аудандарында әуе қозғалысына қызмет көрсетуді жеке кәсіпкерлік субъектісі болып табылатын аэронавигациялық қызмет көрсетуді беруші жүзеге асыра алады.
6. 2013.04.07. № 132-V ҚР Заңымен алып тасталды (бұр.ред.қара)
7. Әуе қозғалысына қызмет көрсету органдары орындалатын ұшудың ауқымы мен күрделілігіне қарай үлгі нұсқаулыққа сәйкес ұшу қауіпсіздігін басқару жүйесін енгізуге міндетті.
2022.29.12. № 174-VІІ ҚР Заңымен 8-тармақ өзгертілді (2023 ж. 1 наурыздан бастап қолданысқа енгізілді) (бұр.ред.қара)
8. Әуе қозғалысына қызмет көрсету органдары әуе қозғалысына қызмет көрсетудің бұзылуына байланысты күтпеген мән-жайлар жағдайына іс-шаралар жоспарларын әзірлейді және оларды азаматтық авиация саласындағы уәкілетті ұйыммен келіседі.
9. 2013.04.07. № 132-V ҚР Заңымен алып тасталды (бұр.ред.қара)
18-бап. Әуе кеңiстiгiн пайдалануға байланысты қызмет
1. Қазақстан Республикасының әуе кеңiстiгiн пайдалануға байланысты қызметке:
1) әуе кемелерiнiң және басқа да ұшу аппараттарының ұшуы;
2) атыстардың және зымырандарды ұшырудың барлық түрлерi, жарылыс жұмыстары және материалдық объектiлердiң әуе кеңiстiгiнде қозғалуымен байланысты өзге де қызмет жатады.
2. Осы баптың 1-тармағында көрсетiлген қызметтi жүзеге асыратын жеке және заңды тұлғалар әуе кеңiстiгiн пайдаланушылар болып табылады.
2013.04.07. № 132-V ҚР Заңымен 19-бап өзгертілді (бұр.ред.қара)
19-бап. Әуе кеңiстiгiнiң құрылымы мен сыныптамасы
1. Әуе кеңiстiгiнiң құрылымы мен сыныптамасы, сондай-ақ әрбір сыныптағы әуе кеңістігі шегінде ұшуға және әуе қозғалысына қызмет көрсету түрлеріне қойылатын талаптар Қазақстан Республикасының әуе кеңістігін пайдалану қағидаларында белгіленеді.
