5. Табиғи монополиялар субъектілеріне тексеру жүргізетін уәкілетті органның лауазымды тұлғасының тиісті аумаққа немесе үй-жайға енуіне кедергі жасалған және ақпараттарды, құжаттар мен түсініктемелерді бермеген кезде Қазақстан Республикасының әкімшілік құқық бұзушылық туралы заңнамасында белгіленген тәртіппен әкімшілік іс қозғалады.
6. Табиғи монополия субъектісіне тексеру жүргізу мерзімі алда тұрған жұмыстардың және қойылған міндеттердің көлемін ескере отырып белгіленеді, бірақ күнтізбелік отыз күннен аспауға тиіс.
Мән-жайларды қосымша тексеру қажет болған жағдайда, тексеру мерзімі уәкілетті органның шешімімен күнтізбелік отыз күнге ұзартылуы мүмкін.
Табиғи монополия субъектісін тексеру мерзімін ұзартуды тексеру жүргізетін уәкілетті органның басшысы жүргізеді.
7. Тексеру табиғи монополия субъектісін тексеру қорытындылары туралы анықтаманы жасаумен аяқталады.
Тексеру қорытындылары туралы анықтамаға табиғи монополия субъектісін тексеруді жүзеге асыратын лауазымды адам және тексерілетін табиғи монополия субъектісінің басшысы немесе оны ауыстыратын адам қол қояды.
8. Тексерілетін табиғи монополия субъектісінің басшы немесе оны ауыстыратын адам ерекше пікірлерін жазбаша түрде білдіруге құқылы, ол тексеру қорытындысы туралы анықтамаға қоса беріледі.
9. Тексерілетін табиғи монополия субъектісінің басшысы немесе оны ауыстыратын адам тексеру қорытындылары туралы анықтамаға қол қоюдан бас тартқан жағдайда, табиғи монополия субъектісін тексеруді жүзеге асыратын лауазымды тұлға тексеру қорытындысы туралы анықтамаға тиісті жазба енгізеді.
10. Тексеру қорытындылары туралы анықтаманың екінші данасы табиғи монополия субъектісін тексеру аяқталған соң қол қойғызып алу арқылы табиғи монополия субъектісінің басшысына немесе оны ауыстыратын адамға, ал олар болмаған жағдайда - тексерілетін табиғи монополия субъектісінің кеңсесіне, анықтаманы қабылдап алған табиғи монополия субъектісі қызметкерінің тегін және лауазымын көрсете отырып, қол қойғызу арқылы тапсырылады. Тексеру қорытындылары туралы анықтаманы беру не кеңсеге тапсыру мүмкін болмаған жағдайда тексеру қорытындылары туралы анықтама табиғи монополия субъектісіне почта арқылы тапсырылғандығы хабарланатын тапсырыс хатпен жіберіледі.
11. Табиғи монополия субъектісін тексерудің нәтижелері Қазақстан Республикасының заңнамасында белгіленген тәртіппен шағым жасалуы мүмкін.
18-7-бап. Табиғи монополия субъектісін тексеру нәтижелерi
бойынша уәкілетті органның шешімi
Уәкілетті орган табиғи монополия субъектісін тексеру қорытындылары туралы анықтаманы қарау нәтижелері бойынша:
1) әкімшілік құқық бұзушылық туралы іс қозғауға негіздердің жоқтығы туралы қорытынды жасайды;
2) әкімшілік құқық бұзушылық туралы іс қозғайды;
3) табиғи монополия субъектісіне Қазақстан Республикасының табиғи монополиялар туралы заңнамасын бұзушылықтардың анықталған фактілерін жою туралы нұсқама шығарады;
4) материалдарды қылмыстық іс қозғау туралы мәселені қарау үшін құқық қорғау органдарына береді;
5) материалдарды қарау және тиісті шаралар қабылдау үшін өзге де мемлекеттік органдарға береді.".
23. "Асыл тұқымды мал шаруашылығы туралы" 1998 жылғы 9 шілдедегі Қазақстан Республикасының Заңына (Қазақстан Республикасы Парламентінің Жаршысы, 1998 ж., № 16, 220-құжат; 2001 ж., № 23, 318-құжат; 2004 ж., № 23, 142-құжат):
11-бапта:
тақырыбы мынадай редакцияда жазылсын:
"11-бап. Уәкілетті органның асыл тұқымды мал шаруашылығы
жөніндегі мемлекеттік инспекторлары";
1 және 2-тармақтардағы "асыл тұқымды мал шаруашылығы саласындағы", "мемлекеттік" деген сөздер алып тасталсын;
мынадай мазмұндағы 2-1-тармақпен толықтырылсын:
"2-1. Асыл тұқымды мал шаруашылығы саласында тексеру жүргізу мерзімі жиырмаға дейін күнтізбелік күнді құрайды, қажет болған жағдайда тексеру мерзімі тағы да күнтізбелік он күнге ұзартылуы мүмкін.".
24. "Ұлттық мұрағат қоры және мұрағаттар туралы" 1998 жылғы 22 желтоқсандағы Қазақстан Республикасының Заңына (Қазақстан Республикасы Парламентінің Жаршысы, 1998 ж., № 24, 435-құжат; 2001 ж., № 21-22, 286-құжат; 2003 ж., № 10, 53-құжат; 2004 ж., № 23, 142-құжат):
1) 18-баптың 1-тармағының 8) тармақшасындағы "сақтауы жөнінде мемлекеттік инспекция" деген сөздер "сақтауына тексеру" деген сөздермен ауыстырылсын;
2) мынадай мазмұндағы 18-1-баппен толықтырылсын:
"18-1-бап. Мемлекеттік бақылау
1. Мемлекеттік бақылауды жүзеге асырудың нысаны тексеру болып табылады.
2. Тексерудің түрлері:
жоспарлы - уәкілетті орган алдын ала жоспарлаған, үш жылда бір рет жүргізілетін тексеру;
жоспардан тыс - уәкілетті орган жеке және заңды тұлғалардың өтініштері бойынша жүргізетін тексеру.
3. Тексеру жүргізу мерзімі нұсқама берілген кезден бастап күнтізбелік он бес күннен аспауға тиіс.
4. Уәкілетті органның басқа мемлекеттік органдардың қызметкерлерін тексерулерге тартуға құқығы бар.".
25. "Тауарлардың импорты жағдайында ішкі рынокты қорғау шаралары туралы" 1998 жылғы 28 желтоқсандағы Қазақстан Республикасының Заңына (Қазақстан Республикасы Парламентінің Жаршысы, 1998 ж., № 24, 446-құжат; 1999 ж., № 21, 763-құжат; 2005 ж., № 11, 40-құжат):
5-баптың 1-тармағындағы "бақылауды" деген сөз "мониторингті" деген сөзбен ауыстырылсын.
26. "Өсімдіктердің карантині туралы" 1999 жылғы 11 ақпандағы Қазақстан Республикасының Заңына (Қазақстан Республикасы Парламентінің Жаршысы, 1999 ж., № 2-3, 34-құжат; № 23, 931-құжат; 2002 ж., № 4, 30-құжат, 2003 ж., № 15, 121-құжат; 2004 ж., № 23, 142-құжат):
1) 1-бапта:
9-2) тармақша мынадай редакцияда жазылсын:
"9-2) өсімдіктер карантині жөніндегі уәкілетті орган (бұдан әрі - уәкілетті орган) - Қазақстан Республикасының аумағында өсімдіктер карантині саласындағы мемлекеттік реттеуді және мемлекеттік бақылауды жүзеге асыратын мемлекеттік орган және шекаралық пункттері мен шекарадағы постылары бар оның аумақтық органдары;";
2) 4-баптың 1) тармақшасы "сақтап тұру" деген сөздерден кейін "және мүлікті сақтау" деген сөздермен толықтырылсын;
3) 7-бап мынадай редакцияда жазылсын:
"7-бап. Уәкілетті органның құзыретi
1. Уәкілетті орган:
1) өсімдіктер карантині саласындағы мемлекеттік саясатты әзірлеп, іске асырады;
2) өсімдіктер карантині жөніндегі мемлекеттік іс-шаралар белгіленіп, жүзеге асырылатын карантиндік объектілер тізбесін айқындайды;
3) Қазақстан Республикасында және басқа да елдерде карантинді объектілердің болуы мен таралуы, оларға қарсы күрес жөніндегі шаралар мен іс-шаралар туралы деректер базасын құрады және мүдделі тұлғаларға ақпарат береді;
4) өсімдіктер карантині саласында қолданбалы ғылыми зерттеулер жүргізуді ұйымдастырады, үйлестіреді және бақылайды;
5) өсімдіктер карантині жөніндегі мемлекеттік инспекторлар туралы ережені бекітеді;
6) карантинді объектілер залалдаған залалсыздандыруға немесе қайта өңдеуге жатпайтын карантинге жатқызылған өнімдерді (жүктерді) алып қою және жою жөніндегі ережелерді бекітеді;
7) өз құзыреті шегінде өсімдіктер карантині жөніндегі нормативтік құқықтық актілерді бекітеді;
8) карантиндік іс-шараларды жүзеге асырудың тәртібі мен тәсілдерін регламенттейтін әдістерді, әдістемені, ұсынымдарды бекітеді;
9) ғылыми-зерттеу ұйымдарымен бірлесіп, халықаралық нормалар талаптары мен ұсынымдарды ескере отырып, фитосанитарлық тәуекелді бағалаудың ғылыми принциптері негізінде карантиндік шараларды әзірлейді және оларды жеке және заңды тұлғалардың орындауын тұрақты бақылауды жүзеге асырады;
10) Өсімдіктер карантині жөніндегі бас мемлекеттік инспектор лауазымына орналасуға біліктілік талаптарын белгілейді;
11) карантинді объектілердің таралу ошақтарын анықтау, оқшаулау, жою және карантинге жатқызылған өнімдерді залалсыздандыру жөніндегі іс-шаралардың жүргізілуін ұйымдастырады;
12) карантинге жатқызылған өнімдер транзитінің шарттарын айқындайды;
13) Қазақстан Республикасының заңдарында белгіленген тәртіппен пестицидтерді (улы химикаттарды) мемлекеттік сатып алуды, оларды сақтау, тасымалдау, карантиндік объектілердің таралу ошақтарын оқшаулау мен жою үшін қолдану жөніндегі жұмыстар мен қызмет көрсетуді ұйымдастырады және жүргізеді;
14) карантиндік объектілердің таралу ошақтарын оқшаулау және жою үшін Қазақстан Республикасының заңдарында белгіленген тәртіппен пестицидтердің (улы химикаттардың) қорын құрады;
15) карантиндік объектілердің таралу ошақтарын оқшаулау және жою үшін бюджет қаражаты есебінен сатып алынған пестицидтерді (улы химикаттарды) Қазақстан Республикасының аумағы бойынша бөледі;
16) өсімдіктер карантині жөніндегі шекаралық пункттер мен постыларда карантинге жатқызылған әкелінетін өнімді тұрақты бастапқы карантиндік тексеруді, қажет болғанда үлгілерін, көлік құралдарын, қол жүгі мен багажды іріктеу арқылы олардың зертханалық сараптамасын, әкелінетін және транзиттік карантинге жатқызылған өнімге карантиндік құжаттарды тексеруді жүргізеді;
17) карантинге жатқызылған әкелінетін өнім келіп түсетін соңғы пункттерде осы өнімді тұрақты қайтадан карантиндік тексеруді, қажет болғанда аумақтың фитосанитариялық сипаттамасы мен оның шыққан жерін, баратын пунктін, сондай-ақ карантинді объектілерден бос жатқан немесе олар аз таралған аймақтарды ескере отырып, үлгілерін іріктеу арқылы оның зертханалық сараптамасын, карантиндік құжаттарды тексеруді жүргізеді;
18) карантинге жатқызылған әкетілетін өнімді тиеп-жөнелту орындарында тұрақты карантиндік тексеруді, қажет болғанда үлгілерін іріктеу арқылы зертханалық сараптамасын және фитосанитариялық сертификаттауды жүргізеді;
19) өсімдіктер карантині жөніндегі шекаралық пункттер мен постыларда әкетілетін және транзиттік карантинге жатқызылған өнімнің карантиндік құжаттарының болуын және дұрыс ресімделуін тұрақты тексеруді жүргізеді;
20) республика базарлары мен кәсіпорындарында карантинге жатқызылған өнімдерді тұрақты тексеруді, қажет болғанда үлгілерін іріктеу арқылы оның зертханалық сараптамасын, карантиндік құжаттарды тексеруді жүргізеді;
21) өсімдік текті өнімдерді өсіретін, дайындайтын, жинайтын, өңдейтін және өткізетін ұйымдардың, базарлардың, шаруа (фермер), үй жанындағы және саяжай қожалықтарының аумағы мен үй-жайларына, ведомстволық бағыныстылығы мен меншік нысанына қарамастан, ауыл шаруашылығына, орманға, суға және басқа да мақсатқа арналған жерлерге тұрақты талғамалы бақылау тексерулерін жүргізеді;
22) карантинді объектілердің таралу ошақтарын анықтау, оқшаулау және жою жөніндегі іс-шараларды уақтылы және тиімді жүргізу жөніндегі жұмыс барысына тұрақты бақылау жүргізеді;
23) анықталған Қазақстан Республикасының өсімдіктер карантині жөніндегі заңнамасын бұзушылықтарды жою, карантинге жатқызылған өнімдерді, сондай-ақ көлік құралдарын залалсыздандыру жөніндегі іс-шараларды орындау туралы нұсқама береді және олардың орындалуын бақылайды;
24) жерсіндіру-карантиндік көшеттіктерде импорттық себу материалдары мен отырғызылатын материалдардың карантинді объектілерден және бөтен текті түрлерден жасырын залалданған-залалданбағанын тексеру жөніндегі іс-шараларды ұйымдастырады және бақылайды;
25) карантинге жатқызылған өнімге фитосанитариялық, карантиндік сертификаттар және импорттық карантиндік рұқсаттар береді;
26) Қазақстан Республикасының Үкіметіне және жергілікті атқарушы органдарға карантиндік режимді енгізе отырып, карантинді аймақты белгілеу немесе оның күшін жою туралы ұсыныстар енгізеді, сондай-ақ осы аймақтарда міндетті іс-шараларды жүргізу тәртібін әзірлейді;
27) карантинді аймақтарда міндетті іс-шаралардың орындалуына тұрақты бақылау жүргізеді;
28) халықаралық нормалар мен талаптардың өсімдіктер карантині саласында жасалған келісімдерге сәйкес орындалуын қамтамасыз етеді;
29) халықаралық ұйымдарда өсімдіктер карантині мәселелері бойынша Қазақстан Республикасының мүдделерін білдіреді.
2. Тиісті уәкілетті органның басшысы Қазақстан Республикасының Өсімдіктер карантині жөніндегі бас мемлекеттік инспекторы, ал оның орынбасары - Қазақстан Республикасының Өсімдіктер карантині жөніндегі бас мемлекеттік инспекторының орынбасары болып табылады.
Уәкілетті органның облыстық, (республикалық маңызы бар қаланың, астананың) аумақтық органдарының басшылары тиісті облыстар мен қалалардың өсімдіктер карантині жөніндегі бас мемлекеттік инспекторлары болып табылады.
Уәкілетті органның және оның аумақтық органдарының өсімдіктер карантині бойынша бақылауды тікелей жүзеге асыратын өзге де лауазымды адамдары өсімдіктер карантині жөніндегі мемлекеттік инспекторлар болып табылады.
3. Уәкілетті орган өз қызметін шекаралық, кедендік, құқық қорғау және басқа да мемлекеттік органдармен өзара іс-қимылда жүзеге асырады.
4. Уәкілетті органның өз өкілеттіктері шегінде қабылдаған шешімі лауазымды тұлғалардың, жеке және заңды тұлғалардың орындауы үшін міндетті болып табылады.
5. Мемлекеттік органдар мен олардың лауазымды адамдары уәкілетті органның өзіне жүктелген міндеттерді шешуіне жәрдемдесуге міндетті.";
4) 7-1-бапта:
1-тармақтың 2) тармақшасы мынадай редакцияда жазылсын:
"2) тексеруге келіп түсетін импорттық, себу материалдары мен отырғызылатын материалдардағы жасырын залалдануды анықтайды.";
2-тармақта:
бірінші абзацтағы "Республикалық мемлекеттік кәсіпорындар" деген сөздер "Өсімдіктер карантинін қамтамасыз ету жөніндегі республикалық мемлекеттік кәсіпорындар" деген сөздермен ауыстырылсын;
1) тармақша мынадай редакцияда жазылсын:
"1) карантинді объектілердің ошақтарын анықтайды және олардың таралу шекараларын айқындайды;";
5) 9-1-бап мынадай мазмұндағы 3) тармақшамен толықтырылсын:
"3) уәкілетті органның ұсынуы бойынша тиісті аумақтарда карантиндік режимді енгізе отырып, карантинді аймақты белгілеу немесе оның күшін жою туралы шешім қабылдайды.";
6) 10-бап мынадай мазмұндағы екінші және үшінші бөліктермен толықтырылсын:
"Қазақстан Республикасының аумағына карантинді объектілерді әкелудің алдын алу, олардың таралу қаупі бар ошақтарын уақтылы анықтау, оқшаулау және жою мақсатында карантинге жатқызылған өнімдерді тұрақты карантиндік тексеруді, үлгілерін іріктей отырып, оның зертханалық сараптамасын, іріктеу арқылы бақылау тексерулерін, карантин құжаттарын тексеруді жүргізу және карантиндік іс-шаралардың орындалуына бақылауды жүзеге асыру өсімдік және азық-түлік ресурстарын қорғауға, карантинді объектілерге қарсы күреске арналған бюджет қаражатының болжанбаған шығыстарын болдырмауға, сондай-ақ отандық өнімнің бәсекеге қабілеттігін арттыруға бағытталған.
Өсімдіктер карантині жөніндегі мемлекеттік бақылау мен карантиндік шараларды жүргізу адамдардың өсімдіктер карантині бойынша бақылау объектілеріне жатқызылған мүлкін сақтауға бағытталған және тексеру белгілеу туралы акті шығарусыз жүзеге асырылады.";
7) 13-бапта:
тақырыбындағы "әкелу мен әкету" деген сөздер "әкелу, әкету, транзиттеу, ішкі мемлекеттік тасымалдау, тексеру және залалсыздандыру" деген сөздермен ауыстырылсын;
2-тармақ мынадай мазмұндағы төртінші, бесінші, алтыншы және жетінші бөліктермен толықтырылсын:
"Жеке және заңды тұлғалар импорттық карантиндік рұқсаттар алу үшін карантинге жатқызылған өнімді әкелуге дейін күнтізбелік отыз күннен кешіктірмей немесе оның Қазақстан Республикасы арқылы транзитін жүзеге асыруға дейін күнтізбелік бес күн ішінде уәкілетті органға мынадай мәліметтер:
1) карантинге жатқызылған өнімді Қазақстан Республикасына әкелудің (транзиттеу) мақсаты және әкелінетін жүкті өлшеп орау тәсілі мен буып-түю түрін көрсете отырып, жекелеген әрбір түрі бойынша оның саны;
2) өнімнің пайдаланылу мақсаты мен орны (мекен-жайы, ал транзиттік жүктер үшін - бағыты мен баратын елі);
3) карантинге жатқызылған өнімдер импорты немесе транзиті болжанатын экспорттаушы елдердің атауы, сондай-ақ карантинге жатқызылған өнімдер шыққан елдің атауы;
4) карантинге жатқызылған өнімнің болжамды жету мерзімдері немесе транзиттік тасымал мерзімдері;
5) карантинге жатқызылған өнім сол арқылы Қазақстан Республикасына әкелінетін шекаралық пункттің (постының) атауы көрсетілген өтінім береді.
Өтініш беруші карантинге жатқызылған өнімді әкелуге (транзиттеуге) импорттық карантиндік рұқсат алуға өтінімде өз есебінен карантиндік шараларды орындауға кепілдік береді.
Импорттық карантинге жатқызылған өнім Қазақстан Республикасының аумағы бойынша жабық немесе изотермиялық, ақаусыз және пломбаланған контейнерлерде, герметикалық орамаларда, вагондарда, автофургондарда, авторефрижераторларда және басқа да көлік құралдарында тасымалданады.
Қазақстан Республикасының аумағында орналасқан шетелдік дипломатиялық өкілдіктердің, консульдық мекемелердің, халықаралық ұйымдар өкілдіктерінің, сондай-ақ артықшылықтар мен иммунитетті пайдаланушы тұлғалардың карантинге жатқызылған өнімді әкелуі Қазақстан Республикасының заңдарына немесе Қазақстан Республикасы бекіткен халықаралық шарттарға сәйкес жүргізіледі.";
4-тармақ мынадай мазмұндағы екінші, үшінші және төртінші бөліктермен толықтырылсын:
"Жеке және заңды тұлғалар фитосанитариялық сертификат алу үшін өсімдіктер карантині жөніндегі аумақтық органдарға жүкті тиеп-жөнелтудің болжамды мерзімінен он бес тәулік бұрын мынадай мәліметтерді:
1) карантинге жатқызылған өнімнің атауы мен санын;
2) импортқа шығарушы елдің атауын және карантинге жатқызылған өнім баратын мекен-жайды;
3) импорттық карантиндік рұқсатта немесе экспортталатын карантинге жатқызылған өнімге арналған шартта көрсетілген импортқа шығарушы елдің өсімдіктер карантині бойынша ұлттық қызметінің өсімдіктер карантині саласындағы талабын;
4) карантинге жатқызылған өнімді тиеп-жөнелту мерзімі мен орнын;
5) сол арқылы жүкті әкелу болжанатын импортқа шығарушы елдің шекаралық пунктінің атауын көрсетіп өтінім береді.
Өсімдіктер карантині жөніндегі мемлекеттік инспекторлар карантинге жатқызылған әкелінетін өнімнің карантиндік жай-күйін жүкті тиеп-жөнелтудің бастапқы орындарында және экспорттық партияларды қайта тиеу (қалыптастыру) кезінде теңіз және өзен порттарында (айлақтарында), әуежайларда, теміржол станцияларында, почта байланысы кәсіпорындарында, базарларда, автовокзалдарда (автостанцияларда) және өзге де объектілерде қайтадан белгілейді. Қайта тиеусіз әкету кезінде шекаралық пунктте және постыда тиеп-жөнелту орнында берілген фитосанитариялық сертификаттың дұрыс ресімделуін бақылау ғана жүзеге асырылады.
Фитосанитариялық сертификатты карантинге жатқызылған өнімде карантиндік объектілердің бар-жоғын тексерген өсімдіктер карантині жөніндегі мемлекеттік инспектор береді және өзінің жеке қолымен және белгіленген үлгідегі мөрмен (мөртабанмен) куәландырады. Фитосанитариялық сертификат карантинге жатқызылған өнімнің әрбір партиясына беріледі және оның карантиндік жай-күйін куәландыруға, жүргізілген залалсыздандыру, осы өнімді жеткізу жөніндегі басқа да қосымша карантиндік талаптарды орындау туралы мәліметтері болуға тиіс.";
мынадай мазмұндағы 4-1-тармақпен толықтырылсын:
"4-1. Карантинге жатқызылған өнімді облысаралық тасымалдау аумақтық органның өсімдіктер карантині жөніндегі мемлекеттік инспекторы беретін карантиндік сертификаттар болған кезде жүзеге асырылады.
Карантиндік сертификатты алу үшін жеке және заңды тұлғалар өсімдіктер карантині жөніндегі аумақтық органға өтінім береді, сондай-ақ карантиндік жай-күйді айқындау үшін өнімді өсімдіктер карантині жөніндегі мемлекеттік инспекторға жүкті жөнелтудің болжамды мерзімінен бес күн бұрын береді.
Өтінімде карантинге жатқызылған өнімнің атауы, баратын пункті және пайдалану мақсаты көрсетіледі.
Карантинге жатқызылған өнімді жүретін жолында немесе баратын пунктінде басқа мекен-жайға жіберу осы операциялар аумағында жүзеге асырылатын өсімдіктер карантині жөніндегі аумақтық органның рұқсаты бойынша жүргізіледі.
Қазақстан Республикасының карантинді аймағынан әкетілетін карантинге жатқызылған өнімді жүру жолында басқа мекен-жайға жіберуге тыйым салынады.
Әкелінетін карантинге жатқызылған өнім жүктің баратын пунктінде қайтадан карантиндік тексеруге жатады.";
5-тармақ мынадай мазмұндағы екінші - он бірінші бөліктермен толықтырылсын:
"Қазақстан Республикасының аумағына әкелінетін карантинге жатқызылған өнім, карантинге жатқызылған өнім тасымалданатын көлік өсімдіктер карантині бойынша бақылауға және қажет болғанда Қазақстан Республикасының Мемлекеттік шекарасы арқылы шекаралық өткізу пункттерінде карантиндік тексеруге, сондай-ақ тиісті актілер ресімделе отырып, жүк баратын жерде карантиндік тексеруге жатады.
Шекаралық пункттің және постының өсімдіктер карантині жөніндегі мемлекеттік инспекторы жүк иелеріне Қазақстан Республикасының өсімдіктер карантині туралы заңнамасын түсіндіреді, импорттық карантиндік рұқсаттың және экспорттаушы елдің ұлттық карантиндік қызметінің фитосанитариялық сертификатының болуын тексереді, көлікке, карантинге жатқызылған өнімге (жүкке), ыдысқа сырттай тексеру жүргізеді. Карантиндік зиянкестерді, өсімдік аурулары мен арамшөптерді анықтау мақсатында карантинге жатқызылған өнімнен үлгілерді іріктеп алып, оларға сол жерде тексеру жүргізеді. Қажет болғанда үлгілер мен объектілер Республикалық карантиндік зертханаға объектілердің карантиндік түрлерге жататынын растау үшін беріледі.
Егер жүк тасымалдаушы карантинге жатқызылған өнімді карантиндік бақылауға көрсетуден бас тартқан жағдайда бұл өнім оның иесінің қаражаты есебінен экспорттаушы елге қайтаруға жатады, ол туралы өсімдіктер карантині жөніндегі мемлекеттік инспектор Қазақстан Республикасының аумақтық, шекара және кеден органдарын хабардар етеді.
Карантинді объектілер табылған карантинге жатқызылған өнім қайтаруға, карантиндік арамшөптерден залалсыздандыруға, тазартуға немесе техникалық қайта өңдеуге жатады. Карантинге жатқызылған өнімді залалсыздандыруға, тазартуға немесе қайта өңдеуге байланысты шығыстарды жүк иелері төлейді.
Ерекше ғылыми немесе өзге де құндылығы бар карантинді объектілер залалдаған тұқымдар мен отырғызылатын материал солардың иелерінің өтініштері бойынша жерсіндіру-карантиндік көшеттіктерге тексеру үшін берілуі мүмкін. Карантинді объектілерден залалдануы жойылғаннан кейін тұқымдар мен отырғызылатын материал иесіне қайтарылады.
Карантинге жатқызылған өнімді алып қоюды (оның ішінде, почталық жөнелтілімдерден, қол жүгінен және багаждан) өсімдіктер карантині жөніндегі мемлекеттік инспектор жүзеге асырады, ол туралы алып қою актісі жасалады.
Карантинге жатқызылған өнім карантиндік тексеруден өткізілгеннен кейін және қажетті карантиндік іс-шаралар жүргізілген соң өсімдіктер карантині жөніндегі мемлекеттік инспектор баратын пунктіне әкелуге немесе транзиттеуге рұқсат бере отырып, ілеспе тауар-көлік құжаттарына карантиндік бақылаудан өткені туралы белгіленген үлгідегі мөртабан басады және жүк иесіне карантиндік тексеру актісін береді.
Шекарада карантинге жатқызылған өніммен (жүктермен) жүк операцияларын (әкелінген жүкті басқа көлік құралдарына қайта тиеуді) жүк иелері өсімдіктер карантині жөніндегі бақылау және міндетті карантиндік тексеру жүргізілгеннен кейін өсімдіктер карантині жөніндегі мемлекеттік инспектордың рұқсаты бойынша жүргізеді.
Өсімдіктер карантині жөніндегі шекаралық пункттер мен постыларда карантиндік тексеруден өткізілген әкелінетін карантинге жатқызылған өнімдер (жүктер), сондай-ақ көлік құралдары карантинге жатқызылған өнім жеткізілетін соңғы пунктте карантиндік тексеруге жатады.
Карантинге жатқызылған өнімдерді және көлік құралдарын тексеруді, жүкті баратын пунктінде талдау мен сараптама жасау үшін үлгілерді іріктеп алуды кейіннен зиянкестердің түрлік құрамын, өсімдік аурулары мен арамшөптерді анықтау үшін сараптама жүргізе отырып, аумақтық органның өсімдіктер карантині жөніндегі мемлекеттік инспекторлары жүзеге асырады, олардың нәтижелері бойынша осы өнімдерді пайдаланудың шарттары туралы жазбасы бар тексеру актісі жасалады. Қажет болғанда карантинге жатқызылған өнімге талдау жасау және объектілердің түрлік құрамына сараптама жүргізу үшін жабдықталған зертханасы бар ұйымдар мен өсімдіктер карантині жөніндегі білікті кадрлар тартылуы мүмкін.";
мынадай мазмұндағы 6-тармақпен толықтырылсын:
"6. Карантинді объектілерден залалданған көлік құралдары мен карантинге жатқызылған өнімдер, импорттық карантиндік рұқсат бойынша залалсыздандыру көзделген өнімдер, сондай-ақ Қазақстан Республикасының Өсімдіктер карантині жөніндегі бас мемлекеттік инспекторының ұйғарымы бойынша карантиндік тұрғыдан ықтимал қаупі бар көлік құралдары мен карантинге жатқызылған өнімдер залалсыздандыруға жатады.
Импорттық карантиндік рұқсат бойынша, сондай-ақ уәкілетті органның және шекаралық пункттері мен шекарадағы постылары бар оның аумақтық органдарының өсімдіктер карантині жөніндегі мемлекеттік инспекторларының нұсқамалары бойынша, карантиндік тексерудің нәтижелері бойынша көзделген карантинге жатқызылған өнімдерді залалсыздандыруды жүк иелері өсімдіктер карантинін қамтамасыз ету жөніндегі республикалық мемлекеттік кәсіпорындардың фумигациялық отрядтарымен шарт жасасу негізінде жүргізеді.
Шекаралық пункттер мен шекарадағы постыларда карантинге жатқызылған өнімдерде карантиндік объектілер анықталған кезде Қазақстан Республикасының Мемлекеттік шекарасы арқылы өткізу пункттерінде фумигациялық камераларда, штабельдерде, кемелер мен баржалардың трюмдерінде, вагондарда, контейнерлерде және көліктің басқа да түрлерінде залалсыздандыру жөніндегі жұмыстар жүргізіледі.
