"Көкшетау техникалық институты" республикалық мемлекеттік қазыналық
кәсіпорнын қайта ұйымдастыру туралы Қазақстан Республикасы
Үкіметінің ҚАУЛЫСЫ 2000 жылғы 15 ақпан N 243
Осы редакция ҚР 2005 жылғы 5 наурыздағы N 214 қаулысымен енгізілген өзгерістеріне дейін қолданылды
Қазақстан Республикасының Үкіметі ҚАУЛЫ ЕТЕДІ:
1. "Көкшетау техникалық институты" республикалық мемлекеттік қазыналық кәсіпорны "Көкшетау техникалық институты" мемлекеттік мекемесіне (бұдан әрі - Мекеме) қайта құру жолымен қайта ұйымдастырылсын.
2. Қазақстан Республикасының Қаржы министрлігі белгіленген тәртіппен 2000 жылға арналған реcпубликалық бюджетте осы мақсатқа көзделген қаражаттың есебінен Мекемені қаржыландыруды қамтамасыз етсін.
3. Қазақстан Республикасының Төтенше жағдайлар жөніндегі агенттігі заңдарда белгіленген тәртіппен:
1) Мекеменің жарғысын бекітсін;
2) Мекемені мемлекеттік тіркеуді қамтамасыз етсін;
3) осы қаулыдан туындайтын өзге де шараларды қабылдасын.
4. Қазақстан Республикасы Үкіметінің кейбір шешімдеріне мынадай өзгерістер мен толықтыру енгізілсін:
1) "Республикалық мемлекеттік кәсіпорындардың тізбесі туралы" Қазақстан Республикасы Үкіметінің 1996 жылғы 25 маусымдағы N 790 қаулысына (Қазақстан Республикасының ПҮАЖ-ы, 1996 ж., N 29, 256-құжат):
көрсетілген қаулымен бекітілген Республикалық мемлекеттік кәсіпорындардың тізбесіндегі "Қазақстан Республикасының Төтенше жағдайлар жөніндегі агенттігі" бөліміндегі реттік нөмірі 109-6-жол алынып тасталсын;
2) "Қазақстан Республикасының Төтенше жағдайлар жөніндегі комитеті органдарының ведомстволық бағыныстағы ұйымдары қызметкерлерінің шекті штаттық санын бекіту туралы" Қазақстан Республикасы Үкіметінің 1998 жылғы 6 қазандағы N 1006 қаулысына:
көрсетілген қаулыға 1-қосымшада:
мынадай мазмұндағы жолмен толықтырылсын:
"Көкшетау техникалық институты" 120;
"Жиыны" деген жолдағы "1798" деген сан "1918" деген санмен ауыстырылсын.
5. Осы қаулы қол қойылған күнінен бастап күшіне енеді.
Қазақстан Республикасының
Премьер-Министрі
