Жарғылық капиталда қатысудың басым мемлекеттік үлесі бар акционерлік
қоғам басқармасының төрағасымен жасалатын Үлгілік келісімшартты
бекіту туралы Қазақстан Республикасы Үкіметінің
1999 жылғы 1 шілдедегі N 909 Қаулысы
Осы редакция ҚР Үкіметінің 2004 жылғы 25 маусымдағы N 702 қаулысымен енгізілген өзгерістеріне дейін қолданылды
Жарғылық капиталда қатысудың басым мемлекеттік үлесі бар акционерлік қоғамдардың ағымдағы қызметіне тиімді басшылық жасауды арттыру мақсатында Қазақстан Республикасының Үкіметі қаулы етеді:
1. Қоса беріліп отырған Жарғылық капиталда қатысудың басым мемлекеттік үлесі бар акционерлік қоғам басқармасының төрағасымен жасалатын Үлгілік келісімшарт бекітілсін.
2. Акционерлік қоғамдар акцияларының мемлекеттік пакеттерін иемдену және пайдалану құқықтарын жүзеге асыратын Қазақстан Республикасының министрліктері, агенттіктері мен орталық атқарушы органдарының ведомстволары заңдарға сәйкес осы қаулымен бекітілген Үлгілік келісімшарт негізінде тиісті акционерлік қоғамдардың басқармалар төрағаларымен келісімшарттар жасасуын қамтамасыз етсін.
3. Қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.
4. Осы қаулы қол қойылған күнінен бастап күшіне енеді.
Қазақстан Республикасының
Премьер-Министрі
Қазақстан Республикасы Үкіметінің
1999 жылғы 1 шілдедегі
N 909 қаулысымен бекітілген
Жарғылық капиталда қатысудың басым мемлекеттік
үлесі бар акционерлік қоғам басқармасының
төрағасымен жасалатын
Үлгілік Келісімшарт
________қаласы 1999 жылғы "___"_______
1.___________________________________ акционерлiк қоғамы, бұдан әрi "Қоғам" деп аталатын директорлар кеңесiнiң төрағасы ______________ атынан, бiрiншi тараптан, және азамат ________________________________, екiншi тараптан, мына төмендегiлер туралы осы келiсiм шартты жасасты.
2. Азамат_________ Қоғамның Директорлар Кеңесiнiң ____________ жылғы отырысының хаттамасына сәйкес Қоғам басқармасының төрағасы (бұдан әрi - Төраға) қызметiне сайланады.
3. Төраға Қазақстан Республикасының Заңдарына, Қоғамның Жарғысына сәйкес қоғамды басқаруды жүзеге асыру мақсатында мынадай функцияларды орындайды:
1) басқарманың тиiмдi жұмыс iстеуiн және Қоғамның қызметiн ұйымдастырады;
2) Қоғамның филиалдарының, өкiлдiктерiнiң, сондай-ақ өз құзыреті шегiндегi еншiлес ұйымдардың немесе тәуелдi қоғамдардың жұмыстарын үйлестiредi және бағыттап отырады,
3) басқарманың және Қоғамның құрылымдық бөлiмшелерiнiң тиiмдi жұмыс iстеуiн бақылайды және қамтамасыз етедi;
4) басқарма отырысы хаттамаларының жүргiзiлуiн ұйымдастырады және оларға Қоғам акционерлерiнiң кедергiсiз жiберiлуiн қамтамасыз етедi;
5) үшiншi тараптармен қарым-қатынастарда Қоғамның атынан сенiмхатсыз әрекет етедi;
6) Қоғамды бiлдiру құқына сенiмхат бередi;
7) Бас есепшiнiң кандидатурасы туралы Қоғамның Директорлар Кеңесiмен келiседi;
8) Қоғам басқармасы мүшелерiне тиесiлi сыйақылар мен өтемақылар мөлшерiн Қоғамның Директорлар Кеңесінің бекiтуiне енгiзедi;
9) банктерде есепшоттар ашады және қоғамның төлем құжаттарына қол қояды;
10) "Акционерлiк қоғамдар туралы" Қазақстан Республикасының Заңында және Қоғамның жарғысында белгiленген тәртiппен Қоғам атынан мәмiлелер жасайды;
11) заңдарда және Қоғам жарғысының ережелерiнде, акционерлердiң жалпы жиналысы мен Қоғам директорлары кеңесi шешiмдерiнде белгiленген шеңберiнде қоғамның қаржысына билiк етедi;
12) Қоғам қызметкерлерiн қызметке тағайындау, оларды ауыстыру және босату туралы бұйрықтар шығарады, Қоғам қызметкерлерiмен еңбек шарттарын жасасады;
13) Қоғам қызметкерлерi үшiн лауазымдық жалақы және дербес үстемеақы мөлшерлерiн белгiлейдi, сыйақы беру мәселелерiн шешедi;
14) Қоғам қызметкерлерi үшін ынталандыру шараларын қабылдайды және тәртiптiк жазалар қолданады;
15) бизнес-жоспардың, өндiрiстiк (коммерциялық) бағдарламалардың, шығыстар сметасының әзiрленуiн ұйымдастырады және оларды Қоғамның Директорлар Кеңесiнiң бекiтуiне тапсырады;
16) Қоғам филиалдарының, өкілдiктерiнiң басшыларын және бас есепшiлерiн лауазымға тағайындайды және босатады;
17) өзiне заңдар, Директорлар Кеңесi мен Қоғамның жарғысы жүктеген басқа да функцияларды жүзеге асырады.
4. Төрағаның мiндеттерi мыналар болып табылады:
1) Қоғамның мүддесiн барынша жоғары деңгейде көрсетедi деп санауға негiзделген тәсiлдердi қолдана отырып, өзiнiң лауазымдық өкiлеттігiн адал жүзеге асыру;
2) Жарғыға немесе акционерлердiң жалпы жиналысының немесе Қоғам мүлкi мен мүлiктiк құқықтарының Қоғамның Директорлар Кеңесiнiң шешiмдерiне сәйкес келмейтiн тұрғыда пайдаланылуына жол бермеу;
3) Қоғамның құрылтайшы құжаттарында белгiленген тәртiппен акционерлердiң жалпы жиналысы алдында есеп беру;
4) Қоғам қызметiнде заңдардың сақталуын қамтамасыз ету;
5) Қоғамның коммерциялық және қызметтiк құпиясын сақтау және оларды қорғауды қамтамасыз ететiн шараларды қолдану;
6) Қоғам қызметi туралы толық және дер кезiнде расталған есеп берiп тұру;
7) Төраға қызметке сайланған күннен бастап 6 ай толғанда өзiнiң қызметi және Қоғамның осы кезеңдегi нәтижелерi туралы Директорлар Кеңесiне есеп беру оның нәтижелерi бойынша Директорлар Кеңесi Қоғамның акционерлерiн алдын ала жазбаша хабардар етіп, Төрағаның атқарып отырған қызметіне сәйкестiк туралы, не Төрағаның өкiлеттігiн мерзiмiнен бұрын тоқтату және онымен осы келiсiмшартты бұзу туралы шешiм қабылдайды;
8) өзiне заңдар, Директорлар Кеңесi мен Қоғамның жарғысы жүктеген басқа да мiндеттердi орындау.
5. Төраға өзiнiң лауазымдық мiндеттерiн атқару кезiнде:
1) басқа ұйымдарда ақы төленетін лауазымда болуға;
2) қоғамның мүмкiндiктерiн Қоғамды дамытуға және оның кірістерін арттыруға бағытталған қызметтен басқа өзге де мақсаттарда пайдалануға немесе олардың пайдаланылуына мүмкiндiк беруге;
3) қоғаммен бәсекелес ұйымдарды немесе оған еншiлес ұйымдарды немесе тәуелдi қоғамдарды құруға немесе қатысуға;
4) қоғамда оның филиалдарында, өкiлдiктерінде, оның еншiлес ұйымдарында немесе тәуелдi қоғамдарда үшiншi тұлғаның iстерi бойынша өкiл болуға;
6. Төраға Қазақстан Республикасының заңдарына сәйкес өзiнiң заңсыз әрекеттерiмен келтiрiлген зиян үшiн Қоғам алдында жауаптылықта болады.
7. Төрағаға сыйақыны Қоғамның Директорлар Кеңесi белгiлейдi.
8. Қоғамның Директорлар Кеңесi төрағаға қоғам шығынсыз жұмыс iстеген, өндiрiстiк және инвестициялық бағдарламалар орындалған, сондай-ақ осы шартта айтылған мiндеттемелер ойдағыдай орындалған жағдайда қосымша сыйақылар белгiленуi мүмкін.
9. Жыл сайын төрағаға күнтiзбелiк демалыс белгiленедi. Қоғамның Директорлар Кеңесiнiң шешiмiмен Төрағаға ақылы қосымша демалыс белгіленуi мүмкін.
10. Қоғам:
1) Төрағаның еңбек кiтапшасындағы жазбаларды ол жұмыстан босатылған жағдайда дұрыс ресiмдеуге;
2) босатылатын Төрағаға босатылған күнi еңбек кiтапшасын беруге және онымен толық есеп айырысуға;
3) осы келiсiмшарттың күшiндегi кезiнде Төраға қайтыс болған жағдайда, оның отбасына заңдарда көзделген төлемдермен қатар ____________ мөлшерiнде жәрдемақы төленуге мiндетті.
11. Осы келiсiмшарттың қолданылу мерзiмi 1 жыл.
12. Төрағаның Қоғамды басқару жөнiндегi қызметi тиiмдi болған жағдайда, осы келiсiмшарт келесi жылға ұзартылуы мүмкiн.
13. Осы келiсiмшарт тараптардың өзара келiсiмi бойынша немесе заңдарда көзделген негіздемелер бойынша бұзылуы мүмкiн. Сондай-ақ осы келiсiмшартты Қоғам бiржақты тәртiппен бұзуы мүмкiн.
14. Төрағаның өкiлеттiгiн мерзiмiнен бұрын тоқтату туралы Қоғамның Директорлар Кеңесi шешiм қабылдаған жағдайда, осы келiсiмшарт бiржақты тәртiппен Қоғамның бұзуына жатады.
Мұндай шешiмнiң қабылдауына мынадай жағдайлар негіз болып табылады:
1) Төрағаның заңдарды және Қоғамның Жарғысын бұзуы;
2) Төрағаның акционерлердiң жалпы жиналысының және Қоғамның Директорлар Кеңесiнiң шешiмдерiн орындамауы;
3) Төрағаның кiнәсiнен Қоғамның қаржы-экономикалық жағдайының нашарлауы;
4) осы келiсiмшарттың 4-тармағында көрсетiлген міндеттерді, сондай-ақ осы келiсiмшарттың басқа да ережелерiн Төрағаның орындамауы не ойдағыдай орындамауы;
5) заңдарда немесе Қоғамның Жарғысында қарастырылған өзге де жағдайлар.
15. осы келісімшарттың тараптардың өзара келісімі бойынша өзгертілуі немесе толықтырылуы мүмкін. Осы келісімшарттың барлық өзгертулері мен толықтырулары жазбаша түрде ресімделуі және осы келісімшарттың ажырамас бөлігі болып табылуы тиіс.
16. Осы келісімшарт қол қойылған күнінен бастап күшіне енеді.
17. Осы келісімшартпен реттелмеген мәселелер Қазақстан Республикасының заңдарына сәйкес шешілуге жатады.
18. Осы келісімшарт мемлекеттік және орыс тілдерінде екі данада жасалды. Келісімшарттың екі данасының да бірдей заң күші бар. Бір данасы Қоғамда, екінші данасы Төрағада сақталады.
Тараптардың мекен-жайы және қолдары:
Қоғам: Төраға
Директорлар Кеңесінің Төрағасы
_____________________________ _________________________
_____________________________ _________________________
(қолы) МО
Қазақстан Республикасы
Үкіметінің
1999 жылғы 1 шілдедегі
N 909 қаулысына қосымша
Қазақстан Республикасы Үкіметінің күші
жойылған кейбір шешімдерінің тізбесі
1. "Мемлекеттiк иелiгiнен алу және жекешелендiру процесiндегi шаруашылық жүргiзушi субъектiлердiң қызметiн мемлекеттiк реттеу мәселелерi" туралы Қазақстан Республикасының Министрлер Кабинетiнiң 1993 жылғы 14 шілдедегі N 606 қаулысы (Қазақстан Республикасының ПҮАЖ-ы, 1993 ж., N 28, 341-құжат).
2. "Алаугаз мемлекеттiк холдингтік компаниясын құру туралы" Қазақстан Республикасы Министрлер Кабинетiнiң 1993 жылғы 2 қыркүйектегi N 770 қаулысының 7-тармағы (Қазақстан Республикасының ПYАЖ-ы, 1993 ж., N 34, 397-құжат).
3. "Қазақстан Республикасы Үкiметiнiң кейбiр шешiмдерiне өзгерiстер мен толықтырулар енгiзу туралы" Қазақстан Республикасы Министрлер Кабинетiнiң 1995 жылғы 2 қыркүйектегi N 1177 қаулысының 2-тармағы (Қазақстан Республикасының ПҮАЖ-ы, 1995 ж., N 29, 353-құжат).
4. "Қазақстан Республикасының Азаматтық кодексiнiң (жалпы бөлiм) қабылдануына байланысты Қазақстан Республикасы Yкiметiнiң кейбiр шешiмдерiне өзгерiстер мен толықтырулар енгiзу және күшi жойылған деп тану туралы" Қазақстан Республикасы Министрлер Кабинетiнiң 1996 жылғы 19 қаңтардағы N 71 қаулысымен бекiтiлген Қазақстан Республикасы Үкiметінiң кейбiр шешiмдерiне енгiзiлетін өзгерiстер мен толықтырулардың 7-тармағы (Қазақстан Республикасының ПҮАЖ-ы, 1996 ж., N 6, 26-құжат).
