Қазақстан Республикасының білім беру ұйымдарының оқушылары мен
тәрбиеленушілерін жұмыспен қамту саласындағы жағдай туралы
ақпараттармен және оларды кәсіптік-диагностикалық тұрғыдан тексеруді қамтамасыз ету мәселелері
Қазақстан Республикасы Үкіметінің 1999 жылғы 9 қыркүйектегі № 1347 Қаулысы
ҚР Үкіметінің 2011 жылғы 19 ақпандағы № 159 Қаулысымен күші жойылды
«Білім туралы» Қазақстан Республикасының 1999 жылғы 7 маусымдағы Заңына сәйкес Қазақстан Республикасының Үкіметі қаулы етеді:
1. Қазақстан Республикасының Еңбек және халықты әлеуметтік қорғау министрлігі Қазақстан Республикасының білім саласындағы орталық атқарушы органдарына облыстар бойынша білікті жұмысшы мамандықтарына сұраныс туралы ақпараттарды жыл сайын бірінші тоқсанда беріп отырсын.
2. Қазақстан Республикасының білім саласындағы орталық атқарушы органдары білім беру ұйымдарының барлық оқушылары мен тәрбиеленушілеріне жыл сайын осы қаулының 1 тармағында көрсетілген ақпараттарды мамыр айынан кешіктірмей жеткізуді ұйымдастырсын.
3. Қазақстан Республикасының білім саласындағы орталық атқарушы органдары және Қазақстан Республикасының Денсаулық сақтау, білім және спорт министрлігі заңдарға сәйкес білім беру ұйымдарының оқушылары мен тәрбиеленушілерінің кәсіптік-диагностикалық тұрғыдан тексерілуі құқығын жүзеге асыруды қамтамасыз етсін.
4. Облыстардың, Астана және Алматы қалаларының әкімдері Қазақстан Республикасының білім беру, сондай-ақ еңбек және халықты әлеуметтік қорғау саласындағы орталық атқарушы органдарына осы қаулыны жүзеге асыру жөнінде жәрдем көрсетсін.
5. Осы қаулы жарияланған күнінен бастап күшіне енеді.
Қазақстан Республикасының
Премьер-Министрі
