13. Сатып алынатын медициналық техникаға мынадай талаптар қойылады:
1) медициналық техника Кодекске және денсаулық сақтау саласындағы уәкілетті орган белгілеген тәртіпке сәйкес Қазақстан Республикасында тіркелуі немесе Кодексте көзделген жағдайларда Қазақстан Республикасының аумағына уәкілетті органның рұқсатымен мемлекеттік тіркеусіз, жеткізілу сәтіне растау құжаттары ұсыныла отырып, әкелінуі тиіс;
2) медициналық техниканы таңбалау, тұтынушылық қаптамалау және қолдану жөніндегі нұсқаулық Кодекстің және денсаулық сақтау саласындағы уәкілетті орган белгілеген тәртіптің талаптарына сәйкес болуы тиіс;
3) медициналық техника жаңа және бұрын пайдаланылмаған болуы тиіс;
4) өлшеу құралдарына жататын медициналық техника Қазақстан Республикасының өлшем бірлігін қамтамасыз етудің мемлекеттік жүйесінің тізіліміне енгізілуі тиіс не өнім беруші растау құжаттарын ұсына отырып, жеткізу сәтіне мұндай медициналық техниканы аталған тізілімге енгізу жөнінде міндеттеме қабылдауға міндетті.
14. Сатып алуды ұйымдастырушы және бірыңғай дистрибьютор сатып алынатын және босатылатын дәрілік заттар, профилактикалық (иммундық-биологиялық, диагностикалық, дезинфекциялық) препараттар, медициналық мақсаттағы бұйымдар мен медициналық техникаға осы тарауда көзделмеген талаптарды қоюға құқығы жоқ.
ҚР Үкіметінің 2010.25.02. № 122 Қаулысымен 2-бөлімнің тақырыбы өзгертілді (бұр.ред.қара)
2-бөлім. Тапсырыс берушінің немесе сатып алуды ұйымдастырушының сатып алуды жүзеге асыру тәртібі
5-тарау. Тендер өткізу тәсілімен сатып алуды жүзеге асыру тәртібі
1. Тендерді ұйымдастыру
15. Тендерді ұйымдастырушы алда болатын фармацевтикалық қызметтерді сатып алу туралы тендерлік өтініштерді қабылдау мерзімі аяқталу күніне дейін кемінде 20 күнтізбелік күн бұрын аптасына үш реттен сиретпей шығарылатын және кемінде Қазақстан Республикасының аумағында таралатын мерзімдік баспа басылымдарында мемлекеттік және орыс тілдерінде жариялау және ақпаратты денсаулық сақтау саласындағы уәкілетті органның интернет-ресурсында орналастыру жолымен әлеуетті өнім берушілерді хабардар етеді.
16. Тендерлік өтінімдерді қабылдаудың аяқталуы мен тендерлік өтінімдер салынған конверттерді ашу үдерісінің басталуы арасындағы уақыт ұзақтығы екі сағаттан аспауы тиіс.
17. Осы ережеге 1-қосымшаға сәйкес нысан бойынша жарияланатын дәрілік заттарға, профилактикалық (иммундық-биологиялық, диагностикалық, дезинфекциялық) препараттарға, медициналық мақсаттағы бұйымдар мен медициналық техникаға тендер өткізу туралы хабарландыруда мынадай мәліметтер болуы тиіс:
1) тендерді ұйымдастырушының атауы мен мекен-жайы;
2) сатып алынатын дәрілік заттардың, профилактикалық (иммундық-биологиялық, диагностикалық, дезинфекциялық) препараттардың халықаралық патенттелмеген атауы, сатып алынатын медициналық мақсаттағы бұйымдар мен медициналық техниканың тізбесі, сатып алу көлемі, жеткізу орны, әрбір лот бойынша сатып алу үшін бөлінген сомалар;
3) жеткізудің талап етілетін мерзімдері мен шарттары;
4) тендерлік құжаттаманы алу тәсілі және орны;
5) құжаттарды ұсыну орны және тендерлік өтінімдерді берудің соңғы мерзімі;
6) тендерлік өтінімдер салынған конверттерді ашу күні, уақыты және орны.
18. Осы Ережеге 1-қосымшаға сәйкес нысан бойынша жарияланатын фармацевтикалық қызметті сатып алуды өткізу туралы хабарландыруда мынадай мәліметтер болуы тиіс:
1) тендерді ұйымдастырушының атауы мен почталық мекен-жайы;
2) сатып алынатын қызметтердің атауы;
3) қызметтерді көрсету мерзімі;
4) шарт жасасу үшін тендерлік құжаттаманы алу орны мен тәсілдері;
5) құжаттарды ұсыну орны мен өтінім берудің соңғы мерзімі;
6) тендерлік өтінімдер салынған конверттерді ашу күні, уақыты және орны.
19. Тендерді ұйымдастыру және өткізу үшін оны ұйымдастырушы әрбір тендерге жеке тендерлік комиссия құрады және оның құрамын бекітеді.
20. Тендерлік комиссияның құрамына төраға, төрағаның орынбасары және тендерлік комиссияның мүшелері кіреді. Тендерлік комиссия мүшелерінің жалпы саны тақ саннан тұруы және үш адамнан кем болмауы тиіс. Тендерлік комиссияның хатшысы тендерлік комиссияның мүшесі болып табылмайды және тендерлік комиссия шешім қабылдаған кезде дауыс беру құқығы болмайды.
Тендерлік комиссия оны құру туралы шешім күшіне енген күнінен бастап сатып алу туралы шарт күшіне енгенге дейін жұмыс істейді.
Егер тендер өтпей қалды деп танылған немесе оның қорытындылары күшін жойған жағдайда, тендерлік комиссия өзінің қызметін тоқтатады.
21. Тендерлік комиссияның құрамына тендерді ұйымдастырушының, тапсырыс берушінің бірінші басшылары немесе олардың орынбасарлары, сондай-ақ тендерді ұйымдастырушының және тапсырыс берушінің құрылымдық бөлімшелерінің басшылары мен мамандары кіреді.
22. Тендерлік комиссияның төрағасы тендерді ұйымдастырушы басшының орынбасарынан төмен емес тұлға болып табылады, ол комиссияның қызметін басқарады, комиссия отырыстарына төрағалық етеді, жұмысты жоспарлайды және оның шешімдерінің іске асырылуын жалпы бақылауды жүзеге асырады. Төраға болмаған уақытта оның функцияларын орынбасары атқарады.
23. Тендерлік комиссияның хатшысы тендерді ұйымдастырушының қызметкері болып табылады. Тендерлік комиссияның хатшысы әлеуетті өнім берушілерге тендерлік құжаттаманы береді, әлеуетті өнім берушілерден тендерлік өтінімдер салынған конверттерді қабылдайды, тендерлік комиссия отырысының күн тәртібі бойынша ұсыныстарды, қажетті құжаттарды және материалдарды дайындайды, комиссия отырыстарын өткізгеннен кейін оның хаттамаларын ресімдейді, түскен тендерлік өтінімдерді және тендерлік өтінімдер салынған конверттерді әлеуетті өнім берушілердің ұсынған уақыты мен күні, әлеуетті өнім берушінің уәкілетті өкілінің тегі, аты, әкесінің аты (тендерлік өтінімдер салынған конвертті берген және конверттерді ашу рәсімінде қатысатын тұлғалар) көрсетілген конкурстық өтінімдер салынған конверттерді ашу рәсімдеріне қатысуға ниет білдірген әлеуетті өнім берушілерді тіркеу журналын жүргізеді. Түскен тендерлік өтінімдерді және конверттерді ашу рәсімдеріне қатысуға ниет білдірген әлеуетті өнім берушілерді тіркеу журналы тігілуі, беттері нөмірленуі және соңғы беті тендерді ұйымдастырушының мөрімен бекітілуі тиіс.
24. Қажет болған жағдайда тендерді ұйымдастырушы клиникалық фармакологтар мен денсаулық сақтау ұйымдарының мамандарынан немесе дәрілік заттарды, профилактикалық (иммундық-биологиялық, диагностикалық, дезинфекциялық) препараттарды, медициналық мақсаттағы бұйымдар мен медициналық техниканы сараптауды жүзеге асыруға аккредиттелген ұйымдардың сарапшыларынан тұратын сараптама комиссиясын құрады.
25. Сарапшылар (құрылған жағдайда сараптама комиссиясы) әлеуетті өнім берушілер ұсынатын дәрілік заттардың, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдар мен медициналық техниканың тендерлік құжаттаманың талаптарына сәйкестігі бойынша сараптамалық қорытынды береді және тендерлік комиссия шешім қабылдаған кезде дауыс беру құқығы болмайды. Сарапшылардың (сараптама комиссиясының) сараптама қорытындысын, егер ол тендерлік құжаттамада көзделген талаптар шегінде жасалған болса ғана тендерге ұсынылған тендерлік өтінімдерді бағалау және салыстыру және тендер жеңімпазын анықтау кезінде ескеріледі. Сараптама қорытындысы жазбаша түрде ресімделеді, оған сарапшылар (сараптама комиссиясының мүшелері) қол қояды және конкурсқа қатысуға рұқсат туралы хаттамаға қоса беріледі.
26. Тендерлік комиссияның отырысы тендерлік комиссия мүшелерінің жалпы санының кемінде үштен екісі қатысқан кезде өткізіледі. Тендерлік комиссияның шешімі ашық дауыс берумен қабылданады және егер отырысқа қатысып отырған тендерлік комиссия мүшелерінің жалпы санының басым бөлігі ол үшін дауыс берсе, қабылданды деп есептеледі. Дауыстар тең болған жағдайда комиссия төрағасы немесе ол болмаған кезде оның орынбасары дауыс берген шешім қабылданды деп есептеледі.
27. Тендерлік комиссия мүшелерінің бірі өндірістік немесе басқа себепен қатыспаған жағдайда тендерлік комиссия отырысының хаттамасында оның қатыспау себебі және осы фактіні растайтын құжатқа сілтеме көрсетіледі.
Егер тендерлік комиссия мүшелерінің қажетті саны болмауы себебінен белгіленген күні мен уақытында тендерлік өтінімдер салынған конверттерді ашу жөніндегі тендерлік комиссия отырысы болмай қалған жағдайда, тендерлік комиссияның хатшысы тендерге ұсынылған тендерлік өтінімдер салынған конверттердің сақталуын қамтамасыз етеді және хабарланған мерзімнен 24 сағаттан кешіктірмей конверттерді ашуды өткізудің күні мен уақыты туралы хабарлайды. Бұл ретте жаңадан ұсынылған өтінімдер қабылданбайды.
Егер хатшы хабарлаған уақытта тендерлік комиссия мүшелерінің қажетті саны болмаған жағдайда, тендерді ұйымдастырушы тендерлік комиссияның қатыспаған мүшелерін ауыстыру бойынша, ауыстыру себебін көрсете отырып, өзгеріс енгізеді.
28. Тендерлік комиссия отырысының хаттамасына тендерлік комиссияның қатысқан барлық мүшелері, төраға, оның орынбасары және хатшысы қол қояды.
29. Тендерді ұйымдастырушы тендерлік құжаттаманы әзірлейді және бекітеді, бұл бюджеттік бағдарлама әкімшісінің интернет-ресурсында орналастырылуы тиіс және онда мыналар болуы тиіс:
1) тендерлік құжаттаманның құрамы, осы Ереженің 3, 4-тарауларының талаптарына сәйкестігін растау үшін әлеуетті өнім беруші ұсынуы тиіс құжаттардың тізбесі;
2) сатып алынатын дәрілік заттардың, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдар мен медициналық техниканың сипаттамасы, техникалық өзіндік ерешеліктерді қоса алғанда, олардың қажетті техникалық және сапалық сипаттамалары;
3) сатып алынатын дәрілік заттардың, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдар мен медициналық техниканың саны (көлемі), әрбір лот бойынша сатып алуға бөлінген сома;
4) жеткізуде талап етілетін мерзімдер мен шарттар, орны;
5) төлем шарты және сатып алу туралы шарттың жобасы;
6) бағада тасымалдауға және сақтандыруға шығыстарды, кедендік баждарын, салықтарды, алымдарды және тауарлардың құнынан басқа өзге де төлемдерге шығыстар сияқты элементтердің қамтылуына қатысты нұсқауларды қоса алғанда, тендерлік өтінімнің бағасын есептеу тәсілдері мен әдістемесі;
7) тендерлік өтінімнің бағасы көрсетілуі тиіс валюта немесе валюталар, тендерлік өтінімдер бағаларын оларды салыстыру және бағалау мақсатында бірыңғай валютаға келтіру үшін қолданылатын курс;
8) Қазақстан Республикасының тіл туралы заңнамасына сәйкес тендерлік өтінімді, сатып алу туралы шарттарды құру және ұсыну тіліне қойылатын талаптар;
9) тендерлік өтінімді ресімдеуге қойылатын талаптар;
10) тендерлік өтінімді қамтамасыз етуді енгізу тәртібі, нысаны, мерзімдері;
11) тендерлік өтінімді ұсынудың аяқталу мерзіміне дейін тендерлік өтінімді өзгертуге немесе қайтарып алуға өнім берушінің мүмкіндігін көрсету;
12) тендерлік өтінімді ұсынудың орны мен соңғы мерзімі және олардың қолданылу мерзімі;
13) тендерлік құжаттаманың мазмұны бойынша әлеуетті өнім берушілер түсініктеме сұрай алатын тәсілдер, сондай-ақ аталған кезеңде тендерді ұйымдастырушының әлеуетті өнім берушілермен ашық нысанда өтетін және хаттамаланатын кездесу өткізуге ниеті туралы хабарлама;
14) тендерлік өтінімдерімен коверттерді ашу орны, күні және уақыты;
15) тендерлік өтінімдер салынған конверттерді ашу және тендерлік өтінімдерді қарау кезінде пайдаланылатын рәсімдер;
16) әлеуетті өнім берушілер - отандық тауар өндірушілерге басымдық беру туралы шарт;
17) сатып алу туралы шарт бойынша міндеттемелердің орындалуын қамтамасыз етуді енгізу шарты, нысаны, көлемі мен тәсілі.
30. Сатып алуды жүзеге асыру кезінде тендерді ұйымдастырушы бір текті тауарларды оларды жеткізу орны бойынша лоттарға бөле алады.
Бір текті тауарлардың бірнеше түрлерін сатып алуды жүзеге асыру кезінде тендерді ұйымдастырушы тауарлардың бір текті түрлері бойынша және (немесе) оларды жеткізу орны бойынша оларды лоттарға бөле алады.
31. Әлеуетті өнім беруші тендерді ұйымдастырушыдан тендерлік өтінімді ұсынудың соңғы мерзімі аяқталғанға дейін он күнтізбелік күннен кешіктірмей тендерлік құжаттамаға түсініктеме сұрауға құқылы. Тендерді ұйымдастырушы өтінімді алған күнінен бастап үш жұмыс күнінен кешіктірмей сұраным жасаған авторды көрсетпей тендерлік құжаттама берілген барлық әлеуетті өнім берушілерге тиісті түсініктеме жіберуі тиіс.
32. Тендерді ұйымдастырушы тендерлік өтінімді ұсынудың соңғы мерзіміне дейін жеті күнтізбелік күннен кешіктірмей жеке бастамасымен немесе әлеуетті өнім берушілердің сұранымына жауапқа тендерлік құжаттамаға өзгерістер енгізуге құқылы.
Енгізілген өзгерістердің міндетті күші болады және олар туралы тендерлік, құжаттама берілген барлық әлеуетті өнім берушілерге дереу хабарланады. Бұл ретте тендерді ұйымдастырушы тендерлік өтінімдердегі осы өзгерістерді әлеуетті өнім берушілердің есепке алуы үшін тендерлік өтінімдерді ұсынудың соңғы мерзімін кемінде бес жұмыс күніне ұзартады.
33. Тендерді ұйымдастырушы тендер шарттарын түсіндіру үшін тендерлік құжаттамада көрсетілген белгіленген орында және белгіленген уақытта әлеуетті өнім берушілермен кездесу өткізуге құқылы.
Көрсетілген кездесуді өткізу кезінде мазмұнында кездесу барысында тендер шарттарын түсіндіру бойынша берілген сұрақтар мен жауаптар бар хаттама жасалады, бұл кездесу қорытындысы бойынша тендерлік құжаттама ұсынылған барлық әлеуетті өнім берушілерге дереу жіберіледі.
34. Фармацевтикалық қызметтерді сатып алу үшін тендерді ұйымдастырушы тендерлік құжаттаманы әзірлейді және бекітеді, онда мынадай ақпаратты көрсетеді:
1) тегін босатылатын, халықаралық патенттелмеген атауларымен дәрілік заттардың және медициналық мақсаттағы бұйымдардың тізбесі мен көлемдері;
2) өтеу коэффициенті көрсетіле отырып, жеңілдік шарттармен босатылатын, халықаралық патенттелмеген атауларымен дәрілік заттардың және медициналық мақсаттағы бұйымдардың тізбесі мен көлемдері;
3) фармацевтикалық қызметтерді ұсыну қажет елді мекендер пункттерінің тізбесі;
4) осы Ереженің 9-тармағында көрсетілген қызметтердің өнім берушілеріне қойылатын талаптар;
5) мамандардың біліктілігін, мамандығы бойынша жұмыс өтілін көрсете отырып, олардың саны туралы мәліметтер;
6) амбулаториялық дәрі-дәрмекпен қамтамасыз етуді есепке алудың автоматтандырылған жүйесін жүргізу үшін компьютерлік техника және телекоммуникацияның байланыс құралдарының болуы туралы мәлімет;
7) осы Ереженің 4-тарауында көрсетілген, босатылатын дәрілік заттар мен медициналық мақсаттағы бұйымдарға қойылатын талаптар;
8) осы Ережеге 8-қосымшаға сәйкес фармацевтикалық қызметтерді көрсетуге арналған қызметтердің өнім берушілерімен шарттың үлгі нысаны;
9) конверттерді ашу орны, күні мен мерзімі.
35. Талаптар бойынша дәйексіз ақпарат берген әлеуетті өнім берушілер туралы, сондай-ақ соңғы екі жыл ішінде фармацевтикалық қызметтерді сатып алу туралы жасасқан шарттар бойынша өздерінің міндеттемелерін орындамағаны немесе тиісінше орындамағаны үшін соттың заңды күшіне енген шешімінің негізінде жауапкершілікке тартылған әлеуетті өнім берушілер туралы ақпарат уәкілетті органның интернет-ресурсында орналастыру үшін денсаулық сақтау саласындағы уәкілетті органға жіберіледі.
2. Тендерлік өтінімдердің қолданылу мерзімі, мазмұны, оларды ұсыну, өзгерту және қайтарып алу
36. Тендерге қатысуға ниет білдірген әлеуетті өнім беруші тендерлік өтінімдерді ұсынудың соңғы мерзімі аяқталғанға дейін тендерлік құжаттамаға сәйкес жасалған тендерлік өтінімді мөрленген түрде тендерді ұйымдастырушыға ұсынады.
37. Тендерлік өтінімдерді ұсынудың соңғы мерзімі аяқталғаннан кейін ұсынылған тендерлік өтінімдер ашылмайды және оны ұсынған әлеуетті өнім берушіге қайтарылады.
38. Тендерге қатысу үшін әлеуетті өнім беруші ұсынған тендерлік өтінімнің қолданылу мерзімі қырық бес күнтізбелік күннен кем болмауы тиіс.
Қолданылу мерзімі тендер шартында көрсетілген мерзімнен қысқа тендерлік өтінім қайтарылады.
ҚР Үкіметінің 2010.26.05. № 474 Қаулысымен (бұр.ред.қара); 2010.27.08. № 844 қаулысымен (бұр.ред.қара) 39-тармақ өзгертілді
39. Тендерге қатысуға ниет білдірген әлеуетті өнім берушінің тендерлік өтінімі мыналарды қамтуы тиіс:
1) осы Ережеге 2-қосымшаға сәйкес тендерге қатысуға өтінім. Осы Ережеге 3-қосымшаға сәйкес нысан бойынша өтінімге қоса берілетін құжаттардың тізімдемесі электрондық нұсқада міндетті түрде беріледі;
2) әлеуетті өнім берушіге қойылатын біліктілік талаптарына сәйкестігін растайтын құжаттар:
дәрілік заттарды, Диммундық-биологиялық, диагностикалық, дезинфекциялық) препараттарды, медициналық мақсаттағы бұйымдар мен медициналық техниканы өндіруге және/немесе көтерме, бөлшек саудада өткізуге әлеуетті өнім берушінің құқығын растайтын лицензиялардың нотариаттық куәландырылған көшірмелері;
тиісті мемлекеттік орган (дара кәсіпкер үшін) берген, заңды тұлғаның білімінсіз кәсіпкерлік қызметті жүзеге асыруға құқық беретін құжаттың нотариаттық куәландырылған көшірмесі;
«Бухгалтерлік есеп және қаржылық есептілік туралы» Қазақстан Республикасының Заңына сәйкес бірінші басшы немесе оны алмастыратын тұлға, сондай-ақ бас бухгалтер (бухгалтер) қол қойған соңғы қаржы жылындағы міндетті қаржылық есептіліктің түпнұсқасы немесе нотариаттық куәландырылған көшірмесі. Егер конверттерді ашу ағымдағы жылдың 30 сәуіріне дейінгі мерзімде жүргізілген жағдайда, онда соңғы қаржы жылының алдындағы қаржы жылындағы міндетті қаржылық есептіліктің түпнұсқасы немесе нотариаттық куәландырылған көшірмесі ұсынылады;
Қазақстан Республикасының заңнамалық актілерінде міндетті аудит жүргізу белгіленген заңды тұлғалардың соңғы қаржы жылындағы аудиторлық есебінің түпнұсқасы немесе нотариаттық куәландырылған көшірмесі. Егер конверттерді ашу ағымдағы жылдың 1 маусымына дейінгі мерзімде жүргізілген жағдайда, соңғы қаржы жылының алдындағы қаржы жылындағы аудиторлық есептің түпнұсқасы нотариаттық куәландырылған көшірмесі ұсынылады;
заңды тұлғаның мемлекеттік тіркелгені (қайта тіркелгені) туралы куәліктің нотариаттық куәландырылған көшірмесі, жеке куәлігінің немесе төлқұжатының көшірмесі (дара кәсіпкерлер үшін);
заңды тұлға үшін Жарғының нотариаттық куәландырылған көшірмесі (егер Жарғыда құрылтайшылардың, қатысушылардың немесе акционерлердің құрамы көрсетілмеген жағдайда, акцияларды ұстаушылардың тізілімінен үзінді көшірме немесе құрылтайшылардың, қатысушылардың құрамы туралы үзінді көшірме немесе құрылтай шартының нотариаттық куәландырылған көшірмесі);
Қазақстан Республикасының заңнамалық актілеріне сәйкес төлем мерзімі ұзартылған жағдайларды қоспағанда, тендерлік өтінімдер салынған конверттерді ашу күнінің алдындағы бір айдан кешіктірілмей берілген, Қазақстан Республикасы бойынша салық төлеушінің салық берешегінің, міндетті зейнетақы жарналары мен әлеуметтік аударымдар бойынша берешегінің жоқтығы (болуы) туралы тиісті салық органының белгіленген нысандағы анықтамасының салық органы басшысының не орынбасарының қолымен және аталған салық органының мөрімен бекітілген түпнұсқасы;
осы Ережеге 4-қосымшаға сәйкес тендерлік өтінімдер салынған конверттерді ашу күнінің алдындағы бір айдан кешіктірмей берілген, әлеуетті өнім берушінің банктің (банктердің) алдында мерзімі асқан берешегінің жоқтығы туралы банктің (банктердің) бірінші басшысының немесе расталуы болғанда оны алмастыратын тұлғаның және бас бухгалтердің қолы қойылған банктің (банктардың) мөрі соғылған анықтамасының түпнұсқасы (егер әлеуетті өнім беруші екінші деңгейдегі бірнеше банктің немесе филиалдардың, сондай-ақ шетелдік банктің клиенті болып табылған жағдайда, бұл анықтама осындай банктердің әрқайсысынан ұсынылады).
біліктілігі, мамандығы бойынша жұмыс өтілі көрсетіле отырып, мамандардың болуы және саны туралы мәлімет,;
егер әлеуетті өнім беруші Қазақстан Республикасының резиденті болып табылмаса және Қазақстан Республикасының салық төлеушісі ретінде тіркелмеген жағдайда, Қазақстан Республикасының салық органынан осы әлеуетті өнім берушінің Қазақстан Республикасының резиденті еместігі және салық есебіне тұрмайтыны туралы анықтаманың түпнұсқасы немесе нотариаттық куәландырылған көшірмесі беріледі;
3) осы Ережеге 5-қосымшаға сәйкес жеткізілетін дәрілік заттардың, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдар мен медициналық техниканың, қосалқы қызметтердің құнын қоса алғанда, түпкі бағасын құрайтын, әлеуетті өнім берушінің барлық нақты шығындары қамтылуға тиіс әлеуетті өнім беруші ұсынатын баға кестесі;
4) техникалық өзіндік ерекшеліктер;
5) ұсынылатын қосалқы қызметтер;
6) тендерлік өтінімді қамтамасыз етуді енгізуді растайтын құжаттардың түпнұсқасы;
7) ұсынылатын дәрілік заттардың, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдар мен медициналық техниканың, фармацевтикалық қызметтердің осы Ережеде көзделген талаптарға сәйкестігін растайтын құжаттар;
7-1) мемлекеттік санитариялық-эпидемиологиялық қадағалау органдары берген «суыту тізбегі» болуы қажет болған жағдайда дәрілік заттар айналымы саласындағы уәкілетті органның аумақтық бөлімшелері берген дәрілік заттарды сақтау мен тасымалдау үшін жағдайдың бар-жоғын тексеру актісі (актілер өтінімдер салынған конверттерді ашу күніне дейін бір жылдан кешіктірілмей берілуі тиіс);
8) тендерлік құжаттамаға сәйкес ұсыну үшін қажетті басқа да құжаттар.
ҚР Үкіметінің 2010.27.08. № 844 қаулысымен 40-тармақ өзгертілді (бұр.ред.қара)
40. Осы Ереженің 39-тармағында көзделген құжаттардан басқа, дәрілік заттардың, профилактикалық (иммундық-биологиялық, диагностикалық, дезинфекциялық) препараттардың және/немесе медициналық мақсаттағы бұйымдардың әлеуетті өнім берушісінің тендерлік өтінімінде мынадай құжаттар болуы тиіс:
1) дәрілік заттарды, профилактикалық (иммундық-биологиялық, диагностикалық, дезинфекциялық) препараттарды және/немесе медициналық мақсаттағы бұйымдарды өндірушілермен не өндірушінің ресми өкілдерімен (дәрілік заттарды, профилактикалық (иммундық-биологиялық, диагностикалық, дезинфекциялық) препараттардың, медициналық мақсаттағы бұйымдардың көлемдері мен тізбесі көрсетілген) шарттардың нотариаттық куәландырылған көшірмелері;
2) ҚР Үкіметінің 2010.27.08. № 844 қаулысымен алып тасталды (бұр.ред.қара)
ҚР Үкіметінің 2010.25.02. № 122 Қаулысымен 40-1-тармақпен толықтырылды
40-1. Осы Ереженің 39-тармағында көзделген құжаттардан басқа, медициналық техниканың әлеуетті өнім берушісінің тендерлік өтінімінде өндірушінің не сатып алу ұсынылатын медициналық техниканы өндірушінің ресми өкілінің мәртебесін растайтын құжаттың түпнұсқасы немесе нотариалды куәландырылған көшірмесі болуы тиіс.
41. Әлеуетті өнім беруші тендерлік өтінімді ұсынудың мерзімі аяқталғанға дейін өзінің тендерлік өтінімін өзгертуге немесе қайтарып алуға құқылы. Бұл ретте ол өзінің тендерлік өтінімінің кепілдік қамтамасыз етілуін қайтарып алуға құқылы.
Әлеуетті өнім берушінің тендерлік өтінімді қайтарып алу туралы хабарламасы тендерлік өтінімдерді ұсынудың соңғы мерзімінен кешіктірілмей, сатып алуды ұйымдастырушыға жазбаша түрде жіберілуі тиіс.
42. Тендерлік өтінімді ұсынудың соңғы мерзімі өткеннен кейін тендерлік өтінімдерге өзгерістер енгізуге жол берілмейді.
43. Тендерлік өтінімді әлеуетті өнім беруші сатып алуды ұйымдастырушыға тігілген түрде, нөмірленген беттерімен ұсынады және соңғы беті мөрмен куәландырылады.
Тендерлік өтінімнің техникалық өзіндік ерекшелігі (тігілген түрде, нөмірленген беттерімен, соңғы беті заңды тұлғаның немесе дара кәсіпкердің қолымен және мөрімен бекітілген болуы тиіс) және кепілдікті қамтамасыз етудің түпнұсқасы тендерлік өтінімге жеке қоса беріледі.
44. Тендерлік өтінім басылуы немесе өшірілмейтін сиямен жазылуы және оған әлеуетті өнім беруші қол қоюы тиіс.
45. Тендерлік өтінімде әлеуетті өнім берушінің грамматикалық немесе арифметикалық қателерді түзетуі қажет болатын жағдайларды қоспағанда, жолдар арасында ешқандай өндірме, өшірілген сөздер немесе толықтырулар болмауы тиіс.
46. Әлеуетті өнім беруші тендерге қатысуға өтінімді конвертке желімдейді. Конвертте әлеуетті өнім берушінің атауы мен заңды мекен-жайы көрсетілуі тиіс. Конверт Тендерлік құжаттамада көрсетілген мекен-жай бойынша тендерді ұйымдастырушыға жіберілуі және мынадай жазулар болуы тиіс: «____________________ сатып алу жөніндегі тендер (тендердің атауы көрсетіледі)» және «________________ дейін ашпаңыз» (тендерлік құжаттамада көрсетілген конверттерді ашу күні және уақыты көрсетіледі)».
