4. Бағдарламаның мақсаты, міндеттері
Бағдарламаның мақсаты халықты сауықтыру және орташа өмір сүру ұзақтығын ұлғайту болып табылады.
Бағдарламаның негізгі міндеттері:
1. Салауатты өмір салтына, денсаулықты нығайтуға, халықтың денсаулық әлеуетін дамытуға және денсаулық сақтау мәдениетін қалыптастыруға жәрдемдесу.
2. Салауатты өмір салтын қалыптастырудың кешенді, үзіліссіз және орнықты жүйесін құру.
Бірінші кезеңде (2008 - 2010 жылдар) жекелеген әлеуметтік маңызы бар аурулар мен қауіп-қатерлер факторларының алдын алудың кешенді тәсілінің міндеттерін шешу мақсатында барлық секторларды белсенді тарту көзделеді. Халықтың жекелеген топтары мен қоғамдастық (балалар, жасөспірімдер, жастар негізгі әлеуметтік маңызы бар аурулардың қауіп-қатерлер факторлары бар адамдар) деңгейінде салауатты орта қалыптастыруға ерекше көңіл бөлінетін болады. Бастапқы медициналық-санитарлық көмек (бұдан әрі - БМСК) деңгейінде ауруларды емдеуден аурулардың алдын алуға және «салауаттылардың» денсаулығын нығайтуға басымдықтар орын ауыстырады.
Екінші кезеңде (2011 - 2013 жылдар) денсаулық қауіп-қатерлерінің негізгі факторларын жоюға бағытталған ықпалдастық, мультифакторлық тәсілге ерекше көңіл бөлінетін болады. Халық денсаулығын нығайтуда экономикалық ынталандыру тетіктері арқылы медицина қызметкерлерінің қызметін, әсіресе БМСК деңгейінде күшейту көзделеді. Ұлттық және жергілікті деңгейлерде денсаулықтың көрсеткіштеріне әсер ететін әлеуметтік мәселелерді шешу әлеуметтік экономиканың басқа секторларының аса белсенді қолдауын табады.
Үшінші кезеңде (2014 - 2016 жылдар) аурулардың бастапқы себептеріне шоғырланатын денсаулық әлеуетін дамыту саласында бүкіл қоғамның күш-жігерін ықпалдастыруға қол жеткізіледі. Денсаулықты қорғаудың ұлттық саясаты және денсаулық сақтау секторы қызметінің бағыты «салауаттылардың» денсаулығына, халықтың өзі белсенді қатысқан кезде жеке тұлға денсаулығының әлеуетін дамытуға бағдарланады.
5. Бағдарламаның негізгі бағыттары мен іске асыру тетіктері
Бағдарламаны іске асыру мынадай бағыттар бойынша жүзеге асырылады:
1. Халықтың салауатты өмір сүру салты мен аурулардың алдын алудың мынадай дағдыларын қалыптастыру:
1) қауіп-қатердің мінез-құлықтық факторлары: темекі шегу, ішімдікке салыну, есірткі тұтыну, сапасыз және тиімсіз тамақтану, дене шынықтыру белсенділігінің төмендігі;
2) әлеуметтік елеулі аурулар мен жарақаттану;
3) ұрпақты болу денсаулығын сақтау.
2. Сектораралық өзара іс-қимылды күшейту және бүкіл қазақстандық қоғамдастықты салауатты өмір салтын қалыптастыруға тарту:
1) бастапқы медициналық-санитарлық көмек шеңберінде салауатты өмір салтын қалыптастыруды күшейту;
2) салауатты өмір салтын қалыптастыруда білімнің рөлін күшейту;
3) салауатты өмір салтын насихаттауда БАҚ-тың рөлін арттыру;
4) салауатты өмір салты мен адамды қоршаған ортаның байланысын күшейту;
5) салауатты өмір салтын қалыптастыруға үкіметтік емес ұйымдар мен бизнес-қоғамдастықтың қатысуы;
6) салауатты өмір салтын қалыптастыру үшін құқықтық ортаны қамтамасыз ету;
7) салауатты өмір салтын қалыптастыруды ғылыми қамтамасыз ету;
8) салауатты өмір салтын қалыптастыру жүйесін ресурстық және институционалдық қамтамасыз етуді күшейту.
5.1. Халықтың салауатты өмір сүру салты мен аурудың алдын алу дағдыларын қалыптастыру
Салауатты өмір салтына, денсаулықты нығайтуға, халықтың денсаулық әлеуетін дамытуға және денсаулықты сақтауды қалыптастыруға жәрдемдесу халықтың салауатты өмір сүру салты мен аурулардың алдын алу дағдыларын қалыптастыру мынадай жолмен жүзеге асырылады:
1) қауіп-қатердің мінез-құлықтық факторлары: темекі шегу, ішімдікке салыну, есірткі тұтыну, сапасыз және тиімсіз тамақтану, дене тәрбиесі белсенділігінің төмендігі сияқты қауіп-қатердің мінез-құлықтық факторларының денсаулық үшін салдары туралы халыққа хабарлауды арттыру арқылы дәйектемелер әзірлеу және салауатты өмір сүру салты үшін жағдай жасау арқылы қалыптастыру.
Ақпараттық насихат, қауіп-қатердің мінез-құлықтық факторларының алдын алу жөніндегі ақпараттық-білім материалдарын әзірлеу және халықтың арасында тарату электрондық және баспа БАҚ арқылы жүзеге асырылады.
Халықтың әсіресе балалардың, жасөспірімдердің, жастардың арасында қауіп-қатердің мінез-құлықтық факторларының зияны мен салдарлары туралы ақпараттандыру мен алдын алу жұмысына БМСК медицина қызметкерлері мен педагогтар кеңінен тартылатын болады.
Орта және жоғары оқу орындары жүйесінде білім беретін кешендерді әзірлеу мен енгізу арқылы балалардың, жасөспірімдер мен жастардың арасында темекі шегу, маскүнемдік, есірткіні тұтынудың зияны мен салдарлары туралы ақпараттандыру деңгейі арттырылады.
Волонтерлер қозғалысының одан әрі даму мүмкіндігін алады.
Жергілікті деңгейде елдің жекелеген өңірлерінің қолда бар тәжірибесі негізінде мақсатты, кең ауқымды акциялар мен онкүндіктерді, қауіп-қатердің мінез-құлықтық факторларының алдын алуға бағытталған Дүниежүзілік күндерді әзірлеу мен енгізу арқылы қоғамды жұмылдыруға баса көңіл бөлінеді.
Темекі және алкоголь өнімдерін тұтынуға халықтың тікелей немесе жанама қатысына ықпал ететін ақпараттың әсерін барынша тиімді төмендету жолдары қарастырылатын болады.
Қоғамдағы салауатты өмір салтын ұстанудың әлеуметтік қолайлы беделін насихаттауға және құруға елдің көшбасшылары мен әйгілі адамдар (саясаткерлер, мәдени қайраткерлер, спортшылар) тартылатын болады.
«Ықпал етуші топтар» арқылы темекі шегуді төмендетуге ықпал ету: денсаулық сақтау, білім беру саласының және мемлекеттік қызметкерлерін көтермелеу жүйесін қалыптастыру және ынталандыру арқылы темекі шегуден бас тартқызу.
Азаматтардың таза ауаға, қауіпсіз қоршаған ортаға, темекі түтінінен және алкоголь өнімдерін тұтынудан еркін аумақтардың шекарасын кеңейтуге бағытталған шараларды әзірлеу арқылы ақпарат алуға, сондай-ақ темекінің, алкогольдің және есірткілердің адам денсаулығына жағымсыз әсері туралы толық және нақты ақпаратқа еркін қолжетімділігіне құқықтарын қамтамасыз ету жұмыстар жалғасатын болады.
Темекі шегуді, ішімдікке салынуды, есірткіні тұтынуды тастағысы келетін тәуелді адамдарға психологиялық көмек көрсету үшін дағдарыстық орталықтар жүйесін кеңейту, медициналық-психологиялық көмек жүйесін жетілдіру және сенім телефондарының жұмысы бойынша шаралар қабылданатын болады. Жастар денсаулық орталықтары желілерін құру және дамыту балаларға, жасөспірімдер мен жастарға жеке және әлеуметтік проблемаларды еңсеруде кешенді медициналық-психикалық әлеуметтік көмек беруге мүмкіндік береді.
Интерактивтік технологияларды және «теңге тең» қағидасын пайдалана отырып, оларға өмірлік жауапты мінез-құлық дағдыларын, сыртқы қысымға қарсы әрекет етуді үйрете отырып, балалардың, жасөспірімдер мен жастардың өз денсаулығына деген жауапкершілігін қалыптастыру жөніндегі жұмыс күшейтілетін болады.
Жергілікті деңгейде ұлттық ашытылған сүт сусындарын өндіру және оны сату жөніндегі шағын бизнесті дамытуды басымдықпен қолдау шаралары әзірленетін болады.
Халықаралық ұсынымдарды ескере отырып, тамақ өнімдерін сертификаттау мәселелеріне қатысты іс-шаралар өткізілетін болады.
Нормалардың сақталуын бақылай отырып, тамақ өнімдерін, оның ішінде емшектегі балалар мен нәрестелерге арнайы тағайындалған тамақ өнімдерін витаминдік-минералдық кешендермен байытуға баса назар аударылатын болады.
Ұнды темірмен ратификациялау және тұзды йодтау деңгейін 100%-ға жеткізуді қамтамасыз ету бойынша қажетті жәрдем көрсетілетін болады.
ДДҰ ұсынымдарына сәйкес тек емшек сүтімен кем дегенде алты айға дейін қоректендіру практикасын таратуға ықпал ету және дұрыс қосымша қоректендіруді енгізу технологиясын қатар жетілдіру жөніндегі шаралар жалғасады.
Сапалы тамақтану мәдениеті мәселесінде педагогтардың, медицина қызметкерлерінің хабардар болушылығы мен білімділігінің деңгейі арттырылады.
Тамақ өнімдерін өндіруде, қайта өңдеу және сақтауда гигиеналық норма мен қауіпсіздік ережесін бақылау және сақтау жолымен тамақтану сапасы жақсартылады.
Халықты қауіпсіз ауыз суымен қамтамасыз етуге көмек көрсету елдің бірқатар өңірінде бар белгілі ауру түрлерімен байланысты мәселелерді төмендетумен қатар, елдің экологиялық қауіпсіздігіне де өз үлесін қосады.
Халыққа арзан бағамен маусымға сәйкес жергілікті өндірістің тамақ өнімдерін, жемісі мен көкөнісін тасымалдау мүмкіндігін қалыптастыру үшін ұсыныстар әзірленетін болады.
Мектеп алдыңғы, бастауыш сынып оқушыларын одан кейін жоғары сынып оқушыларын ыстық тамақпен біртіндеп қамтуға бағытталған ұйымдастырушылық және түсіндіру іс-шаралары жалғасатын болады. Жергілікті өндірушілердің мектептерге сапалы тамақ жеткізіп отыру, мектеп асханаларын тамақ өнімдерімен қамтамасыз ету түрлерін жетілдіру жөніндегі шаралары жалғасатын болады.
Экономикалық шаралар арқылы тамақтың сапасын жақсарту, мектеп асханалары үшін салық ауыртпалығын жеңілдету жөніндегі ұсыныстар жетілдірілетін болады.
Балалар мен жастарды қолжетімді балалар, аула клубтарының, үйірмелердің, секциялардың дамушы желісіне тарту жөнінде насихат жүргізілетін болады.
Халықтың арасында дене тәрбиесі белсенділігінің арттыруына велосипед қозғалысының дамуы елеулі түрткі бола алады, бұл үшін қажетті жағдайлар туғызуға жәрдем көрсетілетін болады. Дәстүрлі спорттық іс-шараларды өткізу, халықтың барлық жігін тарта отырып, республика аумағында спорттың ұлттық түрлері мен ұлттық ойындарын дамыту, әлеуметтік жарнама арқылы қимыл белсенділігін ынталандыру дене тәрбиесі белсенділігін дамыту бойынша жағдай жасау барысында мақсатты іс-қимылдың объектісі болып табылады.
Жұмыс істейтін халықты сауықтыру және дене шынықтыру тәрбиесімен шұғылдану үшін жағдай жасау жөніндегі шаралары әзірленетін болады.
2) әлеуметтік елеулі аурулар мен жарақаттануды жүрек-қан тамыры ауруларына, онкологиялық патологияға, респираторлық ауруларға, туберкулезге, ЖЖБЖ, АҚТҚ/ЖҚТБ-ға, басқа да жұқпалы ауруларға, жарақаттануға қатысты алдын алу қызметін арттыру, халықтың өз денсаулығына деген жауапкершілігін және салааралық өзара іс-қимылды күшейту арқылы қалыптастыру.
Әлеуметтік елеулі аурулар мен жарақаттану көрсеткіштерінің жоғары деңгейінің жоғарыда аталған себептерін жою мақсатында әлеуметтік елеулі аурулар мен жарақаттанудың алдын алу, олардың туындауының бастапқы белгілері мен салдары туралы халықтың хабардар болу деңгейін арттыруға бағытталған шаралар кешені өткізілетін болады.
Бүкіл қоғамның назарын осы проблемаға аудару үшін онкүндіктер мен акция өткізу; ақпараттық-білім материалдарын жетілдіру және үлестіру, әлеуметтік елеулі аурулар мен жарақаттанудың проблемаларын жариялау үшін БАҚ-ты кеңінен тарту, халықтың барлық деңгейін аурудың бастапқы белгілері мен салдарына, сондай-ақ өмір сүру қауіпсіздігі мен жарақат алған жағдайда өзіне-өзі және өзара көмек көрсету негіздері туралы ақпараттандыру және оқыту жалғасатын болады.
Халықтың осал тобын қауіпсіз мінез-құлық, ЖЖБЖ, АҚТҚ/ЖҚТБ алдын алу мәселелері бойынша өмір дағдыларына әдеттендіру мен оқытудың қазіргі заманғы технологияларын пайдалану (волонтерлер қозғалысы, «теңге тең» қағидасы бойынша оқыту, жастар веб-сайттары, жастарға арналған ақпараттық-білім орталықтары және т.б.) негізінде ақпараттандыру мен оқытуға бағытталған бағдарламаны әзірлеу мен енгізуге маңызды рөл беріліп отыр.
Халыққа ақпарат беруді арттыру, сондай-ақ жұқпалы аурулардың тән емес және өзіне тән алдын алуларын жүргізу туралы аспектілерді қамтитын болады.
Әлеуметтік елеулі ауруларды ерте диагностикалауды БМСК мамандары халықпен алдыңғы қатарлы технологияларды пайдалана отырып, жұмыс жүргізетін болады. Жоғары артериялық қысымға, қандағы холестерин мен қанттың деңгейіне скрининг (таңдамалы зерттеулер), сондай-ақ халықты белсенді тарту үшін оларды ақпараттық сүйемелдеу жүргізу арқылы өткізу жолымен ерте диагностикалауға тәсілдер жетілдірілетін болады.
Әлеуметтік елеулі аурулардан зардап шегетін сырқаттарды ерте анықтау, емдеу және оңалту жөніндегі жаңа қазіргі заманғы технологиялар, сондай-ақ жұқпалы аурулармен ауырған жағдайда байланыста болған адамдар үшін алдын алу шаралары дамитын болады.
БМСК жанынан қауіп-қатердің мінез-құлықтық факторлары бар және СЖА мен зардап шегетін пациенттерді оқыту бойынша мектеп және денсаулық клубтарының желісін құру және дамыту үшін БМСК мамандарына жәрдем көрсетілетін болады.
Жұқпалы аурудың таралу деңгейін төмендету үшін басқа секторларды, үкіметтік емес ұйымдарды белсенді тарта отырып, әртүрлі деңгейдегі медицина қызметкерлерінің туберкулезді, АҚТҚ/ЖҚТБ және ЖЖБЖ-ны жұқтыруға жол бермеу жөніндегі қызметіндегі алдын алу бағыттары күшейтілетін болады.
Халықтың осал топтарының алдын алу бағдарламаларына, сондай-ақ ЖЖБЖ тексеру мен емдеу жөніндегі медициналық-әлеуметтік қызметтерге, психологиялық қолдауға, АҚТҚ-ға тестілеуге, жеке қорғау құралдарына қол жеткізушілігін арттыру жөнінде жәрдем көрсетілетін болады.
Жұқпалы аурулардың алдын алу бойынша мақсатты іс-шаралар енгізіліп, мониторинг өткізілетін болады.
Денсаулық үшін жеке және қоғамдық гигиена ережелерін сақтамаудың, уақтылы вакцинациядан бас тартудың салдары туралы халықтың хабардар болуы арттырылатын болады.
Медицина қызметкерлері үшін халықтың әртүрлі топтарында жұқпалы ауруларының алдын алу, тамақтан улануды болдырмау жөніндегі бағдарламалар жетілдірілетін болады.
Жарақаттанудың алдын алу үшін, сондай-ақ жұмыс орындарында қауіпсіз еңбек жағдайын жасауға, өндірістің барынша қауіпсіз технологияларын және қозғалыс тәсілдерін пайдалануға, халық арасында жарақаттануға әкеліп соғатын тұрмыстық, өндірістік, жол-көлік факторларының әсерін қысқартуға бағытталған салааралық іс-қимылдар қабылданатын болады.
3) ұрпақты болу денсаулығын сақтауды қалыптастыру БМСК деңгейде ана мен ұрпақ патологиясының антенаталдық және перинаталдық профилактикасын ықпалдастыру мен үйлестіруді нығайту, әйелдердің бұл топтарын халықаралық стандарттарға сәйкес диспансерлік бақылау арқылы ертерек қамту, БМСК мамандарын, мемлекеттік, халықаралық және үкіметтік емес құрылымдарды тарта отырып, кең ауқымды науқандар өткізу арқылы қалыптастыру.
Отбасын жоспарлау және салауатты өмір салтын қалыптастыру жөніндегі қызметті жетілдіру арқылы жасөспірім кезеңнен бастап, темекі шегудің, алкоголь мен есірткілерді тұтынудың алдын алуды, бұқаралық ақпарат құралдарын белсенді тарта отырып, дене шынықтыру белсенділігін арттыруды, "Бүгінгі таңда жасөспірімдердің ұрпақты болу денсаулығын сақтаймыз" деген ақпараттық науқанды өткізуді қамти отырып, қаламаған жүктіліктің алдын алуға жәрдем көрсетілетін болады.
Халықты балалардың тұқым қуалаушылық және туа пайда болған ауруларының алдын алу, ұрпақты болу денсаулығын сақтау бойынша хабардар ету арттырылып және халықтың әсіресе, жүкті әйелдер мен бала туу жасындағы әйелдердің ұрпақты болу денсаулығын сақтау бойынша қоғамды жұмылдыруға жәрдем көрсетілетін болады.
Әйелдер мен ерлердің ұрпақты болу денсаулығын сақтау мен нығайту мәселелері бойынша білім беру ұйымдарында оқыту білім беру кешендерін енгізу жөніндегі жұмыс жандандырылатын болады.
5.2. Сектораралық өзара іс-қимылды күшейту және барлық қазақстандық
қоғамдастықты салауатты өмір салтын қалыптастыруға тарту
Ұйымдастырушылық, институционалдық инфрақұрылымның дамыған желісі мен СӨСҚ процесін басқару жүйесі болған кезде салауатты өмір салтын қалыптастырудың кешенді, үздіксіз және орнықты жүйесін құру мүмкін болады.
СӨСҚ-дың кешенді стратегиясын іске асыруды институционалдық қамтамасыз етуге барлық министрліктер мен ведомстволар, жергілікті атқарушы билік органдары, үкіметтік емес және қоғамдық ұйымдар, сондай-ақ халық тартылатын болады.
Сектораралық өзара іс-қимылды күшейту және СӨСҚ-ға бүкіл қазақстандық қоғамдастығын тартуға мыналар арқылы қол жеткізіледі:
1) бастапқы медициналық-санитарлық көмек шеңберінде салауатты өмір салтын қалыптастыруды күшейту. Алдын алу қызметінің стандарттарын енгізу, аурулардың скринингі бағдарламасы және оларды енгізу сапасының мониторингі арқылы алдын алу жұмыстарын күшейту, БМСК-нің медициналық қызметкерлеріне жәрдемдесу және ынталандыру жүзеге асырылады.
Денсаулық сақтаудың ішкі және сыртқы секторында салауатты өмір салтының әртүрлі аспектілерін ықпалдастыруда БМСК-ның рөлі күшейетін болады.
БМСК мамандары халықты сауықтыру жөніндегі іс-шараларды - кең ауқымды науқандарды, онкүндіктерді, айлықтарды, денсаулық фестивалдерін, спартакиадаларды, конкурстарды өткізуге белсенді тартылатын болады.
БМСК деңгейінде жастар денсаулық орталықтарын құру кешенді тәсіл мен ведомствоаралық өзара іс-қимыл негізінде алдын алу мен СӨСҚ-ға екпін түсіре отырып, кешенді медициналық-әлеуметтік қызметтерді енгізуге мүмкіндік береді.
БМСК-ның халықты салауатты өмір сүру салтына және денсаулықты нығайтуға тарту жөніндегі қызметін ынталандыру бойынша шаралар одан әрі дамитын болады. Халықтың алдын алуға араласуының басымдықтарын айқындауға, жоспарлауға, іске асыруға, мониторингіне және бағалауға белсенді қатысуы жергілікті қоғамдастық деңгейінде денсаулықты қалыптастыруға мүмкіндік береді.
Жарақат алған және уланған жағдайларда парамедиктер мен халықты дәрігерге дейінгі көмек көрсетуге үйрету жөніндегі іс-шаралар өткізілетін болады.
2) өскелең ұрпақтың салауатты өмір салтын қалыптастыруда білім беру рөлін күшейту.
Оқушылар мен мектеп қызметкерлерінің, оқушылардың өздерінің арасында, сондай-ақ мектептің, үй мен қоғамның арасында қолайлы ахуал орнатылатын болады.
Білім беру жүйесінде денсаулықты нығайтуға және аурудың алдын алуға медициналық-гигиеналық, әлеуметтік-психологиялық тәсілдерді дамыту мен жетілдіру, денсаулыққа қатысты дұрыс шешім қабылдау және қоршаған ортаны сақтау үшін қажетті дағдыларға үйрету оқушылардың өз денсаулығына деген жауапкершілік сезімін қалыптастырып, оқушылардың барынша көп физикалық, психикалық және әлеуметтік әлеуетін іске асыру үшін мүмкіндік тудырады.
Жұмыс және оқу кезінде үй-жайларды, ойын алаңдарын тиісінше жоспарлау, тиісті жабдықтармен жарақтандыру, тиісті қауіпсіздік шараларымен қамтамасыз ету және дұрыс тамақтануды ұйымдастыру туралы ұйымдастырушылық және түсіндіру іс-шараларын өткізу арқылы денсаулыққа қолайлы қоршаған орта құру, бұл СӨСҚ-ға және оқушылар мен мектеп қызметкерлері үшін СӨС сүруге арналған тұтасымен бірқатар практикалық мүмкіндіктер құруға ықпал етеді.
Физикалық ортаны сақтауға, оқушының және бүкіл қауымдастықтың денсаулығын нығайтуға, салауатты өмір салтына, мектеп медицинасының қызметін регламенттейтін нормативтік-құқықтық құжаттарды әзірлеу және жетілдіру, оның қызметінің мониторингі жүйесін құру және бағалау жолымен валеологиялық сауаттылыққа уәждемені қалыптастыруға бағытталған мектеп медицинасы қызметінің тұтас жүйесін құру және дамыту шаралары қабылданатын болады.
«Валеология» мен «Денсаулық және өмірлік дағдылар» бағдарламалары біріктірілетін болады, темекі шегу, маскүнемдік, нашақорлық, ұрпақты болу денсаулығы, ЖЖБЖ, АҚТҚ/ЖҚТБ-ның алдын алу жөніндегі оқу-әдістемелік кешендері әзірленіп, таратылатын және енгізілетін болады.
Оқушылардың және жасөспірімдердің денсаулығын сақтау және нығайту мәселелері бойынша, сондай-ақ «Денсаулық сақтауды нығайтуға ықпал ететін мектептер», «Салауатты университеттер» деген ДДҰ жобаларының желісін дамыту бойынша орташа медицина қызметкерлері - дәрігерлердің, орта медицина қызметкерлерінің, мектеп медицинасы (мектеп медициналық және жасөспірімдерге арналған кабинеттердің) мамандарының біліктілігін арттыру жөніндегі іс-шаралар жалғасатын болады.
3) медициналық бағдарламалардың мазмұнды бөлігін (проблеманың өзектілігін ескере отырып, медициналық бағдарламалардың тақырыптарын айқындау, медицина өкілдерімен бірлесіп, бағдарламалар мен мақалалар әзірлеу, сондай-ақ денсаулық сақтау, мәдениет, спорт, көрнекті білім қайраткерлерінің бағдарламаларына қатыстыру) күшейту үшін медицина қызметкерлерінің және журналистердің топтасуын күшейту, медициналық теле- және радио бағдарламаларын шығаруға мемлекеттік тапсырысты ұлғайту арқылы салауатты өмір салтын насихаттауда БАҚ-тың рөлін арттыру. Медициналық бағдарламаларды барынша қолайлы уақытта (жұмыс күндері кешкі уақытта, сенбі және жексенбі күндері таңертеңгі уақытта) көрсету жүзеге асырылатын болады.
БАҚ-пен істелетін жұмыстың сапасын күшейту мен арттыру үшін БАҚ-та салауатты өмір салтының түрлі аспектілерін жариялау сапасын арттыру жөніндегі іс-шаралар жалғасатын болады;
4) салауатты өмір салты мен адамды қоршаған ортаның байланысын күшейту экологиялық стандарттарды және нормативтерді, қоршаған ортаны қорғау жөніндегі заңнаманы сақтау үшін бар мүмкіндіктерді пайдалану арқылы қалыптастыру.
Жұмыс орындарында түсіндіру жұмыстары арқылы халық денсаулығына әсер ететін экологиялық қатерлердің алдын алу және оларды азайту бойынша іс-шараларды өткізу әркімнің экологиялық қауіпсіздікке жауаптылығын арттыруға мүмкіндік береді.
Экологиялық туризмді дамыту, оның дамуына инвестициялар бөлетін кәсіпорындарды ынталандыру тетіктерін әзірлеу жөніндегі ұсыныстар әзірленетін болады.
Нәтижелілік индикаторының мониторингі бар «Салауатты қалалар», «Салауатты жұмыс орындары», «Салауатты ауылдар», «Денсаулықты нығайтуға ықпал ететін ауруханалар» деген ДДҰ жобаларын дамыту бойынша іс-шаралар жалғасатын болады.
5) Мемлекеттік әлеуметтік тапсырысты ұсына отырып, салауатты өмір салтын қалыптастыруда қоғамдық қозғалыстар мен мемлекеттік емес ұйымдардың дамуына белсенді тарту мен ынталандыру және корпоративтік әлеуметтік жауаптылығын арттыру үшін бизнес-қауымдастықтардың қаражатын тарту арқылы салауатты өмір салтын қалыптастыруға үкіметтік емес ұйымдар мен бизнес-қауымдастықтардың қатысуы.
Жұмыс берушілердің СӨСҚ көмек көрсету жағдайларын жасау және салауатты өмір салтын ұстанатын қызметкерлерді ынталандыру жөніндегі шаралар әзірленетін және енгізілетін болады.
6) халықтың денсаулығын сақтауға және нығайтуға, оларға сараптама жүргізуге бағытталған нормативтік құқықтық актілер мен ұсыныстарды әзірлеу арқылы салауатты өмір салтын қалыптастыру үшін құқықтық ортаны қамтамасыз ету.
Салауатты өмір салтын қалыптастыру жөніндегі қазіргі заманғы саясат тұрғысынан қолданыстағы заңнаманың мониторингі жүзеге асырылып әрі өмір салтымен және адам құқықтарымен байланысты халықтың денсаулығын сақтау саласындағы қолданыстағы Қазақстан Республикасының нормативтік құқықтық актілеріне өзгерістер мен толықтырулар енгізу жөніндегі, сондай-ақ волонтерлік қозғалысы мәселесі бойынша ұсыныстар әзірленетін болады;
7) Қазақстан Республикасында салауатты өмір салтын қалыптастыру жүйесін дамытудың теориялық негіздері мен ұйымдастыру қағидаттарын әзірлеу арқылы салауатты өмір салтын қалыптастыруды ғылыми сүйемелдеу.
Ғылыми-техникалық бағдарламаларды өткізу халық денсаулығының детерминантын зерттеуге және қазіргі жағдайда аурулардың пайда болу мен дамуының қауіп-қатер факторларына бағалау жүргізуге, жеке және популяциялық деңгейлерде салауатты өмір салтын қалыптастырудың инновациялық технологияларын әзірлеу және енгізуге, сондай-ақ салауатты өмір салты мамандарының еңбегін нормалауды ғылыми негіздеуге, БМСК ұйымдарын ресурстық және материалдық қамтамасыз етуге мүмкіндік береді.
СӨСҚ процестерінің мониторингі, БМСК, білім және басқа секторлар жүйесіндегі алдын алу бағдарламалары мен алдын алу араласуларының тиімділігін бағалау жалғасуда.
8) салауатты өмір салтын қалыптастыру жүйесін ресурстық және институционалдық қамтамасыз етуді күшейту.
Ішімдікке, темекі шегуге қарсы заңнамаларды сақтау, жүргізілген тексерулердің нәтижелері бойынша мектептегі тамақтануды мәселелері облыстардың, Астана және Алматы қалалары әкімдерінің жанындағы Азаматтардың денсаулығын сақтау жөніндегі үйлестіру кеңестерінде талқыланатын болады.
СӨСҚ саласында қызметін жүзеге асыратын денсаулық сақтау ұйымдарының ұйымдастырушылық-құқықтық түрлері шаруашылықты жүргізу құқығындағы мемлекеттік кәсіпорындар түрінде өзгеретін болады, бұл басқарушылық шешімдерін қабылдауда дербестігін күшейтуге, бәсекелік ортаны дамытуға ықпал етуге және тұтастай барынша сапалы, жетілдірілген және талап етілетін қызметтерді ұсынуды ынталандыруға мүмкіндік береді.
