253. Инкассолық өкiмді орындаған кезде инкассолық өкiмдерді есепке алу журналында оның орындалғаны туралы белгі соғылады.
Инкассолық өкiм толық орындалғаннан кейiн аумақтық қазынашылық бөлiмшесi атқарушы құжаттың түпнұсқасын төлеуге берілетін шоттың көшірмесін қоса бере отырып, екі жұмыс күні ішінде атқарушы құжаттарды орындау жөніндегі уәкілетті мемлекеттік органға ілеспе хатпен қайтарады.
254. Аумақтық қазынашылық бөлiмшесiне анықтау және алдын ала тергеу органдарының қаулылары, белгілі бір ақша сомасына тыйым салуды қолдану туралы прокурор санкциялаған атқару өндірісі органдарының қаулылары түскен кезде қазынашылықтың жауапты орындаушысы:
1) мемлекеттік мекеменің кодына:
мемлекеттік мекеменің қызметін ұстау жүзеге асырылатын бюджеттік бағдарлама (кіші бағдарлама) бойынша, мыналар:
жалақы және басқа да ақша, оның ішінде штаттан тыс қызметкерлер бойынша жалақы төлемдерi;
Қазақстан Республикасының заңнамалық актілерінде көзделген ақшалай өтемақы;
салық және бюджетке төленетiн басқа да мiндеттi төлемдер;
жәрдемақы, алимент;
мiндеттi зейнетақы жарналары;
әлеуметтiк аударымдар;
банк қызметтеріне ақы төлеу бойынша төлемдер мен ақша аударымдары жүзеге асырылатын БСК-сін қоспағанда, инкассолық өкім қойылған жағдайда;
2) ақылы қызмет ҚБШ-ына немесе демеушілік, қайырымдылық көмек ҚБШ-ына атқарушы құжаттың сомасына инкассолық өкім қойылған жағдайда;
Тыйым салу қолданған кезде талап - арыздарды қамтамасыз етуге ақшаның сомасы талап - арыздың сомасы мен сот шешімдерін, үкімдерін, анықтамалары мен қаулыларын орындаумен байланысты мемлекеттік баж және шығыстардың мөлшерінен аспауға тиіс. Атқару өндірісі органдары тұтқындау жазасын қолданған кезде атқарушы құжаттың орындалуын қамтамасыз етуге ақшаның сомасы мен тұтқындау жазасы қолданылған мүліктің құны өндіріп алушыға берілетін соманы өтеу үшін қажетті, сондай-ақ атқарушы құжатты орындау процесінде борышкерге қолданылған айыппұлдар және атқарушы құжатты орындау бойынша шығыстардың сомасынан аспауға тиіс.
255. Аумақтық қазынашылық бөлiмшесiне салық қызметi (кеден) органдарының мемлекеттік мекеменің коды бойынша, ақылы қызметтер мен демеушiлiк, қайырымдылық көмек шоттары бойынша шығыс операцияларын тоқтата тұру туралы бірінші басшының қолы қойылған, (кеден) органдарының мөрімен расталған, прокурор санкциялаған өкімдері келіп түскен кезде аумақтық қазынашылық бөлiмшесiнiң жауапты орындаушысы барлық шығыс операцияларын тоқтатады.
Салық қызметi (кеден) органдарының өкiмдерi бойынша өндіріп алу Қазақстан Республикасының заңнамалық актілерінде көзделген негіздемелер бойынша ғана қаралуы мүмкін.
Салық органы тиым салуды қолдану немесе шығыс операцияларын тоқтата тұру туралы өкімді кері қайтару және (немесе) бас тартуды салық төлеуші (салық агенті) салықтық берешек мiндеттi зейнетақы жарналары мен әлеуметтiк аударымдар бойынша берешек сомаларын өтегеннен кейінгі бір жұмыс күнінен кешіктірмей жүзеге асырады.
256. Аумақтық қазынашылық органына инкассолық өкім ұсынылғанға дейін мемлекеттік мекеменің атқарушы құжатты өздігінен орындауы олар белгілеген мерзімдерде төлеуге берілген шоттың негізінде 155 «Атқарушы құжаттарды орындау» ерекшелігі бойынша жүзеге асырылады.
32-тарау. Трансферттердi төмен тұрған бюджеттерге аудару тәртібі
257. Қазақстан Республикасының Үкіметі және облыстың жергiлiктi атқарушы органы резервінің қаражаты есебiнен трансферттердi қоса алғанда, дамуға арналған нысаналы трансферттер бойынша негізділігін растайтын құжаттар болған кезде дамуға арналған нысаналы трансферттер бойынша төмен тұрған бюджеттің бюджеттік бағдарламалар әкімшісіне төленеді, төмен тұрған бюджеттерге трансферттердi белгіленген тәттіппен бекітілген төлемдер бойынша тиiстi бюджеттік бағдарламаны (кіші бағдарламаны) қаржыландырудың жеке жоспары бюджеттік бағдарламаларды (кіші бағдарламаларды) жүзеге асыруға қабылданған нормативтік құқықтық актілері негiзiнде және трансферттердiң жалпы сомасын төмен тұрған бюджеттердiң арасында бөлудi бекiтетiн нормативтiк құқықтық актiлерге сәйкес бюджеттік бағдарлама әкiмшiсi төмен тұрған бюджеттердiң кiрiсiне аударады.
Бюджеттік субвенциялар жоғары тұрған бюджеттерден төмен тұрғандарға республикалық бюджет туралы заңмен және тиісті қаржы жылына арналған жергілікті бюджет туралы мәслихаттың шешімімен бекітілген сомалар шегінде беріледі. Аударуды жоғары тұрған бюджетті атқару жөніндегі уәкілетті орган жоғары тұрған бюджеттің түсімдерін және төлемдер бойынша қаржыландырудың жиынтық жоспарында көзделген сомалар шегінде айдың бірінші он күндігі ішінде жүзеге аырылады.
Трансферттерді аударуды жоғары тұрған бюджетті атқару жөніндегі уәкілетті орган жоғары тұрған бюджеттiң бюджеттік бағдарламалар әкiмшiсi төлем мақсатын көрсету үшiн 02 «Мемлекеттік басқарудың жоғары тұрған органдарынан түсетiн трансферттер» сыныбының 4-санатының ҚР ББС-нiң түсiмдер кодтарын қолдана және дамуға арналған нысаналы ағымдағы трансферттердi және нысаналы трансферттердi әрбiр аудару бойынша төлеуге берiлетiн шоттар көшiрмесiн тиiстi төмен тұрған бюджеттi атқару жөніндегі уәкiлеттi органның қаперне жеткiзе отырып, төлеуге берiлетiн шот негiзiнде жүргiзедi.
258. Нысаналы трансферттерді аудару осы Ереженiң 257-тармағының бірінші абзацында көзделген нормаларды сақтай отырып, жоғары тұрған бюджет бағдарламасы әкімшісі төлеуге берілетін шотты ұсыну негізінде жүргізіледі.
Бюджеттік бағдарламалар әкімшісі нысаналы трансферттерді аумақтық қазынашылық бөлімшесіне аударуға төлеуге берілетін шотты беру негізділігі мен заңдылығын қамтамасыз етеді.
Жоғары тұрған бюджеттен берiлетiн трансферттердiң есебiнен iске асырылатын жергiлiктi бюджеттік бағдарламалар бойынша төмен тұрған бюджет бағдарламалары әкiмшiлерiнiң шығыстары шығыстардың экономикалық сыныптамасының пайдаланылатын ерекшелiгiне байланысты осы Ережеде белгiленген тәртiппен жүзеге асырылады.
259. Нысаналы ағымдағы трансферттер және дамуға арналған нысаналы трансферттер бойынша, оның ішінде бюджеттік инвестициялық жоба бойынша республикалық бюджеттi және жергiлiктi бюджеттердi атқару туралы есептер деректерiнде алшақтықтар болған жағдайда, бюджеттi атқару жөніндегі уәкiлеттi орган заңнамада белгiленген тәртiппен тиiстi бақылау объектiсіндегі есеп деректерiнiң растылығын тексеру үшiн iшкi бақылау жөніндегі уәкiлеттi органға материалдарды бередi.
260. Жалпы сипаттағы трансферттердің үш жылдық көлемін қолдану кезеңінде мемлекеттік органдардың функцияларын мемлекеттік басқарудың төмен тұрған деңгейінен жоғары тұрғанға беруге байланысты шығыстарды арттыруға және (немесе) түсімдерді азайтуға әкеп соқтыратын заңнамалық актілерді қабылдаудан туындайтын жоғары тұрған бюджеттердің залалын өтеген жағдайда, төмен тұрған бюджеттен нысаналы ағымдағы трансферттерді аударуды белгіленген тәртіппен бекітілген төлемдер бойынша тиісті бюджеттік бағдарламаны қаржыландырудың жеке жоспары негізінде төмен тұрған бюджеттің бюджеттік бағдарламалар әкiмшiсі жүзеге асырады.
Трансферттердi аударуды төмен тұрған бюджетті атқару жөніндегі уәкілеты органы төмен тұрған бюджеттiң бюджеттік бағдарламалар әкiмшiсi төлем мақсатын көрсету үшiн 01 «Мемлекеттік басқарудың төмен тұрған органдарынан түсетiн трансферттер» сыныбының 4-санатының ҚР ББС-нiң түсiмдер кодтарын қолдана және дамуға арналған нысаналы ағымдағы трансферттердi және нысаналы трансферттердi әрбiр аудару бойынша төлеуге берiлетiн шоттар көшiрмесiн тиiстi төмен тұрған бюджеттi атқару жөніндегі уәкiлеттi органның қаперіне жеткiзе отырып, төлеуге берiлетiн шот негiзiнде жүргiзедi.
261. Мақсатқа сай пайдаланылмаған нысаналы трансферттер сомасы осы трансферттерді бөлген жоғары тұрған бюджетке мемлекеттік қаржылық бақылау актісіне қол қойылғаннан кейін міндетті түрде қайтаруға жатады.
Төмен тұрған бюджеттің жоғары тұрған бюджеттен алынған нысаналы трансферттердiң мақсатқа сай пайдаланылмаған сомаларын бюджетті түзету жолымен тиісті нысаналы трансферттер бойынша ағымдағы қаржы жылының нысаналы трансферттері бойынша да, өткен жылдың нысаналы трансферттері бойынша да жоспарлы тағайындалымын азайту есебінен өтеу жүргізіледі. Егер тиісті жергілікті бюджеттерде өткен жылдар үшін нысаналы трансферттер көзделмесе, онда тиісті қаржы жылына арналған жергілікті бюджеттерді нақтылаған кезде жергілікті атқарушы органдар жоғарыда тұрған бюджеттен алынған нысаналы трансферттердің мақсатқа сай пайдаланылмаған сомасын өтеу үшін қаражат көздейді.
Бұл сомалар жоғары тұрған бюджет үшiн нысаналы трансферттердi өтеу сомалары, ал төмен тұрған бюджет үшiн - нысаналы трансферттердi өтеу жөніндегі шығыстардың сомалары болып табылады.
Қаражат аударуды төмен тұрған бюджеттi атқару жөніндегі уәкілетті орган ҚР ББС бюджет шығыстары функционалдық сыныптамасының тиісті бюджеттік бағдарламасы бойынша төлеуге берiлетiн шот және мемлекеттік қаржы бақылау органының ұсынымы негізінде жүргізеді. Бұл ретте төмен тұрған бюджеттi атқару жөніндегі уәкілетті орган мақсатқа сай пайдаланылмаған қаражатты әрбiр қайтару бойынша төлеуге берiлетiн шоттың көшiрмесiн және мақсатқа сай пайдаланбауға жол берiлген шығыстардың бюджеттік сыныптамасының кодтарын қамтитын негiздеме хаттың көшiрмесiн үш күндiк мерзiмде жоғары тұрған бюджетке жеткізеді.
262. Қазақстан Республикасы Үкіметінің резервінен және облыстың жергілікті атқарушы органдары резервінен бөлінген нысаналы трансферттерді қоспағанда қаржы жылы iшiнде пайдаланылмаған (жете пайдаланылмаған) республикалық бюджеттен және облыстық бюджеттен бөлінген нысаналы трансферттердiң сомалары келесі қаржы жылында оларды мақсатқа сай сақтай отырып пайдаланылылуы (жете пайдаланылуы) мүмкін.
Қазақстан Республикасы Үкіметінің немесе жергілікті атқарушы органның шешімі бойынша пайдалануға рұқсат берген қаржы жылы iшiнде пайдалануға (жете пайдалануға) нысаналы трансферттердiң сомалары оларды бөлген жоғары тұрған бюджетке дамуға арналған нысаналы трасферттерді пайдаланған кезде пайда болған және жоғары тұрған бюджеттен дамуға арналған нысаналы трансферттредің есебінен жергілікті инвестициялық жобаларды іске асыруды жүргізетін бюджеттік бағдарламалардың нәтижелері көрсеткіштерін жақсартуға тиісті жергілікті атқарушы органдарға бағытталған үнем сомасын қоспағанда, тиісті бюджетті түзету және тиісті бюджеттік бағдарлама бойынша жоғары тұрған бюджеттің бюджеттік бағдарламалар әкімшісінің кассалық шығыстарын қалпына келтіру жолымен ағымдағы қаржы жылының 20 желтоқсанынан кешіктірмей қайтаруға жатады.
Жоғары тұрған бюджеттiң бөлiнетiн бюджеттік бағдарламасы әкiмшiсiнiң кассалық шығыстарын қалпына келтiру жөніндегі төмен тұрған бюджеттің шығыстары нысаналы трансферттердi қайтару жөніндегі шығыстары болып табылады, олар бюджеттi түзету негiзiнде қаржыландырудың жиынтық жоспарларына енгiзiлген өзгерістерге сәйкес жүзеге асырылады.
Қаражатты қалпына келтiру мен аударуды бөлiнген қаражатты пайдаланбау (жете пайдаланбау) себептерiн қамтитын негiздеме хатты қоса бере отырып және нысаналы трансферттердi әрбiр қайтару жөнiнде төлеуге берiлетiн шоттың көшiрмесiн және негiздеме хаттың көшiрмесiн жоғары тұрған бюджетке дейiн жеткiзе отырып, ҚР ББС бюджет шығыстары функционалдық сыныптамасының тиісті бюджеттік бағдарламасы бойынша төлеуге берiлетiн шот негiзiнде төмен тұрған бюджеттiң бюджеттік бағдарлама әкiмшiсi жүргiзедi.
263. Бөлiнген бюджеттік бағдарламалар қаражаты есебінен алынған, бюджеттік бағдарламалар әкiмшiлерi жете пайдаланбаған бюджет қаражаты Қазақстан Республикасы Үкіметінің немесе жергілікті атқарушы органның тиісті резервінен қаражат бөлу туралы қаулысына өзгерістер енгізу туралы Қазақстан Республикасы Үкіметінiң немесе жергiлiктi атқарушы органның белгiленген тәртiппен әзiрленген және қабылданған қаулысының негiзiнде Қазақстан Республикасы Үкіметінiң немесе жергiлiктi атқарушы органның тиісті резервін қалпына келтіру жолымен резервке кейіннен Түсімдердің және төлемдер бойынша қаржыландырудың жиынтық жоспарына, міндеттемелер бойынша қаржыландырудың жиынтық жоспарына, сондай-ақ міндеттемелер мен төлемдер бойынша қаржыландырудың жеке жоспарларына кейіннен өзгерістер енгiзе отырып қайта бағытталады.
Бұл ретте, бюджеттік бағдарламалар әкiмшiсiнiң жазбаша өтiнiшi (еркiн нысанда) негiзiнде аумақтық қазынашылық бөлiмшелерi бөлiнетiн бюджеттік бағдарламалар есебiнен iс-шаралар өткізуге байланысты шығыстарға тақауын қояды.
264. Төмен тұрған бюджеттер ағымдағы қаржы жылы жоғары тұрған бюджеттiң бөлiнетiн бюджеттік бағдарламасынан алынған қаражатты жете пайдаланбаған кезде жоғары тұрған бюджеттің бөлінетін бюджеттік бағдарламаның әкімшісі белгіленген тәртіппен Қазақстан Республикасы Үкіметінің немесе Қазақстан Республикасы Үкіметінің немесе жергілікті атқарушы органның тиісті резервтен қаржы бөлу туралы қаулысына өзгерістер мен толықтырулар енгізу туралы жергілікті атқарушы органның қаулыларын әзірлейді. Қазақстан Республикасы Үкіметінің немесе жергілікті атқарушы органның қабылданған қаулысының негізінде мемлекеттік жоспарлау жөніндегі жергілікті уәкілетті орган жергілікті бюжет туралы мәслихаттың шешімін іске асыру туралы жергілікті атқарушы органның қаулысына өзгерістер енгізу жолымен тиісті жергілікті бюджетті түзетуді жүзеге асырады. Бюджетті атқару жөніндегі жергілікті уәкілетті орган жергілікті бюжет туралы мәслихаттың шешімін іске асыру туралы жергілікті атқарушы органның қаулысының негізінде осы Ереженің 5-тарауында белгіленген тәртіппен төлемдер бойынша түсімдердің және қаржыландырудың жиынтық жоспарына, міндеттемелер бойынша қаржыландырудың жиынтық жоспарына өзгерістер енгізеді.
Төмен тұрған бюджеттің бюджетті атқару жөніндегі жергілікті уәкілетті органы жоғары тұрған бюджеттің бөлінетін бюджеттік бағдарламасы әкімшісінің кассалық шығыстарын қалпына келтіру жолымен бюджет түсімдері сыныптамасының тиісті кодынан жоғары тұрған бюджеттің бөлінетін бюджеттік бағдарламасынан алынған пайдаланылмаған қаражатты қайтаруды жүзеге асырады.
33-тарау. Нысаналы трансферттер бойынша
нәтижелер туралы келісімді әзірлеу тәртібі
265. Тәртіп Бюджет кодексіне сәйкес Нысаналы трансферттер бойынша нәтижелер туралы келісімді (бұдан әрі - Келісім) әзірлеуге бірыңғай амалды қамтамасыз ету үшін әзірленді.
266. Келісім:
шешіміне нысаналы трансферттер бөлінетін мақсат пен міндеттерді;
нысаналы трансферттерді пайдалану есебінен қол жеткізілуге тиіс тура және түпкілікті нәтижелер, сондай-ақ, сапа және тиімділігінің көрсеткіштері (нәтиженің көрсеткіштері);
қол жеткізілген тура және түпкілікті нәтижелері туралы төменгі бюджеттің есебін жоғары тұрған бюджеттік бағдарламалар әкімшісіне ұсыну туралы міндеттемелерді қамтитын құжат болып табылады.
267. Келісім осы Ереженің 93-қосымшасына сәйкес ағымдағы қаржы жылының 20 қаңтарынан кешіктірмей:
жоғары тұрған бюджеттік бағдарламалар әкімшісі мен облыс (республикалық маңызы бар қала, астана) әкімінің.
Республикалық бюджеттен облыстық бюджеттерге берілген нысаналы трансферттерді одан әрі бөлген жағдайда, аудандар бюджеттері арасында (облыстық маңызы бар қалалар) облыстық бюджеттік бағдарламалар әкімшісінің басшысы мен аудан әкімі (облыстық маңызы бар қала) арасында жасалады.
268. Келісім әрбір нысаналы трансферттер бойынша жеке жасалады:
Дамытуға арналған нысаналы трансферттер бойынша бірнеше инвестициялық жобалар болған жағдайда - 2, 3 және 4 қосымшаларды инвестициялық жобалар бойынша толтырылады.
Бірнеше нысаналы трансферттер бойынша бір Келісімді жасауға рұқсат беріледі.
269. Келісімді жасаған кезде негізгі жәйттер:
1) Ағымдағы нысаналы трансферттер бойынша немесе дамуға арналған нысаналы трансферттер бойынша Келісім жасасу кезінде 3.2.- тармақта (аудару мерзімі) және 3.3. - тармақта (растайтын құжаттардың тізбесі) нысаналы трансферттің түрін ескерген жөн
2) Келісімге 1-қосымшаны толтыру бойынша:
Осы қосымшада тура және түпкілікті көрсеткіштері, сондай -ақ тиімділік және сапа көрсеткіштері келтіріледі, мұнда
тура нәтиже - орындалатын мемлекеттік функциялар, өкілеттіктер және көзделген бюджеттік қаражат шегінде көрсетілетін мемлекеттік қызметтердің сандық сипаттамасы, оларға жету осы функцияны, өкілеттікті немесе көрсетілетін қызметті жүзеге асыратын ұйымның қызметіне толық байланысты болады;
түпкілікті нәтиже - халықтың тұрмыс деңгейі мен сапасының, әлеуметтік саласының, экономиканың, қоғамдық қауіпсіздіктің және белгілі бір мемлекеттік орган қызметінің, басқа да мемлекеттік органдар қызметінің тікелей нәтижелері қол жеткізуге себепші болған мемлекеттік басқарудың басқа да салаларының (салалары) мақсатқа сай жай-күйі (жай-күйдің өзгеруі).
сапа көрсеткіштері - көрсетілетін мемлекеттік қызметтің оны алушылар күткендей және мемлекеттік қызмет стандартына сәйкестік дәрежесін көрсететін көрсеткіштер.
тиімділік көрсеткіштері - бекітілген бюджет қаражатының көлемін пайдалана отырып ең үздік тікелей нәтижеге қол жеткізуді немесе бюджет қаражатының ең аз көлемін пайдалана отырып тікелей нәтижеге қол жеткізуді көрсететін көрсеткіштер.
3) Келісімге 2-қосымшаны толтыру бойынша:
Осы қосымшада нысаналы трансферттердің ай бойынша бөлінуі келтірілген, осы ретте ай бойынша бөлу жоғарыда тұрған бюджеттің төлемдері бойынша түсімдердің жоспары мен қаржыландырудың жеке жоспарына, төменде тұрған бюджеттік төлемдері бойынша қаржыландырудың жеке жоспарына сәйкес болуы тиіс.
4) Келісімнің 3-қосымшасын толтыру бойынша:
Нәтиже көрсеткіштерінің жетістіктері туралы аралық есепте тікелей және түпкілікті нәтижелердің іс жүзіндегі жетістіктері, сапа және тиімділік көрсеткіштері, нәтиже көрсеткіштерінің осы кезеңіне жоспарланған қол жетпеу себептері көрсетілген белгілі бір уақыт кезеңі үшін нысаналы трансферттер сомасының игерілгені туралы деректер келтірілген.
5) Келісімнің 4-қосымшасын толтыру бойынша:
Нәтиже көрсеткіштерінің жетістіктері туралы қорытынды есепте тікелей және түпкілікті нәтижелердің іс жүзіндегі жетістіктері туралы, сапа мен тиімділік көрсеткіштері, осы кезең үшін жоспарланған нәтижелердің көрсеткіштеріне қол жетпеуді себебі көрсете отырып, ағымдағы қаржылық жыл үшін нысаналы трансферттердің сомасын игеру туралы деректер келтірілген.
6) Келісімде заңнамаға қайшы келмейтін нысаналы трансферттін түрі мен бағытына байланысты басқа да өзіне тән жағдайлар (міндеттер, құқықтар, жауапкершілік, Келісімге өзгерістер енгізудің жағдайлары) да көзделуі мүмкін.
34-тарау. Республикалық және жергiлiктi бюджеттерден
бюджеттік субсидиялар төлеу тәртібі
270. Бюджеттік субсидиялар тиiстi қаржы жылына арналған республикалық бюджет туралы заңда және жергiлiктi атқарушы органның немесе жергiлiктi бюджет туралы мәслихаттар шешiмiнде, Қазақстан Республикасы Үкіметінiң тиiстi қаржы жылына арналған республикалық бюджет туралы заңын немесе тиiстi қаржы жылына арналған жергiлiктi бюджет туралы мәслихат шешiмiн iске асыру туралы қаулысымен анықталған сомалар шеңберiнде берiледi.
271. Бюджеттік субсидиялар төлеу үшiн оларды алушылар бюджеттік бағдарлама әкiмшiсiне олардың бюджеттен өтеудi талап ететiн шығындарды жүзеге асырғанын растайтын құжаттар ұсынады. Бюджеттік бағдарлама әкiмшiсi оларды қарағаннан кейiн Қазақстан Республикасы Үкіметінiң немесе жергiлiктi атқарушы органдардың шешiмдерiнде көзделген тәртiппен және нысанда бюджеттік субсидия беру жүзеге асырылған әр бюджеттік бағдарлама бойынша бюджеттік субсидиялардың жүзеге асырылуы тиіс бюджеттік бағдарлама бойынша бюджеттік субсидияларды төлеуге арналған қорытындыны және төлеуге берiлетiн шоттарды қалыптастырады.
272. Бюджеттік бағдарлама әкiмшiсi тиесiлi бюджеттік субсидияларды олардың тiкелей алушыларына аудару үшiн аумақтық қазынашылық бөлiмшесiне осы Ереженiң 75-қосымшасына сәйкес нысан бойынша төлеуге берiлетiн шоттардың тiзiлiмiн және төлеуге берiлетiн шоттарды екi данада ұсынады. Бюджеттік бағдарлама әкiмшiсi бюджеттік субсидияларды төлеудiң негiздiлiгiн, бюджеттік субсидия алушыларға тиесiлi соманы есептеудiң дұрыстығын, бюджеттік субсидияларды аудару yшiн аумақтық қазынашылық бөлiмшесiне ұсынылған төлеуге берiлетiн шоттарды толтырудың растығын және толықтығын қамтамасыз етедi.
35-тарау. Шетел валютасын айырбастау және аудару тәртібі
273. Мемлекеттік мекемелер Қазақстан Республикасының резиденттері еместердің пайдасына шетел валютасында төлемдер мен ақша аударуды жүргiзу үшiн шетел валютасын айырбастау және аудару жөніндегі операцияларды жүзеге асырылады.
274. Валюта түрлерi бойынша ҚР ҰБ белгiлеген лимиттен асып түспейтiн сомаға валюта түрлерi бойынша шетел валютасын сатып алу жөніндегі операция алдын ала мәлiмет ұсынбастан жүзеге асырылады.
275.Валюта түрлері бойынша ҚР ҰБ белгілеген шетел валютасының лимитінен артатын сомаға валюта түрлері бойынша шетел валюталарын қайта айырбастау аумақтық бөлімшелеріне мемлекетік мекеме қайта айырбастау күніне дейінгі келесі мерзімде:
валюта түрі мен сомасын көрсете отырып, шетел валютасын сатып алу қажеттілігі туралы хатты ұсынғаннан кейін;
АҚШ доллары, еуро, ағылшын фунт стерлингi, швейцария франкiсi, ресей рублi - үш күн ішінде;
жапония иенасы - бес күн ішінде жүзеге асырылады.
276. Аумақтық бөлiмшесi сол күні бюджетті атқару жөніндегі орталық уәкілетті органға электрондық түрде хат жібереді, ол, өз кезегiнде, оларды Ұлттық Банкке дейiн жеткізеді.
277. Мемлекеттік мекеме шетел валютасында төлемдер мен ақша аударымын жүзеге асыру үшiн мемлекеттік мекеме осы Ереженің 94-қосымшасына сәйкес аумақтық қазынашылық бөлiмшесiне төлеуге берiлетiн шотты және шетел валютасын айырбастауға арналған өтiнiмдi ұсынады. Шетел валютасын айырбастауға арналған өтiнiмдi мемлекеттік мекеме жасайды және екi данада сағат 10-00-ге дейін бередi.
278. Төлеуге берiлетiн шотта және/немесе шетел валютасын айырбастауға арналған өтiнiмде қателер мен түзетулер болған, оларда қандай да бiр талап қажетті деректемелер болмаған, қойылған қойылған қолдардың және/немесе мөр бедерiнің, қойылған қолдар және мөр бедерiнiң үлгiлерi бар құжатқа сәйкес келмеген, төлеуге берiлетiн шот сомасының шетел валютасын айырбастауға арналған өтiнiм сомасына сәйкес келмеген кезде, төлеуге берiлетiн шот және шетел валютасын айырбастауға арналған өтiнiм қайтару себептерi көрсетiлiп орындамастан мемлекеттік мекемеге қайтарылады.
279. Бағамдық айырмашылыққа байланысты қажеттi төлем сомасы тiркелген азаматтық-құқықтық мәмiле сомасынан асып түскен жағдайда, аумақтық бөлiмшесi қазынашылық жүйеге енгiзiлген төлеуге берiлетiн шотты және шетел валютасын айырбастауға арналған өтiнiмдi бекiтпейдi, ол туралы мемлекеттік мекемені хабардар етеді.
280. Мемлекеттік мекеме сол күнi аумақтық қазынашылық бөлiмшесiне бағамдық айырма сомасына: мiндеттемелердi тiркеуге арналған өтiнiм, шетел валютасын айырбастауға арналған өтiнiм және төлеуге берiлетiн шот бередi.
281. Шығыстардың бюджеттік сыныптамасының тиiстi коды бойынша мiндеттемелер жөніндегі бюджеттік бағдарламаларды (кiшi бағдарламаларды) қаржыландырудың жеке жоспары бойынша қабылданбаған міндетемелер сомасы болған жағдайда аумақтық қазынашылық бөлiмшесi бағамдық айырма сомасына мiндеттемелердi тiркеуге арналған өтiнiм деректерiн ҚБАЖ-ға енгізудi және хабарлама қалыптастыруды жүзеге асырады.
282. Бағамдық айырма сомасына төлемдер бойынша берiлген бюджеттік бағдарламаларды (кiшi бағдарламаларды) қаржыландыру жоспарының пайдаланылмаған қалдықтары болмаған жағдайда - бұрын қазынашылық жүйеге енгiзiлген төлеуге берiлетiн шот пен шетел валютасын айырбастауға арналған өтiнiм қабылданбайды және төлеуге берiлетiн шотпен, шетел валютасын айырбастауға арналған өтiнiммен және бағамдық айырма сомасына арналған мiндеттемелермен бiрге орындамай мемлекеттік мекемеге қайтарылады.
283. ҚР ҰБ-дан электрондық түрдегi төлем құжаттары мен шетел валютасындағы кореспонденттік шоттары бойынша үзiндi алғаннан кейiн бюджеттi атқару жөніндегі орталық уәкiлеттi орган үзiндiнi алған күнi мемлекеттік мекеменiң шетел валютасындағы тиiстi шоттарына шетел валютасының түрлерi бойынша оны есептеу жүргiзедi.
284. Аумақтық бөлiмшесi мемлекеттік мекеменiң шетел валютасындағы тиiстi шоттарына шетел валютасын оның түрлерi бойынша бюджеттік атқару жөніндегі орталық уәкілетт орган есептеген күнi мемлекеттік мекеменiң шетел валютасындағы шоттары бойынша үзiндiлерді қалыптастырады және мемлекеттік мекемеге береді, сондай-ақ аумақтық қазынашылық бөлiмшесiнiң жауапты орындаушысының белгiсi соғылған бар және мемлекеттік мекеме ақша аударуға өтiнiшті ұсынуы үшiн шетел валютасындағы шоттарға ақша есептелген күнiн көрсетiп, шетел валютасын айырбастауға арналған өтiнiмнiң бiр данасы қайтарылады. Шетел валютасын айырбастауға арналған өтiнiмнiң екiншi данасы қазынашылықтың аумақтық бөлiмшесiнде қалады.
285. Ақшаны мемлекеттік мекеме шетел валютасындағы ақшаны аударуды жүзеге асыру үшін аумақтық бөлімшесіне шетел валютасын алушыны енгізуге арналған өтiнiш осы Ереженің 60-қосымшасына сәйкес нысан бойынша екi данада үсынады.
286. Аумақтық бөлiмшесi шетел валютасында ақшаны аударуға арналған өтiнiштi тексергеннен кейiн деректерді ҚБАЖ-ға енгiзедi.
