65-бап. Кедендік баждарды, салықтарды төлеу жөніндегі міндеттерді орындауды қамтамасыз етудің мөлшерін айқындау
1. Осы Кодекстің осы бабына, 146-бабына және 287-бабының 4-тармағына сәйкес кедендік баждарды, салықтарды төлеу жөніндегі міндеттерді орындауды өзге мөлшерде қамтамасыз етілетін жағдайларды қоспағанда, кедендік баждарды, салықтарды төлеу жөніндегі міндеттерді орындауды қамтамасыз ету мөлшері тауарлар ішкі тұтыну үшін шығару кедендік рәсіміне немесе тиісінше, кедендік әкелу баждарын төлеу жөніндегі тарифтік преференциялар мен жеңілдіктерді, кедендік әкету баждарын төлеу жөніндегі салықтар мен жеңілдіктерді қолданбай, кеден органы тауарларды шығаруды жүргізетін мүше мемлекетте экспорт кедендік рәсімімен орналастыру кезінде төленуі тиіс болатын кедендік баждардың, салықтардың сомасы негізге алына отырып, айқындалады.
2. Мүше мемлекеттердің заңнамасында кедендік баждарды, салықтарды төлеу жөніндегі міндеттерді орындауды қамтамасыз етудің мөлшеріне кеден органдарының тауарды шығаруға байланысты кедендік операциялар жасағаны үшін төлеуге жататын кедендік алымдар сомаларын енгізу көзделуі мүмкін.
3. Егер кедендік баждарды, салықтарды төлеу жөніндегі міндеттерді орындауды қамтамасыз ету мөлшерін айқындау кезінде тауарлар (сипаттамасы, атауы, саны, шығарылған жері және (немесе) кедендік құны) туралы нақты ақпарат болмауға байланысты кедендік баждарды, салықтарды төлеуге жататын соманы нақты анықтау мүмкін болмаған жағдайда, кедендік баждардың, салықтардың мұндай сомасы тауарлардың құны және (немесе) олардың заттай мәніндегі физикалық сипаттамаларына (саны, салмағы, көлемі немесе басқа сипаттамалары), пайдалану тәртібін Комиссия айқындайтын қолда бар мәліметтердің негізінде айқындалуы мүмкін кедендік баждар, салықтар мөлшерлемесінің ең үлкен шамасына негізделе отырып, айқындалады.
4. Осы Кодекстің 121 және 122-баптарында көзделген ерекшеліктері бар тауарларды шығару кезінде кедендік баждарды, салықтарды төлеу жөніндегі міндеттерді орындауды қамтамасыз ету мөлшері осы баптың 3 және 5-тармақтары ескеріле отырып, кедендік бақылау, кедендік сараптама нәтижелері бойынша қосымша төленуге жатуы мүмкін кедендік баждардың, салықтардың сомасы ретінде айқындалады.
5. Осы Кодекстің 121-бабында көзделген ерекшеліктері бар тауарларды шығару кезінде кедендік баждарды, салықтарды төлеу жөніндегі міндеттерді орындауды қамтамасыз етудің мөлшерін анықтау үшін тауардың кедендік құнына кедендік бақылау жүргізген жағдайда, атап айтқанда:
1) кеден органының билігіндегі класы немесе түрі бірдей тауардың құны туралы ақпарат;
2) егер кеден органының олардың негізділігіне күдігі болса, мәлімделген шегерімдер мен арзандатуларды ескермегенде, тауардың кедендік құны;
3) егер кеден органының мәлімделген қосымша төлемдердің негізділігіне күдігі болса, нақты төленген немесе төленуге жататын бағаға қосымша төлемнің ықтимал шамасын ескере отырып, тауардың кедендік құны пайдаланылуы мүмкін.
6. Осы Кодекстің 120-бабының 13-тармағының 3-тармақшасына сәйкес тауар декларациясы берілгенге дейін тауарды шығару шарты кедендік баждарды, салықтарды төлеу жөніндегі міндеттерді орындауды қамтамасыз етуді беру болып табылған жағдайда, кедендік баждар, салықтар сомасы осындай қамтамасыз ету мөлшерін анықтаған кезде тауар декларациясы берілгенге дейін тауарды шығару туралы өтініштегі және осы баптың 1 және 3-тармақтары ескеріле отырып, осы өтінішпен бірге берілетін құжаттардағы мәліметтерге сүйене отырып, айқындалады.
Оларға сүйене отырып, кедендік баждарды, салықтарды төлеу жөніндегі міндеттерді орындауды қамтамасыз етудің мөлшері айқындалатын кедендік баждардың, салықтардың сомасын айқындау үшін тауар декларациясы берілгенге дейін тауарларды шығару туралы өтініш тіркелген күні қолданыстағы кедендік баждар, салықтар мөлшерлемесі қолданылады.
Егер кедендік баждардың, салықтардың көрсетілген сомасын айқындау үшін шетел валютасын мүше мемлекеттің валютасына қайта есептеу талап етілген жағдайда, мұндай қайта есептеу тауар декларациясы берілгенге дейін тауарларды шығару туралы өтініш тіркелген күні қолданыстағы валюта бағамы бойынша жүргізіледі.
7. Тауарлардың жекелеген түрлеріне қатысты мүше мемлекеттер заңнамасында кедендік баждарды, салықтарды төлеу жөніндегі міндеттерді орындауды қамтамасыз етудің тіркелген мөлшерлері осы баптың 1-3-тармақтарында көзделген талаптар ескеріле отырып, ал кедендік транзит кедендік рәсіміне орналастырылатын тауарларға қатысты - осы Кодекстің 146-бабының 2-тармағында көзделген талаптар ескеріле отырып, белгіленуі мүмкін.
10-тарау
Кедендік баждар, салықтар сомаларын және өзге де ақшалай қаражатты (ақшаны) қайтару (есепке жатқызу)
66-бап. Артық төленген немесе артық өндіріліп алынған кедендік баждар, салықтар
Артық төленген немесе артық өндіріліп алынған кедендік баждар, салықтар кедендік баждар, салықтар ретінде төленген немесе өндіріліп алынған, мөлшері осы Кодекске және (немесе) мүше мемлекеттердің заңнамасына сәйкес төленуге жататын кедендік баждардың, салықтардың мөлшерінен асатын және нақты тауарларға қатысты кедендік баждардың, салықтардың нақты түрінде және сомаларында идентификатталған ақшалай қаражат (ақша) болып табылады.
67-бап. Кедендік баждарды, салықтарды төлеу жөніндегі міндеттерді орындауды қамтамасыз ету ретінде төленген кедендік баждардың, салықтардың, аванстық төлемдердің сомаларын, ақшалай қаражат (ақша) сомаларын, сондай-ақ өзге де ақшалай қаражат (ақша) сомаларын қайтару (есепке жатқызу)
1. Осы тарауға сәйкес кедендік баждардың, салықтардың сомалары:
1) кедендік баждар, салықтар осы Кодекстің 66-бабына сәйкес артық төленген немесе артық өндіріліп алынған кедендік баждар, салықтар болып табылған;
2) Одақ туралы шартқа сәйкес айқындалған шоттарға төленген кедендік әкелу баждары нақты тауарларға қатысты кедендік әкелу баждарының сомалары ретінде идентификатталмаған;
3) мүше мемлекеттердің заңнамасында айқындалған шоттарға төленген кедендік әкету баждары, салықтар нақты тауарларға қатысты кедендік әкету баждарының, салықтардың сомалары ретінде идентификатталмаған;
4) егер осы тауарларға қатысты кедендік баждарды, салықтарды төлеу жөніндегі міндет бұрын орындалған болса, кедендік әкелу баждары, салықтары уақытша әкелу (кіруге рұқсат) кедендік рәсіміне орналастырылған тауарларға қатысты кедендік әкелу баждарын, салықтарды ішінара төлеу қолданылған кездегі кезеңде төленген жағдайды қоспағанда, осы мүше мемлекеттің заңнамасына сәйкес тауарлар тәркіленген немесе мүше мемлекеттің меншігіне (кірісіне) айналдырылған;
5) егер кедендік декларация не тауарларға декларация берілгенге дейін тауарларды шығару туралы өтініш тіркелген кезде туындаған кедендік баждарды, салықтарды төлеу жөніндегі міндет бұрын орындалған болса, мәлімделген кедендік рәсімге сәйкес тауарларды шығарудан бас тартылған;
6) егер кедендік декларацияны тіркеу кезінде туындаған кедендік баждарды, салықтарды төлеу жөніндегі міндет бұрын орындалған болса, осы Кодекстің 113-бабына сәйкес кедендік декларация кері қайтарылып алынған және (немесе) осы Кодекстің 118-бабының 4-тармағына сәйкес тауарларды шығарудың күші жойылған;
7) осы Кодекстің 237 және 242-баптарында көзделген жағдайларда;
8) осы Кодекстің 104-бабының 8-тармағына сәйкес мүше мемлекеттердің кедендік реттеу туралы заңнамасында белгіленген кедендік декларациялау ерекшеліктерін қолдануға байланысты мүше мемлекеттердің заңнамасында көзделген жағдайларда;
9) осы Кодексте және (немесе) Одақ шеңберіндегі халықаралық шарттарда көзделген өзге де жағдайларда қайтаруға (есепке жатқызуға) жатады.
2. Артық төленген және (немесе) артық өндіріліп алынған кедендік баждардың, салықтардың сомаларын қайтаруды (есепке жатқызуды) тауар декларациясында мәлімделген есептелген кедендік баждар, салықтар туралы мәліметтерге белгіленген тәртіпте өзгерістер (толықтырулар) енгізілген не кедендік кіріс ордерінде не Комиссия осы Кодекстің 266-бабының 24-тармағына сәйкес айқындаған өзге де кедендік құжаттағы немесе осы Кодекстің 52-бабының 4-тармағында немесе 277-бабының 4-тармағының екінші абзацында көрсетілген кедендік құжаттардағы есептелген кедендік төлемдер туралы мәліметтерге белгіленген тәртіпте түзету енгізілген жағдайда және кедендік баждарды, салықтарды төлеу және (немесе) өндіріп алу жүргізілген мүше мемлекеттің заңнамасында белгіленген артық төленген және (немесе) артық өндіріліп алынған кедендік баждардың, салықтардың сомаларын қайтару (есепке жатқызу) үшін өзге де шарттар сақталған кезде кеден органы жүзеге асырады.
3. Осы баптың 1-тармағының 4 - 9-тармақшаларында көрсетілген жағдайларда кедендік баждардың, салықтардың сомаларын қайтару (есепке жатқызу) кеден органына мүше мемлекеттердің заңнамасына сәйкес белгіленетін тәртіпте кедендік баждардың, салықтардың сомаларын қайтаруға (есепке жатқызуға) әкеп соқтыратын мән-жайдың басталуын растаған кезде және кедендік баждарды, салықтарды төлеу және (немесе) өндіріп алу жүргізілген мүше мемлекеттің заңнамасында белгіленетін кедендік баждардың, салықтардың сомаларын қайтару (есепке жатқызу) үшін өзге де шарттар сақталған кезде жүзеге асырылады.
4. Кедендік әкелу баждарының сомаларын қайтару (есепке жатқызу) Одақ туралы шарттың ережелері ескеріле отырып, осындай кедендік әкелу баждарын төлеу және (немесе) өндіріп алу жүргізілген мүше мемлекеттің заңнамасында белгіленген тәртіппен және мерзімде жүзеге асырылады.
5. Егер Одақ шеңберіндегі халықаралық шарттарда және (немесе) мүше мемлекеттердің екіжақты халықаралық шарттарында өзгеше белгіленбесе, кедендік әкету баждарының сомаларын қайтару (есепке жатқызу) осындай кедендік әкету баждарын төлеу және (немесе) өндіріп алу жүргізілген мүше мемлекеттің заңнамасында белгіленетін тәртіппен және мерзімде жүзеге асырылады.
6. Салықтардың сомаларын қайтару (есепке жатқызу) осындай салықтарды төлеу және (немесе) өндіріп алу жүргізілген мүше мемлекеттің заңнамасында белгіленетін тәртіппен және мерзімде жүзеге асырылады.
7. Аванстық төлемдердің, өзге де ақшалай қаражаттың (ақша) сомаларын қайтару (есепке жатқызу) осындай аванстық төлемдер, өзге ақшалай қаражат төлеу жүргізілген мүше мемлекеттің заңнамасында белгіленетін тәртіппен және мерзімде, жағдайларда жүзеге асырылады.
8. Кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген ақшалай қаражат (ақша) сомасын қайтаруды (есепке жатқызуды) осындай қамтамасыз ету берілген мүше мемлекеттің кеден органы осы мүше мемлекеттің заңнамасында белгіленетін тәртіппен және мерзімде жүзеге асырады.
9. Кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген ақшалай қаражат (ақша) сомаларын қайтару (есепке жатқызу):
1) орындалуы кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген ақшалай қаражатпен (ақшамен) қамтамасыз етілген кедендік баждарды, салықтарды төлеу жөніндегі міндет толық көлемде орындалған, тоқтатылған не туындамаған;
2) кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген ақшалай қаражаттың (ақшаның) орнына кедендік баждарды, салықтарды төлеу жөніндегі міндеттерді басқа тәсілмен орындауды қамтамасыз ету берілген жағдайларда жүзеге асырылады.
10. Төлеушінің белгіленген мерзімде кедендік баждарды, салықтарды, арнайы, демпингке қарсы, өтем баждарын, өсімпұлдарын, пайыздарын төлеу жөніндегі орындалмаған (толықтай немесе ішінара) міндеттері бар болса, кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген кедендік баждардың, салықтардың, аванстық төлемдердің, ақшалай қаражаттың (ақшаның) сомаларын қайтару, сондай-ақ осындай орындалмаған міндеттер мөлшерінде өзге де ақшалай қаражатты (ақшаны) қайтару жүзеге асырылмайды.
Мүше мемлекеттің заңнамасында кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген, сондай-ақ басқа да ақшалай қаражатты (ақшаны) кедендік баждардың, салықтардың, аванстық төлемдердің, ақшалай қаражаттың (ақшаның) сомаларын есепке жатқызу төлеушінің кедендік баждарды, салықтарды, арнайы, демпингке қарсы, өтем баждарын, өсімпұлдарды, пайыздарды, осындай кедендік баждарды, салықтарды, аванстық төлемдерді, ақшалай қаражатты (ақшаны) көрсетілген міндетті орындау есебіне есепке жатқызуды қоспағанда, төлеу жөніндегі міндеттерді белгіленген мерзімде (толық немесе ішінара) орындамағаны бар болса, жүргізілмейтіні белгіленуі мүмкін.
Мүше мемлекеттердің заңнамасында кедендік баждарды, салықтарды төлеу жөніндегі міндеттерді орындауды қамтамасыз ету ретінде енгізілген кедендік баждардың, салықтардың, аванстық төлемдердің, ақшалай қаражаттың (ақшаның) сомаларын қайтару (есепке жатқызу), сондай-ақ өзге де ақшалай қаражатты (ақшаны) қайтару жүргізілмейтін өзге де жағдайлар белгіленуі мүмкін.
11-тарау
Кедендік баждарды, салықтарды өндіріп алу
68-бап. Кедендік баждарды, салықтарды өндіріп алу туралы жалпы ережелер
1. Осы Кодекстің 55-бабының 7-тармағында көрсетілген жағдайларда, кеден органы осы тарауға сәйкес кедендік баждарды, салықтарды өндіріп алу жөніндегі шараларды қабылдайды.
2. Кедендік баждарды, салықтарды өндіріп алу жөніндегі шараларына төлеушінің ақшалай қаражаты (ақшасы) және (немесе) өзге де мүлігі есебінен кедендік баждарды, салықтарды, оның ішінде осы Кодекстің 67 және 76-баптарына сәйкес қайтаруға жататын кедендік баждардың, салықтардың, арнайы, демпингке қарсы, өтем баждарының сомалары және (немесе) аванстық төлемдер есебінен, кедендік баждарды, салықтарды төлеу жөніндегі міндеттерді орындауды қамтамасыз ету, арнайы, демпингке қарсы, өтем баждарын төлеу жөніндегі міндеттерді орындауды қамтамасыз ету, кеден ісі саласында қызметін жүзеге асыратын заңды тұлғаның міндеттерін орындауын қамтамасыз ету, егер осы Кодексте және (немесе) Одақ туралы шартта өзгеше белгіленбесе, уәкілетті экономикалық оператор міндеттерінің орындалуын қамтамасыз ету есебінен өндіріп алу жатады.
3. Осы баптың 2-тармағында көрсетілген шараларға қосымша, мүше мемлекеттердің заңнамасында кедендік баждарды, салықтарды өндіріп алу бойынша өндіріп алуды оларға қатысты кедендік баждар, салықтар төленбеген тауарларға айналдыру сияқты шара және кедендік баждарды, салықтарды өндіріп алу жөніндегі өзге де шаралар белгіленуі мүмкін.
Өндіріп алуды оларға қатысты кедендік баждар, салықтар төленбеген тауарларға айналдыру осындай тауарларға қатысты кедендік баждарды, салықтарды төлеу жөніндегі міндетті тоқтатады.
4. Кедендік баждарды, салықтарды өндіріп алу жөніндегі шаралар:
1) кеден органы төленбеген кедендік баждарды, салықтарды өндіріп алуды жүзеге асыратын мүше мемлекеттің заңнамасында белгіленген кедендік баждарды, салықтарды өндіріп алу мерзімі өтіп кеткен;
2) кедендік баждарды, салықтарды төлеу жөніндегі міндет кедендік баждардың, салықтардың төленуіне байланысты не осы Кодекстің 54-бабының 2-тармағында көзделген өзге де жағдайларға байланысты тоқтатылған;
3) кедендік баждарды, салықтарды төлеу жөніндегі міндет осы баптың 3-тармағына сәйкес белгіленген кедендік баждарды, салықтарды өндіріп алу жөніндегі шара қолданылуына байланысты тоқтатылған;
4) өндіріп алынуы мүмкін болмаған кедендік баждардың, салықтардың сомалары, кеден органы осы сомаларды өндіріп алуды жүзеге асырған мүше мемлекеттің заңнамасына сәйкес өндіріп алуға үмітсіз деп танылған;
5) кедендік әкелу баждарына қатысты Комиссия айқындайтын өзге де жағдайларда;
6) кедендік әкету баждарына, салықтарға қатысты мүше мемлекеттердің заңнамасында белгіленетін өзге де жағдайларда қолданылмайды.
5. Кедендік баждарды, салықтарды өндіріп алу жөніндегі шаралар қылмыс туралы хабарды тексеру барысында алынған немесе тыйым салынған, қылмыстық іс бойынша немесе әкімшілік құқық бұзушылық (әкімшілік іс жүргізу) туралы іс бойынша оларға қатысты қайтару туралы шешім қабылданған және осы Кодекске сәйкес кедендік декларациялауға жататын тауарларға, осындай тауарларды қайтару туралы шешім қабылданғанға дейін туындаған кедендік баждарды төлеу жөніндегі міндеттерге қатысты, осы Кодекстің 98-бабының 4-тармағында көрсетілген шешімдердің біреуі күшіне енетін күннен бастап осындай тауарларды уақытша сақтауға орналастырған немесе оларды кедендік рәсімдердің біріне орналастырған күнге дейінгі мерзім ішінде қабылданбайды.
6. Осы баптың 2 және 3-тармақтарында көрсетілген кедендік баждарды, салықтарды өндіріп aлy жөніндегі шаралар кеден органы кедендік баждарды, салықтарды өндіріп алуды жүзеге асыратын мүше мемлекеттің заңнамасына сәйкес қабылданады.
69-бап. Кедендік баждарды, салықтарды өндіріп алуды жүзеге асыратын кеден органы
1. Кедендік баждарды, салықтарды тауарларды шығару жүргізілген кеден органы немесе осы баптың 2 және 3-тармақтарында көзделген жағдайларды қоспағанда, мүше мемлекеттің кедендік реттеу туралы заңнамасымен айқындалатын тауарларды шығару жүргізілген өзге де кеден органы өндіріп алады.
Одақтың кедендік шекарасы арқылы заңсыз өткізілген тауарларға қатысты, Одақтың кедендік шекарасы арқылы дұрыс емес кедендік декларациялаумен өткізілген тауарларды қоспағанда, кедендік баждарды, салықтарды аумағында Одақтың кедендік шекарасы арқылы тауарларды осындай заңсыз өткізу фактісі анықталған мүше мемлекеттің кеден органы өндіріп алады.
Осы Кодекстің 91-бабының 4-тармағында, 97-бабының 3-тармағында, 103-бабының 4-тармағында, 279-бабының 8-тармағында, 280-бабының 4-тармағында және 288-бабының 4-тармағында көрсетілген мән-жайлар туындаған кезде кедендік баждарды, салықтарды аумағында осындай мән-жайлар анықталған мүше мемлекеттің кеден органы өндіріп алады.
2. Осы Кодекстің 2-тармағының екінші абзацында және 61-бабының 3-тармағында көрсетілген жағдайларда кедендік баждарды, салықтарды, егер осы баптың 3-тармағында өзгеше белгіленбесе, осы Кодекстің 2-тармағының екінші абзацына және 61-бабының 3-тармағына сәйкес кедендік баждарды, салықтарды төлеуге жататын мүше мемлекеттің кеден органы өндіріп алады.
3. Егер кедендік транзит кедендік рәсіміне сәйкес тауарларды тасыған (тасымалдаған) кездегі жағдайларда кедендік баждарды, салықтарды төлеу жөніндегі міндеттерді орындауды қамтамасыз ету берілсе, онда осы Кодекстің 153-бабының 5-тармағында және 309-бабының 3-тармағында көзделген мән-жайлар басталған кезде төленбеген кедендік баждарды, салықтарды кеден органына кедендік баждарды, салықтарды осындай қамтамасыз ету есебінен төлеу жөніндегі міндеттерді орындауды қамтамасыз ету берілген мүше мемлекеттің кедендік реттеу туралы заңнамасына сәйкес айқындалатын кеден органы өндіріп алады.
Егер кедендік транзит кедендік рәсіміне сәйкес тауарларды тасымалдаған (тасыған) кезде осындай тауарлардың декларанты ретінде уәкілетті экономикалық оператор немесе кедендік тасымалдаушы болса, онда осы Кодекстің 153-бабының 5-тармағында және 309-бабының 3-тармағында көзделген мән-жайлар басталған кезде төленбеген кедендік баждарды, салықтарды мүше мемлекеттің кедендік реттеу туралы заңнамасына сәйкес айқындалатын, кедендік транзит кедендік рәсіміне орналастырылған тауарлардың декларанты болатын, уәкілетті экономикалық операторлар тізбесіне не кедендік тасымалдаушы тізбесіне кіретін кеден органы өндіріп алады.
4. Осы баптың 3-тармағына сәйкес кеден органдарының кедендік баждарды, салықтарды өндіріп алған кезде және кедендік баждардың, салықтардың өндіріп алынған сомаларын кедендік баждарды, салықтарды төлеуге жататын мүше мемлекетке аударған кезде өзара іс-қимылы осы Кодекске №1 қосымшада көзделген тәртіпте, көрсетілген қосымшамен реттелмейтін бөлігінде - Комиссия айқындайтын тәртіпте жүзеге асырылады.
70-бап. Кедендік төлемдердің, өсімпұлдардың, пайыздардың сомаларын өндіріп алуға үмітсіз деп тану және оларды есептен шығару
Өндіріп алынуы мүмкін емес болып шыққан кедендік төлемдер, өсімпұлдар, пайыздар сомалары өндіріп алу бойынша үмітсіз деп танылады және кеден органы осы сомаларды өндіріп алуды жүзеге асырған мүше мемлекеттің заңнамасында белгіленген тәртіппен және негізде есептен шығарылады.
12-тарау
Ішкі нарықты қорғау мақсатында қолданылатын арнайы, демпингке қарсы, өтем және өзге де баждар
71-бап. Арнайы, демпингке қарсы, өтем және өзге де баждарды ішкі нарықты қорғау мақсатында қолдану
1. Одақта арнайы, демпингке қарсы, өтем баждары түрінде ішкі нарықты қорғау шаралары енгізілген кезде, мұндай баждар осы Кодексте белгіленген тәртіппен төленуге жатады.
Квота енгізу арқылы арнайы қорғау шаралары белгіленген тауарлар осындай квотадан тыс не осындай квотадан артық көлемде әкелінген жағдайда, Одақта ішкі нарықты қорғау шаралары енгізілген кезде арнайы баж осы Кодексте белгіленген тәртіппен төленуге жатады.
Одақ туралы шарттың 50-бабына сәйкес Одақта баж түрінде ішкі нарықты қорғау шаралары енгізілген кезде, мұндай баждар егер Комиссия өзгеше айқындамаса, арнайы, демпингке қарсы, өтем баждары осы Кодекске сәйкес кедендік баждар, салықтар төлеуші болып табылатын тұлғалар төлеу үшін осы Кодексте көзделген жағдайларда және тәртіппен төленуге жатады.
2. Арнайы, демпингке қарсы, өтем баждарын төлеушілер декларант немесе арнайы, демпингке қарсы немесе өтема баждар, арнайы квота енгізу жолымен ішкі нарықты қорғау шаралары қолданылатын тауарларға қатысты арнайы, демпингке қарсы, өтем баждарды төлеу жөніндегі міндеті туындаған өзге де тұлғалар болып табылады.
3. Арнайы, демпингке қарсы, өтем баждарын есептеу және төлеу, осы тарауда және Одақ туралы шартта көзделген ерекшеліктерін ескере отырып, кедендік әкелу баждарын есептеу және төлеу үшін осы Кодексте белгіленген тәртіппен жүзеге асырылады.
4. Осы тараудың ережелері Одақтың кеден шекарасына әкелінген жеке пайдалануға арналған тауарларға қатысты қолданылмайды.
72-бап. Арнайы, демпингке қарсы, өтем баждарын төлеу жөніндегі міндеттердің туындауы және тоқтатылуы. Арнайы, демпингке қарсы, өтем баждары төленбейтін жағдайлар
1. Арнайы, демпингке қарсы, өтем баждарын төлеу жөніндегі міндет осы баптың 5-тармағына, осы Кодекстің 91, 97, 103, 136, 137, 153, 162, 174, 198, 208, 216, 225, 241, 247, 279, 284 және 295-баптарына сәйкес, сондай-ақ Кодекстің 254-бабына сәйкес Комиссия және Комиссияда көзделген жағдайларда мүше мемлекеттердің заңнамасында айқындалған мән-жайлар басталған кезде туындайды.
2. Арнайы, демпингке қарсы, өтем баждарды төлеу жөніндегі міндеттер:
1) осы Кодекстің 91, 97, 103, 136, 137, 153, 162, 174, 198, 208, 216, 225, 241, 247, 279, 284 және 295-баптарында көзделген мән-жайлар басталған және арнайы, демпингке қарсы, өтем баждарды төлеу жөніндегі міндеттерді тоқтатуға байланысты шарттар сақталған кезде;
2) осы баптың 5-тармағына сәйкес;
3) осы Кодекстің 254-бабына сәйкес Комиссия және Комиссияда көзделген жағдайларда мүше мемлекеттердің заңнамасында айқындалған мән-жайлар басталған кезде;
4) осы Кодекстің 73-бабының 4-тармағында және 77-бабының 3-тармағының екінші абзацында көрсетілген жағдайларда;
5) арнайы, демпингке қарсы, өтем баждарды өндіріп алу жөніндегі шаралар осы Кодекстің 77-бабының 4-тармағының 4-тармақшасына сәйкес мүше мемлекеттердің заңнамасына сәйкес өндіріп алуға үмітсіз деп танылған арнайы, демпингке қарсы, өтем баждар сомаларына қатысты қабылданбаған жағдайда тоқтатылады.
3. Комиссия арнайы, демпингке қарсы, өтем баждарды төлеу жөніндегі міндет бір тауарға қатысты арнайы, демпингке қарсы, өтем баждарды төлеу жөніндегі міндет әртүрлі тұлғаларда, әртүрлі мән-жайларда және (немесе) бірнеше рет туындаған жағдайларда, оның ішінде арнайы, демпингке қарсы, өтем баждарды төлеу жөніндегі міндет бір мүше мемлекетте туындаған, ал арнайы, демпингке қарсы, өтем баждарды төлеу жөніндегі міндет өзге мүше мемлекетте туындаған мән-жайларда тоқтатылатын мән-жайларды айқындауға, сондай-ақ кеден органдарының осындай мән-жайлардың басталуын растау бойынша өзара іс-қимыл тәртібін айқындауға құқылы.
4. Арнайы, демпингке қарсы, өтем баждар:
1) орналастыру шарттары арнайы, демпингке қарсы, өтем баждарды төлеуді көздемейтін, осындай кедендік рәсімнің қолданылуы аяқталғанға немесе тоқтатылғанға дейін және осы тауарлардың осындай кедендік рәсімге сәйкес пайдалану шарттары сақталған кезде, кедендік рәсімге орналастырылатын (орналастырылған) тауарларға қатысты;
2) Осы Кодекстің 272-бабының 4-тармағына және 281-бабының 2-тармағына сәйкес кедендік рәсімге орналастыруға жатпайтын тауарлардың, осы Кодекспен осы тауарлар санаттарына белгіленген пайдалану шарттарын сақтаған кезде, жекелеген тауарлар санатына қатысты төленбейді.
5. Арнайы, демпингке қарсы, өтем баждарды Одақтың кедендік шекарасы арқылы заңсыз өткізген кезде төлеу жөніндегі міндет кедендік әкелу баждарын төлеу жөніндегі міндеттің туындауы, тоқтатылуы мен орындалуы үшін, Одақ шеңберіндегі халықаралық шарттарда көзделген ерекшеліктер ескеріле отырып, осы Кодекстің 56-бабында белгіленген мән-жайлар басталған кезде туындайды, тоқтатылады және орындауға жатады.
Одақтың кедендік шекарасы арқылы тауарларды заңсыз өткізген кезде арнайы, демпингке қарсы, өтем баждар тауарларды ішкі тұтынуға шығару кедендік рәсіміне орналастырылған сияқты мөлшерде төлеуге жатады.
Одақтың кедендік шекарасы арқылы тауарларды заңсыз өткізген кезде арнайы, демпингке қарсы, өтем баждар Одақ шеңберіндегі халықаралық шарттарда көзделген ерекшеліктер ескеріле отырып, осы тарауға сәйкес есептеледі.
Арнайы, демпингке қарсы, өтем баждарды есептеу үшін тауар Одақтың кедендік шекарасын кесіп өткен күнге қолданылатын, ал егер ол күн анықталмаса - Одақтың кедендік шекарасы арқылы тауарларды заңсыз өткізу фактісі анықталған күнге қолданылатын арнайы, демпингке қарсы, өтем баждардың мөлшерлемелері қолданылады.
